Sarong Regalo na Daing Katapusan Gikan sa Kaglalang

BAKO daw na makangangalas na an nakakakontribwir na mga bagay na pinapaniwalaan kan mga sientista na kaipuhan para sa buhay sa arin man na planeta magsalang nasasambitan o direktang ipinaparisa sa enot na kapitulo kan Biblia? Ano an mga ini?

Tanganing magtalubo an buhay, dapat na igwa nin dakol na suplay nin tubig, siring kan nasambitan sa Genesis 1:2. Dapat na tama an temperatura tanganing an tubig sa planeta magdanay na nasa pormang likido. Kaipuhan na an planeta nasa tamang distansia sa saldang kaiyan. An salaysay sa Genesis paorootrong dinadara an atension sa saldang asin sa epekto kaiyan sa daga.

Tanganing maistaran nin mga tawo, an sarong planeta nangangaipo nin atmospera na may partikular na proporsion nin mga gas. An mahalagang marhay na aspektong ini nasasambitan sa Genesis 1:6-8. An pagtalubo nin mga pananom, na ilinadawan sa Genesis 1:11, 12, nagkokontribwir sa mayaman na suplay nin oksiheno. An sarong planeta na dian puedeng mabuhay an dakol na laen-laen na hayop nangangaipo nin marang mga kontinente, mabungang daga, siring kan ilinaladawan sa Genesis 1:9-12. Sa katapustapusi, para sa tama sanang kamugtakan nin panahon, an sarong planeta dapat na nakakibang sa tamang anggulo asin iyan dapat na nakapirme—sa situwasyon kan daga, iyan nagibo sa sarong kabtang huli sa pagbotong kan grabidad kan satong bulan. An pag-eksister kan satelayt na ini asin an nagkapira sa mga pakinabang kaiyan itinatampok sa Genesis 1:14, 16.

Paanong an suanoy na parasurat na si Moises, na mayo nin tabang kan siensia sa presenteng panahon, makakapagsabi nin detalyado kan mga bagay na nasa enotan? Si Moises daw mas naenot sanang nakasabot sa halaga kan mga iyan kisa sa saiyang mga kapanahon? An paliwanag iyo na sia pinasabngan kan Kaglalang kan kalangitan asin kan daga. Iyan mahalagang mangnohon huli sa pagigin tama kan salaysay sa Genesis segun sa siensia.

Kinokompirmar kan Biblia na may katuyohan sa likod kan mga ngangalasan na naoobserbaran niato sa uniberso na nasa palibot niato. “Kun manongod sa kalangitan, an kalangitan rogaring ni Jehova,” an sabi kan Salmo 115:16, “alagad an daga itinao nia sa mga aki nin mga tawo.” An saro pang salmo nagsasabi: “Pinatindog nia an daga sa mga pasisikadan kaiyan; dai iyan matatanyog sagkod sa panahon na daing talaan, o sagkod lamang.” (Salmo 104:5) Kun an uniberso asin an satong magayon na planeta dinisenyo asin ginibo kan sarong Kaglalang, sierto nanggad na rasonableng magtubod na may kakayahan man siang manteneron ini. Nangangahulogan ini na may kompiansa nindong malalaoman an kaotoban kan makangangalas na panuga: “An mga matanos mismo makakasadiri kan daga, asin sinda mag-eerok dian sagkod lamang.” (Salmo 37:29) Daing duwa-duwa na ‘dai linalang nin Dios an daga na dai nin kapakanan’ kundi ‘hinaman iyan tanganing pag-istaran’ sagkod lamang kan mapag-apresyar na mga tawo na nagrerekonoser sa saiyang mga ginibo.—Isaias 45:18.

Segun sa Kasuratan, si Jesus nagdigdi sa daga tanganing tokdoan kita manongod sa Dios asin sa Saiyang katuyohan na magtao nin buhay na daing katapusan sa makinuyog na katawohan. (Juan 3:16) Inaasegurar kita na sa dai na mahahaloy ‘lalaglagon nin Dios an mga nagraraot sa daga,’ mantang makakaligtas an mga tawong mamomoton sa katoninongan hale sa gabos na nasyon na nag-aako kan saiyang mga probisyon para sa kaligtasan. (Kapahayagan 7:9, 14; 11:18) Kanigoan kamakangangalas kan magigin buhay mantang padagos na dinidiskobre asin ikinakaogma kan mga tawo an mga ngangalasan nin paglalang nin Dios sagkod lamang!—Eclesiastes 3:11; Roma 8:21.

[Picture Credit Line sa pahina 8]

Retrato nin NASA