“Padagos na Patunayan Kun Ano Man Nanggad Kamo”

“Padagos na baloon kun baga kamo nasa pagtubod, padagos na patunayan kun ano man nanggad kamo.”​—2 CORINTO 13:5.

1, 2. (a) Paano puedeng makaapektar sa sato an kadaihan nin kasegurohan manongod sa satong mga tinutubod? (b) Anong situwasyon sa Corinto kan enot na siglo an tibaad nagin dahelan na an nagkapira dai na segurado kun arin na dalan an dapat na lakawan?

NAKAABOT sa sarong sangang tinampo an sarong tawo na nagbibiahe sa probinsia. Huling dai nia segurado kun arin na dalan an pasiring sa saiyang destinasyon, naghagad sia nin direksion sa mga nag-aagi alagad ta nagkokorontrahan na impormasyon an nakua nia. Huling nariribaraw, dai sia makaabante. An pagkaigwa nin mga pagduwaduwa manongod sa satong mga tinutubod puedeng magkaigwa nin kaagid na epekto sa sato. An siring na kadaihan nin kasegurohan puedeng makaolang sa satong kakayahan na gumibo nin mga desisyon, na nagigin dahelan na dai na kita segurado kun arin na dalan an dapat na lakawan.

² Naglataw an sarong situwasyon na puedeng nagkaigwa nin siring na epekto sa nagkapira sa Kristianong kongregasyon sa Corinto, Grecia, kan enot na siglo. Kinukuestion kan “labi-labi karahay na mga apostol” an autoridad ni apostol Pablo, na nagsasabi: “An saiyang mga surat magabat asin makosog, alagad an saiyang personal na presensia maluya asin an saiyang pagtaram daing kuenta.” (2 Corinto 10:7-12; 11:​5, 6) An siring na punto de vista tibaad nagin dahelan na an nagkapira sa kongregasyon nin Corinto dai na segurado kun arin na dalan an dapat na lakawan.

3, 4. Taano ta maninigo kitang magin interesado sa konseho ni Pablo sa mga taga Corinto?

³ Inestablisar ni Pablo an kongregasyon sa Corinto durante kan saiyang pagsongko duman kan 50 C.E. Nagdanay sia sa Corinto nin “sarong taon may anom na bulan, na itinotokdo sa sainda an tataramon nin Dios.” Tunay nanggad, “dakol sa mga taga Corinto na nakadangog an nagpoon na tumubod asin nabautismohan.” (Gibo 18:5-11) Si Pablo interesadong marhay sa espirituwal na ikakarahay kan saiyang mga kapagtubod sa Corinto. Dugang pa, si Pablo sinuratan kan mga taga Corinto tanganing maghagad nin sadol manongod sa nagkapirang bagay. (1 Corinto 7:1) Kaya tinawan nia sinda nin marahayon na konseho.

⁴ “Padagos na baloon kun baga kamo nasa pagtubod,” an isinurat ni Pablo, “padagos na patunayan kun ano man nanggad kamo.” (2 Corinto 13:5) An pag-aplikar kan konsehong ini siertong nakaprotehir sa mga tugang na idto sa Corinto tumang sa kadaihan nin kasegurohan manongod sa kun arin na dalan an dapat na lakawan. Puede man kitang protehiran kaiyan ngonyan sa kaparehong paagi. Kun siring, paano niato masusunod an sadol ni Pablo? Paano niato mababalo kun baga kita nasa pagtubod? Asin ano an kalabot sa pagpapatunay kun ano man nanggad kita?

“Padagos na Baloon Kun Baga Kamo Nasa Pagtubod”

5, 6. Ano an pamantayan niato sa pagbalo kun baga kita nasa pagtubod, asin taano ta iyan an pinakamarahay na pamantayan?

