“Maogma Idtong mga Nakakamate kan Saindang Espirituwal na Pangangaipo”

KUN an mga gamgam nagmamata sa aga, sa parate sinda minahuni nin kadikit dangan minalayog na tanganing maghanap nin kakanon. Sa banggi, minabuelta sinda sa saindang dinadapoan, minahuni pa nin kadikit, asin minatorog. May mga panahon na sinda nagkukubkob, nagsosogok, asin nagpapadakula kan saindang mga siyo. Arog man kaiyan an ginigibo kan ibang mga hayop.

Laen kitang mga tawo. Totoo, kita nagkakakan, nagtotorog, asin nag-aaki, alagad an kadaklan sa sato dai nakokontento sa mga bagay sanang iyan. Gusto niatong maaraman kun taano ta yaon kita digdi. Hinahanap niato an kahulogan kan satong buhay. Nagmamawot man kitang magkaigwa nin paglaom sa ngapit. An mas hararom na mga pangangaipong ini nagtotokdo sa sarong kualidad na mga tawo sana an igwa​—an espirituwalidad, o an pangangaipo asin kakayahan para sa espirituwal na mga bagay.

Ginibo sa Ladawan nin Dios

Ipinapaliwanag kan Biblia an dahelan kan katambay na pangangaipo nin tawo sa espirituwal na bagay, na nagsasabi: “Linalang nin Dios an tawo sa saiyang ladawan, sa ladawan nin Dios linalang nia sia; linalang nia sindang lalaki asin babae.” (Genesis 1:27) An pagkaporma sa sato “sa ladawan nin Dios” nangangahulogan na dawa ngani namantsahan kita nin kasalan asin pagkabakong sangkap, may kakayahan kitang ipabanaag an nagkapirang kualidad nin Dios. (Roma 5:12) Halimbawa, puede kitang magin mapag-imbento. Igwa man kita nin sarong sokol nin kadonongan, pakamate nin hustisya, asin kan kakayahan na magpaheling nin mapagsakripisyong pagkamoot sa lambang saro. Apuera kaini puede man kitang maghorophorop sa nakaagi asin magplano para sa ngapit.​—Talinhaga 4:7; Eclesiastes 3:​1, 11; Miqueas 6:8; Juan 13:34; 1 Juan 4:8.

An satong espirituwal na kapasidad pinakamalinaw na maheheling sa satong natural na pagmawot na sambahon an Dios. Kun dai niato papanigoan nin tama an pangangaipo na magkaigwa nin mas marahay na relasyon sa satong Kaglalang, dai niato manonompongan an tunay asin nagdadanay na kaogmahan.  “Maogma idtong mga nakakamate kan saindang espirituwal na pangangaipo,” an sabi ni Jesus. (Mateo 5:3) Minsan siring, kaipuhan na magin maingat kita na panigoan an pangangaipong iyan nin espirituwal na katotoohan​—katotoohan manongod sa Dios, sa saiyang mga pamantayan, asin sa saiyang katuyohan para sa katawohan. Saen niato manonompongan an espirituwal na katotoohan? Sa Biblia.

“An Saimong Tataramon Katotoohan”

Si apostol Pablo nagsurat: “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16) An mga tataramon ni Pablo kaoyon kan mga tataramon ni Jesus, na nagsabi sa pamibi sa Dios: “An saimong tataramon katotoohan.” Ngonyan, midbid niato an Tataramon na iyan bilang an Banal na Biblia, asin madonong kita kun beberepikaron niato na an satong mga tinutubod asin pamantayan nakakaabot sa pamantayan kaiyan.​—Juan 17:17.

Paagi sa pagkomparar kan satong mga tinutubod sa Tataramon nin Dios, inaarog niato an mga taga suanoy na Berea, na sinegurado na an mga katokdoan ni Pablo kaoyon kan Kasuratan. Imbes na tatsaran an mga taga Berea, inomaw sinda ni Lucas sa saindang aktitud. “Inako ninda an tataramon na igwa nin dakulang pagkagalaga sa isip,” an isinurat nia, “na maingat na sinisiyasat an Kasuratan aroaldaw kun baga an mga bagay na ini iyo man nanggad.” (Gibo 17:11) Huli sa nagkakasarongatan na mga katokdoan sa relihion asin sa moral na lakop ngonyan, mahalaga na arogon niato an halimbawa kan noble an isip na mga taga Berea.

An saro pang paagi na mamidbid an espirituwal na katotoohan iyo na helingon kun paano iyan nakakaimpluwensia sa buhay nin mga tawo. (Mateo 7:17) Halimbawa, an pamumuhay na kaoyon kan katotoohan sa Biblia maninigong gibohon an saro na mas marahay na agom na lalaki, mas marahay na ama, mas marahay na agom na babae, o mas marahay na ina, sa siring pinapaoswag an kaogmahan kan pamilya asin dinadagdagan an pagkakontento nin saro. “Maogma an mga nagdadangog sa tataramon nin Dios asin nag-ootob kaiyan,” an sabi ni Jesus.​—Lucas 11:28.

