Nagigirumdoman daw Nindo?

Inapresyar daw nindo an pagbasa kan dai pa sana nahahaloy na mga isyu kan An Torrengbantayan? Bueno, helingon kun masisimbag nindo an minasunod na mga hapot:

• Ano an makakatabang sa tunay na Kristiano kun an sarong namomotan magbaya ki Jehova?

Pakosogon an saindong sadiri asin an ibang maimbod na mga miembro kan pamilya. Magdanay na sibot sa espirituwal na mga aktibidad. Magin andam na tumabang sa iba. Nungkang mawaran nin paglaom na tibaad bumalik an sarong namomotan. Dai pagbasolon an sadiri nindo. Igalang an areglo nin Dios para sa disiplina, asin ipahayag an saindong mga saboot sa mga katood.—9/1, pahina 18-21.

• Ano an duwang paagi na an Kasuratan nagtatabang na mamidbid an “huring mga aldaw”?

Ihinuhula kan Biblia an mga mangyayari durante kan “pagtatapos kan sistema nin mga bagay.” (Mateo 24:3, 7, 8; Lucas 21:11) Ilinaladawan man kaiyan an mga pagbabago sa aktitud asin paggawe nin mga tawo na nabubuhay durante kan “huring mga aldaw.” (2 Timoteo 3:1-5) Makahulogan nanggad, an maogmang bareta kan kahadean ihuhulit durante kan panahon na ini.—9/15, pahina 4-6.

• Ano an paninimbagan kan kongregasyon kun an sarong Kristianong nagmamaneho nin auto nakaaksidente na nagbunga nin pagkagadan nin iba?

Tibaad manompongan kan kamagurangan na nagsisiyasat kan bagay na iyan na mayo nin kasalan sa dugo an drayber huling sia daing gayo o mayo nin kontrol sa mga kamugtakan na nagresulta sa pagkagadan. Alagad kun igwa nin kasalan sa dugo asin an tawong nagkasala nagsosolsol, sia tatawan nin pagsagwe na sono sa Kasuratan asin nin restriksion kun manongod sa mga pribilehio sa kongregasyon.—9/15, pahina 30.

• Taano an buhay na daing katapusan ta dai nakadepende sa sientipikong mga pag-oswag?

Igwa nin sientipikong mga paghihingoa na palawigon an buhay, siring kan pagprobar na palawigon an kabilangan nin pagbago giraray kan mga selula o paagi sa therapeutic cloning tanganing magtao sa mga pasyente nin bago asin magkabagay na mga organo. Alagad ipinapaheling kan Biblia na an solamenteng paagi na an mga tawo puedeng magkamit nin buhay na daing katapusan iyo an pantubos ni Jesus.—10/1, pahina 3-5.

• Sa ritual na pagkarigos daw kan mga Judio naggikan an Kristianong bautismo?

Bako. Nagsagibo an mga Judio nin mga seremonya sa paglinig sa saindang sadiri, na dai hinagad kan bautismo ni Juan. An paglinig na kahagadan kan Ley ni Moises kaipuhan na orootrohon, alagad an Kristianong bautismo ginigibo sana nin sarong beses.—10/15, pahina 12-13.

• Ano an Paadalan sa Ministeryal na Pagsasanay?

Iyan walong semanang pag-adal para sa kamagurangan asin ministeryal na mga lingkod sa kongregasyon na mayong agom asin nasa kamugtakan na iasignar na maglingkod kun saen igwa nin dakulang pangangaipo. Iyan tibaad sa kongregasyon na pinaghalean ninda, sa ibang lugar sa nasyon na iyan, o sa ibang nasyon.—11/15, pahina 10-11.

• Ano o siisay an anticristo na nasambitan sa 1 Juan 2:18; 4:3?

Sa pangkagabsan na kahulogan, an “anticristo” nanonongod sa gabos na nagkokontra ki o putik na naghihingako na iyo an Cristo o mga representante nia. An mga tataramon ni Jesus asin Juan nagpapaheling na an anticristo sarong grupo na kompuesto nin dakol na indibiduwal na anticristo na nagpapalakop nin pandadaya sa relihion asin hinahaboan an Kahadean nin Dios.—12/1, pahina 4-6.