Mapakosog Logod an Kongregasyon
Mapakosog Logod an Kongregasyon
“An kongregasyon . . . luminaog sa panahon nin katoninongan, na pinapakosog.”—GIBO 9:31.
1. Anong mga hapot an puedeng ihapot manongod sa “kongregasyon nin Dios”?
KAN aldaw nin Pentecostes 33 C.E., rinekonoser ni Jehova an sarong grupo nin mga disipulo ni Cristo bilang sarong bagong nasyon, an “Israel nin Dios.” (Galacia 6:16) An mga Kristianong ini na linahidan nin espiritu nagin man an inaapod kan Biblia na “kongregasyon nin Dios.” (1 Corinto 11:22) Pero, ano an kalabot dian? Paano oorganisaron an “kongregasyon nin Dios”? Paano iyan magpupunsionar sa daga, saen man nakaistar an mga miembro kaiyan? Asin paano naaapektaran an satong buhay asin kaogmahan?
2, 3. Paano nagtao nin indikasyon si Jesus na an kongregasyon magkakaigwa nin depinidong areglo?
2 Arog kan nasambit sa sinusundan na artikulo, ihinula ni Jesus an pag-eksister kan kongregasyon na ini nin linahidan na mga parasunod, na sinasabi ki apostol Pedro: “Sa ibabaw kan dakulang gapong ini [ki Jesu-Cristo] papatindogon ko an sakong kongregasyon, asin an mga tata nin Hades dai makakadaog kaiyan.” (Mateo 16:18) Apuera kaini, mantang si Jesus nasa kaibanan pa kan mga apostol, nagtao sia nin mga indikasyon manongod sa katongdan asin areglo sa laog kan madali nang establisaron na kongregasyon na iyan.
3 Itinokdo ni Jesus paagi sa tataramon asin gibo na mangengenot an nagkapira sa kongregasyon. Gigibohon ninda iyan paagi sa paglilingkod sa iba sa saindang grupo. Si Cristo nagsabi: “Aram nindo na idtong mga namamahala sa mga nasyon nagpapakangkagurangnan sa sainda asin an darakula dian sa sainda naggagaramit nin autoridad sa sainda. Bakong siring kaini dian sa saindo; kundi an siisay man na boot na magin dakula dian sa saindo dapat na mani saindong paralingkod, asin an siisay man na boot na magin enot sa saindo dapat na magin oripon kan gabos.” (Marcos 10:42-44) Malinaw nanggad, an “kongregasyon nin Dios” dai sana magigin wararak, suruwaysuway na mga indibiduwal, na kapareho nin sarong kongregasyon na dai inorganisar. Imbes, igwa iyan nin depinidong areglo, na an mga indibiduwal sa kongregasyon nakikikomunikar sa balang saro.
4, 5. Paano niato naaaraman na an kongregasyon mangangaipo nin espirituwal na instruksion?
4 Ipinarisa kan Saro na magigin Payo kan ‘kongregasyon na iyan nin Dios’ na an saiyang mga apostol asin an iba pa na nakanood sa saiya magkakaigwa nin espesipikong mga paninimbagan sa iba pang nasa kongregasyon. Tanganing gibohon an ano? An importanteng marhay na asignasyon ninda iyo an pagtao nin espirituwal na instruksion sa mga nasa kongregasyon. Girumdomon na an binuhay liwat na si Jesus, sa presensia kan nagkapira sa iba pang apostol, nagsabi ki Pedro: “Simon na aki ni Juan, namomoot ka sa sako?” Si Pedro nagsimbag: “Iyo, Kagurangnan, ika nakakaisi na ako may kapadangatan sa saimo.” Si Jesus nagsabi sa saiya: “Pasabsaba an sakong mga kordero. . . . Pastoran mo an saradit kong karnero. . . . Pasabsaba an saradit kong karnero.” (Juan 21:15-17) Abaa kaimportanteng asignasyon!
5 Maheheling niato sa mga tataramon ni Jesus na idtong mga tinitipon sa kongregasyon iinaagid sa mga karnero sa sarong toril. An mga karnerong ini—Kristianong mga lalaki, babae, asin aki—kaipuhan na pakakanon sa espirituwal asin pastoran nin tama. Apuera kaini, mantang pinagbotan ni Jesus an gabos niang parasunod na magtokdo sa iba asin gumibo nin mga disipulo, an siisay man na bagohan na nagigin mga karnero nia kaipuhan na sanayon kun paano gigibohon an sugong iyan nin Dios.—Mateo 28:19, 20.
