Siisay si Jesu-Cristo?

IMAHINARA kun gurano kaogma an sarong hoben na Judio na an ngaran Andres kan enot niang madangog an mga tataramon ni Jesus na taga Nazaret! An Biblia nagsasabi na dali-daling nagpasiring si Andres sa saiyang tugang asin nagsabi: “Nakua na niamo an Mesiyas [o, Cristo].” (Juan 1:41) Sa lenguaheng Hebreo asin Griego, an mga termino na parateng tinatradusir na “Mesiyas” asin “Cristo” nangangahulogan “Linahidan.” Si Jesus iyo an Linahidan, o Pinili nin Dios​—an ipinanugang Poon. (Isaias 55:4) An Kasuratan igwa nin mga hula may labot sa saiya, asin an mga Judio kan panahon na iyan inaantisipar an pag-abot nia.​—Lucas 3:15.

Paano niato naaaraman na si Jesus talaga an Pinili nin Dios? Bueno, isipon niato an nangyari kan taon 29 C.E. kan si Jesus 30 anyos. Sia nagpasiring ki Juan na Bautisador tanganing bautismohan kaini sa Salog nin Jordan. An Biblia nagsasabi: “Kan mabautismohan na si Jesus tolos na naghawas sa tubig; asin, uya! an kalangitan nagkaburukasan, asin naheling nia an espiritu nin Dios na nag-iibaba siring sa salampati na nagtotogdon sa saiya. Uya! May nadangog man na tingog sa langit na nagsasabi: ‘Ini an sakong Aki, an namomotan, na sakong inoyonan.’” (Mateo 3:​16, 17) Pagkadangog kan mga tataramon na idto nin pag-oyon, may pagduda pa daw si Juan na si Jesus iyo an Pinili nin Dios? Paagi sa pagbubo kan Saiyang banal na espiritu ki Jesus, linahidan sia ni Jehova Dios, o ninombrahan sia, na magin Hade sa Saiyang maabot na Kahadean. Sa siring, si Jesus nagin si Jesu-Cristo, o si Jesus na Linahidan. Pero, sa anong paagi na si Jesus Aki nin Dios? Ano an saiyang ginikanan?

An Saiyang Ginikanan “kan Enot Pang mga Panahon”

An buhay ni Jesus puedeng bangaon sa tolong tangga. An enot nagpoon haloy pa bago sia mamundag bilang tawo. An saiyang ginikanan “kan enot pang mga panahon, kan mga aldaw nin panahon na daing talaan,” an sabi kan Miqueas 5:2. Si Jesus mismo nagsabi: “Ako taga itaas”​—an boot sabihon, hale sa langit. (Juan 8:23) Sia dating yaon sa langit bilang makakamhan na espiritung persona.

Mantang an gabos na linalang na bagay may kapinonan, may panahon kaidto na an Dios nagsosolo. Minsan siring, kaidtong dai masokol na panahon na an nakaagi, an Dios nagin Kaglalang. Siisay an enot niang linalang? An huring libro kan Biblia ipinapamidbid si Jesus bilang “an kapinonan kan paglalang nin Dios.” (Kapahayagan 3:14) Si Jesus “an panganay sa gabos na linalang.” Iyan “huli ta paagi sa saiya an gabos na iba pang bagay linalang sa kalangitan asin sa daga, an mga bagay na naheheling asin an mga bagay na dai naheheling.” (Colosas 1:​15, 16) Iyo, solamente si Jesus an direktang linalang nin Dios. Kun siring, inapod siang “Aking bugtong” nin Dios. (Juan 3:16) An panganay na Aki igwa man kan titulong “an Tataramon.” (Juan 1:14) Taano man? Huli ta bago sia mamundag bilang tawo, naglingkod sia sa langit bilang parataram nin Dios.

“An Tataramon” nasa kaibanan ni Jehova Dios “sa kapinonan,” kan lalangon “an kalangitan asin an daga.” Sia an saro na sinabihan nin Dios: “Gibohon niato an tawo sa satong ladawan.” (Juan 1:1; Genesis 1:​1, 26) An panganay na Aki ni Jehova yaon sa kataed kan saiyang Ama, na aktibong naggigibo kaiba nia. Sa Talinhaga 8:22-31, sia irinerepresentar na nagsasabi: “Yaon ako kaidto sa kataed [kan Kaglalang] bilang pangenot na trabahador, asin ako an nangongorog niang kinakaogmahan sa aroaldaw, mantang ako maogma sa atubangan nia sa gabos na panahon.”

