Sairisay Ngonyan an Nagtatao nin Kamurawayan sa Dios?

“Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan.”​—KAPAHAYAGAN 4:11.

1, 2. (a) Anong mga halimbawa an nag-iilustrar kan langtad nin siensia na inaapod na biomimetics? (b) Anong hapot an minalataw, asin ano an simbag?

SARONG aldaw kan mga taon nin 1940, an inhenyerong Sueco na si George de Mestral naglakawlakaw kaiba an saiyang ayam. Pagpuli sa harong, nariparo nia na pano nin hibo an saiyang bado asin an barahibo kan ayam. Huling interesadong makaaram, siniyasat nia sa mikroskopyo an mga hibo asin naintriga sia sa saraditon na kawit na minakabit sa ano man na puedeng masabitan. Pag-abot nin panahon, inimbento nia an artipisyal na katumbas kaiyan​—an Velcro. Bako sana si de Mestral an nagkopya sa naturalesa. Sa Estados Unidos, an magtugang na Wright nagdisenyo nin sarong eroplano pakatapos na pag-adalan an paglayog nin darakulang gamgam. Dinisenyo kan inhenyerong Pranses na si Alexandre-Gustave Eiffel an torre sa Paris na inginaran sa saiya, na ginagamit an pundamental na mga prinsipyo na nagpapangyari sa tolang nin paa nin tawo na masuportaran an gabat kan hawak.

² Iiniilustrar nanggad kan mga halimbawang ini an inaapod sa Ingles na biomimetics, an langtad nin siensia na naghihingoang arogon an mga disenyo na manonompongan sa naturalesa. * Pero, rasonable sanang maghapot: Gurano kaparate na tinatawan nin kredito kan mga imbentor an Saro na nagdisenyo kan saraditon na hibo, kan darakulang gamgam, kan tolang nin paa nin tawo, asin kan gabos na iba pang pambihirang mga orihinal na pinagbasehan kan dakol na imbension nin tawo? Makamomondo alagad totoo na sa kinaban ngonyan, an Dios bihirang tawan kan kredito o kan kamurawayan na maninigong itao sa saiya.

3, 4. Ano an kahulogan kan termino sa Hebreo na trinadusir na “kamurawayan,” asin sa ano iyan maninigong ipanongod kun ginagamit mapadapit ki Jehova?

³ ‘Taano,’ tibaad ipagngalas nin nagkapira, ‘ta kaipuhan na magtao nin kamurawayan sa Dios? Bako daw na mamuraway na an Dios?’ Totoo, si Jehova an pinakamamuraway na Personahe sa uniberso, alagad dai nangangahulogan na sia mamuraway sa mata kan gabos na tawo. Sa Biblia, an termino sa Hebreo na trinadusir na “kamurawayan” igwa nin pundamental na kahulogan na “kagabatan.” Iyan nanonongod sa ano man na bagay na nagpapangyari sa saro na magin garo baga kahangahanga o mahalaga para sa iba. Kun ginagamit mapadapit sa Dios, iyan nanonongod sa bagay na nagpapangyari sa Dios na magin kahangahanga para sa tawo.

⁴ Kakadikit ngonyan an nakakarisa sa kun ano an nagpapangyaring magin kahangahanga an Dios. (Salmo 10:4; 14:1) Sa katunayan, an prominenteng mga tawo sa sosyedad, kun nagtutubod man sinda sa Dios, sa parate nakaimpluwensia sa mga tawo na dai  igalang an mamuraway na Kaglalang kan uniberso. Sa anong mga paagi ninda ginibo iyan?

“Mayo Sinda nin Sarahotan”

5. Paano ipinapangatanosan kan dakol na sientista an mga ngangalasan nin paglalang?

⁵ Nag-iinsistir an dakol na sientista na mayo nin Dios. Kun siring, paano ninda ipinapaliwanag an mga ngangalasan nin paglalang, kaiba na an katawohan? Sinasabi ninda na an siring na mga ngangalasan bunga nin ebolusyon, sarong basta na sanang puersa na basado sa pagkanorongod. Halimbawa, isinurat nin sarong ebolusyonista na si Stephen Jay Gould: “Yaon kita ngonyan huli ta an sarong pambihirang grupo nin mga sira nagkaigwa nin palaen na anatomiya nin parikpik na puedeng maliwat na magin mga tabay para sa mga linalang na nasa daga . . . Tibaad maghimuyawot kita nin ‘mas nakakalabing’ simbag​—alagad ta mayo kaiyan.” Siring man, si Richard E. Leakey asin si Roger Lewin nagsurat: “An tawo sarong dakulaon na biolohikong aksidente sana gayod.” Dawa an nagkapirang sientista na nag-oomaw sa kagayonan asin disenyo na nasa naturalesa dai itinatao sa Dios an kredito.