⁵ Sa sarong pagbalo, sa parate binabalo an sarong bagay, asin igwa nin sarong basehan o pamantayan na dian ibinabasar an pagbalo. Sa kasong ini, an bagay na binabalo bakong an pagtubod​—an kabilogan kan mga tinutubod niato. Kita bilang mga indibiduwal an binabalo. Bilang basehan kan pagbalo, igwa kita nin sangkap na pamantayan. An sarong melodiya na kinomponer kan salmistang si David nagsasabi: “An ley ni Jehova sangkap, na nagpapaomay kan kalag. An pagirumdom ni Jehova mapagtitiwalaan, na nagpapadonong sa daing eksperyensia. An mga pagboot ni Jehova tanos, na nagpapagayagaya sa puso; an togon ni Jehova malinig,  na nakakapakinang kan mga mata.” (Salmo 19:​7, 8) Nasa Biblia an sangkap na mga ley asin tanos na mga pagboot ni Jehova, an saiyang mapagtitiwalaan na mga pagirumdom asin malinig na mga togon. An mensahe na yaon dian iyo an pinakamarahay na pamantayan para sa pagbalo.

⁶ May labot sa mensaheng iyan na ipinasabong nin Dios, si apostol Pablo nagsasabi: “An tataramon nin Dios buhay asin mapuersa asin mas matarom kisa arin man na espada na may duwang tarom asin nakakalagbas sagkod sa pagbulag kan kalag asin espiritu, saka kan mga pagsokmolan asin hotok kaiyan, asin nakakarisa kan mga kaisipan asin intension kan puso.” (Hebreo 4:12) Iyo, puedeng baloon kan tataramon nin Dios an satong puso​—kun ano man nanggad kita sa laog. Paano niato personal na ikakaaplikar an matarom asin mapuersang mensaheng ini? Malinaw na sinasabi kan salmista kun ano an kalabot digdi. Sia nag-awit: “Maogma an tawo na . . . an saiyang pagkaogmang marhay yaon sa ley ni Jehova, asin sa saiyang ley sia nagbabasa nin pahinghing aldaw asin banggi.” (Salmo 1:​1, 2) An “ley ni Jehova” yaon sa nasusurat na Tataramon nin Dios, an Biblia. Dapat na mawili kita sa pagbasa kan Tataramon ni Jehova. Tunay nanggad, dapat na magtao kita nin panahon na basahon iyan nin pahinghing, o horophoropon iyan. Mientras na ginigibo niato ini, kaipuhan na pabayaan niato na baloon kita kan nasusurat dian.

7. Ano an pangenot na paagi nin pagbalo kun baga kita nasa pagtubod?

⁷ Kun siring, an pangenot na paagi nin pagbalo kun baga kita nasa pagtubod iyo na basahon asin horophoropon an Tataramon nin Dios asin siyasaton kun sagkod saen nakakaoyon an satong gawe-gawe sa satong nanonodan. Puede niatong ikaogma na kadakol kan tabang sa sato tanganing masabotan an Tataramon nin Dios.

8. Paano kita matatabangan kan mga publikasyon kan “maimbod asin mapagmansay na oripon” na baloon kun baga kita nasa pagtubod?

⁸ Itinatao ni Jehova an mga katokdoan asin pagtotokdo paagi sa mga publikasyon kan “maimbod asin mapagmansay na oripon,” na nagpapaliwanag kan Kasuratan. (Mateo 24:45) Halimbawa, estudyare an kahon na “Mga Hapot Para sa Paghorophorop” sa katapusan kan kadaklan na kapitulo sa librong Rumani ki Jehova. * Kanigoan karahay na mga oportunidad para sa personal na paghorophorop an itinatao kan kabtang na ini kan librong iyan! Nakakatabang man sa sat an balakid na tema na tinotokar sa satong mga magasin, An Torrengbantayan asin Awake!, na baloon kun baga kita nasa pagtubod. Mapadapit sa mga artikulo manongod sa libro nin Talinhaga sa dai pa sana nahaloy na mga isyu kan An Torrengbantayan, sinabi nin sarong Kristiana: “An mga artikulong ini praktikal na marhay para sa sako. Tinatabangan ako kaiyan na siyasaton kun baga an sakong pagtaram, gawe-gawe, asin aktitud nakakaabot talaga sa matanos na mga pamantayan ni Jehova.”

9, 10. Anong mga probisyon ni Jehova an nagtatabang sa sato na padagos na baloon kun baga kita nasa pagtubod?