Mantang nagtatrabaho sindang magkaibanan seguradong nagin dayupot nanggad an pagkamidbidan ni Jehova Dios asin kan saiyang bugtong na Aki! Hararom an nagin epekto sa Aki nin Dios kan dayupot na pakiibaibang iyan ki Jehova  sa laog nin dai masokol na panahon. An makinuyog na Aking ini nagin arog nanggad kan saiyang Ama, si Jehova. Sa katunayan, si Jesus inaapod kan Colosas 1:15 na “an ladawan kan Dios na dai naheheling.” Ini sarong dahelan kun taano ta an kaaraman manongod ki Jesus kaipuhan sa pagpanigo sa satong espirituwal na pangangaipo asin sa satong natural na pagmawot na mamidbid an Dios. An gabos na ginibo ni Jesus mantang yaon sia sa daga iyo an eksaktong inaasahan ni Jehova na gigibohon nia. Huli kaini, an pakamidbid ki Jesus nangangahulogan man nin pagpaoswag kan satong kaaraman manongod ki Jehova. (Juan 8:28; 14:8-10) Alagad paano napadigdi sa daga si Jesus?

An Saiyang Buhay Bilang Tawo

An ikaduwang tangga kan buhay ni Jesus nagpoon kan isugo nin Dios an saiyang Aki sa daga. Ginibo ini ni Jehova paagi sa milagrosong pagbalyo kan buhay ni Jesus hale sa langit pasiring sa matris nin sarong maimbod na Judiong daraga na an ngaran Maria. Si Jesus dai nagmana nin pagkabakong sangkap huli ta mayo sia nin amang tawo. An banal na espiritu, o puersa aktiba, ni Jehova nagdatong ki Maria, asin an saiyang kapangyarihan “naglindong” ki Maria, na nagpangyaring ini magbados sa milagrosong paagi. (Lucas 1:​34, 35) Kun siring, si Maria nangaki nin sarong sangkap na aki. Bilang inampon na aki kan karpinterong si Jose, sia pinadakula sa sarong simpleng harong asin iyo an pinakamatua sa nagkapirang aki sa pamilya.​—Isaias 7:14; Mateo 1:​22, 23; Marcos 6:3.

Kadikit sana an naaaraman manongod sa pagkaniaki ni Jesus, alagad mahalagang mangnohon an sarong pangyayari. Kan si Jesus 12 anyos, iiniba sia kan saiyang mga magurang sa saindang taonan na pagsongko sa Jerusalem para sa Paskua. Mantang yaon duman, dakol na panahon an ginamit nia sa templo, “na nagtutukaw sa tahaw kan mga paratokdo asin naghihinanyog sa sainda asin naghahapot sa sainda.” Apuera dian, “an gabos na naghihinanyog sa saiya danay na nagngangalas sa saiyang pakasabot asin sa saiyang mga simbag.” Iyo, an hoben na si Jesus bako sanang nakakapalataw nin mga hapot na nakakapukaw nin isip asin nakasentro sa espirituwal na mga bagay kundi nakakatao man nin madonong na mga simbag na nakapangalas sa iba. (Lucas 2:41-50) Mantang sia nagdadakula sa siudad nin Nazaret, daing duda na nakanood siang magin karpintero sa saiyang kag-ampon na ama, si Jose.​—Mateo 13:55.

Si Jesus nag-istar sa Nazaret sagkod na sia 30 anyos. Dangan sia nagpasiring ki Juan tanganing magpabautismo. Pagkatapos kan saiyang bautismo, si Jesus nagpoon sa saiyang entusiastikong ministeryo. Sa laog nin tolo may kabangang taon, linibot nia an saiyang dagang tinuboan na nagpapahayag kan maogmang bareta kan Kahadean nin Dios. Sia nagtao nin ebidensia na sia isinugo nin Dios. Paano? Paagi sa paggibo nin dakol na milagro​—makapangyarihan na mga gibo na dai kayang gibohon nin tawo.​—Mateo 4:17; Lucas 19:​37, 38.

