“An Tabang sa Sako Gikan ki Jehova”

Mga Pamilya na Pinasarig kan Kaaraman Manongod sa Dios

“LANOB nin Berlin.” Iyan an apod nin sarong mag-agom sa Argentina sa totoong lanob na ibinugtak ninda tanganing bangaon sa duwa an saindang harong! Igwa sinda nin pagkakalaen na imposibleng mahusay; talagang dai ninda kayang tagalan na makaibanan an lambang saro.

Makamomondo, an situwasyon kan mag-agom na iyan bakong daing kapareho. Dakol na pamilya an dinadamat nin pag-iriwal, kadaihan nin kaimbodan, asin biyong pagkaongis. Makamomondo ini, mantang an pamilya sarong institusyon na inestablisar mismo nin Dios. (Genesis 1:​27, 28; 2:​23, 24) An balaog na ini nin Dios tamang-tama an kamugtakan para sa pagpaheling nin hararom na pagkamoot. (Rut 1:9) Paagi sa pag-otob sa saindang tao nin Dios na mga obligasyon, an mga miembro nin pamilya puedeng magtao nin onra ki Jehova asin magin sarong bendisyon sa lambang saro. *

Mantang inestablisar nin Dios an areglo nin pamilya, kaipuhan na togotan niato an saiyang pagmansay na makaimpluwensia sa satong pakasabot kun paano maninigong magpunsionar an mga pamilya. An saiyang Tataramon nagtatao nin dakol na praktikal na hatol na dinisenyo tanganing tabangan an mga pamilya na magin mapanggana, nangorogna kun lumataw an mga kadepisilan. Kun dapit sa kabtang kan mga agom na lalaki, an Biblia nagsasabi: “An mga agom na lalaki kaipuhan na mamoot sa saindang agom na babae siring sa saindang sadiring hawak.” Kun inootob kan agom na lalaki an kahagadan na ini, kawilihan sa agom na babae an magkaigwa nin “hararom na paggalang sa saiyang agom.”​—Efeso 5:25-29, 33.

May labot sa relasyon sa pag-oltanan kan mga magurang asin kan saindang mga aki, nagsurat ni apostol Pablo: “Mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.” (Efeso 6:4) Ini man nagbubunga nin mamomoton na kamugtakan sa pamilya, na mapangyaring magin mas pasil para sa mga aki na kuyogon an saindang mga magurang.​—Efeso 6:1.

Iiniilustrar kan mga puntong nasambitan sa enotan an marahay na sadol kan Biblia sa buhay pampamilya. Paagi sa pag-aplikar sa mga prinsipyo nin Dios, dakol an nagkakamit nin kaogmahan sa harong. Kuanon tang halimbawa an mag-agom sa Argentina na nasambitan sa kapinonan. Pagkatapos na makipag-adal sinda sa Biblia sa mga Saksi ni Jehova sa laog nin tolong bulan, pareho nindang pinonan na iaplikar an madonong na hatol kaiyan sa pag-agoman. Nagmaigot sindang marhay sa pagpaoswag kan komunikasyon, sa pagigin maduminamay sa mga pangangaipo kan lambang saro, asin sa pagigin mapagpatawad. (Talinhaga 15:22; 1 Pedro 3:7; 4:8) Nanodan nindang kontrolon an saindang kaanggotan asin dumolok sa Dios para sa tabang kun garo baga dai na makontrol an situwasyon. (Colosas 3:19) Dai nahaloy, buminagsak an “Lanob nin Berlin”!

Puedeng Pasarigon nin Dios an Sarong Pamilya

An kaaraman asin an pag-aplikar kan mga pamantayan nin Dios puedeng makapasarig sa sarong pamilya na mapaglabanan an mga pangigipit. Mahalagang marhay ini, huli ta nakahula na an areglo nin pamilya makakaeksperyensia nin maringis na pagsalakay sa satong kaaldawan. Ihinula ni Pablo an presenteng pagbagsak kan moralidad asin sosyedad nin tawo. Sinabi nia na an “huring mga aldaw” mamimidbid paagi sa kadaihan nin kaimbodan, kawaran nin “natural na kapadangatan,” asin pagigin masumbikal sa mga magurang, dawa sa tahaw kan mga “may porma nin diosnon na debosyon.”​—2 Timoteo 3:1-5.