6. Ano an nakakabensir sa dakol na dai itao sa Dios an kredito na maninigo sa saiya bilang Kaglalang?

⁶ Kun positibong sabihon nin edukadong marhay na mga indibiduwal na totoo an ebolusyon, ipinaparisa ninda na mga ignorante sana an habong magtubod dian. Ano an reaksion nin dakol sa siring na sinasabi? Nagkapirang taon na an nakaagi, an sarong tawo na dakol an aram manongod sa ebolusyon ininterbio an mga tawo na nagtubod sa teoriyang iyan. Sinabi nia: “Nadiskobre ko na an kadaklan na naniniwala sa ebolusyon naniniwala huli ta sinabihan sinda na an gabos na intelihenteng tawo naniniwala.” Iyo, kun ipinapahayag kan edukadong mga indibiduwal an saindang ateistikong mga punto de vista, nabebensir an iba na dai itao sa Dios an kredito na maninigo sa saiya bilang Kaglalang.​—Talinhaga 14:​15, 18.

7. Segun sa Roma 1:​20, ano an malinaw na maheheling paagi sa naheheling na mga linalang, asin taano?

⁷ An mga sientista daw nakaabot sa saindang mga konklusyon huli sa mga katunayan asin ebidensia? Dai nanggad! Napapalibotan kita nin ebidensia na may Kaglalang. Mapadapit sa saiya, si apostol Pablo nagsurat: “An saiyang dai naheheling na mga kualidad malinaw nang naheheling poon pa sa paglalang kan kinaban [nin katawohan] padagos, huli ta sinda namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios, kaya mayo sinda [an mga dai nagtutubod] nin sarahotan.” (Roma 1:20) An Kaglalang nagwalat nin ebidensia sa saiyang ginibo. Sa siring, sinasabi ni Pablo na poon kan mag-eksister an katawohan, nagin nang posible na ‘mamansayan’ nin mga tawo an ebidensia kan pag-eksister nin Dios paagi sa naheheling na mga linalang. Haen an ebidensiang ini?

8. (a) Paano nagpapatunay sa kapangyarihan asin kadonongan nin Dios an pisikal na kalangitan? (b) Ano an nagpaparisa na siertong may Enot na Nagpangyari sa uniberso?

⁸ Naheheling niato sa mabitoon na kalangitan an ebidensia na may Dios. “An kalangitan nagpapahayag kan kamurawayan nin Dios,” an sabi kan Salmo 19:1. “An kalangitan”​—an saldang, bulan, asin mga bitoon​—nagpapatunay sa kapangyarihan asin kadonongan nin Dios. An kadakoldakol na kabilangan nin bitoon nagpapamate sato nin may pagkangirhat na paggalang. Asin an gabos na bagay na ini sa kalangitan naghihiro sa espasyo, bakong dai nin direksion, kundi segun sa eksaktong pisikal na mga ley. * (Isaias 40:26) Rasonable daw na sabihon na an siring na pagkaareglado basta na sanang nagkanorongod? Makahulogan nanggad, sinasabi nin dakol na sientista na an uniberso nagkaigwa nin bigla na sanang  kapinonan. Ipinapaliwanag an kahulogan kaini, isinurat nin sarong propesor: “An uniberso na dai nin kapinonan mas madaling tubodon nin saro na may ateistiko o agnostikong [punto de vista]. Kaagid kaiyan, an sarong uniberso na may kapinonan garo baga nangangaipo nin enot na nagpangyari; huli ta siisay an makakaimahinar nin siring na epekto kun mayo nin igong nagpangyari?”