6. Anong mga areglo an ginibo sa bagong mabilog na “kongregasyon nin Dios”?
6 Kan an “kongregasyon nin Dios” nabilog na, an mga minakompuesto kaiyan regular na nagtitiripon para sa instruksion asin pagparinigonan nin boot: “Sinda nagpadagos sa pagdusay kan saindang sadiri sa katokdoan kan mga apostol asin sa pakikabtang sa lambang saro, sa pagkakan asin pamibi.” (Gibo 2:42, 46, 47) An saro pang lataw na detalye sa historikong rekord iyo na an nagkapirang kualipikadong lalaki dinesignaran na tumabang sa pag-asikaso sa nagkapirang praktikal na bagay. Dai sinda pinili huli sa naabot nindang edukasyon o teknikal na mga abilidad. Ini mga lalaking “pano nin espiritu asin kadonongan.” An saro iyo si Esteban, asin an pagkasaysay nag-aapod nin atension sa saiyang pagigin “sarong tawo na pano nin pagtubod asin banal na espiritu.” An sarong resulta kan areglo sa kongregasyon iyo na “an tataramon nin Dios padagos na nagtalubo, asin an kabilangan kan mga disipulo padagos na nagdakol na marhay sa Jerusalem.”—Gibo 6:1-7.
Mga Lalaki na Ginamit nin Dios
7, 8. (a) An mga apostol asin kamagurangan na lalaki sa Jerusalem naglingkod bilang ano sa tahaw kan enot na mga Kristiano? (b) Ano an nagin resulta kan itao an instruksion paagi sa mga kongregasyon?
7 Siempre, nangenot an mga apostol sa enot na areglo sa kongregasyon, alagad bakong sinda sana. May panahon na si Pablo asin an saiyang kairiba nagbalik sa Antioquia sa Siria. An Gibo 14:27 nagsasaysay: “Kan sinda mag-abot na asin natipon na an kongregasyon, isinaysay ninda an dakol na bagay na ginibo nin Dios paagi sa sainda.” Mantang kaibanan pa sinda kan lokal na kongregasyon na iyan, luminataw an sarong isyu manongod sa kun baga kaipuhan na magpaturi an nagturubod na Hentil. Tanganing maresolberan an isyu, si Pablo asin Bernabe isinugo “sa mga apostol asin kamagurangan na lalaki sa Jerusalem,” na malinaw na naglilingkod bilang sarong namamahalang grupo.—Gibo 15:1-3.
8 An Kristianong magurang sa kongregasyon na si Santiago, na tugang sa ina ni Jesus alagad bakong sarong apostol, iyo an nangenot kan “an mga apostol asin an kamagurangan na lalaki nagtiripon sa pag-orolay dapit sa bagay na ini.” (Gibo 15:6) Pagkatapos nin pagturotimbang asin sa tabang kan banal na espiritu, nakaabot sinda sa sarong konklusyon na kaoyon kan Kasuratan. Ipinadara ninda ini paagi sa surat sa lokal na mga kongregasyon. (Gibo 15:22-32) An mga nakaresibi kan impormasyon na ini inako asin iinaplikar iyan. Ano an nagin resulta? An mga tugang na lalaki asin babae napakosog asin naparigon an boot. An Biblia nagbabareta: “Kun siring, tunay na an mga kongregasyon nagpadagos na maparigon sa pagtubod asin magdakol an kabilangan aroaldaw.”—Gibo 16:5.
9. Anong mga katongdan an sinasabi kan Biblia para sa kualipikadong Kristianong mga lalaki?
9 Alagad paano nagpunsionar sa aroaldaw an lokal na mga kongregasyon? Kuanon niatong halimbawa an mga kongregasyon sa isla nin Creta. Minsan ngani may maraot na reputasyon an dakol na tawo na nag-iistar duman, an nagkapira nagbago asin nagin tunay na mga Kristiano. (Tito 1:10-12; 2:2, 3) Nakaistar sinda sa manlaenlaen na siudad, asin gabos sinda harayo sa namamahalang grupo sa Jerusalem. Minsan siring, dai idto nagin dakulang problema huling an espirituwal na “kamagurangan na lalaki” ninombrahan sa kada lokal na mga kongregasyon sa Creta, siring sa iba pang lugar. Inootob kan siring na mga lalaki an mga kualipikasyon na mababasa niato sa Biblia. Sinda ninombrahan bilang kamagurangan, o mga paraataman, na ‘makakapagsadol paagi sa katokdoan na ikakarahay asin makakapagsagwe sa mga nagtutumang.’ (Tito 1:5-9; 1 Timoteo 3:1-7) An iba pang espirituwal na mga lalaki kualipikado na tumabang sa mga kongregasyon bilang ministeryal na mga lingkod, o mga diakono.—1 Timoteo 3:8-10, 12, 13.
