Nanggana si Samson Paagi sa Kosog ni Jehova!

AN BENGGATIBONG mga nambihag hinulwat an saiyang mga mata asin ilinaag sia sa puersahan na pagtrabaho. Dangan ilinuwas sia ninda sa harong na bilanggoan pasiring sa paganong templo tanganing magtao nin kaalingan sa kadaklan. Ipinarada sia ninda sa atubangan nin rinibong nagmamasid asin pinagkawatan ninda sia. An bilanggo bako man na kriminal ni komandante nin kalaban na hukbo. Sia sarong parasamba ki Jehova asin naglingkod bilang hokom sa Israel sa laog nin 20 taon.

Paano si Samson​—an pinakamakosog sa pisikal na tawong nabuhay kasuarin man​—napasiring sa siring na makasusupog na kamugtakan? Ikakaligtas daw sia kan saiyang ekstraordinaryong kosog? Ano an sekreto kan kosog ni Samson? Ano, kun igwa man, an manonodan niato sa estorya kan saiyang buhay?

Sia an “Mangengenot sa Pagliligtas sa Israel”

An mga aki ni Israel dakol na beses nang tuminalikod sa tunay na pagsamba. Kaya kan sinda “naggibo giraray nin maraot sa pagheling ni Jehova, . . . itinao sinda ni Jehova sa kamot kan mga Filisteo sa laog nin apat na polong taon.”​—Hokom 13:1.

An estorya ni Samson nagpoon kan magpaheling an anghel ni Jehova sa baog na agom na babae nin sarong Israelita na an ngaran Manoa asin inimpormaran sia na mangangaki sia nin sarong aking lalaki. “Mayong labaha na maagi sa saiyang payo,” an instruksion kan anghel sa saiya, “huli ta an aki magigin Nazareo nin Dios pagluwas sa tulak; asin sia an mangengenot sa pagliligtas sa Israel sa kamot kan mga Filisteo.” (Hokom 13:2-5) Bago ipinangidam si Samson, dineterminaran na ni Jehova na si Samson magkakaigwa nin espesipikong asignasyon. Poon sa pagkamundag nia, sia magigin Nazareo​—saro na pinili para sa sarong espesyal na klase nin sagradong paglilingkod.

Sia an “Angay Nanggad sa Sakong Pagheling”

Mantang nagdadakula si Samson, “padagos siang binendisyonan ni Jehova.” (Hokom 13:24) Sarong aldaw duminolok si Samson sa saiyang ama asin ina asin nagsabi: “Igwa akong naheling na babae sa Timna sa mga aking babae kan mga Filisteo, asin ngonyan kuanon nindo sia para sa sako bilang agom.” (Hokom 14:2) Imahinara an pagkabigla ninda. Imbes na patalingkason an Israel sa kamot kan mga nan-aapi, an saindang aki gustong makialyansa sa pag-agom sa sainda. Tumang sa Ley nin Dios an pagkua nin agom sa mga  parasamba sa paganong mga dios. (Exodo 34:11-16) Huli kaini, an mga magurang nagsayuma: “Mayo daw nin babae sa tahaw kan mga aking babae kan saimong mga tugang asin sa tahaw kan bilog na banwaan ko, kaya makua ka nin agom sa dai tinuring mga Filisteo?” Sa ibong kaiyan, si Samson nag-insistir: “Sia sana an kuanon mo para sa sako, huli ta sia an angay nanggad sa sakong pagheling.”​—Hokom 14:3.

Sa anong paagi na an partikular na babaeng Filisteo na ini “angay nanggad” para ki Samson? Bakong sa sentido na sia “magayon, kawiliwili, nakakaakit,” an isinusuherir kan Cyclopedia ni McClintock asin Strong, “kundi angay may koneksion sa sarong katuyohan.” May koneksion sa anong katuyohan? An Hokom 14:4 nagpapaliwanag na si Samson “naghahanap nin oportunidad tumang sa mga Filisteo.” Interesado si Samson sa babaeng idto huli sa katuyohan na iyan. Kan nasa edad na si Samson, “an espiritu ni Jehova nagpoon na pahiroon sia.” (Hokom 13:25) Kaya an espiritu ni Jehova an puersang nagmomotibar sa pambihirang paghagad ni Samson nin agom saka sa saiyang bilog na karera bilang hokom sa Israel. Nakua daw ni Samson an oportunidad na hinahanap nia? Konsideraron nguna niato kun paano sia inasegurar ni Jehova na susuportaran Nia sia.

