An Maogmang mga Lingkod ni Jehova
An Maogmang mga Lingkod ni Jehova
“Maogma idtong mga nakakamate kan saindang espirituwal na pangangaipo.”—MATEO 5:3.
1. Ano an tunay na kaogmahan, asin ano an ipinapabanaag kaiyan?
AN KAOGMAHAN sarong mahal na marhay na rogaring kan banwaan ni Jehova. An salmistang si David nagkagsing: “Maogma an banwaan na an Dios iyo si Jehova!” (Salmo 144:15) An kaogmahan sarong pakamate nin pagigin nasa marahay na kamugtakan. An pinakahararom na kaogmahan—na nakakataros sa kairairaromi kan pagkatawo niato—naggigikan sa pakaaram na kita binebendisyonan ni Jehova. (Talinhaga 10:22) An siring na kaogmahan nagpapabanaag nin dayupot na relasyon sa satong langitnon na Ama asin kan pakaaram na ginigibo niato an saiyang kabotan. (Salmo 112:1; 119:1, 2) Interesante nanggad, sinarosaro ni Jesus an siyam na dahelan na masasabing kita maogma. An pagsiyasat sa inaapod na mga kaogmahan na ini, o beatitud, na nasa artikulong ini asin sa sunod pa makakatabang sa sato na marealisar na kita puedeng magin maogma nanggad kun maimbod niatong paglilingkodan an “maogmang Dios,” si Jehova.—1 Timoteo 1:11.
Pakaaram kan Satong Espirituwal na Pangangaipo
2. Sa anong pangyayari nagtaram si Jesus manongod sa kaogmahan, asin ano an saiyang pambukas na tataramon?
2 Kan 31 C.E., itinao ni Jesus an saro sa pinakabantog na mga diskurso sa bilog na kasaysayan. Inaapod iyan na Sermon sa Bukid huli ta itinao iyan ni Jesus sa may bakilid nin bukid na dian natatanaw an Dagat nin Galilea. An Ebanghelyo ni Mateo nagsasaysay: “Kan maheling [ni Jesus] an kadaklan sia nagtukad sa bukid; asin pakatukaw nia an saiyang mga disipulo nagrani sa saiya; asin binuka nia an saiyang ngoso asin nagpoon sa pagtokdo sa sainda, na an sabi: ‘Maogma idtong mga nakakamate kan saindang espirituwal na pangangaipo, huli ta an kahadean kan kalangitan sadiri ninda.’” Sa literal na traduksion, an pambukas na mga tataramon ni Jesus nagsasabi: “Maogma an mga dukha (kun dapit) sa espiritu,” o “Maogma an mga parapakilimos nin espiritu.” (Mateo 5:1-3; Kingdom Interlinear; nota sa ibaba) An Today’s English Version nagsasabi: “Maogma an mga nakakaaram na sinda dukha sa espirituwal.”
3. Paano nakakakontribwir sa satong kaogmahan an pagigin mapakumbaba?
3 Sa saiyang sermon sa may bakilid nin bulod, sinabi ni Jesus na mas maogma nanggad an sarong tawo kun aram nia na sia may pangangaipo sa espirituwal. Huling aram na marhay ninda an saindang kamugtakan bilang makasalan, an mapakumbabang mga Kristiano nakikimaherak ki Jehova para sa saiyang kapatawadan basado sa atang na pantubos ni Cristo. (1 Juan 1:9) Sa siring nakakaeksperyensia sinda nin katoninongan sa isip asin tunay na kaogmahan. “Maogma idtong an pagrebelde pinatawad, na an kasalan tinahoban.”—Salmo 32:1; 119:165.
4. (a) Sa anong mga paagi niato ikakapaheling an pakaaram kan espirituwal na pangangaipo niato asin kan iba? (b) Ano an nakakadagdag sa satong kaogmahan kun kita nakakamate kan satong espirituwal na pangangaipo?
