“An Tabang sa Sako Gikan ki Jehova”

Daing Agom Asin Kontento sa Paglilingkod ki Jehova

“KADAKOL sa samo an lubos na maogma dawa ngani dai kaming agom,” an sabi nin sarong Kristiana sa España. Ano an dahelan kan saiyang pagkakontento? “Naoogma kami sa pagigin libre sa dakol na kahaditan kaya mas lubos kaming nakakapaglingkod sa satong Dios, si Jehova.”

An siring na saboot kaoyon kan sinasabi sa Tataramon nin Dios manongod sa pagigin daing agom. Kan tinotokar ni apostol Pablo an mga bagay na may koneksion sa pag-agom, itinao nia an ipinasabong na pakarorop na ini: “Ako nagsasabi sa mga dai pang agom asin sa mga balo, marahay sa sainda na magdanay sinda na siring sa sako.” Si Pablo mismo daing agom. Alagad anong dahelan an itinao nia na irekomendar an pagigin daing agom? Sinabi nia na an may agom nababanga, mantang an daing agom na lalaki o babae “napupurisaw sa mga bagay kan Kagurangnan.” (1 Corinto 7:​8, 32-34) An paglilingkod ki Jehova an pangenot na dahelan na nagpapangyaring magin maogma asin kontento an daing agom.

Pagigin Daing Agom na May Nobleng Katuyohan

Tibaad masakit masabotan an komento ni Pablo sa mga kultura na idinodoon an kahalagahan nin pag-agom asin pagpamilya. Minsan siring, nasambitan ni Jesu-Cristo​—na daing agom alagad maogma asin kontento​—an sarong nobleng katuyohan para sa mga Kristianong daing agom. Sia nagsabi: “Igwa nin mga kapon na ginibo an saindang sadiri na mga kapon huli sa kahadean kan kalangitan. An makakatao nin lugar dian magtao nin lugar dian.”​—Mateo 19:12.

Kaoyon kan mga tataramon na iyan, nanompongan nin dakol na an pagigin daing agom nagtotogot sa sainda na maglingkod sa Dios na mayo nin disturbo na ordinaryo na sana sa buhay may agom. (1 Corinto 7:35) Rinibong Kristiano na mayo nin agom an maogmang nagsasamba ki Jehova, asin nakakanompong sinda nin kagayagayahan sa aktibong pagtabang sa iba. *

Aram kan dakol na daing agom na Kristiano na bako sanang mga may agom an maogma asin na bakong gabos na daing agom nakakaeksperyensia nin kamondoan. Sa duwang grupong iyan, an nagkapira nakakaeksperyensia kun beses nin kaogmahan saka kamondoan. Sa katunayan, an Biblia realistikong nagsasabi na an pag-agom mismo nagbubunga nin ‘kahorasaan sa laman.’​—1 Corinto 7:28.

Daing Agom Huli sa Sirkonstansia

Dakol an daing agom bakong huli ta ginusto ninda iyan kundi huli sa mga sirkonstansia. Tibaad minamawot ninda na may maogmang makaibaiba, may kadamaydamay, asin kapadangatan na makukua sa laog kan areglo nin pag-agom. Minsan siring, para sa nagkapira, dai puede an pag-agom sa presente huli sa pinansial o iba pang bagay na dapat konsideraron. May mga Kristiano​—na dakol sa sainda mahal na espirituwal na mga tugang na babae—​na nagdanay na daing agom huli ta determinado sindang sunodon an hatol sa Biblia na mag-agom ‘sana sa Kagurangnan.’ (1 Corinto 7:39) May kaimbodan na naghahanap sinda nin magigin agom solamente sa tahaw kan nagdusay, bautisadong mga parasamba ki Jehova.

