Napapahiro daw Kamo kan Saindong Pagtubod?

AN OPISYAL nin hukbo kombensido na mapapaomayan ni Jesus an paralisis kan oripon kan opisyal. Alagad ta dai si Jesus inimbitaran kan opisyal nin hukbo sa saiyang harong, tibaad huli ta an pagmate nia bako siang maninigo o huli ta sia sarong Hentil. Imbes, an opisyal nagsugo nin nagkapirang kamagurangan na lalaki kan mga Judio tanganing dumolok ki Jesus asin magsabi: “Ginoo, bako ako tawong angay tanganing maglaog ka sa sirong kan sakong atop, alagad sabihon mo sana an tataramon asin an sakong surogoon na lalaki maoomayan.” Huling naririsa na an opisyal nin hukbo nagtutubod na kaya ni Jesus na magpaomay dawa sa harayo, sinabi ni Jesus sa kadaklan na nagsusurunod sa saiya: “Sinasabi ko sa saindo an katotoohan, Mayo nin siisay man sa Israel na nakuanan ko nin siring kadakulang pagtubod.”​—Mateo 8:5-10; Lucas 7:1-10.

An eksperyensiang ini puedeng makatabang sa sato na magkonsentrar sa mahalagang marhay na kabtang nin pagtubod. An tunay na pagtubod bakong paniniwala na daing gibo; sinusuportaran iyan nin gibo. An kagsurat sa Biblia na si Santiago nagpaliwanag: “An pagtubod, kun dai nin gibo, gadan sa saiya man sana.” (Santiago 2:17) An katunayan na ini nagigin mas malinaw kun eestudyaran niato an sarong tunay na halimbawa kun ano an puedeng mangyari kun an pagtubod magin inaktibo.

Kan 1513 B.C.E., an nasyon nin Israel nagin kasaro ni Jehova Dios paagi sa tipan nin Ley. Bilang parapangoltanan kan tipan na iyan, ipinaabot ni  Moises an tataramon nin Dios sa mga aki nin Israel: “Kun maingat nanggad nindong kukuyogon an sakong tingog asin ootobon nanggad an sakong tipan, dangan kamo sierto nanggad na magigin . . . banal na nasyon.” (Exodo 19:3-6) Iyo, an pagigin banal nin Israel nakadepende sa pagkuyog.

Pakalihis nin dakol na siglo, an mga Judio nagpoon na magtao nin orog na importansia sa pag-adal kan Ley kisa pag-aplikar kan mga prinsipyo kaiyan. Sa saiyang librong The Life and Times of Jesus the Messiah, si Alfred Edersheim nagsurat: “Haloy nang rinesolberan kan [mga rabi]​—an ‘may mga kabatidan sa kinaban,’ na an pag-adal mas mahalaga kisa mga gibo.”

Totoo, an suanoy na mga Israelita pinagbotan na mahigos na pag-adalan an mga kahagadan nin Dios. An Dios mismo nagsabi: “An mga tataramon na ini na ipinagboboot ko sa saimo ngonyan dapat na mamugtak sa saimong puso; asin dapat na itadom mo an mga iyan sa saimong aki asin magtaram ka manongod dian kun ika nagtutukaw sa saimong harong asin kun ika naglalakaw sa dalan asin kun ika naghihigda asin kun ika minabangon.” (Deuteronomio 6:​6, 7) Alagad pirme daw boot sabihon ni Jehova na an pag-adal kan Ley mas mahalaga kisa sa mga gibo na kaoyon kaiyan o sinasabi kaiyan? Helingon niato.

An Seryosong mga Pag-adal

An pagtao nin labi-labing importansia sa pag-adal kan Ley tibaad garo tama sa mga Israelita, huli ta an sarong Judiong tradisyon nagsasabi na an Dios mismo tolong oras aroaldaw na nag-aadal kan Ley. Masasabotan nindo kun taano ta may nagkapirang Judio na tibaad nangangatanosan, ‘Kun an Dios regular na nag-aadal kan Ley, bako daw na an saiyang mga linalang sa daga maninigo na magin biyong okupado man sa paggibo kaiyan?’