Si Samson pasiring sa siudad kan saiyang magigin nobya, sa Timna. “Kan makaabot sia sa mga ubasan nin Timna,” an sabi kan pagkasaysay sa Kasuratan, “tara, uya! sarong may bunday na ogbon na leon an nag-uungal kan masabat sia. Dangan an espiritu ni Jehova naghiro sa saiya, kaya iyan binaak nia.” An pambihirang pagpaheling na ini nin kosog nangyari kan si Samson nagsosolo. Mayo nin mga nakaheling mismo. Ini daw an paagi nin pag-asegurar ni Jehova ki Samson na sia bilang sarong Nazareo may kakayahan na otobon an sugo na tao nin Dios? Mayong sinasabi an Biblia, alagad daing duwa-duwa na narealisar ni Samson na an siring na pambihirang puersa bakong saiya. Iyan seguradong hale sa Dios. Puede siang magsarig ki Jehova tanganing tabangan sia sa saiyang gibohon sa ngapit. Huling pinasarig kan pangyayari may labot sa leon, si Samson ‘nagpadagos sa paglugsad asin nagpoon na makipag-olay sa babae; asin sia angay pa man giraray sa saiyang pagheling.’​—Hokom 14:5-7.

Kan sa huri magbalik si Samson tanganing ipuli an babae, “suminiko sia tanganing helingon an bangkay kan leon, asin uya igwa nin bunyog nin mga alimbubuyog sa bangkay kan leon, asin tangguli.” Nagirumdoman ini, itinao ni Samson an patood na ini sa 30 Filisteo na mga abay na lalaki sa saiyang kasal: “Hale sa nagkakakan may nagluwas na makakakan, asin hale sa makosog may luminuwas na mahamis.” Kun matoodan ninda an kahulogan kan patood, tatawan sinda ni Samson nin 30 pan-irarom na gubing asin pambolos na mga gubing. Kun dai ninda matoodan, sinda an matao saiya kan iyo man sanang mga bagay. Sa laog nin tolong aldaw nagkariribong sa patood an mga Filisteo. Kan ikaapat na aldaw, napiritan sindang humaon an babae. Sinabihan  ninda sia: “Dayaon mo an saimong agom tanganing isabi nia samo kun ano an patood. Ta kun dai sosoloon mi ika asin an harong kan saimong ama.” Kanigoan karingis! Kun arog kaini an pagtratar kan mga Filisteo sa sadiri nindang mga kahimanwa, imahinara na sana an mamondong kamugtakan kan inaaping mga Israelita!​—Hokom 14:8-15.

Pinirit kan nasindak na babae si Samson na sabihon saiya an simbag. Nagpapaheling nin kadaihan nin pagkamoot asin kaimbodan ki Samson, tolos-tolos niang isinabi iyan sa mga abay na lalaki. Aram na ninda kun ano an patood, asin aram ni Samson kun taano. Sinabi nia sainda: “Kun dai nindo ipinang-arado an sakong ogbon na baka, dai nindo maaaraman kun ano an sakong patood.” Uminabot na ngonyan an oportunidad na haloy nang hinahalat ni Samson. “An espiritu ni Jehova naghiro sa saiya, kaya huminilig sia sa Askelon asin ginadan an tolong polong lalaki ninda asin kinua an hinuruba nia sainda asin itinao an pambolos na mga gubing sa mga nakatood kan patood.”​—Hokom 14:​18, 19.

An nagmotibar daw ki Samson sa ginibo nia sa Askelon iyo an pagmawot na bumalos? Dai. Iyan gibo nin Dios paagi sa pinili niang paraligtas. Paagi ki Samson, si Jehova an nagpoon nin pakikilaban tumang sa maringis na mga nan-aapi sa saiyang banwaan. An kampanyang ini mapadagos. Luminataw an sunod na oportunidad kan bisitahon ni Samson an saiyang agom.