 Kun beses, napupungaw an nagkapira sa mga indibiduwal na ini. Pagkatapos na admitiron na namamatean nia iyan, an sarong daing agom na Kristiana nagsabi: “Aram mi an ley ni Jehova asin habo ming paanggoton si Jehova sa ano man na paagi. Gusto mi na may kaibaibang agom, alagad gurano man kadakol na beses na ‘ireto’ kami kan mga tawo sa kinaban, nagdadanay kaming marigon. Habo mi nganing makaibaiba an mga lalaki o babae na daing pagtubod.” Dapat na tawan nin komendasyon an siring na mga Kristiana huli sa pag-aplikar kan hatol sa Biblia asin pagpapadanay nin halangkaw na mga pamantayan sa moral tanganing paogmahon si Jehova sa ibong kan ano man na emosyonal na kapurisawan na tibaad naeeksperyensiahan ninda.

Dakulang Tabang na Itinatao nin Dios

Si Jehova maimbod sa mga nagpapaheling kan saindang kaimbodan sa saiya kun dapit sa mga bagay na arog kan dai pagpaagom sa mga indibiduwal na dai naglilingkod sa saiya. Hale sa personal na eksperyensia, si Hadeng David makakapagpatotoo: “Sa sarong maimbod ika [si Jehova] mahiro sa kaimbodan.” (Salmo 18:25) Asin sa mga may kaimbodan na nagkukuyog sa saiya, nanunuga an Dios: “Sa ano man na paagi dai taka babayaan ni sa ano man na paagi papabayaan taka.” (Hebreo 13:5) Sa pag-arog ki Jehova, puede man kitang magin matinao nin komendasyon sa daing agom na mga Kristiano ano man an edad ninda mantang may kaimbodan na sinusunod ninda an Tataramon nin Dios. Puede man kitang mamibi na logod pakosogon sinda ni Jehova na makaya an mga angat sa sainda.​—Hokom 11:30-40.

Nanonompongan nin dakol na Kristianong daing agom na an pakikikabtang nin lubos sa gibong pagtotokdo kan Biblia nagtatao nin kahulogan sa buhay ninda. Halimbawa, isipon nindo si Patricia, sarong babaeng daing agom na mga 35 anyos, na sarong payunir, o sarong bilog na panahon na paraebanghelyo. Sia nagsabi: “Minsan ngani an pagigin daing agom nag-aatubang nin mga kasakitan, nagtao iyan sa sako nin oportunidad na magin regular payunir. Mantang ako daing agom, an sakong iskedyul mas nakakabagay sa kamugtakan, na nagtatao nin mas dakol na panahon para sa pag-adal. Nakanood man akong mas lubos na manarig ki Jehova, nangorogna sa masakit na mga panahon.”

An siring na saboot basado sa nakakapakosog liwat sa boot na panuga kan Biblia: “Idolot mo ki Jehova an saimong dalan, asin manarig ka sa saiya, asin sia mismo mahiro.” (Salmo 37:5) Tunay nanggad, an gabos na maimbod na parasamba ki Jehova, may agom o daing agom, puedeng maranga asin mapakosog kan ipinasabong na mga tataramon na: “An tabang sa sako gikan ki Jehova.”​—Salmo 121:2.

[Nota sa Ibaba]

[Blurb sa pahina 9]

“An lalaking daing agom napupurisaw sa mga bagay kan Kagurangnan, kun paano nia mapapaoyonan an Kagurangnan.”​—1 CORINTO 7:32

[Kahon sa pahina 8]

GINIGIBONG NAKAKAKONTENTO AN PAGIGIN DAING AGOM

Si Jesus, na dai noarin man nag-agom, nagsabi: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.”​—Juan 4:34.

An apat na aking babae ni Felipe na daing agom nagdanay na sibot sa ‘panhuhula.’​—Gibo 21:​8, 9.

An daing agom na Kristianang mga tugang na nagpapahayag kan mensahe nin Kahadean kabtang kan ‘dakulang hukbo nin mga babae na nagsasabi kan maogmang bareta.’​—Salmo 68:11.