Kan enot na siglo C.E., an pagkabangkag kan mga rabi sa pag-analisar asin pag-interpretar kan Ley biyong biniribid an saindang pag-iisip. “An mga eskriba asin Fariseo . . . nagtataram alagad dai naggigibo,” an sabi ni Jesus. “Sinda nagbobogkos  nin magabat na mga pasanon asin ibinubugtak iyan sa mga abaga nin mga tawo, alagad sinda mismo harabong humiro kaiyan minsan kan saindang moro.” (Mateo 23:2-4) Pinapagabatan kan mga namomoon sa relihion na idto an ordinaryong mga tawo nin dai mabilang na susundon asin regulasyon, alagad sinda mismo mapagsaginsagin na guminibo nin malulusotan tanganing ipuera sinda sa pagsunod sa iyo man sanang mga ley na idto. Apuera dian, an mga lalaking idto na nagkokonsentrar sa seryosong mga pag-adal ‘liningawan an mas magabat na mga bagay kan Ley, arin na baga, an hustisya asin pagkaherak patin kaimbodan.’​—Mateo 23:16-24.

Kabaliktaran nanggad sa linalaoman, na sa paghihingoang patunayan an sadiri nindang katanosan, linalapas na logod kan mga eskriba asin Fariseo an mismong Ley na sinusuportaran daa ninda! An gabos na siglo nin pagdebate sa mga tataramon asin iba pang saradit na detalye kan Ley dai nagpangyari sa sainda na magin mas dayupot sa Dios. An epekto kapareho kan pagsuway na ibinunga kan inaapod ni apostol Pablo na “basang na orolay,” “pagkakaturumang,” asin falsong “kaaraman.” (1 Timoteo 6:​20, 21) Pero, an saro pang magabat na problema iyo an epekto sa sainda kan daing katapusan na pagsiyasat. Dai sinda nagkaigwa kan klase nin pagtubod na nagpahiro sa sainda na gibohon an tama.

Madonong na Isip, Daing Pagtubod na Puso

Laen nanggad an pag-iisip kan Judiong mga namomoon sa relihion kisa sa Dios! Dai nahaloy bago lumaog an mga Israelita sa Dagang Panuga, sinabihan sinda ni Moises: “Idusay nindo an saindong puso sa gabos na tataramon na itinataram ko sa pagpatanid sa saindo ngonyan, tanganing mapagbotan nindo an saindong mga aki na mag-ingat na otobon an gabos na tataramon kan ley na ini.” (Deuteronomio 32:46) Malinaw nanggad, an banwaan nin Dios kaipuhan na bako sanang magin seryosong mga paraadal kan Ley kundi paraotob kan Ley.

Minsan siring, dakol na beses na an nasyon nin Israel dai nagin maimbod ki Jehova. Imbes na gibohon an tamang klase nin mga gibo, an mga aki nin Israel ‘dai nagtubod sa saiya asin dai naghinanyog sa saiyang tingog.’ (Deuteronomio 9:23; Hokom 2:​15, 16; 2 Cronica 24:​18, 19; Jeremias 25:4-7) Sa katapustapusi, nagibo kan mga Judio an pinakamaraot nindang akto nin pagkadaing kaimbodan kan isikwal ninda si Jesus bilang an Mesiyas. (Juan 19:14-16) Huli kaiyan, isinikwal ni Jehova Dios an Israel asin ibinaling an saiyang atension sa mga nasyon.​—Gibo 13:46.

Kaipuhan nanggad na kita mag-ingat na dai mahulog sa iyo man sanang siod​—an mag-isip na puede kitang sumamba sa Dios na may madonong na isip alagad daing pagtubod na puso. Sa ibang pagtaram, an satong pag-adal sa Biblia kaipuhan na bako sanang pagtipon nin kaaraman. An tamang kaaraman kaipuhan na makaabot sa satong puso tanganing makaimpluwensia sa satong buhay para sa ikakarahay. Anong pakinabang kan pag-adal na magtanom nin gulay alagad dai kita noarin man nagtatanom nin ano man na banhi? Totoo, tibaad magkaigwa kita nin nagkapirang kaaraman manongod sa kun paano maghardin, alagad nungka kitang maani nin ano man! Kaagid kaiyan, an mga tawo na nakakanood kan mga kahagadan nin Dios paagi sa pag-adal kan Biblia kaipuhan na togotan an mga banhi kan katotoohan na makaabot sa puso tangani na an mga banhing iyan tumubo asin magpahiro sa sainda.​—Mateo 13:3-9, 19-23.

“Magin Kamong mga Paraotob kan Tataramon”

Si apostol Pablo nagsabi na “an pagtubod minasunod sa bagay na nadangog.” (Roma 10:17) An natural na pagkakasunodsunod na ini poon sa pakadangog kan Tataramon nin Dios sagkod sa pagtubod sa saiyang Aki, si Jesu-Cristo, nagtatao sato nin oportunidad na magkamit nin buhay na daing katapusan. Iyo, may orog pang kaipuhan kisa pagsabi sanang, ‘Nagtutubod ako sa Dios asin ki Cristo.’

