Kun Ano an Kahulogan Para Sato kan Kapakumbabaan ni Jehova

SI David sarong tawo na nag-agi nin kasakitan. Naeksperyensiahan nia an pagmaltrato sa kamot ni Hadeng Saul, an maimon niang panugangan na lalaki. Tolong beses na prinobaran ni Saul na gadanon si David paagi sa budyak asin sa laog nin dakol na taon linapag sia nin daing ontok, kaya napiritan siang magin sarong dulag. (1 Samuel 18:11; 19:10; 26:20) Pero, pinatunayan ni Jehova na sia nasa kampi ni David. Ilinigtas sia ni Jehova bako sanang ki Saul kundi sa iba pang mga kaiwal. Kun siring, masasabotan niato an sentimiento ni David, na ipinahayag paagi sa awit: “Si Jehova an sakuyang kantil asin an sakuyang kuta patin an Paratao nin dudulagan para sa sako.  . . Itatao mo [Jehova] sako an saimong kalasag nin kaligtasan, asin an saimong kapakumbabaan an minagibo sako na dakula.” (2 Samuel 22:​2, 36) Naabot ni David an sarong sokol nin kadakulaan sa Israel. Kun siring, paano napalabot an kapakumbabaan ni Jehova?

Kun nasasambitan kan Kasuratan si Jehova bilang mapakumbaba, dai kaiyan boot sabihon na may limitasyon sia sa ano man na paagi o na may nakakasakop sa saiya. Imbes, ipinapaheling kan magayon na kualidad na ini na igwa sia nin hararom na pagkaherak sa mga tawo na sinserong nagmamaigot na kamtan an saiyang pag-oyon asin kinakaherakan sinda. Sa Salmo 113:​6, 7, mababasa niato: “[Si Jehova] nagpapakanghababa na helingon an langit asin daga, na binabangon an hamak sa mismong kabokabo.” An saiyang ‘pagpapakanghababa’ nangangahulogan na “minaduko sia tanganing helingon” o na “nagpapakumbaba Sia tanganing helingon.” (Today’s English Version; Young’s Literal Translation of the Holy Bible) Kaya hale sa kalangitan si Jehova mismo ‘nagduko,’ o ‘nagpakumbaba,’ tanganing magtaong atension ki David, sarong bakong sangkap alagad mapakumbabang tawo na nagmawot na paglingkodan an Dios. Kun siring, inaasegurar giraray kita ni David: “Si Jehova halangkaw, alagad naheheling nia an mapakumbaba.” (Salmo 138:6) An maheherakon asin mapasensiang paagi nin pagtratar ni Jehova ki David maninigong parigonon an boot kan gabos na nagmamawot na gibohon an kabotan nin Dios.

Dawa ngani yaon ki Jehova bilang Soberano an pinakamamuraway na posisyon sa uniberso, andam siang makipagkatood sa kada saro sa sato. Nagtatao ini sa sato nin kompiansa na puede niatong laoman an saiyang dai nasusudyang tabang dawa sa pinakamasakit na mga kamugtakan. Mayo nin dahelan na matakot na lilingawan nia kita. Mapadapit sa saiyang banwaan kan suanoy na Israel,  angay nanggad na inaapod si Jehova bilang an saro “na nakagirumdom sa [sainda] sa [saindang] mamondong kamugtakan: huli ta an saiyang mamomoton na kabootan sagkod sa panahon na daing talaan.”​—Salmo 136:23.

Bilang mga lingkod ni Jehova sa presenteng panahon, tibaad mag-agi kita nin kasakitan arog ni David. Tibaad mapaatubang kita sa pag-olog-olog kan mga dai nakakamidbid sa Dios, o tibaad nasasakitan kita huli sa maluyang salud o nagadanan nin namomotan. Ano man an satong kamugtakan, kun sinsero an satong puso, makakadolok kita ki Jehova sa pamibi, na hinahagad an saiyang pagkaherak. Si Jehova ‘maduko’ tanganing masdan kita asin dangogon an satong mga pamibi. An pinasabngan na salmista nagsurat: “An mga mata ni Jehova nakaturuhok sa mga matanos, asin an saiyang mga talinga nagdadangog sa saindang mga paghagad nin tabang.” (Salmo 34:15) Dai daw kaiyan pinapahiro an saindong puso tanganing ipabanaag an kawiliwiling kualidad ni Jehova nin kapakumbabaan?

[Mga Ritrato sa pahina 30]

Kun paanong dinangog nia an mga pamibi ni David, andam man si Jehova na dangogon an satong mga pamibi ngonyan