9. Paano risang-risa an kadonongan ni Jehova sa mga linalang na hayop?

⁹ Naheheling man niato sa daga an ebidensia na may Dios. An salmista nagkagsing: “Kanigoan kadakol kan saimong mga gibo, O Jehova! Iyan gabos ginibo mo sa kadonongan. An daga pano kan saimong mga ginibo.” (Salmo 104:24) An “mga ginibo” ni Jehova, kaiba an mga linalang na hayop, ebidensia kan saiyang kadonongan. Siring kan naheling niato sa kapinonan, mahusay nanggad an pagkadisenyo sa nabubuhay na mga bagay kaya sa parate hinihingoang arogon iyan kan mga sientista. Estudyare an nagkapira pang halimbawa. Pinag-aadalan kan mga parasiyasat an mga sungay nin usa, sa katuyohan na gumibo nin mas matibay na helmet; sinisiyasat ninda an mga langaw na sensitibong marhay an pandangog, sa katuyohan na maparahay pa an mga elektronikong pantabang sa pagdangog; asin sinisiyasat ninda an balukag sa pakpak nin mga butbut kuwaw, tanganing maparahay pa an mga eroplanong haros dai naheheling sa radar. Alagad dawa gurano pang paghihingoa an gibohon nia, dai nanggad makokopya kan tawo an perpektong orihinal na mga disenyo na yaon sa naturalesa. An librong Biomimicry​—Innovation Inspired by Nature nagsasabi: “Nagibo kan nabubuhay na mga bagay an gabos na gusto niatong gibohon, na dai nagkokonsumo nin labi-labing krudo, dai nag-aati sa planeta, o dai isinasapeligro an saindang ngapit.” Kadonongan nanggad ini!

10. Taano ta bakong makatanosan na deharan an pag-eksister nin sarong Dakulang Kagdisenyo? Iilustrar.

¹⁰ Baga man tumingag kamo sa kalangitan o pagmasdan nindo an mga linalang digdi mismo sa daga, malinaw an ebidensia na may Kaglalang. (Jeremias 10:12) Maninigo kitang umoyon nin bilog na puso sa langitnon na mga linalang na nagkukurahaw: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay.” (Kapahayagan 4:11) Pero, dai naheheling kan dakol na sientista an ebidensia paagi sa ‘mga mata kan saindang puso,’ maski ngani tibaad magngalas sinda sa pagkadisenyo kan mga bagay na naheheling ninda paagi sa mga mata kan saindang hawak. (Efeso 1:18) Ikakailustrar ta iyan nin arog kaini: An paghanga sa gayon asin disenyo na manonompongan sa naturalesa asin an pagdehar sa pag-eksister nin sarong Dakulang Kagdisenyo siring nanggad kabakong makatanosan nin paghanga sa sarong magayonon na ipininta pero kadungan kaiyan dinedeharan an pag-eksister kan pintor na nagpangyaring magin sarong obra maestra an sarong blankong pinipintahan na tela. Bakong makangangalas na sinabing ‘mayo nin sarahotan’ an mga habong magtubod sa Dios!

Dakol an Ilinalagalag kan “Butang mga Parakabit”

11, 12. Sa anong suposisyon nakabasar an doktrina na pagtalaga antes pa, asin ano an nagpapaheling na dai nagpapamuraway sa Dios an doktrinang ini?

¹¹ An dakol na relihiosong tawo sinserong naniniwala na nagtatao nin kamurawayan sa Dios an saindang paagi nin pagsamba. (Roma 10:​2, 3) Minsan siring, an relihion sa pankagabsan saro pang kabtang kan sosyedad nin tawo na sa katunayan nakaolang sa minilyon na tawo na magpamuraway sa Dios. Taano man? Tokaron niato an duwang paagi.

¹² Enot, iniinaan kan relihion an kamurawayan nin Dios paagi sa falsong mga katokdoan. Helinga bilang halimbawa an katokdoan na pagtalaga antes pa. An doktrinang ini nakabasar sa suposisyon na huling an Dios may kapangyarihan na aramon an ngapit, siertong inaram na nia antes pa an kaaabtan kan gabos na bagay. Sa siring, an pagtalaga antes pa nagsusuherir na itinalaga na nin Dios kaidto pa an ngapit​—marahay o maraot​—kan gabos na indibiduwal. Segun sa ideyang ini, an Dios an responsable sa gabos na pagdusa asin karatan sa kinaban ngonyan. Dai nanggad nagpapamuraway sa Dios kun ibinabasol sa saiya an tama sanang ibasol sa saiyang pangenot na Kaiwal, si Satanas, an inaapod kan Biblia na “an namamahala sa kinaban”!​—Juan 14:30; 1 Juan 5:19.

13. Taano ta kamangmangan na isipon na dai kayang kontrolon nin Dios an saiyang kakayahan na aramon an ngapit? Iilustrar.