Sinadol ni Jesus an saiyang mga parasunod na magkaigwa kan klase nin pagtubod na mapahiro sa sainda: “An sakong Ama napapamuraway kaini, na kamo padagos na nagbubunga nin dakol asin nagpapatunay na kamo sakong mga disipulo.” (Juan 15:8) Kan huri, an tugang sa ina ni Jesus na si Santiago nagsurat: “Magin kamong mga paraotob kan tataramon, asin bakong mga paradangog sana.” (Santiago 1:22) Pero, paano niato  maaaraman kun ano an gigibohon niato? Paagi sa tataramon asin halimbawa, ipinaheling ni Jesus kun ano an kaipuhan na gibohon niato tanganing mapaogma an Dios.

Mantang yaon sa daga, nagmaigot na marhay si Jesus tangani na suportaran an intereses kan Kahadean asin pamurawayon an ngaran kan saiyang Ama. (Juan 17:4-8) Sa anong paagi? Tibaad dakol na tawo an nakakagirumdom kan mga milagro ni Jesus na pagpaomay sa mga may helang asin kimay. Alagad lininaw kan Ebanghelyo ni Mateo an pangenot na paagi: “Si Jesus naglibot sa gabos na siudad asin baryo, na nagtotokdo sa saindang mga sinagoga asin naghuhulit kan maogmang bareta kan kahadean.” Maririsa na dai linimitaran ni Jesus an saiyang ministeryo sa pakikipag-olay sana sa impormal na paagi sa pira sanang katood asin kamidbid o sa mga nakakaolay nia sa pagtaraed. Maigot siang naghingoa, na ginagamit an ano man na paaging magigibo nia tanganing madalaw an mga tawo “sa bilog na Galilea.”​—Mateo 4:​23, 24; 9:35.

Pinagbotan ni Jesus an saiyang mga parasunod na makikabtang man sa paggibo nin disipulo. Tunay nanggad, nagtao sia nin sangkap na halimbawa tanganing arogon ninda. (1 Pedro 2:21) Sinabihan ni Jesus an maimbod na mga disipulo nia: “Kun siring paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”​—Mateo 28:​19, 20.

Totoo, an pakikikabtang sa paghuhulit nag-aatubang nin tunay na angat. Si Jesus mismo nagsabi: “Uya! Isinusugo ko kamo na garo mga karnero sa tahaw nin mga lobo.” (Lucas 10:3) Kun napapaatubang kita sa pagtumang, an natural na tendensia iyo an sumibog tanganing ilikay an satong sadiri sa dai kaipuhan na kamondoan o kahaditan. Iyan an nangyari kan bangging arestaron si Jesus. An mga apostol duminulag kan madaog sinda nin pagkatakot. Paghaloyhaloy kan bangging iyan, tolong beses na dineharan ni Pedro na midbid nia si Jesus.​—Mateo 26:​56, 69-75.

Apuera kaini, tibaad masorpresa kamong maaraman na dawa si apostol Pablo nagsabi na sia nasakitan na maghulit kan maogmang bareta. Nagsurat sia sa kongregasyon nin Tesalonica: “Kami nagpakapusoan paagi sa samong Dios na magtaram sa saindo kan maogmang bareta nin Dios na may dakulang paglapigot.”​—1 Tesalonica 2:​1, 2.

Nakaya ni Pablo asin kan saiyang mga kapwa apostol na daogon an ano man na pagkatakot na makipag-olay sa iba manongod sa Kahadean nin Dios, asin kaya man nindong gibohon iyan. Paano? An pinakamahalagang lakdang iyo an magsarig ki Jehova. Kun kita lubos na magtutubod ki Jehova, an pagtubod na iyan an mapahiro sa sato, asin makakaya niatong gibohon an saiyang kabotan.​—Gibo 4:17-20; 5:​18, 27-29.

Igwa nin Balos sa mga Ginigibo Nindo

Aram na marhay ni Jehova an satong paghihingoa tanganing paglingkodan sia. Halimbawa, aram nia kun kita may helang o pagal. Aram nia an satong mga kahaditan asin pagduda sa sadiri. Kun nagagabatan kita sa pinansial o kun nadedesganar kita huli sa satong salud o huli sa satong emosyon, aram pirme ni Jehova an satong situwasyon.​—2 Cronica 16:9; 1 Pedro 3:12.

