Estorya nin Buhay

Sarong Edukasyon na Nagpapadagos sa Bilog na Buhay

ISINAYSAY NI HAROLD GLUYAS

Minsan ngani labing 70 taon na an nakaagi nagigirumdoman ko pa an sarong pangyayari kan ako aki pa. Nakatukaw ako sa kusina ni Nanay, na nakaheling sa sarong pakete na may nakasurat na “Ceylon Tea.” May retrato man iyan nin nagkapirang babae na naggugutol nin mga dahon nin tsa sa matubang asin berdeng kaomahan sa Ceylon (Sri Lanka na ngonyan). An tanawon na ini, na laen na marhay sa samong marang erokan sa Timog na Australia, nakapukaw kan sakong imahinasyon. Abaa kagayon asin kanakakaogma gayod na nasyon an Ceylon! Mayo lamang akong kaaram-aram kaidto na gagamiton ko an 45 taon kan sakong buhay bilang misyonero sa magayonon na islang iyan.

KAN Abril 1922, namundag ako sa sarong kinaban na laen na marhay sa ngonyan. Kinukultibar kan sakong pamilya an sarong napapasuway na oma nin tipasi na harani sa puerang banwaan nin Kimba, na nasa tahaw kan mahiwas na kontinente nin Australia asin timog na sagkodan kan dakulaon na desierto sa puerang lugar. Iyan peligrosong buhay, na kalabot an danay na pakikipaglaban sa tigmara, peste nin mga insekto, asin sobrang init. An sakong ina mahigos na nagtatrabaho tanganing asikasohon si Tatay asin kaming anom na aki sa sarong istaran sa kadlagan na sa katunayan sarong payag-payag na gibo sa sim.

Pero, para sako an puerang lugar iyo an lugar nin katalingkasan asin kaogmahan. Nagigirumdoman ko an sakong pagkagulat kan ako hoben pa sa pakaheling nin mga grupo nin torilyo na rinaradas an kadlaganon na mga palongpong o tinatakopan kan naghahagubuhob na bagyo nin mahibog na alpog an puerang lugar. Kaya an sakong edukasyon sa buhay  talagang haloy nang nagpoon bago pa ako nagpoon na mag-eskuela sa sadit asin sasaro an maestrang eskuelahan na 5 kilometros an linalakaw hale sa harong.

Relihioso an sakong mga magurang, minsan ngani nungka sindang nagsisimba​—sa pangenot huli ta harayo an samong oma sa banwaan. Minsan siring, kan enot na mga taon nin 1930, si Nanay nagpoon na magdangog sa mga diskurso sa Biblia ni Judge Rutherford, na ibinobrodkast kada semana sa sarong estasyon nin radyo sa Adelaide. An paghona ko si Judge Rutherford sarong parahulit sa Adelaide, asin daing gayo ako interesado. Alagad kada semana galagang hinahalat ni Nanay an mga brodkast ni Rutherford asin atentong nagdadangog mantang an saiyang boses nagkikirikiti sa samong lumang radyong de pila.

Sarong hapon na mainit asin maalpog, may puminondong sarong pik-ap sa atubangan kan samong harong, asin duwang posturadong lalaki an buminaba. Mga Saksi ni Jehova sinda. Naghinanyog si Nanay sa mensahe ninda asin nagkontribwir para sa nagkapirang libro, na tolos-tolos niang pinonan na basahon. Hararom nanggad an nagin epekto sa saiya kan mga librong ini kaya dai nahaloy pinakiolayan nia si Tatay na ipagmaneho sia sa mga kataed tanganing makaolay nia sinda manongod sa nanonodan nia.