4 An pakaaram kan satong espirituwal na pangangaipo nagpapahiro sa sato na basahon an Biblia aroaldaw, lubos na pakinabangan an espirituwal na kakanon na itinatao sa “tamang panahon” kan “maimbod asin mapagmansay na oripon,” asin atenderan nin regular an Kristianong mga pagtiripon. (Mateo 24:45; Salmo 1:1, 2; 119:111; Hebreo 10:25) An pagkamoot sa kapwa nagpapangyari sa sato na magin may pakaaram kan espirituwal na pangangaipo kan iba asin nagpapahiro sato na magin maigot sa paghuhulit asin pagtotokdo kan maogmang bareta kan Kahadean. (Marcos 13:10; Roma 1:14-16) An paghiras kan mga katotoohan sa Biblia nagtatao sato nin kaogmahan. (Gibo 20:20, 35) An satong kaogmahan minararom pa kun hinohorophorop niato an makangangalas na paglaom sa Kahadean asin an mga bendisyon na itatao kan Kahadean na iyan. Para sa “sadangoton na aripompon” nin linahidan na mga Kristiano, an paglaom sa Kahadean nangangahulogan nin inmortal na buhay sa langit bilang kabtang kan gobyernong Kahadean ni Cristo. (Lucas 12:32; 1 Corinto 15:50, 54) Para sa “ibang karnero,” nangangahulogan iyan nin buhay na daing katapusan sa sarong paraisong daga na sakop kan gobyernong Kahadean na iyan.—Juan 10:16; Salmo 37:11; Mateo 25:34, 46.
Kun Paano Magigin Maogma an mga Nagmomondo
5. (a) Ano an boot sabihon kan pananaram na “an mga nagmomondo”? (b) Paano nararanga an siring na mga nagmomondo?
5 Garo baga nagkakasarongatan an mga tataramon sa sunod na kaogmahan na nasambitan ni Jesus. Sinabi nia: “Maogma an mga nagmomondo, huli ta sinda rarangahon.” (Mateo 5:4) Paano an sarong tawo magmomondo asin kadungan kaiyan magin maogma? Tanganing masabotan an tataramon ni Jesus, kaipuhan niatong konsideraron kun anong klaseng pagmondo an sinasabi nia. Ipinaliwanag kan disipulong si Santiago na an satong kamugtakan bilang makasalan maninigong magin sarong dahelan para magmondo. Sia nagsurat: “Hanawe nindo an saindong mga kamot, kamong mga parakasala, asin linigi nindo an saindong mga puso, kamo na mga nagduduwaduwa. Magsakit kamo asin magmondo patin magtangis. Giboha nindong magin kamondoan an saindong pagngisi, asin pagkalumbay an saindong kagayagayahan. Magpakumbaba kamo sa mga mata ni Jehova, asin papalangkawon nia kamo.” (Santiago 4:8-10) An mga talagang ikinakamondo an saindang kamugtakan bilang makasalan nararanga kun naaaraman ninda na puedeng patawadon an saindang mga kasalan kun sinda magtubod sa atang na pantubos ni Cristo asin magpaheling nin tunay na pagsolsol paagi sa paggibo kan kabotan ni Jehova. (Juan 3:16; 2 Corinto 7:9, 10) Sa siring, puede sindang magkaigwa nin mahal na marhay na relasyon ki Jehova asin magkaigwa kan paglaom na mabuhay sagkod lamang tanganing paglingkodan asin omawon sia. Nagtatao ini sa sainda nin hararom na panlaog na kaogmahan.—Roma 4:7, 8.
6. Sa anong sentido nagmomondo an nagkapira, asin paano sinda nararanga?
6 Kaiba man sa tataramon ni Jesus an mga nagmomondo huli sa makauuyam nin makuring mga kamugtakan na nangyayari ngonyan sa daga. Iinaplikar ni Jesus sa saiyang sadiri an hula sa Isaias 61:1, 2, na nagsasabi: “An espiritu kan Soberanong Kagurangnan na Jehova yaon sa sako, huli ta linahidan ako ni Jehova na magsabi kan maogmang bareta sa mga mahoyo. Isinugo nia ako sa pagpaomay sa mga nasasakitan an puso, . . . sa pagranga kan gabos na nagtatangis.” An sugong iyan aplikado man sa linahidan na mga Kristiano na yaon pa digdi sa daga, na isinasagibo iyan sa tabang kan saindang kairiba, an “ibang karnero.” An gabos nakikikabtang sa gibohon na simbolikong pagmarka sa angog “kan mga tawo na nag-aaragagha asin nag-aaragrangay huli sa gabos na makauuyam nin makuring bagay na ginigibo sa tahaw kaiyan [an apostatang Jerusalem, na naglaladawan sa Kakristianohan].” (Ezequiel 9:4) An mga nagmomondong iyan nararanga kan ‘maogmang bareta kan kahadean.’ (Mateo 24:14) Naoogma sindang maaraman na an maraot na sistema nin mga bagay ni Satanas sasalidahan sa dai na mahahaloy kan matanos na bagong kinaban ni Jehova.