Si Jesus saro man na tawo na may mapagpadangat na init asin hararom na saboot. An saiyang pagpadangat espesyalmenteng naheheling sa kun paano nia minamansay asin tinatratar an iba. Huling si Jesus madaling dolokon asin maboot, an mga tawo naaakit sa saiya. Dawa an mga aki pamugtak an boot kun kaatubang nia. (Marcos 10:13-16) Trinatar ni Jesus an mga babae na may  paggalang, minsan ngani may mga nagmemenos sa sainda kan kaaldawan nia. (Juan 4:​9, 27) Tinabangan nia an mga dukha asin inaapi na ‘makakua nin kaginhawahan para sa saindang kalag.’ (Mateo 11:28-30) An saiyang paagi nin pagtotokdo malinaw, simple, asin praktikal. Asin an itinokdo nia nagpapabanaag kan saiyang odok sa pusong pagmawot na tokdoan an mga naghihinanyog sa saiya manongod sa tunay na Dios, si Jehova.​—Juan 17:6-8.

Ginagamit an banal na espiritu nin Dios sa paggibo nin mga milagro, maheherakon na pinaomayan ni Jesus an mga may helang asin nagsasakit nin makuri. (Mateo 15:​30, 31) Halimbawa, an sarong tawo na may daot nagrani sa saiya asin nagsabi: “Kun boot mo sana, mapapalinig mo ako.” Ano an ginibo ni Jesus? Inunat nia an saiyang kamot asin dinuotan an lalaki, na nagsasabi sa saiya: “Boot ko. Luminig ka.” Asin naomayan an may helang na lalaki!​—Mateo 8:2-4.

Isipon man an sarong pangyayari kan an sarong kadaklan na nagpasiring ki Jesus nagdanay na kaiba nia sa laog nin tolong aldaw na mayo nin pagkakan. Naherak sia sa mga tawo asin pinakakan nia sa milagrosong paagi an “apat na ribong lalaki, apuera an mga babae asin aki.” (Mateo 15:32-38) Sa saro pang pangyayari, pinakalma ni Jesus an sarong bagyo na nagsapeligro kan kaligtasan kan saiyang mga katood. (Marcos 4:37-39) Binuhay nia liwat an mga nagadan. * (Lucas 7:22; Juan 11:​43, 44) Gikan sa boot pa nganing itinao ni Jesus an saiyang sangkap na buhay bilang tawo tanganing an bakong sangkap na katawohan magkaigwa nin paglaom para sa ngapit. Kanigoan nanggad kararom kan pagkamoot ni Jesus sa mga tawo!

Haen si Jesus Ngonyan?

Si Jesus nagadan sa sarong hariging pasakitan sa edad na 33 1/2. * Alagad an kagadanan bakong an katapusan kan saiyang buhay. An ikatolong tangga kan saiyang buhay nagpoon pakalihis nin mga tolong aldaw kan buhayon liwat ni Jehova Dios an saiyang Aki bilang sarong espiritung persona. Pakatapos na sia buhayon liwat, si Jesus nagpaheling sa ginatos na tawo na nabubuhay kan panahon na idto. (1 Corinto 15:3-8) Pakatapos kaiyan, sia “nagtukaw sa too nin Dios” asin naghalat na akoon an kapangyarihan bilang hade. (Hebreo 10:​12, 13) Kan umabot an panahon na iyan, si Jesus nagpoon na mamahala bilang Hade. Kaya paano niato maninigong imahinaron si Jesus ngonyan? Maninigo daw na isipon niato na sia sarong nagsasakit na tawo na ginagadan? O maninigo daw niato siang mansayon bilang saro na dapat sambahon? Si Jesus ngonyan bakong tawo ni Dios na Makakamhan sa Gabos. Imbes, sia sarong makakamhan na espiritung linalang, sarong nagrereynar na Hade. Dai na nanggad mahahaloy ngonyan, ipapaheling nia an saiyang pamamahala sa satong purisaw na daga.

Ginagamit an simbolikong pananaram, ilinaladawan kan Kapahayagan 19:11-16 si Jesu-Cristo bilang sarong hade na nakatukaw sa puting kabayo asin minadatong tanganing maghokom asin makiguerra sa katanosan. Igwa sia nin “sarong matarom na halabang espada, tanganing ipanlugad nia sa mga nasyon.” Iyo, gagamiton ni Jesus an saiyang dakulang kapangyarihan tanganing laglagon an mga maraot. Asin kumusta an mga nagmamaigot na sumunod sa halimbawa na ipinaheling nia kan sia yaon sa daga? (1 Pedro 2:21) Sinda iingatan nia asin kan saiyang Ama sa nagdadangadang na “guerra kan dakulang aldaw nin Dios na Makakamhan sa Gabos”​—na parateng inaapod na Armagedon​—tanganing sinda mabuhay sagkod lamang bilang daganon na mga sakop kan langitnon na Kahadean nin Dios.​—Kapahayagan 7:​9, 14; 16:​14, 16; 21:​3, 4.