An Pakinabang kan Positibong mga Impluwensia

Dai nahaloy pakatapos kaini, huli sa masakit na mga kamugtakan sa puerang lugar, napiritan kaming bumalyo sa siudad nin Adelaide, na 500 kilometros an rayo. An samong pamilya nagpoon na makiasosyar sa mga Saksi ni Jehova sa Kongregasyon nin Adelaide asin uminoswag sa espirituwal. Huli sa samong pagbalyo napondo man an sakong pormal na edukasyon. Natapos ako sa pag-eskuela kan ako 13 anyos sana, kan matapos ko an ikapitong grado. Igwa ako nin ugale na pinapapasilpasil sana an buhay, na puede kutanang marhay na nakaparayo sako sa espirituwal na mga pinag-aaabot kun bakong huli sa tabang nin nagkapirang marahayon na mga tugang na lalaki​—mga payunir, o bilog na panahon na mga ministro​—na nagpaheling nin personal na interes sa sako.

Sa pag-agi nin panahon, an impluwensia kan maigot na mga tugang na ini nakapukaw sa sakong garo torog na espirituwalidad. Ikinaogma kong makaibanan sinda asin hinangaan ko an saindang kahigosan. Kaya kan enkaminaron an paglaog sa bilog na panahon na paglilingkod paagi sa sarong anunsio sa sarong kombension na ginibo sa Adelaide kan 1940, nabigla ako kan isinumitir ko an sakong ngaran. Dai pa ngani ako bautisado kan panahon na idto asin kakadikit pa an eksperyensia ko sa paghuhulit. Minsan siring, pakalihis nin pirang aldaw, inimbitaran akong umiba sa sarong sadit na grupo nin mga payunir sa Warrnambool, sarong banwaan na nagkapirang gatos na kilometros hale sa Adelaide, sa kaharaning estado nin Victoria.

Sa ibong nin pagpoon na ini na nagduduwaduwa pa, dai nahaloy napatalubo ko an pagkamoot sa ministeryo sa langtad, sarong pagkamoot na ikinakaogma kong sabihon na dai luminuya sa pag-agi nin mga taon. Sa katunayan, iyan an panahon nin dakulang pagbago para sako, asin nagpoon akong magkaigwa nin tunay na pag-oswag sa espirituwal. Nanodan ko an halaga nin pagigin dayupot sa mga may pagkamoot sa espirituwal na mga bagay.  Nadiskobre ko na an marahay na impluwensia ninda puedeng makapaluwas kan pinakamarahay sa sato ano man an inadalan niato asin na an mga leksion na nanodan niato puede niatong pakinabangan sa bilog na buhay.

Pinakosog Paagi sa mga Pagbalo

Dai pa sana nahahaloy poon kan ako maglingkod bilang payunir kan ipinagprohibir an gibohon kan Mga Saksi ni Jehova sa Australia. Nagduduwaduwa kun ano an gigibohon ko, duminolok ako sa mga tugang para sa paggiya asin sinabi ninda na bakong prohibido an pagtaram sa mga tawo manongod sa Biblia. Kaya kaiba an ibang payunir, nagpoon akong magharongharong dara an simpleng mensahe hale sa Biblia. Pinakosog ako kaini para sa mga pagbalo na padangadang na.

Pakalihis nin apat na bulan nagdesiotso anyos na ako asin ipinaapod ako tanganing magreport sa serbisyo militar. Nagtao ini sako nin oportunidad na idepensa an sakong pagtubod sa atubangan nin nagkapirang opisyal sa militar asin sarong mahistrado. Kan panahon na idto, may mga 20 tugang na lalaki sa karsel sa Adelaide huli sa neutral na paninindogan ninda, asin dai nahaloy magkairiba na kami. Ilinaag kami sa magabat na pagtrabaho, na nagtitipak nin mga gapo asin naghihirahay nin mga tinampo. Nakatabang ini sako na mapatalubo an mga kualidad na arog kan pakatagal asin determinasyon. Sa kahurihurihi, huli sa samong marahay na gawe-gawe asin marigon na paninindogan nakua mi an paggalang kan dakol sa mga guardia sa bilanggoan.