⁹ Nag-aako man kita nin abundang paggiya asin pagparigon sa boot sa mga pagtiripon sa kongregasyon, asamblea, asin kombension. Kabilang ini sa espirituwal na mga probisyon na itinatao nin Dios para sa mga may labot sa sainda ihinula ni Isaias: “Mangyayari sa huring kabtang kan mga aldaw na an bukid kan harong ni Jehova marigon na mapapatindog na halangkaw pa sa alitoktok kan mga bukid, asin iyan ilalangkaw nanggad nin mas halangkaw pa sa mga bulod; asin dian maburunyog an gabos na nasyon. Asin dakol na banwaan an maduruman nanggad asin masarabi: ‘Madia kamo asin tumukad kita sa bukid ni Jehova, . . . asin totokdoan nia kita manongod sa saiyang mga dalan, asin kita maglalakaw sa saiyang mga dana.’” (Isaias 2:​2, 3) Tunay nanggad na sarong bendisyon an pagkaigwa kan siring na pagtotokdo manongod sa mga dalan ni Jehova.

¹⁰ Dai man paglingawan an konseho hale sa mga igwang espirituwal na mga kualipikasyon, kaiba an Kristianong kamagurangan. May labot sa sainda, an Biblia nagsasabi: “Mga tugang, minsan kun an sarong tawo gumibo nin sala bago nia iyan maaraman, kamo na igwang espirituwal na mga kualipikasyon pagmaigotan nindo na pakarhayon giraray an tawong iyan sa espiritu nin kahoyoan, mantang binabantayan man nindo  an saindong sadiri, ta tibaad kamo masugotan man.” (Galacia 6:1) Pinapasalamatan nanggad niato an probisyon na ini para sa pagpakarhay giraray sa sato!

11. An pagbalo kun baga kita nasa pagtubod nangangaipo nin ano?

¹¹ Mga publikasyon niato, Kristianong mga pagtiripon, ninombrahan na mga lalaki​—marahayon na mga probisyon ini hale ki Jehova. Pero, an pagbalo kun baga kita nasa pagtubod nangangaipo nin pagsiyasat sa sadiri. Kaya kun kita nagbabasa kan satong mga publikasyon o naghihinanyog sa konseho na sono sa Kasuratan, kaipuhan na hapoton niato an satong sadiri: ‘Ako daw an ilinaladawan digdi? Ginigibo ko daw ini? Nagsususog daw ako sa kabilogan kan Kristianong mga tinutubod?’ An satong aktitud sa impormasyon na inaako niato paagi sa mga probisyon na ini nakakaimpluwensia man sa satong espirituwal na kamugtakan. “An pisikal na tawo dai nag-aako kan mga bagay kan espiritu nin Dios, huli ta an mga iyan kalolongan para sa saiya,” an sabi kan Biblia. “Minsan siring, an espirituwal na tawo tunay na nagsisiyasat kan gabos na bagay.” (1 Corinto 2:​14, 15) Bako daw na maninigo na kita magmaigot na papagdanayon an positibo, espirituwal na punto de vista sa nababasa niato sa satong mga libro, magasin, asin iba pang publikasyon patin sa nadadangog niato sa satong mga pagtiripon asin sa kamagurangan?

“Padagos na Patunayan Kun Ano Man Nanggad Kamo”

12. Ano an kalabot sa pagpapatunay kun ano man nanggad kita?

¹² Kalabot sa pagpapatunay kun ano man nanggad kita an pag-ebalwar sa sadiri. Iyo, puedeng nasa katotoohan kita, alagad kumusta an satong espirituwalidad? Kalabot sa pagpapatunay kun ano man nanggad kita an pagtao nin prueba nin pagkamaygurang asin nin tunay na pag-apresyar sa espirituwal na mga probisyon.

13. Segun sa Hebreo 5:​14, ano an nagseserbing prueba kan satong pagkamaygurang?

¹³ Anong prueba nin Kristianong pagkamaygurang an puede niatong hanapon sa satong sadiri? Si apostol Pablo nagsurat: “An matagas na kakanon para sa mga maygurang, duman sa mga huli sa paggamit napatuod an saindang kakayahan nin pagmansay na mamidbid an tama sagkod an sala.” (Hebreo 5:14) Kita nagtatao nin prueba nin pagkamaygurang paagi sa pagpatuod kan satong kakayahan nin pagmansay. Kun paanong may mga kalamnan sa hawak nin sarong atleta na kaipuhan na patuodon paagi sa paorootrong paggamit bago nia malabihan an iba sa saiyang isport, an satong kakayahan nin pagmansay kaipuhan man na patuodon paagi sa paggamit sa pag-aplikar kan mga prinsipyo sa Biblia.

