Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga luwas kan An Torrengbantayan? Bueno, helingon kun masisimbag nindo an minasunod na mga hapot:

• Ano an dahelan kan pagpili kan Disyembre 25 bilang petsa para sa pagselebrar kan pagkamundag ni Jesus?

An Tataramon nin Dios mayo nin itinataong petsa para sa pagkamundag ni Jesus. An Enciclopedia Hispánica nagkokomento: “An petsa na Disyembre 25 para sa selebrasyon nin Pasko bakong resulta nin estriktong kronolohikong anibersaryo, kundi, imbes, gibohon na sa Kristiano an kapiestahan kan solsticio kun tiglipot.” Isinelebrar kan suanoy na mga Romano an pagsirang kan saldang kun tiglipot paagi sa bangkete, maribok na pag-ogma, asin pagtinawanan nin mga regalo.​—12/15, pahina 4-5.

• Nangangahulogan daw an Gibo 7:​59 na si Esteban namibi ki Jesus?

Dai. Ipinapaheling kan Biblia na an pamibi dapat na idirekta solamente ki Jehova Dios. Kan maheling si Jesus sa bisyon, minalataw na si Esteban dai nag-alangan na direktang makimaherak sa saiya, na nagsasabi: “Kagurangnan na Jesus, akoa an sakong espiritu.” Aram ni Esteban na tinawan si Jesus nin autoridad na buhayon an mga gadan. (Juan 5:27-29) Kaya hinagad ni Esteban ki Jesus na protehiran an saiyang puersa nin buhay sagkod sa pagkabuhay liwat.​—1/1, pahina 31.

• Paano niato naaaraman na an kaaabtan nin sarong tawo dai patienot na itinalaga?

Tinawan nin Dios an tawo nin katalingkasan na pumili, na inoolang an pagtalaga antes pa. Magigin bakong mamomoton asin bakong makatanosan na patienot nang italaga ni Jehova an aksion na gigibohon niato dangan papanimbagon kita sa satong mga ginibo. (Deuteronomio 32:4; 1 Juan 4:8)​—1/15, pahina 4-5.

• Taano ta bakong tama na sabihon na imposible an mga milagro?

Rinerekonoser na igwa sana sinda nin parsial na kaaraman sa mga ngangalasan sa siensia na manonompongan sa mga linalang nin Dios, may mga sientista na nag-aadmitir na dai na ninda masabi nin may kasiertohan kun baga may imposible pa. Sa kadaklan, gusto nindang sabihon na harayong mangyari iyan.​—2/15, pahina 5-6.

• Taano ta sinabihan ni Hokom Samson an saiyang mga magurang na an gusto niang agomon sarong aking babae kan mga Filisteo? (Hokom 14:2)

Tumang sa ley nin Dios an mag-agom nin falsong parasamba. (Exodo 34:11-16) Pero, an babaeng Filisteo “angay nanggad” sa pagheling ni Samson. Si Samson “naghahanap nin oportunidad tumang sa mga Filisteo,” asin an babaeng idto angay nanggad sa katuyohan na iyan. Sinuportaran nin Dios si Samson paagi sa Saiyang espiritu.​(Hokom 13:25; 14:​3, 4, 6)​—3/15, pahina 26.

• Maninigo daw na magtao an sarong Kristiano nin tip o sarong klase nin regalo sa empleyado kan gobyerno para sa serbisyo nia?

Sala an pagsuhol sa sarong opisyal, an pagtao sa saiya nin sarong bagay na may halaga tanganing sia gumibo nin ilegal, biribidon an hustisya, o may paorogon. Alagad bakong panunuhol an pagtao nin tip o regalo sa sarong lingkod sa publiko kun ginigibo nia an saiyang katongdan o tanganing makua an sarong lehitimong serbisyo o tanganing likayan an bakong makatanosan na tratamiento.​—4/1, pahina 29.