Kan ako makaluwas pakalihis nin nagkapirang bulan, ikinaogma ko an pagkaigwa giraray nin masiram na kakanon asin nagpayunir giraray ako. Minsan siring, kakadikit an makukuang kapartner sa pagpayunir, kaya hinapot ako kun puede akong maglingkod nin solo sa sarong harayong lugar nin mga paraoma sa Timog nin Australia. Uminoyon ako asin nagbiahe sakay nin barko pasiring sa Peninsula nin Yorke, na an dara sana sakong mga gamit sa paghuhulit asin sarong bisikleta. Kan mag-abot ako, itinokdo ako kan sarong interesadong pamilya sa sadit na dagosan nin mga bisita kun saen may maboot na babae na trinatar ako na garo aki nia. Kun aga, nagbibisikleta ako sa kalabaan kan maalpog na mga tinampo, na naghuhulit sa saradit na banwaan na suruwaysuway sa bilog na peninsula. Tanganing mahulitan an hararayong lugar, kun minsan nagdadagos ako kun banggi sa saradit na otel o sa mga dagosan nin mga bisita. Sa paaging ini, nagbibisikleta ako nin ginatos na kilometros asin ikinaogma an dakol na marahayon na eksperyensia. Dai ako noarin man naghadit na marhay na nagsosolo ako sa paglilingkod, asin mantang naeeksperyensiahan ko an pagmakolog ni Jehova, mas nagin dayupot ako saiya.

Pag-atubang sa mga Pakamate nin Kakulangan

Kan 1946, nakaresibi ako nin sarong surat na iniimbitaran ako sa gibohon na nagbibiahe bilang lingkod kan mga tugang (inaapod ngonyan na paraataman sa sirkito). Kalabot digdi an pagdalaw sa nagkapirang kongregasyon sa iinasignar na sirkito. Inaadmitir ko na talagang depisil para sako an mga paninimbagan sa asignasyon na ini. Sarong aldaw nadangog ko nin dai tinutuyo an sarong tugang na nagsabi, “Si Harold bakong gayong matibay na magtaram sa plataporma, alagad matibay sia sa paghuhulit.” Naenkaminar akong marhay sa komentong ini. Aram kong marhay an sakong mga limitasyon sa pagpahayag asin pag-organisar, alagad naniniwala ako na an paghuhulit an pangenot na aktibidad para sa mga Kristiano.

Kan 1947 nagkaigwa nin dakulang kaogmahan sa pagdalaw ni Tugang na Nathan Knorr asin Milton Henschel hale sa opisina prinsipal kan Mga Saksi ni Jehova sa Brooklyn. Ini an enot na pagdalaw hale sa opisina prinsipal poon kan magdalaw si Tugang na Rutherford kan 1938. Sarong dakulang kombension  an ginibo sa Sydney kadungan kan pagdalaw na ini. Arog nin dakol na ibang hoben na payunir, interesado ako sa pagsasanay bilang misyonero na iinaalok sa bago pa sanang mabukasan na Paadalan sa Biblia kan Watchtower sa Gilead sa South Lansing, Nueva York, E.U.A. Dakol sa samo na nag-atender an nag-iisip kun kahagadan sa paadalan an halangkaw na inadalan tanganing makapalista. Minsan siring, si Tugang na Knorr nagpaliwanag na kun nakakabasa kami nin sarong artikulo sa magasin na Torrengbantayan asin nagigirumdoman an importanteng mga punto, posibleng magigin mapanggana kami sa Gilead.

Nagsaboot ako na tibaad huli sa sakong limitadong edukasyon madiskualipikar ako. Nasorpresa ako, pakalihis nin nagkapirang bulan naimbitaran akong mag-aplay para sa pagsasanay sa Gilead. Pagkatapos, inako ako bilang estudyante, asin nag-atender ako sa ika-16 na klase, na ginibo kan 1950. Marahayon nanggad an eksperyensiang ini na nakapakosog na marhay sa sakong kompiansa. Pinatunayan kaini sako na an halangkaw na inadalan bakong an pangenot na bagay tanganing magin mapanggana. Imbes, an kahigosan asin pagkuyog iyo an pangenot na mga kahagadan. Inenkaminar kami kan samong mga instruktor na gibohon an samong pinakamakakaya. Mantang sinusunod ko an sadol ninda, danay akong nag-oswag asin nasabotan kong marhay an leksion.