14, 15. Taano ta maninigo kitang maigot na maghingoa na pag-adalan an mas hararom na mga bagay sa Tataramon nin Dios?

¹⁴ Pero, bago niato mapatuod an satong kakayahan nin pagmansay, kaipuhan na magkaigwa kita nin kaaraman. Para digdi, kaipuhan an maigot na personal na pag-adal. Kun kita personal na nag-aadal nin regular​—nangorogna manongod sa mas hararom na mga bagay sa Tataramon nin Dios​—mas nagrarahay an satong kakayahan nin pagmansay. Sa nag-aging mga taon, tinokar sa An Torrengbantayan an dakol na hararom na tema. Ano an reaksion niato kun nababasa niato an mga artikulo na nagtotokar nin mas hararom na mga katotoohan? May tendensia daw kitang likayan iyan huli sana ta iyan may “nagkapirang bagay na mapawot saboton”? (2 Pedro 3:16) Al kontraryo, orog pa kitang naghihingoa na saboton an sinasabi.​—Efeso 3:18.

 ¹⁵ Kumusta kun depisil para sa sato an personal na pag-adal? Mahalagang marhay na maghingoa kitang masonoan iyan. * (1 Pedro 2:2) An pagtalubo sa pagkamaygurang naghahagad na makanood kitang kuanon an sustansia hale sa matagas na kakanon, an mas hararom na mga katotoohan sa Tataramon nin Dios. Ta kun dai, an satong kakayahan nin pagmansay magdadanay na limitado. Minsan siring, labi pa kisa pagkaigwa sana nin kakayahan nin pagmansay an kalabot sa pagtao kan prueba nin pagkamaygurang. Sa pan-aroaldaw na buhay dapat na gamiton niato an kaaraman na nakukua niato paagi sa maigot na personal na pag-adal.

16, 17. Anong konseho an itinatao ni disipulo Santiago manongod sa pagigin “mga paraotob kan tataramon”?

¹⁶ An prueba sa kun ano man nanggad kita maheheling man sa satong mga kapahayagan nin pag-apresyar sa katotoohan​—an satong mga gibo nin pagtubod. Ginagamit an sarong mapuersang ilustrasyon tanganing iladawan an pag-ebalwar na ini sa sadiri, si disipulo Santiago nagsasabi: “Magin kamong mga paraotob kan tataramon, asin bakong mga paradangog sana, na dinadaya an saindong sadiri nin putik na pangangatanosan. Huli ta kun an siisay man paradangog kan tataramon, asin bakong paraotob, an sarong ini nakakaagid sa tawo na nagheheling sa saiyang natural na lalauogon sa salming. Huli ta pinagheheling nia an saiyang sadiri, asin sia minahale asin nalilingawan tolos kun anong klase siang tawo. Alagad an nagtuturuhok sa sangkap na ley para sa katalingkasan asin nagdadanay dian, an tawong ini, huli ta sia nagin, bakong malilingawon na paradangog, kundi paraotob kan gibohon, maoogma sa paggibo nia kaiyan.”​—Santiago 1:22-25.

¹⁷ An sinasabi ni Santiago: ‘Magturuhok sa salming kan tataramon nin Dios, asin ebalwaron an saindong sadiri. Magdanay sa paggibo kaini, asin pakasiyasaton an saindong sadiri sa liwanag kan naaaraman nindo sa tataramon nin Dios. Dangan, dai nindo paglingawan tolos kun ano an saindong naheling. Gibohon an kinakaipuhan na mga pagtatanos.’ Kun beses an pagsunod sa sadol na ini tibaad magin depisil.