10. Oyon sa Mateo 18:15-17, paano reresolberan an seryosong mga problema?
10 Sinabi ni Jesus na mag-eeksister an siring na depinidong areglo. Girumdomon an pagkasaysay sa Mateo 18:15-17, na dian sinabi nia na kun beses an mga problema tibaad maglataw sa pag-oltanan kan duwang lingkod nin Dios, kun an saro sa ano man na paagi nagkakasala tumang sa saro pa. Kaipuhan na kaolayon kan napagkasalaan an ibong na lado asin “ihayag an saiyang sala” sa pribado, na sinda sanang duwa. Kun an isyu dai naresolberan kan lakdang na iyan, puedeng humagad nin tabang sa saro o duwa pa na nakakaaram kan mga detalye. Paano kun dai pa giraray naresolberan an problema? Si Jesus nagsabi: “Kun dai sia maghinanyog sa sainda, itaram mo sa kongregasyon. Kun dai pa sia maghinanyog minsan sa kongregasyon, ibilang mo sia na arog kan tawo kan mga nasyon asin parasingil nin buhis.” Kan sabihon iyan ni Jesus, an mga Judio iyo pa an minakompuesto sa “kongregasyon nin Dios,” kaya an saiyang mga tataramon enot na aplikado sa sainda. * Minsan siring, kan maestablisar an Kristianong kongregasyon, aplikado na man dian an instruksion ni Jesus. Saro pa ining indikasyon na an banwaan nin Dios magkakaigwa nin depinidong areglo sa kongregasyon para sa pagparigon asin paggiya sa lambang indibiduwal na Kristiano.
11. Paanong an kamagurangan kalabot sa pagresolber nin mga problema?
11 Angay nanggad, an kamagurangan na lalaki, o mga paraataman, magrerepresentar sa lokal na kongregasyon sa pagkapot o pagresolber nin mga problema o sa pagtao nin atension sa mga kaso nin pagkakasala. Kaoyon iyan kan mga kualipikasyon nin kamagurangan na nasambitan sa Tito 1:9. Totoo, an lokal na kamagurangan bakong sangkap na mga lalaki, siring ki Tito, na isinugo ni Pablo sa mga kongregasyon tanganing ‘husayon an mga bagay na may depekto.’ (Tito 1:4, 5) Ngonyan, an mga irinerekomendar bilang kamagurangan dapat na napatunayan an saindang pagtubod asin debosyon sa nag-aging panahon. Sa siring, an ibang nasa kongregasyon igwa nin dahelan na magtiwala sa pagdirehir asin pamomoon na itinatao paagi kan areglong ini.
12. Ano an paninimbagan kan kamagurangan sa kongregasyon?
12 Sa kamagurangan sa kongregasyon sa Efeso, si Pablo nagsabi: “Tawan nindo nin atension an saindong sadiri asin an bilog na aripompon, na sa tahaw kaiyan kamo ninombrahan kan banal na espiritu bilang mga paraataman, na pastoran an kongregasyon nin Dios, na saiyang binakal paagi sa dugo kan saiyang sadiring Aki.” (Gibo 20:28) Totoo man iyan ngonyan na an mga paraataman sa kongregasyon ninombrahan tanganing “pastoran an kongregasyon nin Dios.” Maninigong gibohon ninda iyan na may pagkamoot, na dai nagpapakangkagurangnan sa aripompon. (1 Pedro 5:2, 3) An mga paraataman maninigong magmaigot na pakosogon asin tabangan “an bilog na aripompon.”