Hale sa Marang Kontinente Pasiring sa Garo Mutyang Isla

Pagkatapos kan gradwasyon, duwa pang tugang na lalaki hale sa Australia an kaiba kong idinestino sa Ceylon (Sri Lanka na ngonyan). Nag-abot kami sa kabiserang siudad, an Colombo, kan Setyembre 1951. Mainit asin maharasahas iyan, asin manlaenlaen na bagong mga tanawon, tanog, asin alimyo an suminabat sa samo. Kan lumugsad kami sa barko, maogma akong inako kan saro sa mga misyonero na naglilingkod na sa nasyon na iyan asin itinao sako an sarong imbitasyon na ipinapaisi an sarong pampublikong pahayag na itatao sa masunod na Domingo sa plasa kan siudad. Nasorpresa ako ta nasa imbitasyon an sakong ngaran​—bilang an ispiker! Maiimahinar nindo an sakong pagkahandal. Alagad an dakol na taon na pagpapayunir ko sa Australia an nagtokdo sa sako na akoon an ano man na asignasyon na itinatao sa sako. Kaya sa tabang ni Jehova, mapanggana kong ikinatao an pahayag. Kaiba an apat na solterong tugang na yaon na sa erokan nin mga misyonero sa Colombo kan panahon na idto, nagpoon kaming tolo na atubangon an depisil na lenguaheng Sinhala asin makikabtang sa ministeryo sa langtad. Dakol an panahon na naggigibo kami nin solo, asin naoogma kami na manompongan an mga tawo sa lokal na magalang sagkod mapag-istimar. Dai nahaloy an kabilangan kan nag-aatender sa mga pagtiripon nagpoon nang dumakol.

Sa pag-agi nin panahon, nagpoon akong mag-isip nin seryoso manongod sa sarong magayon na tugang na babaeng payunir, si Sybil, na namidbid ko kan nagbiahe ako sa barko tanganing mag-atender sa Paadalan nin Gilead. Sia nagbiahe tanganing mag-atender sa internasyonal na kombension sa Nueva York. Kan huri, sia nag-atender sa ika-21 klase sa Gilead asin idinestino sa Hong Kong kan 1953. Nagdesisyon akong suratan sia, asin padagos kaming nagsuratan sagkod kan 1955 kan inibanan ako ni Sybil sa Ceylon, kun saen kami ikinasal.

An enot ming destino bilang mag-agom na misyonero iyo an Jaffna, sarong siudad na nasa porong amihanan nin Sri Lanka. Sa kabangaan kan mga taon nin 1950, an dai pagkairintindihan sa politika nagpopoon nang bangaon an mga komunidad nin Sinhala asin Tamil, na magigin dahelan nin armadong ralaban sa huring mga dekada. Kanigoan kanakakaogmang maheling an mga Saksing Sinhala asin Tamil na pinoprotehiran an lambang saro sa laog nin dakol na bulan sa sarong pagkakataon durante kan depisil na mga taon na idto! An mga  pagbalong idto an duminalisay asin nagpakosog sa pagtubod kan mga tugang.

Paghuhulit Asin Pagtotokdo sa Sri lanka

Kaipuhan an pasensia asin pagmamaigot tanganing makaadaptar sa mga komunidad nin Hindu asin Muslim. Dawa siring, nagpoon na masabotan mi an saindang kultura sagkod an saindang kawiliwiling mga kualidad. Mantang pambihirang makaheling nin mga taga ibang nasyon na nagbibiahe sa lokal na mga auto, parate kaming tinuturuhokan na may pag-usyoso. Nagdesisyon si Sybil na maghuyom na sana. Kanigoan na kagayagayahan na maheling an nag-uusyosong mga lalauogon na idto na maogmang minahuyom man!

