“Isulog an Bilog na Pangalasag Hale sa Dios”

“Isulog an bilog na pangalasag hale sa Dios tanganing kamo marigon na makapanindogan tumang sa mga pakana kan Diablo.”​—EFESO 6:11.

1, 2. Sa sadiri nindong tataramon, iladawan an espirituwal na pangalasag na kaipuhan na isulog kan mga Kristiano.

NASA kasagsagan kan kapangyarihan kaiyan an Roma durante kan enot na siglo C.E. Huli sa kosog kan Romanong mga hukbo nakontrol kan siudad an dakulang kabtang kan kinaban kan panahon na idto. Sinabi nin sarong historyador na an hukbong ini iyo “an pinakamapangganang organisasyon militar sa kasaysayan.” An propesyonal na hukbo kan Roma kompuesto nin disiplinadong marhay na mga soldados na nag-agi nin estriktong pagsasanay, alagad an saindang kapangganahan bilang epektibong parapakilaban na hukbo nakadepende man sa saindang pangalasag. Ginamit ni apostol Pablo an pangalasag nin sarong Romanong soldados sa pag-ilustrar kan espirituwal na kasangkapan na kaipuhan kan mga Kristiano tanganing manggana sa paglaban tumang sa Diablo.

² Manonompongan niato an paglaladawan kan espirituwal na kasangkapan na ini sa Efeso 6:14-17. Si Pablo nagsurat: “Manindogan kamo nin marigon, na an saindong habayan nahahagkosan nin katotoohan, asin sulot an takop sa daghan na katanosan, asin an saindong bitis nasasapinan kan kasangkapan kan maogmang bareta nin katoninongan. Orog sa gabos, gamiton an dakulang kalasag nin pagtubod, na huli kaiyan masisigbo nindo an gabos na naglalaad na mga bosog kan maraot. Siring man, akoa nindo an takop sa payo na kaligtasan, asin an espada kan espiritu, arin na baga, an tataramon nin Dios.” Kun mamansayon sa literal na paagi, an pangalasag na ilinadawan ni Pablo nagtatao nin darudakulang proteksion sa Romanong soldados. Dangan, may kapot man siang espada, an saiyang pangenot na armas para sa indibiduwal na pakikilaban.

3. Taano ta maninigo niatong kuyogon an mga instruksion ni Jesu-Cristo asin sunodon an saiyang halimbawa?

³ Apuera sa kasangkapan asin pagsasanay, an kapangganahan kan Romanong hukbo nakadepende sa pagkuyog kan mga soldados sa saindang komandante. Kaagid kaiyan, dapat na kuyogon kan mga Kristiano si Jesu-Cristo, na ilinaladawan kan Biblia bilang “komandante sa mga nasyon.” (Isaias 55:4) Sia man an “payo kan kongregasyon.” (Efeso 5:23) Tinatawan kita ni Jesus nin mga instruksion para sa satong espirituwal na pakikilaban asin nagtatao sia nin sangkap na halimbawa kun paano isusulog an espirituwal na pangalasag. (1 Pedro 2:21) Mantang an arog-Cristong personalidad nakakaagid na marhay sa satong espirituwal na pangalasag, an Kasuratan nagsasadol sa sato na magkaigwa kan kaisipan ni Cristo. (1 Pedro 4:1) Kun siring, mantang sinisiyasat niato an lambang kabtang kan satong  espirituwal na pangalasag, gagamiton niato an halimbawa ni Jesus tanganing ipaheling an importansia asin pagigin epektibo kaiyan.

Pagprotehir sa Habayan, Daghan, Asin Bitis

4. Paano nakatabang an hagkos sa pangalasag nin sarong soldados, asin sa ano iyan naglaladawan?

⁴ Habayan na nahahagkosan nin katotoohan. Kan mga panahon kan Biblia, an mga soldados nagsusulog nin halakbang na pahang anit, o hagkos, na duwa sagkod anom na pulgada an lakbang. An nagkapirang paratradusir nagsusuherir na an maninigo na traduksion kan bersikulo iyo na “higot na ipinaha an katotoohan sa saindong habayan.” An paha kan soldados nakatabang na protehiran an saiyang habayan, asin iyan nagin kombenyenteng sabitan nin espada. Kun hagkosan na nin soldados an saiyang habayan, nag-aandam na sia para sa ralaban. Ginamit ni Pablo an paha nin soldados tanganing iilustrar kun sagkod saen maninigong makaimpluwensia sa satong buhay an katotoohan sa Kasuratan. Iyan maninigong higot na nakahagkos sa sato, sabi ngani, kaya namumuhay kita sono sa katotoohan asin ikakadepensa iyan sa ano man na kamugtakan. (Salmo 43:3; 1 Pedro 3:15) Sa katuyohan na iyan, kaipuhan niatong mahigos na pag-adalan an Biblia asin horophoropon an laog kaiyan. ‘Nasa kairaroman kan sadiri’ ni Jesus an ley nin Dios. (Salmo 40:8) Kan kinukuestion kan mga nagkokontra, kaya nia kun siring na sumimbag paagi sa pagkotar sa Kasuratan na memoryado nia.​—Mateo 19:3-6; 22:23-32.