Maogma an mga Mahoyo
7. Ano an bakong kahulogan kan terminong “mahoyo”?
7 Nagpadagos si Jesus sa saiyang Sermon sa Bukid na nagsasabi: “Maogma an mga mahoyo, mantang mamanahon ninda an daga.” (Mateo 5:5) An pagigin mahoyo kun beses ibinibilang na kaluyahan. Minsan siring, bakong totoo iyan. Sa pagpaliwanag kan kahulogan kan terminong trinadusir na “mahoyo,” an sarong iskolar sa Biblia nagsurat: “An pinakapambihirang karakteristiko nin tawong [mahoyo] iyo na sia tawong may lubos na pagpopogol sa saiyang sadiri. Iyan bakong kabootan na daing puersa, bakong kapadangatan na may pagkasentimental, bakong pagkakalmado na daing pakiaram. Iyan sarong kontroladong kakosogan.” Sinabi ni Jesus manongod sa saiyang sadiri: “Ako mahoyo asin may kababaan an puso.” (Mateo 11:29) Pero, makosog an boot ni Jesus sa pagsurog sa matanos na mga prinsipyo.—Mateo 21:12, 13; 23:13-33.
8. Sa ano konektadong marhay an kahoyoan, asin taano ta kaipuhan niato an kualidad na ini sa satong relasyon sa iba?
8 Kun siring, an kahoyoan konektadong marhay sa pagpopogol sa sadiri. Sa katunayan, an kahoyoan asin pagpopogol sa sadiri magkaibanan na nasambitan ni apostol Pablo kan sarosaroon nia “an mga bunga kan espiritu.” (Galacia 5:22, 23) An kahoyoan dapat na kultibaron sa tabang kan banal na espiritu. Sarong Kristianong kualidad iyan na nakakakontribwir sa pakipagkatoninongan sa mga taga luwas asin sa mga nasa laog kan kongregasyon. Si Pablo nagsurat: “Isolog nindo an mamomoton na mga pagmate nin pagdamay, kabootan, kababaan nin isip, kahoyoan, asin pakatios. Padagos kamong magpatiriostios asin sueltong magpatarawadtawadan.”—Colosas 3:12, 13.
9. (a) Taano ta bakong limitado sa satong relasyon sa ibang mga tawo an satong pagigin mahoyo? (b) Paano “mamanahon [kan mga mahoyo] an daga”?
9 Minsan siring, an kahoyoan bakong limitado sa satong relasyon sa ibang mga tawo. Paagi sa gikan sa boot na pagpasakop niato sa soberaniya ni Jehova, ipinapaheling niato na kita mahoyo. An pinakanangongorog na halimbawa sa bagay na ini iyo si Jesu-Cristo, na kan uya pa digdi sa daga nagpaheling nin kahoyoan asin lubos na pagpasakop sa kabotan kan saiyang Ama. (Juan 5:19, 30) Enot sa gabos, minana ni Jesus an daga, ta sia an nombradong Namamahala dian. (Salmo 2:6-8; Daniel 7:13, 14) Ihiniras nia an manang ini sa 144,000 na “kaibang mga paramana,” na pinili hale sa “katawohan” tanganing ‘mamahala bilang mga hade sa daga.’(Roma 8:17; Kapahayagan 5:9, 10; 14:1, 3, 4; Daniel 7:27) Pamamahalaan ni Cristo asin kan saiyang mga kaibang namamahala an minilyon na arog-karnerong mga lalaki asin babae na sa sainda maogmang maootob an makahulang salmo: “An mga mahoyo mismo makakasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan.”—Salmo 37:11; Mateo 25:33, 34, 46.
Maogma an mga Nagugutom sa Katanosan
10. Ano an sarong paagi na mababasog an mga “nagugutom asin napapaha sa katanosan”?
10 An sunod na kaogmahan na sinabi ni Jesus kan sia nagtataram sa may bakilid nin bulod sa Galilea iyo an: “Maogma an mga nagugutom asin napapaha sa katanosan, huli ta sinda mababasog.” (Mateo 5:6) Para sa mga Kristiano, si Jehova an nagtatao kan pamantayan para sa katanosan. Huli kaini, an mga nagugutom asin napapaha sa katanosan garo man sana nagugutom asin napapaha sa paggiya nin Dios. Aram ninda nin malinaw an saindang kasalan asin pagkabakong sangkap asin naghihimuyawot na magin kawiliwili sa atubangan ni Jehova. Kanigoan an kaogmahan ninda kan maaraman ninda sa Tataramon nin Dios na kun sinda masolsol asin humagad nin kapatawadan basado sa atang na pantubos ni Cristo, sinda mapapalinya sa mga magkakamit nin matanos na kamugtakan sa atubangan nin Dios!—Gibo 2:38; 10:43; 13:38, 39; Roma 5:19.