¹³ An pagtalaga antes pa sarong katokdoan na bakong sono sa Kasuratan na nagpapakaraot sa Dios. Ipinapareho kaiyan an kaya niang gibohon sa talagang ginigibo nia. An bagay na kaya nin Dios na maaraman antes pa an mga mangyayari malinaw na sinasabi sa Biblia. (Isaias 46:​9, 10) Minsan siring, bakong makatanosan na isipon na dai nia kayang kontrolon an saiyang kakayanan na aramon an  ngapit o na sia an responsable sa gabos na kinakaabtan. Sa pag-ilustrar: Ipamugtak ta baga na kamo makosogon sa pisikal. Huli daw kaiyan gugustohon na nindong alsahon an lambang maheling nindong magabat na bagay? Siempre dai! Siring man, an pagkaigwa kan kakayahan na aramon an ngapit dai nag-oobligar sa Dios na aramon o italaga antes pa an gabos na bagay. May pinipili asin nasa sadiring desisyon an paggamit nia nin kakayahan na makaaram antes pa. * Malinaw nanggad, dai nagpapamuraway sa Dios an falsong mga katokdoan, kaiba na an pagtalaga antes pa.

14. Sa anong paagi hinalean nin onra kan establisadong relihion an Dios?

¹⁴ An ikaduwang paagi na hinahalean nin onra kan establisadong relihion an Dios iyo an paggawe kan mga parasunod kaiyan. Kahagadan sa mga Kristiano na sunodon an katokdoan ni Jesus. Kabilang sa iba pang bagay, tinokdoan ni Jesus an saiyang mga parasunod na “magkaminorootmootan” asin magdanay na “bakong kabtang kan kinaban.” (Juan 15:12; 17:14-16) Kumusta man an mga miembro kan klero nin Kakristianohan? Sinunod daw talaga ninda an mga katokdoan na idto?

15. (a) Ano an rekord kan klero kun dapit sa mga guerra kan mga nasyon? (b) Ano an nagin epekto sa minilyon na tawo kan paggawe kan klero?

¹⁵ Estudyare an rekord kan klero kun dapit sa guerra. Sinuportaran, kinonsinte, pinangenotan pa ngani ninda an dakol na guerra kan mga nasyon. Binendisyonan ninda an mga soldados asin tinawan nin katanosan an paggadan. Napipiritan kitang maghapot, ‘Dai lamang daw nagsabong sa isip kan mga klerigong idto na an mga kapareho ninda klerigo sa ibong na lado iyo man an ginigibo?’ (Helingon an kahon na “Siisay an Kinakampihan nin Dios?”) An klero dai nagpapamuraway sa Dios kun hinihingako ninda na sinusuportaran nia sinda sa madugong mga guerra; ni pinapamuraway man sia ninda kun sinasabi ninda na lipas na sa panahon an mga pamantayan sa Biblia asin kinokonsinte ninda an ano man na klase nin seksuwal na inmoralidad. Sinda nagpapagirumdom nanggad sa sato kan mga namomoon sa relihion na inapod ni Jesus na “mga paragibo nin katampalasanan” asin “butang mga parakabit”! (Mateo 7:15-23; 15:14) An paggawe kan klero nagin dahelan na lumipot an pagkamoot sa Dios nin minilyon na tawo.​—Mateo 24:12.

Sairisay Talaga an Nagtatao nin Kamurawayan sa Dios?

16. Tanganing masimbag an hapot na kun sairisay talaga an nagtatao nin kamurawayan sa Dios, taano ta maninigo niatong konsultahon an Biblia?

¹⁶ Kun an prominente asin maimpluwensiang mga tawo sa kinaban sa pankagabsan dai nagtao nin kamurawayan sa Dios, kun siring sairisay talaga an naggigibo kaiyan? Tanganing masimbag an hapot na iyan, maninigo niatong konsultahon an Biblia. Total, may deretso an Dios na sabihon kun paano sia papamurawayon, asin itinao nia an mga pamantayan sa saiyang Tataramon, an Biblia. (Isaias 42:8) Estudyaran niato an tolong paagi nin pagpamuraway sa Dios, na sa kada saro kaiyan sinisimbag an hapot na kun sairisay ngonyan an talagang naggigibo kaiyan.

17. Paano ipinarisa ni Jehova mismo na mahalagang marhay na aspekto kan saiyang kabotan an pagpamuraway kan saiyang ngaran, asin sairisay ngonyan an nag-oomaw sa ngaran nin Dios sa bilog na daga?