Siertong naoogma nanggad na marhay si Jehova kun sa ibong kan satong mga pagkabakong sangkap asin problema, napapahiro kita kan satong pagtubod! An mamomoton na pagpadangat ni Jehova sa saiyang maimbod na mga lingkod bako sanang sarong pagmate na bakong segurado​—iyan suportado nin sarong panuga. Paagi sa pasabong nin Dios, si apostol Pablo nagsurat: “An Dios bakong biko na malingawan an saindong ginibo asin an pagkamoot na saindong ipinaheling para sa saiyang ngaran, na kamo naglingkod sa mga banal asin padagos pang naglilingkod.”​—Hebreo 6:10.

Mapapanarigan nindo an paglaladawan kan Biblia ki Jehova bilang “Dios nin kaimbodan, na dian sa saiya mayo nin inhustisya,” asin bilang “an parabalos sa mga maigot na naghahanap sa saiya.” (Deuteronomio 32:4; Hebreo 11:6) Halimbawa, nagigirumdoman kan sarong babae sa California, E.U.A.: “An sakong ama naglingkod bilang bilog na panahon na ministro sa laog nin sampulong taon bago sia nagpamilya. Ikinakaogma kong marhay an saiyang mga estorya kun paano sia sinusteniran ni Jehova sa ministeryo.  Dakol na beses na ginastos nia an ultimo niang kuarta para sa gasolina tanganing makaluwas sa ministeryo. Pagpuli nia sa harong hale sa ministeryo, sa parate may dai linalaoman na mga probisyon na naghahalat sa saiya sa may pinto.”

Apuera sa materyal na suporta, “an Ama nin maboot na mga pagkaherak asin an Dios nin gabos na karangahan” nagtatao sato nin emosyonal asin espirituwal na suporta. (2 Corinto 1:3) “Nakakakontentong pagmate an pagsarig ki Jehova,” an sabi nin sarong Saksi na nagtagal nin dakol na pagbalo sa nag-aging mga taon. “Nagtatao iyan sa saindo nin oportunidad na magtiwala ki Jehova asin maheling kun paano nia kamo tinatabangan.” Makakadolok kamo na may kapakumbabaan sa “Paradangog nin pamibi,” na nakakasierto na tatawan nia nin atension an saindong personal na mga problema.​—Salmo 65:2.

Dakol an bendisyon asin balos na naaako kan mga trabahador sa espirituwal na pag-aani. (Mateo 9:​37, 38) An pakikikabtang sa pampublikong ministeryo nagbunga nin mga pakinabang sa salud para sa dakol, asin puedeng iyo man sa saindo. Pero an mas mahalaga, an paghuhulit sa iba nakakatabang sa sato na mapakosog an marahay na relasyon niato sa Dios.​—Santiago 2:23.

Padagos na Gumibo nin Marahay

Magigin sala para sa sarong lingkod nin Dios na magkonklusyon na nadedesganar si Jehova kun an mga kamatean o pagkagurang maski paano nakakaolang sa saiya na gibohon an gabos na gusto niang gibohon sa ministeryo. Totoo man iyan mapadapit sa mga nalilimitaran nin maluyang salud, mga paninimbagan sa pamilya, o iba pang sirkonstansia.

Tandaan na kan si apostol Pablo nakakamateng naoolang nin sarong kamatean o balakid, “tolong beses na nakimaherak [sia] sa Kagurangnan na iyan mahale” sa saiya. Imbes na paomayan si Pablo tanganing mas dakol siang mahaman sa paglilingkod ki Jehova, an Dios nagsabi: “An sakuyang dai na kutana maninigong kabootan igo na para sa saimo; huli ta an sakuyang kapangyarihan sinasangkap sa kaluyahan.” (2 Corinto 12:7-10) Kun siring, makakasierto kamo na sa ibong kan ano man na masakit na mga kamugtakan na tibaad tinatagalan nindo, pinapahalagahan kan saindong langitnon na Ama an ano man na tibaad kaya nindong magibo sa pagpaoswag sa saiyang intereses.​—Hebreo 13:​15, 16.

An satong mamomoton na Kaglalang dai naghahagad nin labi sa kaya niatong itao. Hinahagad sana nia na magkaigwa kita kan klase nin pagtubod na nagpapahiro sa sato.

[Ritrato sa pahina 26]

Igo na daw an pag-adal kan Ley?

[Mga Ritrato sa pahina 29]

An satong pagtubod kaipuhan na sinusuportaran nin mga gibo