An Kahadean nin Dios​—Superyor sa Gabos na Paagi

TINOKDOAN ni Jesu-Cristo an saiyang mga parasunod: “Kun siring mamibi kamo nin arog kaini: ‘Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an kabotan mo, kun paano sa langit, siring man sa daga.’” (Mateo 6:9, 10) Ipinapaliwanag kan pamibing ini, na aram kan dakol bilang Ama Niamo, o Pamibi kan Kagurangnan, an katuyohan kan Kahadean nin Dios.

Paagi sa Kahadean, masasantipikar an ngaran nin Dios. Mawawara na dian an gabos na paglapastangan na ibinunga kan pagrebelde ni Satanas asin kan tawo. Mahalagang marhay ini. An kaogmahan kan gabos na intelihenteng linalang nakadepende sa saindang paniniwala na sagrado an ngaran nin Dios asin sa gikan sa boot na pag-ako sa saiyang deretso na mamahala.—Kapahayagan 4:11.

Dugang pa, an Kahadean inestablisar tanganing ‘gibohon an kabotan nin Dios, kun paano sa langit, siring man sa daga.’ Asin ano an kabotan na iyan? Ibalik sa dati an relasyon sa pag-oltanan nin Dios asin nin katawohan, na nawara ni Adan. An Kahadean man an masagibo kan katuyohan kan Unibersal na Soberano, si Jehova, na mag-establisar nin paraiso digdi sa daga kun saen mabubuhay sagkod lamang an marahay na mga tawo. Iyo, hahaleon kan Kahadean nin Dios an gabos na nagin danyos kan orihinal na kasalan asin gigibohon na magin totoo an mamomoton na katuyohan nin Dios para sa daga. (1 Juan 3:8) Sa katunayan, an Kahadean na ini asin an gigibohon kaiyan an pangenot na mensahe kan Biblia.

Superyor sa Anong mga Paagi?

An Kahadean nin Dios sarong totoong gobyerno na igwa nin dakulang kapangyarihan. Tinawan kita ni propeta Daniel nin kadikit na ideya kun gurano man nanggad iyan kamakapangyarihan. Kaidtong haloy na an nakaagi, sia naghula: ‘An Dios nin kalangitan mapatindog nin sarong kahadean na maronot asin matapos kan gabos na kahadean’ nin tawo. Dugang pa, bakong arog kan mga gobyerno nin tawo, na minalataw asin nawawara sa pag-agi nin kasaysayan, an Kahadean nin Dios “dai noarin man malalaglag.” (Daniel 2:44) Bako sana iyan. Sa gabos na bagay, an Kahadean na ini superyor na marhay sa arin man na gobyerno nin tawo.

An Kahadean nin Dios igwa nin superyor na Hade. Isipon kun siisay an Hadeng iyan. Sa “sarong pangatorogan asin mga bisyon” na itinao sa saiya, naheling ni Daniel an Namamahala sa Kahadean nin Dios bilang “saro na kaagid sa aki nin tawo” na dinara sa atubangan kan Makakamhan sa Gabos na Dios asin tinawan nin nagdadanay na “pamamahala asin dignidad patin kahadean.” (Daniel 7:1, 13, 14) An Aki na iyan nin tawo mayong iba kundi si Jesu-Cristo—an Mesiyas. (Mateo 16:13-17) Ibinugtak ni Jehova Dios an saiya mismong Aki, si Jesus, na magin Hade sa Saiyang Kahadean. Kan yaon sa daga kaidto, sinabihan ni Jesus an maraot na mga Fariseo: “An kahadean nin Dios nasa tanga nindo,” na nangangahulogan na sia, an magigin Hade sa Kahadean na iyan, yaon sa kaibahan ninda.—Lucas 17:21.

Siisay sa katawohan an makakapantay sa mga kredensial ni Jesus bilang Namamahala? Pinatunayan na ni Jesus na sia biyong matanos, masasarigan, asin mapagmalasakit na Namomoon. Ilinaladawan sia kan Ebanghelyo bilang sarong tawong aktibo saka may mapagpadangat na init nin pakikiiba asin odok na pagmate. (Mateo 4:23;  Marcos 1:40, 41; 6:31-34; Lucas 7:11-17) Apuera kaini, an binuhay liwat na si Jesus mayo nang kagadanan o iba pang limitasyon nin tawo.—Isaias 9:6, 7.