Solo Sanang Pakikilaban

Kan bumalik sa Timna, naaraman ni Samson na an saiyang agom ipinaagom kan ama kan babae sa ibang lalaki, na naniniwala na ikinakaongis na ini ni Samson. Garo baga nakolgan an boot ni Samson. Nagdakop sia nin 300 na sora asin ginakodan an mga ini nin manduwaduwa na may karaba sa pag-oltanan kan saindang mga ikog. Kan ini binurutasan, sinolo kan mga ini an mga oma, ubasan, asin pananom na olibo, na rinaraot an tolong pangenot na pananom para sa taon na iyan sa Filistea. An anggot na mga Filisteo nagpaheling nin karingisan. Inisip ninda na an may paninimbagan iyo an agom ni Samson asin an ama kaini asin sinolo sinda. Naotob kan sa barbarong pagbalos na ini an katuyohan ni Samson. Huli kaiyan, tinira nia sinda nin grabeng pangadan.​—Hokom 15:1-8.

Nasabotan daw kan mga Israelita na binebendisyonan ni Jehova Dios si Samson asin kun siring kasurog nia sia tanganing taposon an pagdominar kan mga Filisteo? Dai nanggad. Tanganing makalikay sa problema, an kalalakihan nin Juda nagpadara nin 3,000 na lalaki tanganing dakopon an pinili nin Dios na namomoon asin isuko sia sa mga kaiwal. Minsan siring, an pagtraydor na ini kan mga Israelita nagtao ki Samson nin oportunidad na gumibo nin dugang pang danyos sa saiyang mga kalaban. Kan itatao na sia sa mga Filisteo, “an espiritu ni Jehova naghiro sa saiya, asin an mga pisi na nakagapos sa saiyang mga takyag nagin garo mga tursidong de ilo na nasolo sa kalayo, kaya an saiyang mga ramal natunaw sa saiyang mga kamot.” Dangan pinurot nia an salang nin sarong asno asin ginadan an sangribong kaiwal paagi kaiyan.​—Hokom 15:10-15.

Kan nakikimaherak ki Jehova, si Samson nagsabi: “Ika an nagtao kan dakulang kaligtasan na ini sa kamot kan saimong lingkod, asin ngonyan magagadan daw ako sa pagkapaha asin kaipuhan daw na mahulog ako sa kamot kan mga bakong turi?” Dinangog ni Jehova an pamibi ni Samson asin sinimbag iyan. “Binaak nin Dios an korteng almires na lukab . . . , asin nagpoon na lumuwas an tubig hale dian, asin sia umininom, na pagkatapos kaiyan buminalik an saiyang espiritu asin naulian sia.”​—Hokom 15:​18, 19.

Determinado si Samson sa pagmamaigot na magibo an saiyang obheto, an pakikipaglaban nia sa mga Filisteo. An katuyohan kan saiyang pagdagos sa harong nin sarong patotot sa Gaza iyo an makipaglaban sa mga kaiwal nin Dios. Kaipuhan ni Samson nin madadagosan sa banggi sa siudad nin mga kalaban, asin makukua iyan sa harong nin sarong patotot. Mayo sa isip ni Samson an gumibo nin inmoral. Huminale sia sa harong kan babae kan matangang banggi, kinaptan an mga tata kan siudad asin an duwang poste sa gilid, asin dinara iyan sagkod sa alitoktok kan bukid na harani sa Hebron, na mga 60 kilometros an rayo. Ginibo ini na may pag-oyon an Dios asin paagi sa tao nin Dios na kosog.​—Hokom 16:1-3.

Napapalaen an paghiro kan banal na espiritu sa kamugtakan ni Samson huli kan pambihirang  mga sirkonstansia. An maimbod na mga lingkod nin Dios ngonyan puedeng magsarig sa iyo man sanang espiritu tanganing tawan sinda nin kosog. Inasegurar ni Jesus an saiyang mga parasunod na si Jehova “[matao] nin banal na espiritu sa mga naghahagad sa saiya.”​—Lucas 11:13.

Taano ta si Jehova ‘Huminale ki Samson’?

Nangyari na si Samson namoot sa sarong babae na an ngaran Dalila. An limang magkasururog na prinsipe kan mga Filisteo gustong marhay na gadanon si Samson kaya kinua ninda an saiyang tabang. Dinolok ninda si Dalila asin sinabihan sia: “Dayaon mo sia asin aramon mo kun saen hale an dakula niang kosog asin kun paano mi sia madadaog.” Bilang suhol, an lambang saro sa limang magkasururog na prinsipe nag-alok sa saiya nin “sangribo may sanggatos na pidasong pirak.”​—Hokom 16:​4, 5.