Pagigin Dayupot sa Kongregasyon
13. Kun beses, ano an puedeng mangyari sa kongregasyon, asin taano?
13 An kamagurangan asin an gabos na iba pa sa kongregasyon bakong sangkap, kaya sa panapanahon, nangyayari an mga dai pagkasinabotan o problema, arog kan nangyari kan enot na siglo kan yaon pa an nagkapira sa mga apostol. (Filipos 4:2, 3) An sarong paraataman o an saro pang tawo tibaad magtaram na garo baga daing modo, daing kabootan, o medyo bakong totoo. O tibaad isipon niato na igwang nangyayari na bakong sono sa Kasuratan, alagad minsan ngani naaraman iyan kan lokal na kamagurangan, garo baga dai ninda ikinokorehir iyan. Siempre, tibaad an isyu inasikaso na o inaasikaso pa kaoyon kan Kasuratan asin may mga detalye iyan na dai niato aram. Alagad dawa kun an kamugtakan siring man nanggad kan iniisip niato, isip-isipon ini: Sa kadikit na panahon, sarong magabat na kasalan an nag-eksister sa kongregasyon sa Corinto, sarong kongregasyon na pinagmamakologan ni Jehova. Pag-abot nin panahon, sa tama asin marigon na paagi, tinawan nia nin atension an maraot na gibo. (1 Corinto 5:1, 5, 9-11) Puede niatong hapoton an satong sadiri, ‘Kun nabubuhay ako sa Corinto kan panahon na idto, ano daw kutana an reaksion ko mientras na dai pa inaasikaso an problemang idto?’
14, 15. Taano an nagkapira ta nagpondo na sa pagsunod ki Jesus, na nagtatao nin anong leksion para sa sato?
14 Estudyare an saro pang posibilidad na kalabot an kongregasyon. Ipamugtak na nadedepisilan an saro na saboton asin akoon an sarong sono sa Kasuratan na katokdoan. Tibaad nagsiyasat na sia sa Biblia asin sa mga publikasyon na makukua paagi sa kongregasyon asin naghagad nin tabang sa maygurang na mga kapwa Kristiano, sa kamagurangan pa ngani. Sa ibong kaiyan, nasasakitan pa man giraray siang saboton o akoon an punto de vista. Ano an puede niang gibohon? Kaagid kaiyan an nangyari mga sarong taon bago magadan si Jesus. Sinabi nia na sia “an tinapay nin buhay” asin tanganing mabuhay sagkod lamang kaipuhan na an saro “magkakan kan laman kan Aki nin tawo asin mag-inom kan saiyang dugo.” Nakapakubhan iyan sa nagkapira kan saiyang mga disipulo. Imbes na maghanap nin paliwanag o mapasensia na sanang maghalat na ikorehir ni Jehova an mga bagay sa tamang panahon, dakol na disipulo an “habo nang maglakaw kaiba [ni Jesus].” (Juan 6:35, 41-66) Sa giraray, kun yaon kita duman, ano daw kutana an ginibo niato?
15 Sa presenteng mga panahon, an nagkapira nagpondo na sa pakikiasosyar sa lokal na kongregasyon, na nag-iisip na sinda masadiri na sanang maglingkod sa Dios. Tibaad sinasabi ninda na huli ta nakolgan an saindang boot, iniisip ninda na dai itinatanos an sarong pagkakasala, o dai ninda maaako an sarong katokdoan. Gurano karasonable an saindang iginagawe? Minsan ngani totoo na an kada Kristiano maninigong magkaigwa nin personal na relasyon sa Dios, dai niato manenegaran na ginagamit nia an sarong pambilog na kinaban na kongregasyon, arog kan ginibo nia kan panahon kan mga apostol. Apuera kaini, ginamit asin binendisyonan ni Jehova an lokal na mga kongregasyon kan enot na siglo, na nagbubugtak nin kualipikadong kamagurangan asin ministeryal na mga lingkod tanganing pakinabangon an mga kongregasyon. Totoo man iyan ngonyan.
16. Kun nasusugotan na bayaan an kongregasyon, ano an maninigong isipon nin saro?
16 Kun an sarong Kristiano nag-iisip na igo na sa saiya an pagkaigwa nin personal na relasyon sa Dios, sinasayumahan nia an ipinagboot na areglo nin Dios—an pambilog na kinaban na kongregasyon sagkod an lokal na mga kongregasyon kan banwaan nin Dios. An saro tibaad magsolo sana sa pagsamba sa Dios o makiasosyar sa nagkapira sanang iba pa, alagad saen an areglo para sa kamagurangan sa kongregasyon asin an probisyon nin ministeryal na mga lingkod? Makahulogan nanggad, kan magsurat si Pablo sa kongregasyon sa Colosas asin magdirehir na an surat basahon man sa Laodicea, sia nagtaram manongod sa pagigin “nakagamot asin itinitindog dian [ki Cristo].” An makikinabang digdi iyo an mga nasa kongregasyon, bakong an mga indibiduwal na isiniblag an saindang sadiri sa kongregasyon.—Colosas 2:6, 7; 4:16.