Si Jesus asin an saiyang kairiba namamahala hale sa sarong superyor na kamugtakan. Sa saiyang pangatorogan na bisyon, naheling man ni Daniel na “an kahadean asin an pamamahala . . . itinao sa banwaan na mga banal.” (Daniel 7:27) Si Jesus dai namamahala nin solo. May kairiba sia na mamamahala bilang mga hade asin maglilingkod bilang mga saserdote. (Kapahayagan 5:9, 10; 20:6) May labot sa sainda, si apostol Juan nagsurat: “Ako nagheling, asin, uya! an Kordero nagtitindog sa Bukid nin Sion, asin sa kaibanan nia an sanggatos may apat na polo may apat na ribo . . . na binakal hale sa daga.”—Kapahayagan 14:1-3.

An Kordero iyo si Jesu-Cristo na nasa saiyang katongdan sa Kahadean. (Juan 1:29; Kapahayagan 22:3) An Bukid nin Sion na ini nanonongod sa langit. * (Hebreo 12:22) Si Jesus asin an 144,000 na kairiba nia mamamahala hale sa langit. Kanigoan kalangkaw na kamugtakan kan pamamahala ninda! Huling yaon sa langit, mas mahiwas an naheheling ninda. Huling an langit an sentro kaiyan, an “kahadean nin Dios” inaapod man na “kahadean kan kalangitan.” (Lucas 8:10; Mateo 13:11) Mayo nin mga armas, dawa pa nuklear na mga pag-atake, an makakaabot asin makakapabagsak sa langitnon na gobyernong iyan. Dai iyan madadaog asin ootobon kaiyan an katuyohan ni Jehova para dian.—Hebreo 12:28.

An Kahadean nin Dios igwa nin mapagtitiwalaan na mga representante sa daga. Paano niato naaaraman ini? An Salmo 45:16 nagsasabi: ‘Ika manombra nin mga prinsipe sa bilog na daga.’ An “ika” sa hulang ini iyo an Aki nin Dios. (Salmo 45:6, 7; Hebreo 1:7, 8) Huli kaini, si Jesu-Cristo mismo an manombra sa mga representanteng prinsipe. Makakasierto kita na sinda magigin maimbod sa pag-otob kan saiyang instruksion. Dawa ngonyan, an kualipikadong mga lalaki na naglilingkod bilang mga magurang sa Kristianong kongregasyon tinotokdoan na dai ‘magpakangkagurangnan’ sa mga kapagtubod ninda, kundi protehiran, tawan nin karepreskohan, asin rangahon sinda.—Mateo 20:25-28; Isaias 32:2.

An Kahadean igwa nin matanos na mga sakop. Sinda daing katuyawan asin tanos sa pagheling nin Dios. (Talinhaga 2:21, 22) “An mga mahoyo mismo makakasadiri kan daga,” an sabi kan Biblia, “asin tunay na manonompongan ninda an saindang labi-labi nanggad na kaogmahan sa nagsosopay na katoninongan.” (Salmo 37:11) An mga sakop kan Kahadean mahoyo—madaling tokdoan asin mapakumbaba, kalmado asin maboot. An pangenot na interes ninda iyo an espirituwal na mga bagay. (Mateo 5:3) Gusto nindang gibohon an tama asin naghihimate sinda sa paggiya nin Dios.

An Kahadean nin Dios dinidirehiran nin superyor na mga ley. An mga ley asin prinsipyo na nagdidirehir sa Kahadean hale ki Jehova Dios mismo. Imbes na bakong makatanosan na tawan kita nin mga restriksion, iyan nagtataong pakinabang sa sato. (Salmo 19:7-11) Dakol na tawo an nakikinabang na sa pamumuhay sono sa matanos na mga kahagadan ni Jehova. Halimbawa, an paghimate sa hatol kan Biblia sa mga agom na lalaki, agom na babae, asin aki nagpapaoswag sa buhay pampamilya. (Efeso 5:33–6:3) Kun kinukuyog niato an pagboot na ‘isulog niato an pagkamoot,’ an satong relasyon sa iba minarahay. (Colosas 3:13, 14) Mantang namumuhay kita sono sa mga prinsipyo kan Kasuratan, nagkakaigwa man kita nin marahay na mga ugale sa trabaho asin timbang na pagmansay sa kuarta. (Talinhaga 13:4; 1 Timoteo 6:9, 10) An paglikay sa pagbuburat, seksuwal na inmoralidad, tabako, asin nakakaadiktong mga droga nagtatabang sa sato na maprotehiran an satong salud.—Talinhaga 7:21-23; 23:29, 30; 2 Corinto 7:1.