Sa sarong pangyayari, pinapondo kami sa sarong barikada. Pakatapos na hapoton kami kan guardia kun saen kami hale asin pasaen kami, an saiyang mga hapot nagin mas personal.

“Siisay an babaeng ini?”

“Agom ko,” an simbag ko.

“Gurano na kamo kahaloy na mag-agom?”

“Walong taon.”

“Igwa kamong mga aki?”

“Mayo.”

“Pambihira! Nagpaheling na kamo sa doktor?”

Kan enot nabibigla kami sa natural na pag-usyosong ini, alagad pag-abot nin panahon minansay mi iyan na pagpaheling nin tunay na personal na interes kan lokal na mga tawo sa iba. Sa katunayan, saro iyan sa pinakakawiliwiling karakteristiko ninda. Kaipuhan sanang tumindog an saro sa pampublikong lugar sa laog nin pirang segundo tanganing may rumani asin maboot na maghapot kun anong tabang an puede niang itao.

Mga Pagbabago Asin Pagpensar

Sa nag-aging mga taon, ikinaogma mi an manlaenlaen na asignasyon bilang dagdag sa samong pagmimisyonero sa Sri lanka. Inasignaran akong maglingkod sa gibohon sa sirkito asin distrito saka bilang miembro kan Komite kan Sangang Opisina. Kan 1996, magsesetenta y singko na ako. Nagkaigwa ako nin kagayagayahan na girumdomon an labing 45 taon nin paglilingkod bilang misyonero sa Sri lanka. Sa pinakaenot na pagtiripon na inatenderan ko sa Colombo, may mga 20 katawong presente. An kabilangan na iyan uminabot na ngonyan sa labing 3,500! Minamansay niamo ni Sybil an mga namomotan na ini bilang samong espirituwal na mga aki asin makoapo. Minsan siring, dakolon pang gibohon an kaipuhan na taposon sa bilog na nasyon​—gibohon na nangangaipo nin kosog asin abilidad kan mga mas hoben sa samo. Nasa isip ini, inako mi an imbitasyon kan Namamahalang Grupo na magbalik sa Australia. Nagtaong lugar an samong paghale na makalaog an kualipikado asin mas hoben na mga mag-agom bilang mga misyonero sa Sri Lanka.

Otsenta y tres anyos na ako ngonyan, asin pareho kami ni Sybil na naggagayagaya na medyo may marahay pa kaming salud tanganing magpadagos sa samong paglilingkod bilang espesyal payunir sa dati kong lugar sa Adelaide. An samong ministeryo an nagpapadanay samo na listo an isip asin madaling makibagay. Nakatabang man iyan samo na makaadaptar giraray sa laen na marhay na pamumuhay sa nasyon na ini.

Padagos na itinatao ni Jehova an gabos ming materyal na pangangaipo, asin an mga tugang sa samong lokal na kongregasyon nagpapaheling nin dakulang pagkamoot asin pagsuportar sa samo. Kasuarin pa sana nakaresibi ako nin bagong asignasyon. Maglilingkod ako bilang sekretaryo sa samong kongregasyon. Sa siring, naaraman ko na mantang naghihingoa akong maglingkod ki Jehova na may kaimbodan, nagpapadagos an pagsasanay sa sako. Ginigirumdom an nakaaging dakol na taon, padagos akong nagngangalas na an sarong simple asin pinapapasilpasil sana an buhay na solterito na hale sa kadlagan puedeng umako nin marahayon na edukasyon na arog kaini​—saro na nagpapadagos sa bilog na buhay.

[Ritrato sa pahina 26]

Sa kasal mi, 1955

[Ritrato sa pahina 27]

Naglilingkod sa langtad kaiba si Rajan Kadirgamar, sarong lokal na tugang, kan 1957

[Ritrato sa pahina 28]

Kaiba si Sybil ngonyan