¹⁷ Enot, mapapamuraway niato an Dios paagi sa pag-omaw sa saiyang ngaran. An bagay na mahalagang marhay na aspekto kan kabotan nin Dios an  paggibo kaiyan risang-risa sa sinabi ni Jehova ki Jesus. Nagkapirang aldaw bago sia magadan, namibi si Jesus: “Ama, pamurawaya an saimong ngaran.” Dangan sarong tingog an nagsimbag: “Iyan pinamuraway ko na asin papamurawayon ko liwat iyan.” (Juan 12:28) Daing duda na an nagtataram iyo si Jehova mismo. Basado sa saiyang simbag, malinaw na mahalaga sa saiya an pagpamuraway kan saiyang ngaran. Kun siring, sairisay ngonyan an nagpapamuraway ki Jehova paagi sa pagpamidbid kan saiyang ngaran asin pag-omaw kaiyan sa bilog na daga? An Mga Saksi ni Jehova, asin ginigibo ninda iyan sa 235 kadagaan!​—Salmo 86:​11, 12.

18. Paano niato mamimidbid an mga nagsasamba sa Dios sa “katotoohan,” asin anong grupo an nagtotokdo kan katotoohan sa Biblia sa laog nin labi nang sarong siglo?

¹⁸ Ikaduwa, mapapamuraway niato an Dios paagi sa pagtokdo kan katotoohan manongod sa saiya. Sinabi ni Jesus na an tunay na mga parasamba ‘masamba sa Dios sa katotoohan.’ (Juan 4:24) Paano niato mamimidbid an mga nagsasamba sa Dios sa “katotoohan”? Siertong hinahaboan ninda an mga doktrina na dai nakabasar sa Biblia asin na minimisrepresentar an Dios asin an saiyang kabotan. Imbes, dapat nindang itokdo an dalisay na mga katotoohan kan Tataramon nin Dios, kaiba an minasunod: Si Jehova an Kaharohalangkaweng Dios, asin sia sana an maninigo sa kamurawayan kan posisyon na ini (Salmo 83:18); si Jesus an Aki nin Dios asin an ninombrahan na Namamahala sa Mesiyanikong Kahadean nin Dios (1 Corinto 15:​27, 28); an Kahadean nin Dios an masantipikar sa ngaran ni Jehova asin maotob kan saiyang katuyohan para sa dagang ini asin sa mga tawo na nag-eerok dian (Mateo 6:​9, 10); an maogmang bareta manongod sa Kahadean na ini dapat na ihulit sa bilog na daga. (Mateo 24:14) Sa laog nanggad nin labi nang sarong siglo, sarong grupo sana an maimbod na nagtotokdo kan siring na mahalagang marhay na mga katotoohan​—an Mga Saksi ni Jehova!

19, 20. (a) Taano ta puedeng magtao nin kamurawayan sa Dios an marahay na paggawe nin sarong Kristiano? (b) Anong mga hapot an makakatabang sa sato na mamidbid kun sairisay ngonyan an nagpapamuraway sa Dios paagi sa pagpapadanay nin marahay na paggawe?

¹⁹ Ikatolo, mapapamuraway niato an Dios paagi sa pamumuhay na kaoyon kan saiyang mga pamantayan. Si apostol Pedro nagsurat: “Papagdanayon na marahay an saindong gawe-gawe sa tahaw nin mga nasyon, tanganing, sa bagay na ipinagtataram ninda kontra sa saindo na garo baga kamo naggibo nin maraot, tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.” (1 Pedro 2:12) An paggawe nin sarong Kristiano nagpapabanaag kan saiyang pagtubod. Kun maheling iyan kan mga nagmamasid​—an boot sabihon, kun maheling ninda na an marahay na paggawe kan Kristiano direktang resulta kan saiyang pagtubod​—iyan nagtatao nin kamurawayan sa Dios.

²⁰ Sairisay ngonyan an nagpapamuraway sa Dios paagi sa pagpapadanay nin marahay na paggawe? Bueno, anong relihiosong grupo an inomaw kan dakol na gobyerno huli sa pagigin matoninong, makinuyog sa ley na mga siudadano na nagbabayad nin buhis? (Roma 13:​1, 3, 6, 7) Arin na banwaan an midbid sa bilog na kinaban huli sa pagkasararo ninda kan saindang mga kapagtubod​—pagkasararo na mas makosog kisa rasyal, nasyonal, asin etnikong mga pagkakalaen? (Salmo 133:1; Gibo 10:​34, 35) Anong grupo an midbid sa bilog na kinaban huli sa saindang gibohon na pagtotokdo sa Biblia na nag-eenkaminar nin paggalang sa ley, mga prinsipyo sa buhay pampamilya, asin moralidad sa Biblia? Sarong grupo sana an nagtatao nin ebidensia paagi sa saindang marahay na paggawe sa mga bagay na ini asin sa iba pang kabtang​—an Mga Saksi ni Jehova!

