“An mga Mahoyo Magmamana kan Daga”—Paano?

“PAMILYAR gayod kamo sa nakakaogmang mga tataramon ni Jesus na ‘an mga mahoyo magmamana kan daga.’ Alagad huli sa gabos na ginigibo kan mga tawo sa lambang saro asin sa daga, ano pa sa paghona nindo an mamanahon kan mga mahoyo?”​—Mateo 5:5; Salmo 37:​11; King James Version.

Ginagamit ni Myriam, saro sa Mga Saksi ni Jehova, an hapot na ini tanganing makapoon nin pag-oolay sa Biblia. An tawong kinaolay nia suminimbag na kun si Jesus nanuga kaini, an daga seguradong magigin pamana na angay na apodon nin siring kaiyan asin bakong sarong laglag o dai maiistaran na kagabaan.

Daing duwa-duwa na optimistiko an simbag na iyan. Alagad may dahelan daw kitang magkaigwa nin arog kaiyan na positibong paglaom sa ngapit? Iyo nanggad, huli ta an Biblia nagtatao sato nin pusog na mga dahelan na maniwala na an panugang iyan magkakatotoo. Sa katunayan, an kaotoban kan panugang iyan konektadong marhay sa katuyohan nin Dios para sa katawohan asin para sa daga. Asin inaasegurar kita na ootobon nin Dios an saiyang mga katuyohan. (Isaias 55:11) Kaya, kun siring, ano an katuyohan nin Dios para sa katawohan sa kapoonpooni, asin paano iyan maootob?

An Daing Sagkod na Katuyohan nin Dios Para sa Daga

Linalang ni Jehova Dios an daga para sa espesipikong katuyohan. “Ini an isinabi ni Jehova, an Kaglalang kan kalangitan, Sia na totoong Dios, an Naghaman kan daga asin an Naggibo kaiyan, Sia an Saro na masarig na nagbugtak kaiyan, na dai iyan linalang na dai nin kapakanan, na naghaman kaiyan tanganing pag-istaran: ‘Ako si Jehova, asin mayo na nin iba.’” (Isaias 45:18) Sa siring, linalang an daga partikularmente para istaran nin tawo. Apuera kaini, katuyohan nin Dios na an daga magin daing sagkod na erokan para sa katawohan. “Pinatindog nia an daga sa mga pasisikadan kaiyan; dai iyan matatanyog sagkod sa panahon na daing talaan, o sagkod lamang.”​—Salmo 104:5; 119:90.

An katuyohan nin Dios mapadapit sa daga maririsa man sa sugo na itinao nia sa enot na tawong mag-agom. Ki Adan asin Eva, si Jehova nagsabi: “Pangagbunga asin pangagdakol kamo asin panoa nindo an daga patin sakopa nindo iyan, asin sakopon nindo an mga sira sa dagat asin an naglalayog na mga linalang sa kalangitan patin an lambang nabubuhay na linalang na naghihiro sa ibabaw kan daga.” (Genesis 1:28) An daga, na ipinagkatiwala nin Dios ki Adan asin Eva, magigin erokan na daing katapusan para sa sainda asin para sa mga gikan ninda. “Kun manongod sa kalangitan, an kalangitan rogaring ni Jehova,” an sinabi kan salmista pakalihis nin dakol na siglo, “alagad an daga itinao nia sa mga aki nin mga tawo.”​—Salmo 115:16.

Tanganing kamtan an marahayon na esperansang iyan, kaipuhan na akoon ni Adan asin Eva, saka kan saindang mga gikan, si Jehova Dios, an  Kaglalang asin Paratao nin Buhay, bilang saindang Soberano asin gikan sa boot na magkuyog saiya. Si Jehova nagin malinaw sa bagay na ini kan itao nia an pagboot na ini sa lalaki: “Hale sa gabos na kahoy sa tatamnan puede kang magkakan sagkod na ika mabasog. Alagad kun dapit sa kahoy kan pakamidbid sa marahay asin maraot dai ka magkakan dian, huli ta sa aldaw na kumakan ka dian ika siertong magagadan.” (Genesis 2:​16, 17) Tanganing padagos na mabuhay si Adan asin Eva sa tatamnan nin Eden, kaipuhan na kuyogon ninda an simple asin malinaw na sinabi na pagboot na iyan. An paggibo kaiyan kapahayagan kan saindang pagpasalamat para sa gabos na ginibo kan langitnon na Ama para sainda.

