Magdanay Kamo sa Pagkamoot nin Dios!
Magdanay Kamo sa Pagkamoot nin Dios!
“Mga namomotan, . . . magdanay kamo sa pagkamoot nin Dios, . . . na nasa isip an buhay na daing katapusan.”—JUDAS 20, 21.
1, 2. Paano kamo makakapagdanay sa pagkamoot nin Dios?
SI Jehova namomoot na gayo sa kinaban nin katawohan kaya itinao nia an saiyang Aking bugtong tanganing idtong mga nagtutubod sa saiya magkaigwa nin buhay na daing katapusan. (Juan 3:16) Kanigoan karahay na mamatean an siring na pagkamoot! Kun kamo lingkod ni Jehova, siertong boot nindong kamtan an siring na pagkamoot sagkod lamang.
2 Ihinayag ni disipulo Judas kun paano kamo makakapagdanay sa pagkamoot nin Dios. “Paagi sa pagpakosog sa saindo man sana sa saindong kabanalbanaleng pagtubod, asin pamimibi na igwa kan banal na espiritu,” an isinurat ni Judas, “magdanay kamo sa pagkamoot nin Dios, mantang kamo naghahalat sa pagkaherak kan satong Kagurangnan na si Jesu-Cristo na nasa isip an buhay na daing katapusan.” (Judas 20, 21) An pag-adal sa Tataramon nin Dios asin paghuhulit kan maogmang bareta nakakatabang na pakosogon kamo sa “kabanalbanaleng pagtubod”—an Kristianong mga katokdoan. Tanganing magdanay sa pagkamoot nin Dios, dapat na mamibi kamo “na igwa kan banal na espiritu,” o sa impluwensia kaiyan. Tanganing akoon an balos na buhay na daing katapusan, dapat man kamong magtubod sa atang na pantubos ni Jesu-Cristo.—1 Juan 4:10.
3. Taano an nagkapira ta bako nang mga Saksi ni Jehova?
3 An nagkapira na dati may pagtubod dai nagdanay sa pagkamoot nin Dios. Huling pinili nindang sundon an makasalan na dalan, bako na sindang mga Saksi ni Jehova. Paano nindo malilikayan an siring na eksperyensia? Puedeng makatabang saindo an paghorophorop sa minasunod na mga punto tanganing malikayan an kasalan asin makapagdanay kamo sa pagkamoot nin Dios.
Patunayan an Saindong Pagkamoot sa Dios
4. Gurano kahalaga an pagkuyog sa Dios?
4 Ipaheling an saindong pagkamoot sa Dios paagi sa pagkuyog sa saiya. (Mateo 22:37) “Ini iyo an boot sabihon kan pagkamoot sa Dios,” an isinurat ni apostol Juan, “na kuyogon niato an saiyang mga togon; pero an saiyang mga togon dai nakakapagabat.” (1 Juan 5:3) An kinaugalean nang pagkuyog sa Dios mapakosog sa saindo na labanan an sugot asin magpapagayagaya sa saindo. An salmista nagsabi: “Maogma an tawo na dai naglakaw sa hatol kan mga marigsok, . . . kundi an saiyang pagkaogmang marhay yaon sa ley ni Jehova.”—Salmo 1:1, 2.
5. An pagkamoot ki Jehova mapahiro sa saindo na gibohon an ano?
5 An saindong pagkamoot ki Jehova magpapahiro sa saindo na likayan na makakomiter nin magabat na kasalan na magtatao nin katuyawan sa saiyang ngaran. “Dai mo ako pagtawan nin kadukhaan ni kayamanan,” an pamibi ni Agur. “Ipakakan mo sa sakuya an kakanon na maninigo sa sako, tanganing dai ako mabasog asin talagang negaran taka patin sabihon ko: ‘Siisay si Jehova?’ asin tanganing dai ako magin dukha asin talagang maghabon ako patin atakehon ko an ngaran kan sakuyang Dios.” (Talinhaga 30:1, 8, 9) Magin determinado na dai ‘atakehon an ngaran nin Dios’ paagi sa pagtaong katuyawan sa saiya. Imbes, pirmeng magmaigot na gibohon an tanos na mga bagay na nagtatao sa saiya nin kamurawayan.—Salmo 86:12.