Nagtatao daw Kamo nin Kamurawayan sa Dios?

21. Taano ta maninigo niatong pensaron kun baga kita personal na nagtatao nin kamurawayan ki Jehova?

²¹ Maninigong ihapot kan lambang saro sato, ‘Ako daw personal na nagtatao nin kamurawayan ki  Jehova?’ Segun sa Salmo 148, an kadaklan na linalang nagtatao nin kamurawayan sa Dios. An mga anghel, an pisikal na kalangitan, an daga asin an mga linalang na hayop na yaon dian​—gabos sinda nag-oomaw ki Jehova. (Bersikulo 1-10) Makamomondo nanggad na an kadaklan na tawo ngonyan dai! Paagi sa pamumuhay na nagtatao nin kamurawayan sa Dios, nagigin kaoyon kamo kan gabos na iba pang linalang na nag-oomaw ki Jehova. (Bersikulo 11-13) Mayo na nin mas marahay pang paagi na magagamit nindo an saindong buhay.

22. Paagi sa pagtao nin kamurawayan ki Jehova, sa anong mga paagi kamo nagkakamit nin bendisyon, asin ano an maninigo nindong magin determinasyon?

²² Paagi sa pagtao nin kamurawayan ki Jehova, kamo nagkakamit nin bendisyon sa dakol na paagi. Mantang nagsasagibo kamo nin pagtubod sa atang na pantubos ni Cristo, kamo nakikipag-ulian sa Dios asin nagkakamit nin matoninong asin kapakipakinabang na relasyon sa saindong langitnon na Ama. (Roma 5:10) Mientras na naghahanap kamo nin mga dahelan tanganing magtao nin kamurawayan sa Dios, kamo nagigin mas positibo asin mapag-apresyar. (Jeremias 31:12) Kun siring, nasa kamugtakan kamo na tabangan an iba na magkaigwa nin maogma, nakakakontentong buhay, na paagi kaiyan kamo man mismo nakakaeksperyensia nin mas dakulang kaogmahan. (Gibo 20:35) Mapabilang logod kamo sa mga marigon an determinasyon na magtao nin kamurawayan sa Dios​—ngonyan asin sagkod lamang!

[Mga Nota sa Ibaba]

Nagigirumdoman daw Nindo?

• Taano ta masasabi niato na an mga sientista sa pankagabsan dai nakatabang sa mga tawo na pamurawayon an Dios?

• Sa anong duwang paagi na naolang kan establisadong relihion an mga tawo na magtao nin kamurawayan sa Dios?

• Sa anong mga paagi niato mapapamuraway an Dios?

• Taano ta maninigo nindong pensaron kun baga kamo personal na nagtatao nin kamurawayan ki Jehova?

[Mga Hapot Para sa Pag-adal]

[Kahon sa pahina 12]

“Siisay an Kinakampihan nin Dios?”

Nagigirumdoman nin sarong lalaki na dating nasa Aviacion Militar kan Alemania durante kan Guerra Mundial II alagad kan huri nagin saro sa Mga Saksi ni Jehova:

“An nakapurisaw sa sako durante kan mga taon na idto nin guerra . . . iyo an maheling an mga klerigo nin haros gabos na denominasyon​—Katoliko, Luterano, Episcopal, asin iba pa​—na binebendisyonan an mga eroplano asin an mga tripulante kaiyan bago sinda lumupad sa mga misyon tanganing iholog an saindang mga bomba. Sa parate hinohorophorop ko, ‘Siisay an kinakampihan nin Dios?’

“An mga soldados na Aleman nagsusulot nin paha na may ebilya na inukitan nin mga tataramon na Gott mit uns (An Dios nasa kaibahan niato). Alagad inisip-isip ko, ‘Taano man ta dai makampi an Dios sa mga soldados sa ibong na lado na karelihion mi asin namimibi sa iyo man sanang Dios?’”

[Ritrato sa pahina 10]

Sa bilog na daga, an Mga Saksi ni Jehova tunay nanggad na nagtatao nin kamurawayan sa Dios