An Kahadean nin Dios sarong gobyerno na ordenado nin Dios. An Hade kaiyan—an Mesiyas, si Jesu-Cristo—asin an gabos niang kairibang namamahala may paninimbagan sa Dios na suportaran an Saiyang makatanosan na mga ley asin mamomoton na mga prinsipyo. An mga sakop kan Kahadean, kaiba an mga representante kaiyan sa daga, naoogmang marhay na mamuhay oyon sa  mga ley nin Dios. Huli kaini, an Dios an pangenot sa buhay kan mga namamahala asin sakop kan Kahadean. Kun siring, an Kahadean sarong tunay na teokrasya—pamamahala nin Dios. Siertong magigin mapanggana iyan sa pag-otob kan katuyohan kan pagpatindog kaiyan. Alagad noarin daw mapoon an pamamahala kan Kahadean nin Dios, na inaapod man na Mesiyanikong Kahadean?

An Pagpoon kan Pamamahala kan Kahadean

An paliwanag tanganing masabotan kun noarin an pagpoon kan pamamahala kan Kahadean manonompongan sa mga tataramon ni Jesus. “An Jerusalem babatayan kan mga nasyon,” an sabi nia, “sagkod na maotob an itinalaan na mga panahon kan mga nasyon.” (Lucas 21:24) An Jerusalem sana an siudad sa bilog na daga na direktang konektado sa ngaran nin Dios. (1 Hade 11:36; Mateo 5:35) Iyan an kabisera kan daganon na kahadean na aprobado nin Dios. An siudad na iyan babatayan kan mga nasyon sa dahelan na an pamamahala nin Dios sa saiyang banwaan puputolon kaidto nin kinabanon na mga gobyerno. Noarin ini mapoon?

Sinabihan an huring hade na nagtukaw sa trono ni Jehova sa Jerusalem: “Halea an turbante, asin tangkasa an korona. . . . Dai nanggad iyan magigin sadiri nin siisay man sagkod na magdatong sia na igwa kan legal na katanosan, asin iyan itatao ko sa saiya.” (Ezequiel 21:25-27) An korona tatangkason sa payo kan hadeng iyan, asin an pamamahala nin Dios sa Saiyang banwaan mapuputol. Nangyari ini kan 607 B.C.E. kan laglagon kan mga Babilonyo an Jerusalem. Durante kan “itinalaan na mga panahon” na kasunod kaini, an Dios mayo na nin gobyerno sa daga na magrerepresentar sa saiyang pamamahala. Sa katapusan sana kan mga panahon na iyan na itatao ni Jehova an kapangyarihan na mamahala sa saro na “igwa kan legal na katanosan”—si Jesu-Cristo. Magigin gurano kalawig an peryodong iyan?

An sarong hula sa libro sa Biblia na Daniel nagsasabi: “Paloda nindo an kahoy, asin raota nindo iyan. Minsan siring, itada nindo sa daga an pungo kaiyan, alagad may gakod na batbat asin tanso . . . sagkod na lumihis dian an pitong panahon.” (Daniel 4:23) Arog kan maheheling niato, an “pitong panahon” na nasambitan digdi kapareho kalawig kan “itinalaan na mga panahon kan mga nasyon.”

Sa Biblia, an mga indibiduwal, namamahala, asin kahadean irinerepresentar kun beses nin mga kahoy. (Salmo 1:3; Jeremias 17:7, 8; Ezequiel, kapitulo 13) An simbolikong kahoy “naheheling sagkod sa poro kan bilog na daga.” (Daniel 4:11) Sa siring, an pamamahala na irinerepresentar kan kahoy na papalodon asin gagakodan nakakaabot “sagkod sa poro kan daga,” na kalabot an bilog na kahadean nin katawohan. (Daniel 4:17, 20, 22) Kun siring, an kahoy nagrerepresentar sa supremong pamamahala nin Dios, partikularmente sa koneksion kaiyan sa daga. Ginamit an pamamahalang ini sa laog nin kadikit na panahon paagi sa kahadean na tinindog ni Jehova sa nasyon nin Israel. An simbolikong kahoy pinutol asin an pungo kaiyan ginakodan nin batbat asin tanso tanganing dai iyan magtubo. Nag-iindikar ini na an kahadean na ginagamit nin Dios sa pamamahala sa daga mapondo na sa pagpunsionar, na nangyari  kan 607 B.C.E.—alagad bakong sa panahon na daing talaan. An kahoy magdadanay na may gakod sagkod na lumihis an “pitong panahon.” Sa katapusan kan peryodong iyan, itatao ni Jehova an pamamahala sa legal na paramana, si Jesu-Cristo. Malinaw nanggad, an “pitong panahon” asin “an itinalaan na mga panahon kan mga nasyon” nanonongod sa parehong peryodo nin panahon.