Kan si Adan asin Eva tuyong makisuway sa Dios paagi sa pagbalga sa pagboot na itinao sa sainda, sa katunayan tinalikdan ninda an saro na nagtao sainda kan gabos na yaon sainda. (Genesis 3:6) Sa paggibo kaiyan, iwinara ninda an saindang magayon na Paraisong erokan bako sanang para sainda kundi para man sa mga gikan ninda. (Roma 5:12) An pagsuway daw kan enot na mag-agom nakaolang sa katuyohan nin Dios sa paglalang kan daga?

Sarong Dios na Dai Nagliwat

Paagi sa saiyang propetang si Malaquias, an Dios nagpahayag: “Ako si Jehova; dai ako nagliwat.” (Malaquias 3:6) Nagkokomento sa bersikulong ini, an Pranses na iskolar sa Biblia na si L. Fillion nagsabi na an kapahayagan na ini konektadong marhay sa pag-otob kan mga panuga nin Dios. “Puede kutanang pohoon ni Jehova an saiyang rebelyosong banwaan,” an isinurat ni Fillion, “alagad huli ta dai nagliliwat an saiyang mga panuga, sia magigin maimbod sa mga panuga nia kan nakaagi sa ibong kan ano man na kamugtakan.” An mga panuga nin Dios, baga man sa sarong indibiduwal, sarong nasyon, o sa gabos na katawohan, dai malilingawan kundi ootobon sa saiyang itinalaan na panahon. “Ginirumdom nia an saiyang tipan sagkod sa panahon na daing talaan, an tataramon na saiyang ipinagboot, sagkod sa sangribong kapag-arakian.”​—Salmo 105:8.

Pero, paano kita makakaseguro na dai liniwat ni Jehova an saiyang orihinal na katuyohan mapadapit sa daga? Makakaseguro kita kaini huli ta sa bilog na ipinasabong na Tataramon nin Dios, an Biblia, manonompongan niato an pagkasambit sa katuyohan nin Dios na itatao an daga sa makinuyog na katawohan. (Salmo 25:13; 37:​9, 22, 29, 34) Apuera kaini, ilinaladawan kan Kasuratan an mga binendisyonan ni Jehova na nag-eerok sa katiwasayan, na an lambang saro nagtutukaw “sa sirong kan saiyang ubas asin sa  sirong kan saiyang higuerra,” na “mayo nin siisay man na magpapatakig sa sainda.” (Miqueas 4:4; Ezequiel 34:28) An mga pinili ni Jehova “siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan.” Makakamit ninda an katoninongan dawa sa mga hayop kan kapatagan.​—Isaias 11:6-9; 65:​21, 25.

An Biblia nagtatao nin patanaw sa panuga nin Dios sa saro pang paagi. Durante kan pagreynar ni Hadeng Salomon, an nasyon nin Israel nagkamit nin sarong panahon nin katoninongan asin prosperidad. Sa irarom kan saiyang pamamahala, “an Juda asin Israel padagos na nag-erok na may seguridad, an lambang saro sa sirong kan saiyang ubasan asin sa sirong kan saiyang higuerra, poon sa Dan sagkod sa Beer-seba, sa gabos na aldaw ni Salomon.” (1 Hade 4:25) An Biblia nagsasabi na si Jesus “orog pa ki Salomon,” asin nagtataram manongod sa saiyang paghade, an salmista makahulang nagsabi: “Sa saiyang mga aldaw an matanos mamumurak, asin an kadakolan nin katoninongan sagkod na mayo na nin bulan.” Sa panahon na iyan, “magkakaigwa nin abundang tipasi sa ibabaw kan daga; maglilipwas sa alitoktok kan kabukidan.”​—Lucas 11:31; Salmo 72:​7, 16.