11, 12. (a) Paano magkakamit nin katanosan an linahidan na mga Kristiano? (b) Paano pinanigoan an pagkapaha sa katanosan kan kairiba kan mga linahidan?
11 Sinabi ni Jesus na magigin maogma an mga siring, huli ta sinda “papanigoan.” (Mateo 5:6, Kingdom Interlinear) An linahidan na mga Kristiano na inapod tanganing ‘mamahala bilang hade’ kaiba ni Cristo sa langit ipinapahayag na “matanos para sa buhay.” (Roma 5:1, 9, 16-18) Pinaniaki sinda ni Jehova, sa siring inaampon sinda bilang espirituwal na mga aki. Sinda nagigin mga kaibang paramana ni Cristo, na inapod tanganing magin mga hade asin saserdote sa saiyang gobyernong Kahadean sa langit.—Juan 3:3; 1 Pedro 2:9.
12 An kairiba kan mga linahidan dai pa ipinapahayag na matanos para sa buhay. Minsan siring, may katanosan man sinda na itinao sa sainda ni Jehova paagi sa saindang pagtubod sa pinabolos na dugo ni Cristo. (Santiago 2:22-25; Kapahayagan 7:9, 10) Sinda ibinibilang na matanos bilang mga katood ni Jehova na ililigtas sa panahon kan “dakulang kahorasaan.” (Kapahayagan 7:14) An saindang pagkapaha sa katanosan orog pang papanigoan kun, sa pagsakop kan “bagong kalangitan,” sinda magin kabtang na kan bagong daga na duman “magdadanay an katanosan.”—2 Pedro 3:13; Salmo 37:29.
Maogma an mga Maheherakon
13, 14. Sa anong praktikal na mga paagi maninigo niatong ipaheling na kita maheherakon, asin ano an pakinabang para sa sato?
13 Sa pagpadagos kan saiyang Sermon sa Bukid, si Jesus nagsabi: “Maogma an mga maheherakon, huli ta sinda man magkakamit nin pagkaherak.” (Mateo 5:7) Sa legal na sentido, an pagkaherak nanonongod sa pagkaherak (sa Ingles, “clemency”) kan huwes na dai ipinapataw sa sarong nagkasala an pinakamagabat na padusa na itinotogot kan ley. Minsan siring, sa pagkagamit sa Biblia, an orihinal na mga terminong trinadusir na “pagkaherak” nangorognang nanonongod sa sarong kapahayagan nin maboot na konsiderasyon na nagtatao nin kaginhawahan sa mga daing sukat. Sa siring, an mga maheherakon ipinapaheling sa gibo an saindang pagkaherak. An ilustrasyon ni Jesus manongod sa tataong makipagkapwa-tawong Samaritano nagtatao nin marahay na halimbawa nin sarong indibiduwal na “guminawe na may pagkaherak” sa sarong tawong nangangaipo.—Lucas 10:29-37.
14 Tanganing maeksperyensiahan an kaogmahan na resulta nin pagigin maheherakon, kaipuhan na kita gumibo nin positibong mga gibo nin kabootan sa mga nangangaipo. (Galacia 6:10) Si Jesus naherak sa mga tawong naheling nia. “Sia napahiro nin pagkaherak sa sainda, ta garo sinda mga karnero na mayo nin pastor. Asin sia nagpoon na magtokdo sa sainda nin dakol na bagay.” (Marcos 6:34) Aram ni Jesus na an espirituwal na pangangaipo nin katawohan an pinakanangongorog. Puede man niatong ipaheling na kita maheherakon paagi sa paghiras sa iba kan pinakakaipuhan ninda—an ‘maogmang bareta kan Kahadean.’ (Mateo 24:14) Puede man kitang mag-alok nin praktikal na tabang sa mas may edad nang mga kapwa Kristiano, mga balo, asin ilo asin “magtaram na may pagranga sa mga kalag na nagmomondo nin makuri.” (1 Tesalonica 5:14; Talinhaga 12:25; Santiago 1:27) Bako sanang matao ini nin kaogmahan sa sato kundi paagi kaiyan aakoon man niato an pagkaherak ni Jehova.—Gibo 20:35; Santiago 2:13.
