“An Pagkatakot ki Jehova—Iyan an Kadonongan”

“AN KONKLUSYON kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.” (Eclesiastes 12:13) Kanigoan kamapuersang konklusyon an sinabi ni Hadeng Salomon kan suanoy na Israel paagi sa pasabong nin Dios! Nasabotan man kan patriarkang si Job an halaga kan pagkatakot sa Dios, huli ta sia nagsabi: “Uya! An pagkatakot ki Jehova​—iyan an kadonongan, asin an pagtalikod sa karatan pakasabot.”​—Job 28:28.

Tinatawan kan Biblia nin dakulang halaga an pagkatakot ki Jehova. Taano ta madonong an pagkultibar niato nin reberensial na pagkatakot sa Dios? Sa anong paagi kita makikinabang sa pagkaigwa nin diosnon na pagkatakot​—bilang indibiduwal asin bilang grupo nin tunay na mga parasamba? Sinisimbag kan bersikulo 26 sagkod 35 kan Talinhaga kapitulo 14 an mga hapot na ini. *

Gikanan nin “Makosog na Kompiansa”

“Sa pagkatakot ki Jehova yaon an makosog na kompiansa,” an sabi ni Salomon, “asin para sa saiyang mga aki magkakaigwa nin pailihan.” (Talinhaga 14:26) An ginigikanan nin pagtitiwala nin sarong tawong matatakton sa Dios daing iba kundi an maimbod asin makakamhan sa gabos na Dios, si Jehova. Bakong makangangalas na an arog kaiyan na tawo inaatubang an ngapit na may makosog na kompiansa! An saiyang ngapit halawig asin maogma.

Pero, ano an masasabi manongod sa ngapit kan mga an kompiasa nasa kinaban​—an mga plano, organisasyon, ideolohiya, asin rogaring kaiyan? Halipot an ano man na linalaoman nindang ngapit, huli ta an Biblia nagsasabi: “An kinaban maagi sana asin siring man an mawot kaiyan, alagad an naggigibo kan kabotan nin Dios magdadanay sagkod lamang.” (1 Juan 2:17) Kun siring, igwa daw nin ano man na dahelan na kita “mamoot sa kinaban o sa mga bagay kan kinaban”?​—1 Juan 2:15.

Anong aksion an puedeng gibohon nin mga magurang na matatakton sa Dios tanganing seguradohon na “magkakaigwa nin pailihan” an saindang mga aki? “Madia kamo, mga aki, hinanyoga ako nindo,” an awit kan salmista, “an pagkatakot ki Jehova iyo an itotokdo ko sa saindo.” (Salmo 34:11) Kun an mga aki tinokdoan na matakot sa Dios paagi sa halimbawa asin instruksion nin mga magurang, posibleng marhay na madakula sinda bilang mga lalaki asin babae na may makosog na kompiansa ki Jehova.​—Talinhaga 22:6.

“An pagkatakot ki Jehova bobon nin buhay,” an pagpadagos ni Salomon, “sa pagrayo sa mga siod nin kagadanan.” (Talinhaga 14:27) An pagkatakot ki Jehova “bobon nin buhay” huli ta an tunay na Dios “an burabod nin buhay na tubig.” (Jeremias 2:13) An paglaog sa isip nin kaaraman dapit ki Jehova asin ki Jesu-Cristo puedeng mangahulogan nin buhay na daing katapusan para sa sato. (Juan 17:3) An diosnon na pagkatakot irinarayo man kita sa mga siod nin kagadanan. Paano? An Talinhaga 13:14 nagsasabi: “An ley kan madonong burabod nin buhay, tanganing irayo an saro sa mga siod nin kagadanan.” Kun kita natatakot ki Jehova, nagkukuyog sa saiyang mga ley, asin nagpapagiya sa saiyang Tataramon sa satong mga lakad, bako daw na napoprotehiran kita sa nakakadanyar na mga gibo asin emosyon na puedeng magbunga nin mayo pa sa panahon na kagadanan?