An mga tataramon ni Jesus nagpapagirumdom sa sato kan mga tataramon kan saiyang langitnon na Ama, na nagsabi sa suanoy na mga Israelita: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan. O kun ika sana kutana totoong matao nin atension sa sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.” (Isaias 48:​17, 18) An gabos na namomoot sa karahayan asin katanosan seguradong mapapahiro sa siring kamamomoton na pakiolay!

May mga Mas Suno na “Pagirokon an Saindang mga Talinga”

Ginibo nin Dios an odok sa pusong pakiolay na iyan sa mga Israelita huli ta sinda dinadaya paagi sa relihiosong mga kaputikan. (Salmo 106:35-40) Kaipuhan man kitang magmaan sa mga kaputikan. May labot sa naghihingakong mga Kristiano, si Pablo nagsurat: “Madatong an panahon na dai na sinda matagal sa ikakarahay na katokdoan, kundi, oyon sa saindang sadiring mga mawot, matipon sinda nin mga paratokdo tanganing pagirokon an saindang mga talinga; asin irarayo ninda an saindang talinga sa katotoohan.”​—2 Timoteo 4:​3, 4.

Pinapagirok kan mga namomoon sa relihion an mga talinga kan mga tawo paagi sa pagkonsinte sa mga gibohon na  nakakapanigo sa salang mga kamawotan, arog kan pakikidorog sa bakong agom,  homoseksuwalidad, asin pagbuburat. An Biblia malinaw na nagsasabi na an mga minaoyon sa siring na mga bagay asin an mga naggigibo kaiyan “dai magmamana kan kahadean nin Dios.”​—1 Corinto 6:​9, 10; Roma 1:24-32.

Daing duwa-duwa na kaipuhan an kosog nin boot na mamuhay kaoyon kan mga pamantayan sa Biblia, nangorogna kun napapaatubang sa pag-olog-olog, alagad magigibo iyan. Dakol na indibiduwal sa tahaw kan mga Saksi ni Jehova an dating mga adikto sa droga, paraburat, parapakisaro, butangero, parahabon, asin putikon. Pero, isinapuso ninda an Tataramon nin Dios asin sa tabang kan banal na espiritu binago an saindang buhay tanganing “maglakaw na angay ki Jehova.” (Colosas 1:​9, 10; 1 Corinto 6:11) Huling nakipagkatoninongan sa Dios, nakamit man ninda an katoninongan nin isip asin, siring kan maheheling niato, an sarong tunay na paglaom sa ngapit.

An Paglaom sa Kahadean

An paglaom sa Biblia na nagdadanay na katoninongan para sa makinuyog na mga tawo maootob paagi sa Kahadean nin Dios. “Dumatong logod an kahadean mo. Gibohon logod an kabotan mo, kun paano sa langit, siring man sa daga,” an sabi ni Jesus sa saiyang modelong pamibi. (Mateo 6:10) Iyo, solamente an Kahadean nin Dios an makakagarantiya na gigibohon an kabotan nin Dios digdi sa daga. Taano man? Huli ta an langitnon na Kahadean na iyan​—sarong gobyerno sa kamot ni Jesu-Cristo​—iyo an paagi nin Dios na ikapahayag an Saiyang lehitimong soberaniya sa bilog na daga.​—Salmo 2:7-12; Daniel 7:​13, 14.

Bilang Hade sa langitnon na Kahadean na iyan, papatalingkason ni Jesu-Cristo an makinuyog na mga tawo sa gabos na klase nin kaoripnan, kaiba an higot na marhay na pamomogol kan Adanikong kasalan asin an ipinamana kaiyan na helang asin kagadanan. An sabi kan Kapahayagan 21:​3, 4: “Uya! An tolda nin Dios nasa mga tawo . . . Asin papahidon nia [ni Jehova Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.”

Mangingibabaw sa bilog na daga an nagdadanay na katoninongan. Taano ta makakasierto kita kaiyan? An dahelan ihinahayag sa Isaias 11:​9, na nagsasabi: “Dai sinda [an mga sakop kan Kahadean] magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova kun paanong an tubig nakakatahob sa mismong kadagatan.” Iyo, an gabos na tawo sa daga magkakaigwa nin tamang kaaraman manongod sa Dios asin magigin makinuyog sa saiya.  Bako daw na nakakapaogma sa saindong puso an esperansang iyan? Kun iyo, ngonyan na an panahon na magpoon na ilaog sa isip an mahalagang marhay na “kaaraman dapit ki Jehova.”