Kun an mga pidaso nin pirak mga siklo, an alok na 5,500 na siklo dakulaon na suhol. Si Abraham nagbayad nin 400 na siklo para sa lolobngan kan saiyang agom, asin an presyo nin sarong oripon 30 siklo sana. (Genesis 23:14-20; Exodo 21:32) An bagay na an pinukaw kan magkasururog na prinsipe​—mga namamahala sa limang siudad kan mga Filisteo​—iyo an kahanaban ni Dalila asin bakong an saiyang kaimbodan sa saiyang grupong etniko nagsusuherir na tibaad sia sarong Israelita. Sa paano man, inako ni Dalila an alok.

Tolong beses na nagtao si Samson ki Dalila nin nakakadayang simbag sa saiyang paghapot, asin tolong beses siang pinasaloiban kaini paagi sa pagprobar na itao sia sa saiyang mga kaiwal. Alagad “huli ta saiya siang pinirit kan saiyang mga tataramon sa gabos na panahon asin padagos siang dinadagka, an saiyang kalag nauyam na sagkod na garo na sia magagadan.” Sa katapustapusi ihinayag ni Samson an katotoohan​—an saiyang buhok dai noarin man pinutol. Kun iyan putolon, manluluya sia asin magigin kapareho kan gabos na ibang tawo.​—Hokom 16:6-17.

Iyan an ikinabagsak ni Samson. Minaniobra sia ni Dalila sa sarong situwasyon tanganing maaris an saiyang payo. Minsan siring, an kosog ni Samson bako man na literal na yaon sa saiyang buhok. An saiyang buhok nagrerepresentar sana sa saiyang espesyal na relasyon sa Dios bilang sarong Nazareo. Kan tinogotan ni Samson na sia makalaog sa sarong situwasyon na nakaapektar sa saiyang pagigin Nazareo huli sa pag-aris sa saiyang payo, “si Jehova huminale na saiya.” Si Samson nadaog na ngonyan kan mga Filisteo, binuta sia, asin ibinilanggo sia.​—Hokom 16:18-21.

Kanigoan kamapuersang leksion an itinotokdo kaini sa sato! Bako daw na maninigo niatong mansayon an satong relasyon ki Jehova bilang sarong bagay na mahalagang marhay? Kun ikokompromiso niato sa ano man na paagi an satong pagdusay bilang Kristiano, paano niato malalaoman na padagos kitang bebendisyonan nin Dios?

“Magadan Logod an Sakuyang Kalag Kaiba kan mga Filisteo”

An mga Filisteo na naggagayagaya nin labi-labi nagpasalamat sa saindang dios na si Dagon huli sa pagkadaog ki Samson. Bilang pagselebrar kan saindang kapangganahan, dinara ninda an saindang bihag sa templo ni Dagon. Alagad aram ni Samson an tunay na dahelan kan saiyang pagbagsak. Aram nia kun taano ta binayaan sia ni Jehova, asin nagsolsol si Samson sa saiyang pagkukulang. Mantang nasa harong na bilanggoan si Samson, an saiyang buhok huminibog. Ngonyan na nasa atubangan sia kan rinibong Filisteo, ano an gigibohon nia?

“Soberanong Kagurangnan na Jehova,” an pamibi ni Samson, “girumdoma tabi ako, asin pakosoga tabi ako, ngonyan sana, O ika na tunay na Dios, asin togoti akong ipamalos an sakong sadiri sa mga Filisteo kan pamamalos para sa saro kan duwa kong mata.” Dangan itinukod nia an saiyang sadiri sa duwang harigi sa tahaw kan edipisyo, asin “sia duminuko sa kakosogan.” An resulta? “An harong narumpag sa ibabaw kan magkasururog na prinsipe asin sa gabos na tawo na yaon sa laog kaiyan, kaya an ginadan nia sa saiyang sadiring kagadanan nakakalabi sa saiyang mga ginadan kan sia nabubuhay.”​—Hokom 16:22-30.

Sa pisikal na kosog, si Samson mayo nin kapareho sa mga tawo. Lataw nanggad an saiyang makakamhan na mga gibo. Alagad an pinakamahalaga, si Samson ibinibilang kan Tataramon ni Jehova sa mga may makosog na pagtubod.​—Hebreo 11:32-34.

[Ritrato sa pahina 26]

Ano an sekreto kan kosog ni Samson?