5. Ipaliwanag kun paano an sadol kan Kasuratan makakatabang sa sato sa mga panahon na may pagbalo o sugot.

⁵ Kun tinotogotan niato na giyahan kita kan katotoohan sa Biblia, mapoprotehiran kita kaiyan sa salang pangangatanosan asin mapangyaring makagibo kita nin tamang mga desisyon. Sa mga panahon na may sugot o pagbalo, an mga giya sa Biblia mapakosog sa satong determinasyon na gibohon an tama. Garo man sana maheheling niato an satong Kaharohalangkaweng Paratokdo, si Jehova, asin makakadangog nin tataramon sa likod niato na nagsasabi: “Iyo ini an dalan. Maglakaw kamo dian.”​—Isaias 30:​20, 21.

6. Taano ta nangangaipo nin proteksion an satong piguratibong puso, asin paano iyan epektibong mapoprotehiran nin katanosan?

⁶ Takop sa daghan na katanosan. An takop sa daghan kan soldados an nagprotehir sa sarong mahalagang marhay na organo, an puso. An satong piguratibong puso​—an klase nin pagkatawo niato sa laog—​nangangaipo nin espesyal na proteksion huli ta may tendensia iyan na gumibo nin sala. (Genesis 8:21) Kun siring dapat niatong manodan asin kamotan an matanos na mga pamantayan ni Jehova. (Salmo 119:​97, 105) An pagkamoot niato sa katanosan an minagiya sato na isikwal an kinabanon na kaisipan na nag-iignoro o nagpapaluya sa puersa kan malinaw na mga giya ni Jehova. Dugang pa, kun kita namomoot sa kun ano an tama asin naoongis sa maraot, lilikayan niato an paghiro na makakaraot sa satong buhay. (Salmo 119:99-101; Amos 5:15) Si Jesus arogan sa bagay na ini, huli ta mapadapit sa saiya, an Kasuratan nagsasabi: “Namoot ka sa katanosan, asin naongis ka sa karatan.”​—Hebreo 1:9. *

7. Taano ta kinaipuhan nin Romanong soldados an matibay na pansapin sa bitis, asin sa ano iyan naglaladawan?

⁷ Bitis na nasasapinan kan kasangkapan kan maogmang bareta nin katoninongan. Kinaipuhan kan Romanong mga soldados an matagal na sapatos o matibay na sandalyas, huling durante nin mga kampanya, sa parate nagmamartsa sinda nin 30 kilometros kada aldaw mantang may sulog o dara-darang  mga 27 kilos na pangalasag asin kasangkapan. Tamang-tama an pagkagamit ni Pablo sa pansapin sa bitis sa paglaladawan kan satong pagigin andam na ihulit an mensahe kan Kahadean sa gabos na mahinanyog. Mahalaga ini huli ta paano mamimidbid nin mga tawo si Jehova kun kita bakong andam asin bakong gikan sa boot na maghulit?​—Roma 10:13-15.

8. Paano niato maaarog an halimbawa ni Jesus bilang parahulit kan maogmang bareta?

⁸ Ano an pinakamahalagang aktibidad sa buhay ni Jesus kaidto? Sinabihan nia si Gobernador Poncio Pilato nin Roma: ‘Ako napadigdi sa kinaban tanganing magpatotoo sa katotoohan.’ Si Jesus naghulit saen man sia makanompong nin gustong magdangog, asin ikinaogma niang marhay an saiyang ministeryo kaya ipinaorog nia iyan kisa sa saiyang mga pangangaipo sa pisikal. (Juan 4:5-34; 18:37) Kun kita, arog ni Jesus, galagang magpahayag kan maogmang bareta, makakanompong kita nin dakol na oportunidad na ipaabot iyan sa iba. Dugang pa, an satong pagigin lubos na sibot sa satong ministeryo matabang sa sato na magdanay na makosog sa espirituwal.​—Gibo 18:5.