 “Samno nin Sarong Hade”

Sa kadaklan na panahon kan saiyang paghade, si Salomon sarong matatakton sa Dios na hade na nagkukuyog ki Jehova. Nagresulta ini sa mapangganang pamamahala. Ano an nagdedeterminar kun gurano kamapanggana an pamamahala nin sarong hade? An Talinhaga 14:28 minasimbag: “Sa kadakolan nin banwaan yaon an samno nin sarong hade, alagad ta sa kakulangan nin populasyon an pagbagsak nin sarong halangkaw na opisyal.” An kapangganahan nin sarong hade nadedeterminaran paagi sa marahay na kamugtakan kan saiyang mga nasasakopan. Kun kadakoldakol kan tawong gustong magdanay sa saiyang pamamahala, irinerekomendar sia kaiyan bilang sarong marahay na namamahala. Si Salomon igwa nin “mga sakop paghale sa dagat [na Pula] sagkod sa dagat [nin Mediterraneo] asin paghale sa Salog [Eufrates] sagkod sa kaporoporohi kan daga.” (Salmo 72:6-8) An saiyang pamamahala midbid sa pagkaigwa nin daing kaagid na katoninogan asin prosperidad. (1 Hade 4:​24, 25) Mapanggana an paghade ni Salomon. Sa ibong na lado, an kawaran nin pag-oyon kan mga namamanwaan nangangahulogan nin kasusupgan para sa sarong halangkaw na opisyal.

Mapadapit digdi, ano an masasabi manongod sa kamurawayan kan Salomon na Orog na Dakula, an Mesiyanikong Hade, si Jesu-Cristo? Isipon nindo an mga sakop nia dawa ngonyan. Hale sa mag-ibong-ibong na poro kan daga, pinili na nin labing anom na milyon na matatakton sa Dios na lalaki asin babae na mamuhay sa irarom kan pamamahala ni Cristo. Sinda nagtutubod ki Jesus asin nagkakasararo sa tunay na pagsamba sa buhay na Dios. (Juan 14:1) Sa katapusan kan Milenyal na Pamamahala, an gabos na nasa girumdoman nin Dios binuhay na liwat. An paraisong daga mapapano sa panahon na iyan nin maogma asin matanos na mga tawo na nagpaheling nin pag-apresyar sa saindang Hade. Seguradong marahayon na patotoo iyan sa kapangganahan kan pamamahala ni Cristo! Logod na pangaptan niato nin higot an satong makangangalas na paglaom sa Kahadean.

Espirituwal Asin Pisikal na mga Pakinabang

An reberensial na pagkatakot sa Dios puedeng magtao sa sato nin kalmadong puso asin matoninong na isip. Totoo ini huling kaiba sa dakol na aspekto nin kadonongan an marahay na paghusgar asin pagigin mapagrisa. An Talinhaga 14:29 nagsasabi: “An maluway sa pagkaanggot abunda sa pagigin mapagrisa, alagad an daing pasensia nag-oomaw sa kalolongan.” An pagigin mapagrisa nakakatabang sa sato na marealisar na an daing kontrol na kaanggotan igwa nin nakakadanyar na epekto sa satong espirituwalidad. An “mga pag-iriwal, mapait na paglalaban, pangimon, mga pagputok nin kaanggotan, mga pasuruhay” ilinista na kaiba sa mga gibo na puedeng makaolang sa sato sa ‘pagmana kan kahadean nin Dios.’ (Galacia 5:19-21) Hinahatolan kita tumang sa pagtanom sa boot nin dawa makatanosan na kaanggotan. (Efeso 4:​26, 27) Asin an kadaihan nin pasensia puedeng magbunga nin sa lolong na pagtaram asin gawe-gawe na pagbabasolan niato sa huri.

Sinasambit an maraot na pisikal na epekto nin kaanggotan, an hade kan Israel nagsasabi: “An trangkilong puso iyo an buhay kan laman, alagad an pag-imon kalapaan sa mga tolang.” (Talinhaga 14:30) Kaiba sa mga kamatean na resulta nin kaanggotan asin kabangisan an problema sa paghangos, paglangkaw kan presyon nin dugo, diperensia sa katoy, asin maraot na epekto sa pancreas. Ilinista man kan mga doktor an kaangotan asin kabangisan bilang emosyon na nagpapagrabe, o nagigin dahelan pa ngani, nin mga helang na arog kan ulser, libaka, hapo, mga helang sa kublit, asin problema sa panunaw. Sa ibong na lado, “an trangkilong puso nagtatao nin buhay sa hawak.” (Talinhaga 14:​30, New International Version) Kun siring, madonong na ‘sunodon niato an mga bagay na nagpapatoninong asin an mga bagay na nagpapakosog sa lambang saro.’​—Roma 14:19.

An Pagkatakot sa Dios Nagtatabang sa Sato na Dai Magpaorog

“An nandadaya sa dukha naglalanghad sa saiyang Kaggibo,” an sabi ni Salomon, “alagad an nagpapaheling nin pabor sa nagtitios nagpapamuraway sa Saiya.” (Talinhaga 14:31) An matatakton sa Dios na tawo nakakaaram na an gabos na tawo igwa nin saro man sanang Kaggibo, si Jehova Dios. Kun siring, an dukha sarong kapwa tawo, asin an paagi nin pagtratar sa saiya may epekto sa Kaglalang kan katawohan. Tanganing mapamuraway an Dios, kaipuhan na kita magin makatanosan asin daing pagpaorog sa iba. An mga Kristianong dukha maninigong mag-ako nin espirituwal na atension na daing pagpaorog. Kaipuhan na paabotan  niato kan maogmang bareta kan Kahadean nin Dios an mga nagtitios asin mayaman man.