Mahinanyog daw Kamo sa Mensahe kan Kahadean?

Paagi sa Kahadean, hahaleon nin Dios an epekto kan gabos na ginibo ni Satanas asin totokdoan an mga tawo sa Saiyang matanos na mga dalan. Huli kaini, bakong makangangalas na nakasentro sa Kahadean an pagtotokdo ni Jesus. “Kaipuhan na ipahayag ko . . .  an maogmang bareta kan kahadean nin Dios,” an sabi nia, “huli ta dahelan kaini na ako isinugo.” (Lucas 4:43) Ipinagboot ni Cristo sa saiyang mga disipulo na ipaabot an iyo man sanang mensaheng iyan sa iba. (Mateo 28:​19, 20) “An maogmang baretang ini kan kahadean,” an ihinula nia, “ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) An katapusan na iyan marikas na nagdadangadang. Kun siring, mahalaga nanggad na an mga tawong sadiosan an puso maghinanyog sa nagliligtas-buhay na maogmang bareta!

Nadangog ni Albert, na nasambitan sa naenot na artikulo, an mensahe kan Kahadean kan an saiyang agom asin aking lalaki magpoon na makipag-adal sa Biblia sa mga Saksi ni Jehova. Sa primero, si Albert nagdududa. Hinagad pa ngani nia sa sarong lokal na klerigo na bisitahon an saiyang agom asin aki tanganing ibuyagyag an pagigin sala kan mga Saksi. Alagad habong maimbuelto an klerigo. Kaya nagdesisyon si Albert na magdangog sa sarong pag-oolay sa Biblia tanganing itokdo an ano man na sala. Pagkatapos sana nin sarong sesyon, nakiayon na sia sa pag-adal, na gustong-gustong makanood nin orog pa. Kan huri ipinaliwanag nia kun taano ta nagbago an saiyang aktitud. “Ini an haloy ko nang hinahanap,” an sabi nia.

Sa katapustapusi, nagpoon si Albert na panigoan an saiyang espirituwal na pangangaipo, asin nungka niang pinagbasolan iyan. Itinao sa saiya kan katotoohan sa Biblia an haloy na niang hinahanap sa bilog niang buhay​—an solusyon sa inhustisya asin karatan na nangingibabaw sa sosyedad asin an paglaom para sa ngapit. An katotoohan sa Biblia nagtao sa saiya nin katoninongan nin isip. Napapanigoan daw an saindong espirituwal na pangangaipo? Taano ta dai basahon an mga hapot na nakalista sa kahon sa pahina 6? Kun gusto nindo nin dugang na impormasyon, an mga Saksi ni Jehova maoogmang marhay na tabangan kamo.

[Kahon/Mga Ritrato sa pahina 6]

NAPAPANIGOAN DAW AN SAINDONG ESPIRITUWAL NA PANGANGAIPO?

Naninigoan na daw kamo sa inaako nindong espirituwal na kakanon? Iniimbitaran niamo kamong basahon an minasunod na mga hapot asin markahan nin tsek an mga masisimbag nindo nin tama.

□ Siisay an Dios, asin ano an saiyang ngaran?

□ Siisay si Jesu-Cristo? Taano ta kaipuhan siang magadan? Paano kamo makikinabang sa saiyang kagadanan?

□ Igwa daw nin Diablo? Kun igwa, saen sia hale?

□ Ano an nangyayari sa sato kun kita magadan?

□ Ano an katuyohan nin Dios para sa daga asin para sa katawohan?

□ Ano an Kahadean nin Dios?

□ Ano an mga pamantayan nin Dios sa moralidad?

□ Sa pamilya, ano an iinasignar nin Dios na papel kan agom na lalaki asin kan agom na babae? Ano an nagkapirang prinsipyo sa Biblia na nagpapaoswag sa kaogmahan kan pamilya?

Kun dai kamo segurado sa simbag sa arin man sa mga hapot na ini, puede kamong humagad nin sarong kopya kan brosyur na Ano an Kahagadan sa Sato nin Dios? Ipinublikar kan Mga Saksi ni Jehova sa haros 300 na lenguahe, tinotokar kan brosyur na ini an 16 na pundamental na topiko sa Biblia asin itinatao an simbag na sono sa Kasuratan sa gabos na hapot na nakalista sa enotan.

[Mga Ritrato sa pahina 4]

Bakong arog nin mga hayop, an mga tawo igwa nin espirituwal na pangangaipo

[Ritrato sa pahina 5]

“Matipon sinda nin mga paratokdo tanganing pagirokon an saindang mga talinga.”​—2 Timoteo 4:3

[Ritrato sa pahina 7]

An nagdadanay na katoninongan papangyayarihon paagi sa Mesiyanikong Kahadean nin Dios