18. Taano ta may kadepisilan an pagsunod sa konseho ni Santiago?

¹⁸ Kuanon tang halimbawa an kahagadan na makikabtang sa paghuhulit kan Kahadean. “Paagi sa puso an saro nagtutubod para sa katanosan,” an isinurat ni Pablo, “alagad ta paagi sa ngoso na an saro nagpapahayag sa publiko para sa kaligtasan.” (Roma 10:10) An pagpahayag sa publiko para sa kaligtasan paagi sa satong ngoso naghahagad nin dakol na pagliliwat. Bakong madali para sa kadaklan sa sato an pagpartisipar sa paghuhulit. An pagigin maigot dian asin an pagtao sa gibohon na iyan kan maninigo na mahalagang lugar sa satong buhay naghahagad nin orog pa nganing mga pagbabago asin pagsasakripisyo. (Mateo 6:33) Alagad oras na kita magin mga paraotob kan gibohon na ini na itinao nin Dios, maogma kita huli ta nagbubunga iyan nin kaomawan ki Jehova. Kun siring, kita daw maigot na mga parabalangibog kan Kahadean?

19. Ano an maninigong kaiba sa satong mga gibo nin pagtubod?

¹⁹ Maninigo na magin gurano kakompleto an satong mga gibo nin pagtubod? Si Pablo nagsasabi: “An mga bagay na saindong nanodan saka  inako asin nadangog patin naheling mapadapit sa sako, gibohon nindo an mga ini; asin mapapasaindo an Dios nin katoninongan.” (Filipos 4:9) Nagtatao kita nin prueba sa kun ano kita paagi sa pag-aplikar niato kan satong nanodan, inako, nadangog, asin naheling​—an bilog na sakop kan Kristianong pagdusay asin pagkadisipulo. “Iyo ini an dalan. Maglakaw kamo dian,” an instruksion ni Jehova paagi ki propeta Isaias.​—Isaias 30:21.

20. Anong klaseng mga indibiduwal an dakulang bendisyon sa kongregasyon?

²⁰ Dakulang bendisyon sa kongregasyon an mga lalaki asin babae na maigot na mga estudyante kan Tataramon nin Dios, maigot na mga parahulit kan maogmang bareta, daing katuyawan an integridad, asin maimbod na mga parasuportar sa Kahadean. An saindang presensia nakakadagdag sa karigonan kan kongregasyon na inaasosyaran ninda. Sinda nakakatabang na marhay, nangorogna ta kadakol kan bagohan na dapat pangatamanan. Kun isinasapuso niato an sadol ni Pablo na ‘padagos na baloon kun baga kita nasa pagtubod, padagos na patunayan kun ano man nanggad kita,’ kita man nagigin marahay na impluwensia sa iba.

Ikaogmang Marhay an Paggibo kan Boot nin Dios

21, 22. Paano niato ikakaogmang marhay an paggibo kan kabotan nin Dios?

²¹ “An paggibo kan boot mo, O Dios ko, iyo an ikinakaogma kong marhay,” an inawit ni Hadeng David kan suanoy na Israel, “asin an saimong ley nasa kairaroman kan sakong sadiri.” (Salmo 40:8) Ikinawili ni David an paggibo kan kabotan nin Dios. Taano? Huli ta an ley ni Jehova nasa puso ni David. Segurado ni David kun arin na dalan an dapat na lakawan.

²² Kun an ley nin Dios nasa kairaroman kan satong sadiri, segurado niato kun arin na dalan an dapat na lakawan. Ikinakaogma niatong marhay an paggibo kan boot nin Dios. Kun siring, ‘maghingoa nanggad kita nin maigot’ mantang pinaglilingkodan niato si Jehova nin gikan sa puso.​—Lucas 13:24.

[Mga Nota sa Ibaba]

Nagigirumdoman daw Nindo?

• Paano niato mababalo kun baga kita nasa pagtubod?

• Ano an kalabot sa pagpatunay kun ano man nanggad kita?

• Ano an ikakatao niatong prueba nin Kristianong pagkamaygurang?

• Paano nakakatabang sa sato an mga gibo nin pagtubod na ebalwaron kun ano kita?

[Mga Hapot Para sa Pag-adal]

[Ritrato sa pahina 23]

Aram daw nindo kun ano an pangenot na paagi nin pagbalo kun baga kamo nasa pagtubod?

[Ritrato sa pahina 24]

Nagtatao kita nin prueba kan satong Kristianong pagkamaygurang paagi sa paggamit kan satong kakayahan nin pagmansay

[Mga Ritrato sa pahina 25]

Pinapatunayan niato kun ano kita paagi sa pagigin ‘bakong malilingawon na mga paradangog, kundi mga paraotob kan tataramon’