An Kalasag, Takop sa Payo, Asin Espada

9. Paano nagpoprotehir sa sarong Romanong soldados an dakulang kalasag?

⁹ An dakulang kalasag nin pagtubod. An termino sa Griego na trinadusir na “dakulang kalasag” nanonongod sa sarong kalasag na igo an kadakulaan tanganing matakopan an haros bilog na hawak. Iyan proteksion sa “naglalaad na mga bosog” na nasambitan sa Efeso 6:16. Kan mga panahon kan Biblia, an mga soldados naggagamit nin mga pana na gibo sa daing laog na mga gaho na may nakakabit na sadit na mga lalagan na batbat na puedeng bugtakan nin naglalaad na petrolyo. Ilinaladawan nin sarong iskolar an mga panang ini na “saro sa pinakapeligrosong armas sa suanoy na pakikilaban.” Kun an sarong soldados mayo nin dakulang kalasag na pamprotehir nia sa saiyang sadiri sa siring na mga bosog, puede siang tamaan nin grabe o magadan pa ngani.

10, 11. (a) Anong “naglalaad na mga bosog” ni Satanas an puedeng magpaluya sa satong pagtubod? (b) Paano ipinapaheling kan halimbawa ni Jesus an importansia nin pagtubod sa mga panahon nin pagbalo?

 ¹⁰ Anong “naglalaad na mga bosog” an ginagamit ni Satanas tanganing paluyahon an satong pagtubod? Puede niang probokaron an paglamag o pagkontra sa laog nin pamilya, sa trabaho, o sa eskuelahan. An pagmawot na magkaigwa nin mas dakol pang materyal na bagay asin an pan-akit nin inmoralidad nakaraot man sa espirituwalidad nin nagkapira. Tanganing protehiran an satong sadiri tumang sa siring na mga peligro, “orog sa gabos, [dapat niatong] gamiton an dakulang kalasag nin pagtubod.” An pagtubod bunga nin pakanood manongod ki Jehova, regular na pakikikomunikar sa saiya sa pamibi, asin pakaaram kun paano nia kita pinoprotehiran asin binebendisyonan.​—Josue 23:14; Lucas 17:5; Roma 10:17.

¹¹ Kan si Jesus uya digdi sa daga, ipinaheling nia an importansia nin pagkaigwa nin makosog na pagtubod durante nin kritikal na mga panahon. Nagtiwala sia nin lubos sa mga desisyon kan saiyang Ama asin naogmang gibohon an kabotan nin Dios. (Mateo 26:​42, 53, 54; Juan 6:38) Dawa kan nakakamate nin labi-labing kamondoan sa tatamnan nin Getsemani, sinabi ni Jesus sa saiyang Ama: “Bakong an boot ko, kundi an boot mo.” (Mateo 26:39) Dai noarin man liningawan ni Jesus an importansia nin pagdadanay na may integridad asin pagpagayagaya sa saiyang Ama. (Talinhaga 27:11) Kun igwa kita nin kaparehong kompiansa ki Jehova, dai niato totogotan na paluyahon kan pagkritika o pagkontra an satong pagtubod. Imbes, mapapakosog an satong pagtubod kun kita magsasarig sa Dios, mapaheling nin pagkamoot sa saiya, asin ootobon niato an saiyang mga togon. (Salmo 19:7-11; 1 Juan 5:3) Mayo nin materyal na mga balos o madaling mawara na kasingawan sa laman an ikakakomparar sa mga bendisyon na itinagama ni Jehova para sa mga namomoot sa saiya.​—Talinhaga 10:22.

12. Anong mahalagang parte niato an pinoprotehiran kan satong piguratibong takop sa payo, asin taano ta mahalagang marhay an siring na proteksion?

 ¹² An takop sa payo na kaligtasan. An takop sa payo an nagprotehir sa payo asin hotok​—an sentro nin intelihensia​—kan soldados. An satong Kristianong paglaom ikakakomparar sa takop sa payo huli ta pinoprotehiran kaiyan an satong isip. (1 Tesalonica 5:8) Minsan ngani binago na niato an satong isip paagi sa tamang kaaraman sa Tataramon nin Dios, kita maluya asin bakong sangkap na mga tawo pa man giraray. An satong isip puedeng madali sanang maimpluwensiahan nin maraot. An mga pasohan sa sistemang ini nin mga bagay puedeng makadisturbo sa sato o sumalida pa ngani sa satong tao nin Dios na paglaom. (Roma 7:18; 12:2) Daing nangyari sa paghihingoa kan Diablo na linglingon si Jesus paagi sa pag-alok sa saiya kan “gabos na kahadean kan kinaban asin [kan] kamurawayan kan mga iyan.” (Mateo 4:8) Alagad marigon na sinayumahan ni Jesus an alok, asin sinabi ni Pablo manongod sa saiya: “Huli kan kagayagayahan na ibinugtak sa atubangan nia tinagalan [ni Jesus] an hariging pasakitan, na hinamak an kasupganan, asin nagtukaw sa too kan trono nin Dios.”​—Hebreo 12:2.

