Ano an “Huring mga Aldaw”?

INIISIP-ISIP daw nindo kun ano an nakatagama sa ngapit para sa saindo asin sa saindong mga namomotan? Sinusubaybayan kan dakol na tawo an media tanganing maaraman kun paano puedeng makaapektar sa saindang buhay an mga pangyayari sa kinaban. Minsan siring, an pagtao nin atension sa ipinasabong na Tataramon nin Dios nagtatao sa sato nin tunay na pakarorop. Ini huli ta kaidto pa ihinula na kan Biblia bako sanang an presenteng mga kamugtakan kundi pati kun ano an madatong pa.

Halimbawa, kan si Jesu-Cristo nasa daga, dakol siang sinabi manongod sa Kahadean nin Dios. (Lucas 4:43) Naturalmente, an mga tawo na nakadangog sa saiya gustong maaraman kun noarin madatong an makangangalas na Kahadean na iyan. Sa katunayan, tolong aldaw bago ginadan si Jesus nin daing katanosan, hinapot sia kan saiyang mga disipulo: “Ano an magigin tanda kan saimong presensia [na may kapangyarihan sa Kahadean] asin kan pagtatapos kan sistema nin mga bagay?” (Mateo 24:3) Sinabihan sinda ni Jesus na solamenteng si Jehova Dios an nakakaaram kan eksaktong oras kun noarin biyong pamamahalaan kan Kahadean an daga. (Mateo 24:36; Marcos 13:32) Minsan siring, si Jesus asin an iba pa talagang naghula nin nagkapirang pangyayari sa daga na magseserbing ebidensia na namamahala na si Cristo na may kapangyarihan sa Kahadean.

Bago niato siyasaton an naheheling na ebidensia na kita nabubuhay na sa “huring mga aldaw” kan presenteng sistema nin mga bagay, estudyaran niato sa halipot an sarong mahalagang pangyayari sa dai naheheling na rona nin mga espiritu. (2 Timoteo 3:1) Si Jesu-Cristo nagin Hade sa langit kan taon 1914. * (Daniel 7:13, 14) Tolos-tolos pagkaako kan kapangyarihan sa Kahadean, isinagibo ni Jesus an sarong aksion. Sinasabi sa sato kan Biblia: “Puminutok an guerra sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban.” (Kapahayagan 12:7) Si “Miguel na arkanghel” iyo si Jesu-Cristo sa saiyang langitnon na katongdan. * (Judas 9; 1 Tesalonica 4:16) An dragon iyo si Satanas na Diablo. Sa ralaban, ano an nangyari ki Satanas asin sa saiyang marigsok na mga parasunod na anghel, na inaapod mga demonyo? Sinda nadaog sa guerrang iyan asin ‘ihinulog,’ o pinalayas sa langit, pasiring sa palibot kan daga. (Kapahayagan 12:9) Huli kaini naggayagaya an ‘kalangitan asin an mga nag-eerok dian,’ an boot sabihon, an maimbod na espiritung mga aki nin Dios. Pero, an mga tawo dai nakaeksperyensia kan siring na paggayagaya. “Herak man kan daga asin kan dagat,” an ihinula kan Biblia, “huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”—Kapahayagan 12:12.

Si Satanas, sa saiyang nagpuputok na kaanggotan, nagdara nin herak man—pagsakit asin makuring sakit—sa mga nag-eerok sa daga. Minsan siring, an herak man na iyan magigin ‘halipot sanang panahon.’ Inaapod kan Biblia an panahon na ini na “huring mga aldaw.” Puede niatong ikaogma na sa dai na mahahaloy biyong hahaleon an impluwensia kan Diablo sa bilog na daga. Alagad ano an prueba na kita nabubuhay na sa huring mga aldaw?

[Mga Nota sa Ibaba]

 [Picture Credit Lines sa pahina 2]

COVER: Foreground: © Chris Stowers/Panos Pictures; background: FAROOQ NAEEM/AFP/Getty Images