Durante kan saiyang pagreynar sa katoninongan, kanigoan na mga milagro an gigibohon ni Jesus para sa bilog na katawohan! (Isaias 9:​6, 7; 11:1-10) Papaomayan nia an mga may helang asin tataposon an kagadanan. Si Jesus gagamiton nin Dios tanganing buhayon liwat an binilyon, na tinatawan sinda nin oportunidad na mabuhay sagkod lamang sa daga. (Juan 5:​28, 29) Dai ngani niato maimahinar kun gurano karahay an magigin buhay niato sa irarom kan pamamahala kan Kahadean. Kun siring, mahalaga na padagos kitang maglaog sa isip nin kaaraman sa Biblia asin orog niatong midbidon si Jesu-Cristo.

[Mga Nota sa Ibaba]

 [Kahon sa pahina 7]

SI JESUS DAW DIOS NA MAKAKAMHAN SA GABOS?

Dakol na relihiosong tawo an nagsasabing si Jesus Dios. May mga naghihingako na an Dios sarong Trinidad. Segun sa katokdoan na ini, “an Ama Dios, an Aki Dios, asin an Banal na Espiritu Dios, alagad ta bakong tolo an Dios kundi saro an Dios.” Pinapaniwalaan na an tolo “pararehong daing sagkod asin magkakapantay.” (The Catholic Encyclopedia) Tama daw an siring na mga punto de vista?

Si Jehova Dios an Kaglalang. (Kapahayagan 4:11) Mayo sia nin kapinonan o katapusan, asin sia makakamhan sa gabos. (Salmo 90:2) Sa ibong na lado, si Jesus igwa nin kapinonan. (Colosas 1:​15, 16) Sa pag-apod sa Dios bilang saiyang Ama, si Jesus nagsabi: “An Ama orog na dakula kisa sako.” (Juan 14:28) Ipinaliwanag man ni Jesus na may mga bagay na dai nia naiisihan ni kan mga anghel kundi kan Ama nia sana.​—Marcos 13:32.

Dugang pa, si Jesus namibi sa saiyang Ama: “Mangyari logod, bakong an boot ko, kundi an boot mo.” (Lucas 22:42) Kiisay pa baga namimibi si Jesus kun bakong sa sarong Personahe na nakakalabi sa saiya? Apuera kaini, an Dios an nagbuhay liwat ki Jesus hale sa mga gadan, bakong si Jesus mismo. (Gibo 2:32) Malinaw na an Ama asin an Aki bakong magkapantay bago magpasiring sa daga si Jesus o durante kan saiyang buhay digdi sa daga. Kumusta pakalihis na buhayon liwat si Jesus pasiring sa langit? An 1 Corinto 11:3 nagsasabi: ‘An payo kan Cristo iyo an Dios.’ Sa katunayan, an Aki pirmeng magigin sakop nin Dios. (1 Corinto 15:28) Kun siring, ipinapaheling kan Kasuratan na si Jesus bakong Dios na Makakamhan sa Gabos. Imbes, sia Aki nin Dios.

An ikatolo daang persona kan Trinidad​—an banal na espiritu​—bakong persona. Sa pagpamibi sa Dios, an salmista nagsabi: “Kun isugo mo an saimong espiritu, sinda nalalalang.” (Salmo 104:30) An espiritung ini bakong an Dios mismo; iyan puersa aktiba na sinusugo o ginagamit nia tanganing hamanon an ano man na gusto nia. Paagi kaiyan, linalang nin Dios an pisikal na kalangitan, an daga, asin an gabos na nabubuhay na bagay. (Genesis 1:2; Salmo 33:6) Ginamit nin Dios an saiyang banal na espiritu tanganing pasabngan an mga lalaking nagsurat kan Biblia. (2 Pedro 1:​20, 21) Kun siring, an Trinidad bakong katokdoan na sono sa Kasuratan. * “Si Jehova na satuyang Dios sarong Jehova,” an sabi kan Biblia.​—Deuteronomio 6:4.

[Nota sa Ibaba]

[Ritrato sa pahina 5]

Kan sia bautismohan, si Jesus nagin an Linahidan nin Dios

[Ritrato sa pahina 7]

Idinusay ni Jesus an saiyang kosog sa gibohon na iinasignar sa saiya nin Dios

[Ritrato sa pahina 7]

Si Jesus sarong makakamhan na Hade ngonyan