13. Paano niato mapapagdanay an satong kompiansa sa paglaom sa ngapit?

¹³ An klase nin kompiansa na yaon ki Jesus bakong basta na sana nagtunga. Kun papanoon niato an satong isip kan mga pangarap asin pasohan sa sistemang ini nin mga bagay imbes na papagdanayon sa isip an paglaom sa ngapit, maluya an satong pagtubod sa mga panuga nin Dios. Pag-abot nin panahon, puede pa nganing mawara niato nin biyo an satong paglaom. Sa ibong na lado, kun hohorophoropon niato nin regular an mga panuga nin Dios, padagos kitang maggagayagaya sa paglaom na ibinugtak sa atubangan ta.​—Roma 12:12.

14, 15. (a) Ano an satong piguratibong espada, asin paano iyan puedeng gamiton? (b) Iilustrar kun paano kita matatabangan kan espada kan espiritu na labanan an sugot?

¹⁴ An espada kan espiritu. An tataramon, o mensahe, nin Dios na nakasurat sa Biblia garo sarong matibay na espada na may duwang tarom na kayang palodon an relihiosong kaputikan asin tabangan an mga tawo na tama an kamugtakan nin puso na manompongan an espirituwal na katalingkasan. (Juan 8:32; Hebreo 4:12) Kaya man kitang depensahan kan espirituwal na espadang ini kun kita napapaatubang sa mga sugot o pagprobar kan mga apostata na raoton an satong pagtubod. (2 Corinto 10:​4, 5) Kanigoan an pagpasalamat niato na ‘an gabos na Kasuratan ipinasabong nin Dios asin biyong sinasangkapan kita para sa gabos na marahay na gibo’!​—2 Timoteo 3:​16, 17.

¹⁵ Kan sia sinusugotan ni Satanas sa kaawagan, epektibong ginamit ni Jesus an espada kan espiritu tanganing itumba an falsong mga pangangatanosan asin tusong mga sugot. Sa kada angat ni Satanas, sia nagsimbag: “Nasusurat.” (Mateo 4:1-11) Naeksperyensiahan man ni David, saro sa mga Saksi ni Jehova sa España, na nakatabang sa saiya an Kasuratan sa pagdaog sa sugot. Kan an edad nia 19 anyos, may sarong magayon na hoben na babae na katrabaho nia sa sarong kompanya sa paglinig na nagsuherir na “maghapihapi sindang duwa.” Sinayumahan ni David an mga pagprobar kaini na maparani sa saiya asin hinagad nia sa saiyang superbisor na ibalyo sia nin trabaho sa ibang lugar tanganing malikayan na maotro an situwasyon. “Nagirumdoman ko an halimbawa ni Jose,” an sabi ni David. “Sinayumahan nia an inmoralidad asin tolos na duminulag. Iyan man an ginibo ko.”​—Genesis 39:10-12.

16. Ipaliwanag kun taano ta kaipuhan niato an pagsasanay tanganing ‘magamit sa tamang paagi an tataramon nin katotoohan.’

¹⁶ Ginamit man ni Jesus an espada kan espiritu tanganing tabangan an iba na makabutas sa kontrol ni Satanas. “An sakong itinotokdo bako ko,” an sabi ni  Jesus, “kundi kaidtong nagsugo sa sako.” (Juan 7:16) Tanganing maarog an ekspertong pagtotokdo ni Jesus, kaipuhan niato an pagsasanay. Mapadapit sa Romanong mga soldados, an Judiong historyador na si Josefo nagsurat: “An lambang soldados nag-eensayo aroaldaw, asin ginigibo ninda iyan nin mahigos na marhay, na garo baga nasa panahon nin ralaban na iyong dahelan kun taano ta kayang-kaya nindang tagalan an kapagalan sa mga ralaban.” Sa satong espirituwal na pakikilaban, kaipuhan niatong gamiton an Biblia. Dugang pa, dapat niatong ‘gibohon an bilog niatong makakaya tanganing ikaatubang niato an satong sadiri na inooyonan nin Dios, sarong paragibo na mayo nin maninigong ikasupog, na ginagamit an tataramon kan katotoohan sa tamang paagi.’ (2 Timoteo 2:15) Asin abaang satispaksion an naeeksperyensiahan niato kun ginagamit niato an Kasuratan sa pagsimbag sa sinserong hapot nin sarong interesado!