6. Ano an puedeng mangyari kun kamo tuyong gumibo nin kasalan?
6 Regular na mamibi sa saindong mamomoton na langitnon na Ama para sa tabang na malabanan an sugot na gumibo nin kasalan. (Mateo 6:13; Roma 12:12) Padagos na sunodon an hatol nin Dios tanganing dai maolang an saindong mga pamibi. (1 Pedro 3:7) Kun kamo tuyong gumibo nin kasalan, makaturotriste an magigin mga resulta, huli ta sa piguratibong paagi inoolang ni Jehova an pagdolok sa saiya kan mga rebelde na garo paagi sa panganoron tangani na an saindang mga pamibi dai makalagbas pasiring sa saiya. (Lamentacion 3:42-44) Kaya magpaheling nin mapakumbabang aktitud, asin mamibi na dai logod kamo makagibo nin ano man na maolang sa saindo sa pagdolok sa Dios sa pamibi.—2 Corinto 13:7.
Ipaheling an Pagkamoot sa Aki nin Dios
7, 8. Paano an paghimate sa hatol ni Jesus makakatabang sa saro na isikwal an makasalan na dalan?
7 Ipaheling an pagkamoot ki Jesu-Cristo paagi sa pagkuyog sa saiyang mga togon, huli ta matabang ini sa saindo na isikwal an makasalan na dalan. “Kun otobon nindo an sakong mga togon,” an sabi ni Jesus, “magdadanay kamo sa sakong pagkamoot, kun paanong ako nag-otob sa mga togon kan Ama asin nagdadanay sa saiyang pagkamoot.” (Juan 15:10) Paano an pag-aplikar kan mga tataramon ni Jesus makakatabang sa saindo na magdanay sa pagkamoot nin Dios?
8 An pagtao nin atension sa mga tataramon ni Jesus makakatabang sa saindo na papagdanayon an moral na integridad. An Ley nin Dios sa Israel nagsabi: “Dai ka magsambay.” (Exodo 20:14) Alagad ihinayag ni Jesus an prinsipyo sa likod kan pagboot na iyan paagi sa pagsabi: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:27, 28) Sinabi ni apostol Pedro na an nagkapira sa enot na siglong kongregasyon may “mga mata [na] pano nin pagsambay” asin ‘pinasagad an maluyang mga kalag.’ (2 Pedro 2:14) Minsan siring, bakong arog ninda, malilikayan nindo an seksuwal na mga kasalan kun saindong namomotan asin kinukuyog an Dios asin si Cristo patin determinado na ingatan an saindong relasyon sa sainda.
Togotan an Espiritu ni Jehova na Giyahan Kamo
9. Kun mapadapit sa banal na espiritu, ano an puedeng mangyari kun an saro magpadagos sa kasalan?
9 Mamibi para sa banal na espiritu nin Dios, asin togotan iyan na giyahan kamo. (Lucas 11:13; Galacia 5:19-25) Kun kamo mapadagos sa kasalan, tibaad haleon nin Dios saindo an saiyang espiritu. Pagkatapos na magkasala si David may koneksion ki Bat-seba, nakimaherak sia sa Dios: “Dai mo ako ipagsikwal sa atubangan kan saimong lalauogon; asin an saimong banal na espiritu O dai mo paghaleon sa sakuya.” (Salmo 51:11) Huli sa pagigin nagkasala na habong magsolsol, talagang nawara ni Hadeng Saul an espiritu nin Dios. Nagkasala si Saul paagi sa pagdolot nin atang na tinotong asin dai paggadan sa aripompon, sa mga baka, asin sa hade kan mga Amalequita. Pakatapos kaiyan, hinale ni Jehova ki Saul an saiyang banal na espiritu.—1 Samuel 13:1-14; 15:1-35; 16:14-23.
10. Taano ta maninigo nindong isikwal an mismong ideya nin paggibo nin kasalan?
10 Isikwal an mismong ideya nin paggibo nin kasalan. “Kun maggibo kita nin tuyong pagkakasala pakatapos na maako niato an tamang kaaraman sa katotoohan,” an isinurat ni apostol Pablo, “mayo na nin natatadang atang para sa mga kasalan.” (Hebreo 10:26-31) Magigin makaturotriste nanggad kun kamo tuyong magibo nin kasalan!
Magpaheling nin Tunay na Pagkamoot sa Iba
11, 12. Sa anong mga paagi na an pagkamoot asin paggalang maolang sa saro na gumibo nin salang gawe-gawe sa sekso?