Dalisay an Puso Asin Mapagpatoninong
15. Paano kita puedeng magkaigwa nin dalisay na puso asin magin mapagpatoninong?
15 Sinabi ni Jesus an ikaanom asin ikapitong kaogmahan siring kan minasunod: “Maogma an mga dalisay an puso, huli ta maheheling ninda an Dios. Maogma an mga mapagpatoninong, ta sinda aapodon na ‘mga aki nin Dios.’” (Mateo 5:8, 9) An dalisay na puso bako sanang malinig sa moral kundi daing digta man sa espirituwal asin bilog an debosyon ki Jehova. (1 Cronica 28:9; Salmo 86:11) An termino sa orihinal na lenguahe na trinadusir na “mapagpatoninong” sa literal nangangahulogan nin “parapatoninong.” An mapagpatoninong namumuhay nin matoninong kaiba kan saindang Kristianong mga tugang asin, sagkod sa mahihimo ninda, sa saindang mga kataed. (Roma 12:17-21) ‘Hinahanap ninda an katoninongan asin pinagmamaigotan na gibohon iyan.’—1 Pedro 3:11.
16, 17. (a) Taano ta inaapod na “mga aki nin Dios” an mga linahidan, asin paano ninda ‘naheheling an Dios’? (b) Paano ‘naheheling’ kan “ibang karnero” an Dios? (c) Paano asin noarin, sa pinakalubos na paagi, magigin “mga aki nin Dios” an “ibang karnero”?
16 An mga mapagpatoninong na dalisay an puso pinanugaan na sinda “aapodon na ‘mga aki nin Dios’” asin “maheheling ninda an Dios.” An linahidan na mga Kristiano pinaniaki sa espiritu asin inaampon ni Jehova bilang “mga aki” mantang nasa daga pa. (Roma 8:14-17) Kun sinda buhayon na liwat tanganing makaibanan ni Cristo sa langit, maglilingkod sinda sa presensia ni Jehova asin talagang makakaheling sa Saiya.—1 Juan 3:1, 2; Kapahayagan 4:9-11.
17 An mapagpatoninong na “ibang karnero” naglilingkod ki Jehova sa irarom kan Marahay na Pastor, si Cristo Jesus, na nagin an saindang “Amang Daing Sagkod.” (Juan 10:14, 16; Isaias 9:6) An mga mapangganang makakapasar sa pangultimong pagbalo pakatapos kan Milenyal na Paghade ni Cristo aamponon bilang daganon na mga aki ni Jehova asin “magkakaigwa kan mamuraway na katalingkasan kan mga aki nin Dios.” (Roma 8:21; Kapahayagan 20:7, 9) Sa pag-antisipar kaini, inaapod ninda si Jehova na saindang Ama, huling idinudusay ninda sa saiya an saindang buhay, na minimidbid sia bilang an saindang Paratao nin Buhay. (Isaias 64:8) Arog ni Job asin Moises kan suanoy, ‘naheheling ninda an Dios’ paagi sa saindang mga mata nin pagtubod. (Job 42:5; Hebreo 11:27) Paagi sa ‘mga mata kan saindang puso’ asin paagi sa tamang kaaraman manongod sa Dios, namamansayan ninda an makangangalas na mga kualidad ni Jehova asin naghihingoang arogon sia paagi sa paggibo kan saiyang kabotan.—Efeso 1:18; Roma 1:19, 20; 3 Juan 11.
18. Kaoyon kan enot na pitong kaogmahan na sinabi ni Jesus, siisay an nakakanompong nin tunay na kaogmahan ngonyan?
18 Naheling niato na an mga nakakamate kan saindang espirituwal na pangangaipo, an mga nagmomondo, an mga mahoyo, an mga nagugutom asin napapaha sa katanosan, an mga maheherakon, an mga dalisay an puso, asin an mga mapagpatoninong nakakanompong nin tunay na kaogmahan sa paglilingkod ki Jehova. Pero, sinda pirmeng napapaatubang sa pagtumang, paglamag pa ngani. Nakakaraot daw ini sa saindang kaogmahan? Totokaron an hapot na iyan sa sunod na artikulo.
Bilang Repaso
• Anong kaogmahan an naeeksperyensiahan kan mga nakakamate kan saindang espirituwal na pangangaipo?
• Sa anong mga paagi nararanga an mga nagmomondo?
• Paano niato ipinapaheling an kahoyoan?
• Taano ta maninigo kitang magin maheherakon, dalisay an puso, asin mapagpatoninong?
[Mga Hapot Para sa Pag-adal]
[Ritrato sa pahina 10]
“Maogma idtong mga nakakamate kan saindang espirituwal na pangangaipo”
[Mga Ritrato sa pahina 10]
“Maogma an mga nagugutom asin napapaha sa katanosan”
[Ritrato sa pahina 10]
“Maogma an mga maheherakon”