Harigi Asin Sulay kan Katotoohan
17. Ano an ipinapaheling kan 1 Timoteo 3:15 manongod sa kongregasyon?
17 Sa saiyang enot na surat sa Kristianong magurang sa kongregasyon na si Timoteo, sinumaryo ni apostol Pablo an mga kualipikasyon kan kamagurangan asin ministeryal na mga lingkod sa lokal na mga kongregasyon. Kasunod tolos kaiyan, nasambitan ni Pablo an “kongregasyon kan nabubuhay na Dios,” na sinasabi na ini “sarong harigi asin sulay kan katotoohan.” (1 Timoteo 3:15) An bilog na kongregasyon nin linahidan na mga Kristiano nagin siring nanggad na harigi kan enot na siglo. Asin dai madidiskutir na an lokal na kongregasyon iyo an pangenot na areglo tanganing an indibiduwal na mga Kristiano umako kan siring na katotoohan. Dian sinda makakadangog nin katotoohan na itinotokdo asin sinusuportaran, na magpapakosog sa sainda.
18. Taano ta mahalagang marhay an mga pagtiripon kan kongregasyon?
18 Kaagid kaiyan, an pambilog na kinaban na Kristianong kongregasyon iyo an pamilya nin Dios, “sarong harigi asin sulay kan katotoohan.” An satong regular na pag-atender asin pagpartisipar sa mga pagtiripon kan satong lokal na kongregasyon iyo an pangenot na paagi tanganing parigonon kita, pakosogon an satong relasyon sa Dios, asin magin andam na gibohon an saiyang kabotan. Sinusuratan an kongregasyon sa Corinto, nagkonsentrar si Pablo sa sinabi sa siring na mga pagtiripon. Nagsurat sia na minamawot nia na magin malinaw asin nasasabotan an ano man na sinasabi sa saindang mga pagtiripon tanganing ‘mapakosog’ an mga nag-aatender. (1 Corinto 14:12, 17-19) Mapapakosog kita ngonyan kun rinerekonoser niato na inautorisaran ni Jehova Dios an areglo para sa lokal na mga kongregasyon asin sinusuportaran nia iyan.
19. Taano ta may utang na boot kamo sa saindong kongregasyon?
19 Iyo, kun minamawot niato na mapakosog bilang mga Kristiano, maninigo kitang magdanay sa laog kan kongregasyon. Haloy nang napatunayan na iyan sarong depensa tumang sa falsong mga katokdoan, asin ginagamit iyan nin Dios tanganing ipahayag sa bilog na daga an maogmang bareta kan saiyang Mesiyanikong Kahadean. Daing duwa-duwa, dakol an nahaman nin Dios paagi sa Kristianong kongregasyon.—Efeso 3:9, 10.
[Nota sa Ibaba]
^ par. 10 Rinekonoser kan nag-espesyalisar sa Biblia na si Albert Barnes na an instruksion ni Jesus na ‘itaram sa kongregasyon’ puedeng nanonongod sa “mga autorisadong mag-imbestigar sa siring na mga kaso—an mga representante kan iglesia. Sa Judiong sinagoga igwang grupo nin kamagurangan na naglilingkod bilang mga hokom, na sa sainda dinadara an arog kaining mga problema.”
Nagigirumdoman daw Nindo?
• Taano ta maninigo niatong laoman na gagamiton nin Dios an mga kongregasyon sa daga?
• Ano an ginigibo kan kamagurangan para sa kongregasyon, minsan ngani sinda bakong sangkap?
• Paano kamo napapakosog kan lokal na kongregasyon?
[Mga Hapot Para sa Pag-adal]
[Ritrato sa pahina 26]
An mga apostol asin kamagurangan na lalaki sa Jerusalem naglingkod bilang sarong namamahalang grupo
[Ritrato sa pahina 28]
An kamagurangan asin ministeryal na mga lingkod nag-aako nin instruksion tanganing maotob ninda an saindang mga paninimbagan sa kongregasyon