11 An pagkamoot sa kapwa tawo maolang sa saindo na gumibo nin salang gawe-gawe sa sekso. (Mateo 22:39) An siring na pagkamoot matulod sa saindo na protehiran an saindong puso tangani na dai kamo tentaran kaiyan na agawon an kapadangatan kan agom nin iba. An paggibo kaiyan puedeng magresulta sa kasalan na pagsambay. (Talinhaga 4:23; Jeremias 4:14; 17:9, 10) Arogon an matanos na si Job, na dai tinogotan an saiyang sadiri na magpaheling nin atension sa siisay man na babae apuera sa saiyang agom.—Job 31:1.
12 An paggalang sa pagigin sagrado nin pag-agoman makakatabang sa saindo na malikayan an magabat na kasalan. Katuyohan nin Dios na an kagalanggalang na pag-agoman asin pagdodorog iyo an magin paagi na magdakol an tawo. (Genesis 1:26-28) Girumdomon na an mga organo sa sekso konektado sa buhay, na sagrado. An mga parapakisaro asin parasambay nakikisuway sa Dios, hinahalean nin onra an pagdodorog, mayo nin paggalang sa pagigin sagrado nin pag-agoman, asin nagkakasala tumang sa sadiri nindang hawak. (1 Corinto 6:18) Alagad an pagkamoot sa Dios asin sa kapwa kaiba an diosnon na pagkuyog ililikay an saro sa paggawe na puedeng magresulta sa pagkatiwalag nia sa Kristianong kongregasyon.
13. Sa anong paagi “rinaraot [kan inmoral na tawo] an mamahalon na mga bagay”?
13 Kaipuhan na pogolan niato an makasalan na kaisipan tanganing dai niato matawan nin kakologan nin boot an satong mga namomotan. “Sia na nakikiibaiba sa mga patotot rinaraot an mamahalon na mga bagay,” an sabi kan Talinhaga 29:3. Rinaraot kan habong magsolsol na parasambay an saiyang relasyon sa Dios asin linalaglag an bogkos nin pamilya. An saiyang agom na babae nagkakaigwa nin basehan para sa diborsio. (Mateo 19:9) Baga man an nagkasala agom na lalaki o agom na babae, an pagbulag nin mag-agom puedeng magin dahelan nin grabeng kakologan nin boot sa daing kasalan na agom, mga aki, asin iba pa. Dai daw kamo minaoyon na an pakaaram sa pagigin nakakaraot kan inmoral na paggawe maninigong magpahiro sa sato na labanan an sugot na gumibo kaiyan?
14. Anong leksion mapadapit sa paggibo nin sala an puedeng manodan sa Talinhaga 6:30-35?
14 An bagay na mayo nin paagi tanganing mabawi an danyos na nagibo nin pagsambay maninigong magtulod sa saro na likayan an grabe kapaslong gibo na ini. Ipinapaheling kan Talinhaga 6:30-35 na minsan ngani an mga tawo tibaad makisimpatiya sa parahabon na naghahabon huli ta sia nagugutom, dinuduhagi ninda an parasambay huling igwa sia nin maraot na motibo. Sia “nagpapahamak kan saiyang sadiring kalag [o, buhay].” Sa Ley ni Moises, ginadan na kutana sia. (Levitico 20:10) An sarong tawo na nagsasambay kinokologan an boot nin iba tangani sanang panigoan an saiyang horot, asin an parasambay na habong magsolsol dai nagdadanay sa pagkamoot nin Dios kundi hinahale sa malinig na Kristianong kongregasyon.
Papagdanayon an Malinig na Konsensia
15. Ano an kamugtakan nin konsensia na tinatakan “na garo nin batbat na pantatak”?
15 Tanganing magdanay sa pagkamoot nin Dios, dai niato puedeng togotan an satong konsensia na magin bagol sa kasalan. Siempre pa, dai niato dapat akoon an hababang pamantayan sa moral kan kinaban, asin kaipuhan na magmaan kita sa mga bagay na arog baga kan satong pagpili nin kaibaiba, mga babasahon, asin pag-aling-aling. Si Pablo nagpatanid: “Sa huring mga panahon an nagkapira masuhay sa pagtubod, na nagtatao nin atension sa nakakalagalag na ipinasabong na mga tataramon asin katokdoan nin mga demonyo, paagi sa pagsaginsagin nin mga tawo na nagtataram nin putik, na tinatakan sa saindang konsensia na garo nin batbat na pantatak.” (1 Timoteo 4:1, 2) An konsensia na tinatakan “na garo nin batbat na pantatak” nakakaagid sa pinasong laman na may pinilaan asin mayo nin pakamate. An siring na konsensia dai na magpapatanid sa sato na magdanay na harayo sa mga apostata asin sa mga kamugtakan na puedeng magin dahelan kan satong pagsuhay sa pagtubod.