Mamibi sa Gabos na Panahon

17, 18. (a) Ano an kabtang nin pamibi sa paglaban ki Satanas? (b) Magtao nin halimbawa tanganing ipaheling an halaga nin pamibi.

¹⁷ Pakatapos na tokaron an bilog na espirituwal na pangalasag, idinagdag ni Pablo an saro pang mahalagang sadol. Sa paglaban ki Satanas, maninigong gamiton kan mga Kristiano an “gabos na porma nin pamibi asin pagngayongayo.” Gurano kaparate? “Padagos kamong mamibi sa gabos na panahon sa espiritu,” an isinurat ni Pablo. (Efeso 6:18) Kun kita napapaatubang sa mga sugot, pagbalo, o panluluya nin boot, an pamibi puedeng makapasarig sa sato nin dakula. (Mateo 26:41) Si Jesus “nagdolot nin mga pagngayongayo patin nin mga kahagadan man sa Saro na makakapagligtas sa saiya hale sa kagadanan, na may makosog na mga pagtangis asin luha, asin sia dinangog na may pabor huli sa saiyang diosnon na takot.”​—Hebreo 5:7.

¹⁸ Si Milagros, na nag-ataman sa saiyang agom na may pabalikbalik na helang sa laog nin labing 15 taon, nagsasabi: “Kun ako pinanluluyahan nin boot, minadolok ako ki Jehova sa pamibi. Sia sana an orog na makakatabang sa sako. Totoo, may mga panahon na sa boot ko dai ko na talaga kaya. Alagad paorootro pakatapos kong mamibi ki Jehova, namamatean ko na minabalik an sakong kosog asin nagrarahay an kondisyon kan sakong isip.”

19, 20. Ano an kaipuhan niato tanganing manggana sa satong pakipaglaban tumang ki Satanas?

¹⁹ Aram kan Diablo na halipot na sana an saiyang panahon, asin dinadagdagan nia an saiyang paghihingoa tanganing daogon kita. (Kapahayagan 12:​12, 17) Dapat na labanan niato an makapangyarihan na kaiwal na ini asin ‘makipaglaban kan marahay na pakilaban kan pagtubod.’ (1 Timoteo 6:12) Nangangaipo ini nin kosog na labi sa ordinaryo. (2 Corinto 4:7) Kaipuhan ta man an tabang kan banal na espiritu nin Dios asin kun siring maninigo niatong hagadon iyan sa pamibi. Sinabi ni Jesus: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!”​—Lucas 11:13.

²⁰ Malinaw nanggad, kaipuhan na isulog niato an bilog na pangalasag na itinatao ni Jehova. An pagsulog kan espirituwal na pangalasag na ini nagkakaipo na pataluboon niato an diosnon na mga kualidad, na arog baga kan pagtubod asin katanosan. Hinahagad kaiyan na kamotan niato an katotoohan na garo man sana nahahagkosan kita kaiyan, na magin andam kitang palakopon an maogmang bareta sa gabos na panahon, asin na papagdanayon niato na harani sa isip an paglaom sa ngapit. Dapat na manodan niatong gamiton nin eksperto an espada kan espiritu. Paagi sa pagsulog kan bilog na pangalasag hale sa Dios, puede kitang manggana sa satong pakipaggumolan sa maraot na mga puersang espiritu asin tunay na makakatao kita nin kamurawayan sa banal na ngaran ni Jehova.​—Roma 8:37-39.

[Nota sa Ibaba]

Ano an Isisimbag Nindo?

• Siisay an nagtatao nin pinakamarahay na halimbawa nin pagsulog kan espirituwal na pangalasag, asin taano ta maninigo niatong estudyaran nin maingat an saiyang halimbawa?

• Paano niato mapoprotehiran an satong isip asin an satong piguratibong puso?

• Paano kita magigin eksperto sa paggamit kan espada kan espiritu?

• Taano ta maninigo kitang padagos na mamibi sa gabos na panahon?

[Mga Hapot Para sa Pag-adal]

[Mga Ritrato sa pahina 17]

An mahigos na pag-adal sa Biblia makakamotibar sa sato na ipahayag an maogmang bareta sa gabos na panahon

[Mga Ritrato sa pahina 18]

An seguradong paglaom niato nakakatabang sato na maatubang an mga pagbalo

[Mga Ritrato sa pahina 19]

Ginagamit daw nindo “an espada kan espiritu” sa ministeryo?