Tinatabangan kita kan Biblia na madeterminaran an lawig kan “pitong panahon.” Oyon dian an 1,260 aldaw katimbang nin “sarong panahon asin mga panahon [duwang panahon, plural] patin kabangang panahon”—na may total na tolo may kabangang “mga panahon.” (Kapahayagan 12:6, 14) Nangangahulogan ini na kun dodoblehon an kabilangan na iyan, o pitong panahon, magigin 2,520 aldaw.

Kun mabilang kita nin 2,520 literal na aldaw poon 607 B.C.E., maabot kita sa 600 B.C.E. Minsan siring, an pitong panahon mas halawig pa dian. Nagpapadagos pa iyan kan magtaram si Jesus manongod sa “itinalaan na mga panahon kan mga nasyon.” Kun siring, makahula an pitong panahon. Huli kaini, kaipuhan na iaplikar niato an susundon sa Kasuratan: “Sarong aldaw para sa sarong taon.” (Bilang 14:34; Ezequiel 4:6) Sa kamugtakan na iyan, an pitong panahon na pagdominar sa daga kan mga kapangyarihan sa kinaban na dai nag-iinterbenir an Dios bale 2,520 taon. An pagbilang nin 2,520 taon poon 607 B.C.E. madara sa sato sa 1914 C.E. Iyan an taon na natapos an “itinalaan na mga panahon kan mga nasyon,” o pitong panahon. Nangangahulogan ini na si Jesu-Cristo nagpoon na mamahala bilang Hade sa Kahadean nin Dios kan 1914.

“Dumatong Logod an Kahadean Mo”

Mantang an Mesiyanikong Kahadean naestablisar na sa langit, maninigo daw na padagos kitang mamibi na logod dumatong iyan, siring kan itinokdo ni Jesus sa modelong pamibi? (Mateo 6:9, 10) Iyo. An kahagadan na iyan angay asin makahulogan pa man giraray. An Kahadean nin Dios sa ngapit pa magkakaigwa nin lubos na kapangyarihan sa dagang ini.

Kanigoan na bendisyon an maeeksperyensiahan kan maimbod na katawohan kun mangyari na iyan! “An Dios mismo masasakaibanan ninda,” an sabi kan Biblia, “asin papahidon nia an gabos na luha sa saindang mga mata, asin dai na magkakaigwa nin kagadanan, ni magkakaigwa pa man nin pagmondo o pagtangis o kolog. An enot na mga bagay nakalihis na.” (Kapahayagan 21:3, 4) Sa panahon na iyan, “mayo nin nag-eerok na masabi: ‘Naghehelang ako.’” (Isaias 33:24) Kakamtan kan mga nagpapaogma sa Dios an buhay na daing katapusan. (Juan 17:3) Mantang hinahalat niato an kaotoban kan mga ini asin kan iba pang marahayon na mga hula sa Biblia, ‘padagos niatong hanapon nguna an kahadean asin an katanosan nin Dios.’—Mateo 6:33.

[Nota sa Ibaba]

[Blurb sa pahina 4]

Ibinugtak ni Jehova si Jesu-Cristo na magin Hade sa Saiyang Kahadean

[Diagram/Mga Ritrato sa pahina 6]

2,520 taon

Oktubre 607 ◀ B.C.E. C.E. ▸ Oktubre 1914

606 1⁄4 taon 1,913 3⁄4 taon

“An itinalaan na mga panahon kan mga nasyon” nagpoon kan 607 B.C.E. asin natapos kan 1914 C.E.

[Ritrato sa pahina 7]

An daganon na mga sakop kan Kahadean nin Dios magkakamit nin dakol na bendisyon