16. Taano ta mahalagang marhay na magkaigwa nin malinig na konsensia?
16 An satong kaligtasan nakadepende sa pagkaigwa niato nin malinig na konsensia. (1 Pedro 3:21) Paagi sa pagtubod niato sa pinabolos na dugo ni Jesus, nalinigan an satong konsensia sa gadan na mga gibo, “tangani kitang makatao nin sagradong paglilingkod sa nabubuhay na Dios.” (Hebreo 9:13, 14) Kun kita tuyong magkasala, mararamogan an satong konsensia asin bako na kitang malinig na banwaan na angay sa paglilingkod sa Dios. (Tito 1:15) Alagad sa tabang ni Jehova, puede kitang magkaigwa nin malinig na konsensia.
Iba Pang mga Paagi Tanganing Malikayan an Salang Gawe-Gawe
17. Ano an pakinabang kan ‘lubos na pagsunod ki Jehova’?
17 ‘Lubos na sumunod ki Jehova,’ siring kan ginibo ni Caleb kan suanoy na Israel. (Deuteronomio 1:34-36) Gibohon kun ano an hinahagad nin Dios sa saindo, asin nungkang isipon na makikabtang sa “lamesa nin mga demonyo.” (1 Corinto 10:21) Isikwal an apostasiya. Mapagpasalamat na makikabtang sa espirituwal na pagkakan na makukua sana sa lamesa ni Jehova, asin dai kamo ikakalagalag kan falsong mga paratokdo o marigsok na mga puersang espiritu. (Efeso 6:12; Judas 3, 4) Magkonsentrar sa espirituwal na mga bagay, siring kan pag-adal sa Biblia, pag-atender sa pagtiripon, asin ministeryo sa langtad. Seguradong magigin maogma kamo kun lubos nindong susunodon si Jehova asin dakol an gigibohon sa gibohon kan Kagurangnan.—1 Corinto 15:58.
18. Paano makakaapektar sa saindong paggawe an pagkatakot ki Jehova?
18 Magin determinado na ‘makatao sa Dios nin sagradong paglilingkod na may diosnon na takot asin may pagkangirhat na paggalang.’ (Hebreo 12:28) An reberensial na takot ki Jehova magmomotibar sa saindo na isikwal an ano man na kasumbikalan. Matabang iyan sa saindo na gumawe kaoyon kan hatol ni Pedro sa mga kapwa linahidan: “Kun kamo nag-aarang sa Ama na naghohokom nin daing pagpaorog sono sa gibo kan lambang saro, kamo gumawe na may pagkatakot sa panahon kan saindong pakikihimanwa.”—1 Pedro 1:17.
19. Taano ta maninigo nindong padagos na iaplikar an mga bagay na saindong nanonodan sa Tataramon nin Dios?
19 Padagos na iaplikar an saindong nanonodan sa Tataramon nin Dios. Matabang ini sa saindo na malikayan an magabat na kasalan huling mapapabilang nanggad kamo sa “mga huli sa paggamit napatuod an saindang kakayahan sa pagrisa na mamidbid an tama sagkod an sala.” (Hebreo 5:14) Imbes na magin daing pagmaan sa pagtaram asin paggawe, magin alerto tanganing makalakaw kamo siring sa sarong madonong, “na tinutubos an angay na panahon” sa marigsok na panahon na ini. “Padagos na saboton kun ano an kabotan ni Jehova,” asin padagos na gibohon iyan.—Efeso 5:15-17; 2 Pedro 3:17.
20. Taano ta maninigo niatong likayan an kaaraan?
20 Dai pagtawan nin lugar an kaaraan—an mahanab na pagmawot sa pagsadiri nin iba. An saro sa Sampulong Togon nagsasabi: “Dai mo pagmawoton [“kaaraan,” New International Version] an harong kan saimong kapwa. Dai mo pagmawoton an agom na babae kan saimong kapwa, ni an saiyang oripon na lalaki ni an saiyang oripon na babae ni an saiyang toro ni an saiyang asno ni an ano pa man na sadiri kan saimong kapwa.” (Exodo 20:17) Prinotehiran kan ley na ini an mga pagsadiri nin saro, siring kan harong, agom na babae, mga oripon, mga hayop, asin iba pa. Alagad an pinakamahalaga iyo an sinabi ni Jesus na an kaaraan minadigta sa tawo.—Marcos 7:20-23.
21, 22. Anong mga prebension an puedeng gibohon nin sarong Kristiano tanganing malikayan an pagkakasala?
