Sarong Pamana na Puede Nindong Asahan

“KUN makaresibi kamo nin notisya paagi sa koreo hale sa sarong indibiduwal na nagsasabi na may pamana kamo na dai pa kinukua, mag-ingat. Tibaad kamo pinupunteriya nin sarong tusong manloloko.”

Iyan an patanid kan Serbisyo sa Pag-inspeksion sa Koreo sa Estados Unidos na nasa Web site kaiyan. Taano man? Huli ta rinibong tawo an nakaresibi nin sarong notisya paagi sa koreo na nagsasabing, ‘An sarong paryente nindo nagadan asin may iwinalat na pamana saindo.’ Bilang resulta, dakol an nagbayad paagi sa koreo nin $30 o labi pa para sa sarong ‘report sa propiedad’ na iyo daang matokdo kun yaon saen an ipinamana asin kun paano iyan makukua. Nadesganar nanggad sinda. An gabos na hinapot nakaresibi nin pararehong report​—asin an posibilidad na magmana an siisay man nin ano man haros imposible.

Pinupukaw kan siring na pakana an natural na kamawotan nin mga tawo na makaresibi nin pamana. Pero, may pag-oyon na nasasambitan kan Biblia an mga nagtatao nin pamana sa pagsabi kaiyan na: “An tawong marahay magwawalat nin pamana sa mga aki nin mga aki.” (Talinhaga 13:22) An totoo, daing iba kundi si Jesu-Cristo mismo an nagsabi kan midbid na marhay asin pinakamamahal na mga tataramon na iyan sa saiyang Sermon sa Bukid: “Maogma an mga mahoyo: huli ta mamanahon ninda an daga.”​—Mateo 5:​5, King James Version.

An mga tataramon ni Jesus nagpapagirumdom sa sato kan ipinasabong ki Hadeng David kan suanoy na Israel na isurat mga siglo bago kaidto: “An mga mahoyo magmamana kan daga; asin sinda maoogmang marhay sa nagsosopay na katoninongan.”​—Salmo 37:​11, KJ.

“Magmamana kan daga”​—kanigoan kanakakaogmang oportunidad! Alagad makakaseguro daw kita na ini bako sanang saro pang mapandayang pakana na dinisenyo tanganing agawon sa mga tawo an sarong bagay? Iyo, makakasegurado kita. Mantang an daga kabtang kan makangangalas na linalang ni Jehova, sia bilang an Kaggibo asin Kagsadiri may legal na deretso na itao iyan sa siisay man na gusto nia. Paagi ki Hadeng David, si Jehova naggibo nin makahulang panuga na ini sa Saiyang namomotan na Aki, si Jesu-Cristo: “Hagada sako, tanganing itao ko sa saimo an mga nasyon bilang saimong mana asin an kaporoporohi kan daga bilang saimong sadiri.” (Salmo 2:8) Huli sa dahelan na ini, ilinadawan ni apostol Pablo si Jesus bilang an saro “na ninombrahan [nin Dios na] paramana kan gabos na bagay.” (Hebreo 1:2) Kun siring, lubos kitang makakasarig na kan sabihon ni Jesus na an mga mahoyo “magmamana kan daga,” ginibo nia iyan na may marahay na intension, asin sia may tamang autoridad na otobon an saiyang panuga.​—Mateo 28:18.

Kun siring, an importanteng hapot iyo an, Paano magkakatotoo an panugang iyan? Saen man na lugar kita magheling ngonyan, garo baga an mga agresibo asin mapalangkaw an nag-aasensong marhay asin kinukua an ano man na gusto  ninda. Ano pa an ipapamana sa mga mahoyo? Dugang pa, an daga dinadamat nin grabeng mga problema nin polusyon, asin an mga rekurso kaiyan inaaprobetsaran kan mga mahanab asin halipot an pananaw. Igwa pa daw ngani nin mapapakinabangan na daga na mamanahon? Iniimbitaran niamo kamo na basahon an masunod na artikulo tanganing manompongan an simbag sa mga ini asin sa iba pang importanteng mga hapot.

[Ritrato sa pahina 3]

Kamo daw tatawan nin tunay na pamana?