Sarong Pagdalaw na Nagin Dahelan nin Pagbabago

“DAI na ako makahalat na iestorya sa sakong pamilya an manongod sa duwang ‘anghel’ na isinugo nin Dios sa sako.” Iyan an isinurat nin sarong lalaki na dinalaw nin duwang hoben na babae na mga Saksi ni Jehova. Pirang semana antes kan saindang pagdalaw, sia nagadanan nin agom na 45 anyos na niang kaibaiba. Grabe an saiyang kamondoan. Rinanga sia kan darakula na niang mga aki, alagad harayo sinda sa saiya. Mayo nin mga kaamigo asin pagtaraed na nagdalaw sa saiya.

“Dai na ako nakikipag-olay sa Dios,” an sabi kan lalaki sa mga hoben na babae kan sinda dumalaw sa saiya. Minsan siring, sinda maduminamay asin nagwalat sa saiya nin sarong sadit, basado sa Bibliang pulyeto na may titulong What Hope for Dead Loved Ones? Binasa nia iyan kan bangging idto asin sia naranga.

Dai naghaloy, an duwang Kristiana nagbalik. Nagirumdoman ninda kun gurano sia kamondo kan nakaaging pagdalaw asin nagbalik sinda tanganing kumustahon sia. “Nabigla ako,” an isinurat sa huri kan lalaki, “na an duwang dai ko lamang kamidbid nagmamakolog sa sako asin interesado manongod sa sakong ikakarahay.” Naparigon an saiyang boot kan mga punto na saindang sinabi sa saiya hale sa Biblia. Nanuga an mga babae na sinda madalaw giraray. Naogmang marhay an lalaki asin napahiro na isurat an nasambit na mga komento sa sarong surat na saiyang ipinadara sa lokal na Kingdom Hall kan mga Saksi ni Jehova.

Bago magbalyo sa sarong lugar na mas harani sa saro sa saiyang mga aki, an lalaking ini nag-atender sa sarong Kristianong pagtiripon kan mga Saksi ni Jehova asin inimbitaran sa sarong pagkakan kan pamilya kan saro sa mga hoben na babae. Sia nagsurat: “Mahale ako sa lugar na ini, alagad an mga hoben na idto asin an saindong iglesia pirmeng magkakaigwa nin lugar sa sakong puso asin sa sakong mga pamibi. Iyo, namimibi na ako ngonyan—nin parate. Nagbago na ako ngonyan nin biyo. Dakulaon an nagin kabtang dian kan mga hoben na idto, asin daing sagkod akong nagpapasalamat sa sainda.”