21 Gumibo nin mga prebension tanganing an kamawotan dai magresulta sa kasalan. Si disipulo Santiago nagsurat: “An lambang saro nababalo paagi sa pagkabutong asin pagkaakit sa saiya kan saiyang sadiring kamawotan. Dangan an kamawotan, kun iyan nangidam na, nangangaki nin kasalan; an kasalan man, kun iyan ikasagibo na, nagbubunga nin kagadanan.” (Santiago 1:14, 15) Halimbawa, kun an sarong tawo nagkaproblema sa pag-inom nin inomon na de alkohol kan nakaagi, puede siang magdesisyon na dai magkaigwa kaiyan sa saiyang harong. Tanganing malikayan an sugot may koneksion sa sarong bakong kasekso, an sarong Kristiano tibaad kaipuhan na lumipat nin lugar na pinagtatrabawohan o maghanap nin ibang trabaho.—Talinhaga 6:23-28.
22 Dai paggibohon dawa an enot na lakdang pasiring sa pagkakasala. An pakigitilan asin pagparaisip nin inmoral na mga ideya puedeng magresulta sa pakikisaro o pagsambay. An pagsasabi nin saradit na kaputikan mapakosog sa boot nin saro na gumibo nin darakulang pagputik asin puedeng magresulta sa makasalan na ugale na pagparaputik. An saradit na paghabon puedeng pabagolon an konsensia nin sarong indibiduwal sagkod sa punto na nagpopoon na siang maghabon nin mas darakulang bagay. Dawa an dikit na pagtogot sa apostatang kaisipan puedeng sa katapustapusi magresulta na an saro biyong magin apostata.—Talinhaga 11:9; Kapahayagan 21:8.
Paano Kun Kamo Nagkasala?
23, 24. Anong karangahan an makukua sa 2 Cronica 6:29, 30 asin Talinhaga 28:13?
23 An gabos na tawo bakong sangkap. (Eclesiastes 7:20) Alagad kun kamo nagkasala nin magabat, makakakua kamo nin karangahan sa pamibi ni Hadeng Salomon sa inagurasyon kan templo ni Jehova. Si Salomon namibi sa Dios: “An ano man na pamibi, an ano man na kahagadan para sa pabor na tibaad gibohon nin siisay man na tawo o kan bilog mong banwaan na Israel, huli ta aram ninda kada saro an saiyang sadiring damat asin an saiyang sadiring kolog; kun bukahon nanggad nia an saiyang mga palad paatubang sa harong na ini, magdangog ka man logod dian sa kalangitan, an saimong erokan, asin magpatawad ka asin itao sa balang saro an sono sa gabos niang dalan, huli ta ika an nakakamidbid sa saiyang puso (huli ta ika sana an nakakamidbid nanggad sa puso kan mga aki nin katawohan).”—2 Cronica 6:29, 30.
24 Iyo, namimidbid nin Dios an puso asin sia mapagpatawad. An Talinhaga 28:13 nagsasabi: “An nagtatahob sa saiyang mga kalapasan dai mapapakarahay, alagad an minatuga asin minabaya kaiyan papahelingan nin pagkaherak.” Paagi sa may pagsolsol na pagtuga asin pagbaya sa kasalan, puedeng akoon nin saro an pagkaherak nin Dios. Pero, kun kamo nasa hababaon na kamugtakan sa espirituwal, ano pa an makakatabang sa saindo tanganing magdanay sa pagkamoot nin Dios?
Ano an Isisimbag Nindo?
• Paano kita makakapagdanay sa pagkamoot nin Dios?
• Paano an pagkamoot sa Dios asin ki Cristo nagtatabang sa sato na isikwal an makasalan na dalan?
• Taano an tunay na pagkamoot sa iba ta maolang sa sato na gumibo nin salang gawe-gawe sa sekso?
• Ano an nagkapirang paagi na malikayan an salang paggawe?
[Mga Hapot Para sa Pag-adal]
[Ritrato sa pahina 21]
Ipinapaheling sato ni Judas kun paano kita magdadanay sa pagkamoot nin Dios
[Ritrato sa pahina 23]
An pagbulag nin mag-agom puedeng magtao nin grabeng kakologan nin boot sa daing kasalan na agom asin sa mga aki
[Ritrato sa pahina 24]
Arog ni Caleb, determinado daw kamo na ‘lubos na sumunod ki Jehova’?
[Ritrato sa pahina 25]
Regular na mamibi para sa tabang na labanan an sugot