 An pagmamaigot na paogmahon an Dios puedeng makatabang na kontrahon an siring na nakakadanyar na mga epekto sa pamilya. Nanompongan kan dakol na pamilya na kaipuhan an espirituwal na solusyon tanganing matabangan sindang makayanan na atubangon an dakol na kadepisilan na inaagihan ninda. Kun gusto kan mga miembro kan pamilya na mapagdanay an marahay na relasyon sa Dios, orog sa gabos kaipuhan nindang iaplikar an mga prinsipyo sa Biblia asin maaraman na “sagkod na bakong si Jehova mismo an magtogdok sa harong, basang sana an pagpapagal dian kan mga nagtotogdok kaiyan.” (Salmo 127:1) An pinakadakulang kapangganahan sa pagpaoswag sa kaogmahan sa pamilya naggigikan sa pag-enot sa Dios sa buhay pampamilya.​—Efeso 3:​14, 15.

Sa Hawaii naaraman nin sarong lalaki na an ngaran Dennis kun gurano katotoo iyan. Maski ngani saro siang naghihingakong Kristiano, nagin nang paagi nin pamumuhay nia an mapanlibak na pagtaram asin pakikiiwal. Pagkatapos magserbi sa militar, lalo pa ngani siang nagin agresibo asin maongison. “Pirme akong nakikipag-iwal,” an nagigirumdoman nia. “Mayo akong pakiaram kun anong mangyari sa sako, asin dai ako natatakot magadan. An pagraway asin pakikiiwal nagpadagos. Inenkaminar ako kan sakong agom, na saro sa Mga Saksi ni Jehova, na mag-adal sa Biblia.”

Kinontra ni Dennis an mga pagmamaigot kan saiyang agom. Minsan siring, pinalumoy kan Kristianong gawe-gawe kan saiyang agom an negatibong aktitud ni Dennis. Sa kahurihurihi si Dennis nag-iba sa saiyang agom asin mga aki sa sarong Kristianong pagtiripon. Pakatapos kaiyan, pinonan an sarong pag-adal sa Biblia ki Dennis, asin marahay an saiyang pag-oswag. Ipinondo nia an 28 taon nang paninigarilyo asin an saiyang pakikiasosyar sa mga katood na naggigibo kan gabos na bagay na pinagmamaigotan niang haleon. Nagpapasalamat ki Jehova, si Dennis nagkokomento: “An sakong buhay pampamilya mas ruminahay. Nagduduman kami sa mga pagtiripon asin sa ministeryo bilang sarong pamilya. An duwa kong aki dai na natatakot sa sako, huli ta nakanood na akong magkontrol sa templada kan sakong payo asin pinondo ko na an mapanlibak na pagtaram. Nakakapag-olay na kami asin nagkakaigwa nin mga pag-orolay sa Biblia. Kun bakong huli sa katotoohan sa Biblia, mayo ako digdi ngonyan; aranggoton akong marhay.”

Puedeng kamtan kan mga pamilya an kaogmahan kun magmamaigot sindang gibohon an kabotan ni Jehova. Ipinapaheling kan eksperyensia na dawa saro sanang miembro kan pamilya an nag-aaplikar kan mga prinsipyo sa Biblia, mas marahay an kamugtakan kisa kun mayo ni saro. Kaipuhan an pagmamaigot sa pagtogdok nin Kristianong pamilya, na nangangaipo nin abilidad asin panahon. Alagad an mga miembro kan siring na mga pamilya inaasegurar na babalosan ni Jehova nin kapangganahan an saindang pagmamaigot sa pagtotogdok. Puede nindang otrohon an mga tataramon kan salmista: “An tabang sa sako gikan ki Jehova.”​—Salmo 121:2.

[Nota sa Ibaba]

[Blurb sa pahina 9]

An Dios an “pinagkakautangan nin ngaran kan lambang pamilya sa langit asin sa daga.”—EFESO 3:15

[Kahon sa pahina 8]

PINAPAHALAGAHAN NA MARHAY NI JEHOVA AN AREGLO NIN PAMILYA

“Binendisyonan sinda nin Dios asin sinabihan sinda nin Dios: ‘Pangagbunga asin pangagdakol kamo asin panoa nindo an daga.’”​—Genesis 1:28.

“Maogma an gabos na natatakot ki Jehova . . . An saimong agom na babae magigin siring sa namumungang balagon sa kalaoglaogi kan saimong harong.”​—Salmo 128:​1, 3.