Maimbod sa saiyang tataramon, seseguradohon ni Jehova Dios na an ipinanugang pamana bako sanang makukua kundi patin ibabalik sa dati nanggad na kagayonan kaiyan. Sa Kapahayagan 21:​4, an Tataramon nin Dios nagsasabi sato na sa ipinanuga niang bagong kinaban, “papahidon [nin Dios] an gabos na luha sa . . . mga mata [nin mga tawo], asin an kagadanan mawawara na, dai na sagkod magkakaigwa nin pagmondo ni pagtangis ni kolog.” An ipinanuga totoo nanggad na Paraiso.​—Lucas 23:43.

Kun Paano Makakamtan an Ipinanugang Pamana

An pagkaliwat kan daga sa pagigin sarong paraiso mangyayari sa irarom nin sarong gobyerno na mamamahala gikan sa langit, sarong Kahadean na si Jesu-Cristo an Hade. (Mateo 6:​9, 10) Enot, ‘lalaglagon kan Kahadean na iyan an mga naglalaglag kan daga.’ (Kapahayagan 11:18; Daniel 2:44) Dangan, bilang an “Prinsipe nin Katoninongan,” ootobon ni Jesu-Cristo an makahulang mga tataramon na ini: “An kadakolan kan sa prinsipeng pamamahala asin an katoninongan magigin daing kasagkodan.” (Isaias 9:​6, 7) Sa irarom kan Kahadean na iyan, an minilyon na tawo, kaiba an mga bubuhayon liwat, magkakaigwa nin oportunidad na manahon an daga.​—Juan 5:​28, 29; Gibo 24:15.

Sairisay an nakatagamang magkamit kan marahayon  na pamanang iyan? Isipon an mga tataramon ni Jesus: “Maogma an mga mahoyo, mantang mamanahon ninda an daga.” (Mateo 5:5) Ano an kahulogan kan pagigin mahoyo? Sa pankagabsan, tinatawan nin kahulogan kan mga diksionaryo an “mahoyo,” bilang maboot, tama sana an gawe-gawe, mapagpasakop, toninong, masusupgon pa ngani. Minsan siring, an ginamit na orihinal na termino sa Griego nangangahulogan nin labi pang marhay. “Igwa nin pagkakalmado” sa terminong iyan, an sabi kan New Testament Wordbook ni William Barclay, “alagad sa likod kan pagkakalmado igwa nin kosog nin asero.” Ipinaparisa kaiyan an disposisyon nin isip na nagpapangyaring matios kan saro an danyos na mayo nin paghinanakit o pagsaboot na magbalos, na an gabos resulta kan pagkaigwa nin marahay na relasyon sa Dios, asin an relasyon na iyan iyo an nagigin gikanan nin kosog para saiya.​—Isaias 12:2; Filipos 4:13.

An saro na mahoyo mapakumbabang inaako an mga pamantayan nin Dios sa gabos na aspekto kan saiyang personal na buhay; dai nia iniinsistir an sadiri niang opinyon o opinyon kan ibang tawo. Sia man madaling tokdoan, andam na tokdoan ni Jehova. An salmistang si David nagsurat: “Papalakawon [ni Jehova] an mga mahoyo sa saiyang hudisyal na desisyon, asin totokdoan nia an mga mahoyo kan saiyang dalan.”​—Salmo 25:9; Talinhaga 3:​5, 6.

Magigin kabilang daw kamo sa “mga mahoyo” na magmamana kan daga? Paagi sa pagmidbid ki Jehova asin pag-aram kan saiyang kabotan paagi sa maigot na pag-adal kan saiyang Tataramon asin paagi sa pag-aplikar kan saindong nanonodan, puede man nindong antisiparon na manahon an paraiso digdi sa daga asin mabuhay sagkod lamang dian.​—Juan 17:3.

[Ritrato sa pahina 5]

An katuyohan nin Dios para sa daga risang-risa sa sugo na itinao nia ki Adan asin Eva

[Ritrato sa pahina 6, 7]

An katoninongan asin katiwasayan kan pagreynar ni Salomon nagtatao nin preliminaryong paheling kan ipinanugang pamana

[Credit Lines]

Mga karnero asin bulod sa likod: Pictorial Archive (Near Eastern History) Est.; Arabian oryx: Hai-Bar, Yotvata, Israel; paraomang nag-aarado: Garo Nalbandian

[Ritrato sa pahina 7]

An sarong matanos asin bagong kinaban harani na​—yaon daw kamo dian?