Nagtataram manongod sa saro pang pakinabang kan diosnon na pagkatakot, an madonong na hade nagsasabi: “Huli sa saiyang karatan an maraot itutulod paibaba, alagad an matanos makakakua nin pailihan sa saiyang integridad.” (Talinhaga 14:32) Paanong an maraot itutulod paibaba? Isinusuherir na nangangahulogan ini na sia mayo nin ano man na posibilidad na makabawe kun makaeksperyensia sia nin kapahamakan. Sa ibong na lado, kun umabot an problema, an matatakton sa Dios na tawo nagpapaili sa saiyang integridad sa Dios. Huling may lubos na tiwala ki Jehova sagkod sa kagadanan, nagpapaheling sia kan kaparehong determinasyon ni Job, na nagsabi: “Sagkod na ako magadan dai ko hahaleon sa sakuyang sadiri an sakuyang integridad!”​—Job 27:5.

An pagpapadanay nin integridad naghahagad nin diosnon na pagkatakot asin kadonongan. Asin saen puedeng manompongan an kadonongan? “Sa puso nin saro na may pakasabot nagpapahingalo an kadonongan,” an simbag kan Talinhaga 14:​33, “asin sa tahaw nin mga mangmang nahahayag iyan.” Iyo, an kadonongan puedeng manompongan sa puso nin saro na may pakasabot. Pero, sa anong paagi na iyan nahahayag sa tahaw nin mga mangmang? Oyon sa sarong reperensia, “gustong marhay na palatawon kan mangmang na sia garo baga madonong, na bigla na sanang itinataram an sa paghona nia kadonongan alagad sa paggibo kaiyan minalataw na iyan kabalisngagan.”

“Ilinalangkaw an Sarong Nasyon”

Ibinabalyo an satong atension hale sa kun paano naaapektaran an sarong indibiduwal kan pagkatakot sa Dios pasiring sa kun paano kaiyan naaapektaran an bilog na nasyon, an hade kan Israel nagsasabi: “An katanosan an naglalangkaw sa sarong nasyon, alagad an kasalan kasusupgan sa mga grupo nasyonal.” (Talinhaga 14:34) Malinaw nanggad na ipinaheling an prinsipyong ini sa nangyari sa nasyon nin Israel! An pagsusog sa halangkaw na mga pamantayan nin Dios nagresulta sa pagkalangkaw kan Israel sa nakapalibot na mga nasyon. Minsan siring, an paorootrong mga pakisuway nagbunga nin kasusupgan asin sa huri pagsikwal ni Jehova sa Israel. An prinsipyong ini minaaplikar sa banwaan nin Dios ngonyan. An Kristianong kongregasyon napapalaen sa kinaban huling sinususog kaiyan an matanos na mga prinsipyo nin Dios. Pero, tanganing mapagdanay an halangkaw na kamugtakan na iyan, kaipuhan na kita bilang indibiduwal mamuhay na may kabinian. An paggibo nin kasalan nagbubunga sana nin kasusupgan sa sato personalmente saka katuyawan sa kongregasyon asin sa Dios.

Ipinapahayag an nagtatao nin dakulang kaogmahan sa sarong hade, si Salomon nagsabi: “An kaogmahan nin hade yaon sa lingkod na naghihirong may pakarorop, alagad an saiyang nagpuputok na kaanggotan minadatong sa saro na minagawe nin makasusupog.” (Talinhaga 14:35) Asin an Talinhaga 16:13 nagsasabi: “An mga ngabil nin katanosan kawilihan nin dakulang hade; asin an nagtataram nin tanos na mga bagay saiyang namomotan.” Iyo, an satong Poon asin Hade, si Jesu-Cristo, naoogmang marhay kun kita minagawe nin tanos asin may pakarorop patin ginagamit an satong mga ngabil sa paghuhulit kan Kahadean asin paggibo nin disipulo. Tunay nanggad, kun siring, magdanay kitang sibot sa gibohon na iyan mantang nakakamtan niato an mga bendisyon na bunga kan pagkatakot sa tunay na Dios.

[Nota sa Ibaba]

[Ritrato sa pahina 15]

An diosnon na pagkatakot puedeng itokdo