Pag-omawon Logod kan Kongregasyon si Jehova

“Ipapahayag ko an saimong ngaran sa sakong mga tugang; sa tahaw kan kongregasyon oomawon taka.”—HEBREO 2:12.

1, 2. Taano ta kapakipakinabang na marhay an kongregasyon, asin ano an importanteng marhay na kabtang kaiyan?

SA BILOG na kasaysayan, an mga indibiduwal nagkaigwa nin pakiibaiba asin katiwasayan sa laog kan pamilya bilang pundamental na grupo. Minsan siring, an Biblia nagsasabi nin saro pang grupo na dian an dai mabilang na indibiduwal sa bilog na globo ngonyan nagkakamit nin pambihirang pakiibaiba asin katiwasayan. Iyan an Kristianong kongregasyon. Baga man kabtang kamo o bako nin sarong dayupot, mapagsuportar na pamilya, puede asin maninigo nindong apresyaron an itinao nin Dios paagi sa areglo nin kongregasyon. Siempre, kun nakikiasosyar na kamo sa sarong kongregasyon kan Mga Saksi ni Jehova, posibleng marhay na makakapagpatunay kamo sa mainit na pakikiasosyar nindo dian asin sa pakamate nindo nin katiwasayan.

² An kongregasyon bako sanang grupo sosyal. Bako iyan na asosasyon sa komunidad o sarong klab na dian nag-iiribahan an mga tawo na may pararehong kamugtakan o pararehong pinagkakainteresan sa isport o apisyon. Imbes, an areglo nin kongregasyon sa pangenot para sa pag-omaw ki Jehova Dios. Haloy nang arog iyan kaiyan, siring kan idinodoon kan libro nin Salmo. Sa Salmo 35:18, mababasa niato: “Papamurawayon taka sa dakulang kongregasyon; sa tahaw kan dakulang banwaan oomawon taka.” Kaagid kaiyan, an Salmo 107:31, 32 nag-eenkaminar sa sato: “O magpasalamat an mga tawo ki Jehova para sa saiyang mamomoton na kabootan asin sa saiyang makangangalas na mga gibo para sa mga aki nin mga tawo. Asin irukyaw ninda sia sa kongregasyon kan banwaan.”

3. Oyon ki Pablo, ano an kabtang kan kongregasyon?

³ Idinoon kan Kristianong si apostol Pablo an saro pang mahalagang marhay na kabtang kan kongregasyon kan sambiton nia an “pamilya nin Dios, na iyo an kongregasyon kan nabubuhay na Dios, sarong harigi asin sulay kan katotoohan.” (1 Timoteo 3:15) Manongod sa anong kongregasyon nagtataram si Pablo? Sa anong mga paagi ginamit kan Biblia an terminong “kongregasyon”? Asin ano an maninigong magin epekto kaini sa satong buhay asin mga oportunidad? Tanganing maaraman an simbag, siyasaton nguna niato an mga gamit kan terminong “kongregasyon” sa Tataramon nin Dios.

4. Paano parateng marhay na ginagamit sa Hebreong Kasuratan an terminong “kongregasyon”?

⁴ An termino sa Hebreo na parateng tinatradusir na “kongregasyon” hale sa pinakagamot na termino na nangangahulogan “tiriponon.” (Deuteronomio 4:10; 9:10) Ginamit kan salmista an “kongregasyon” mapadapit sa mga anghel sa langit, asin puede iyan na gamiton manongod sa grupo nin mga paragibo nin karompotan. (Salmo 26:5; 89:5-7) Minsan siring, an Hebreong Kasuratan parateng marhay na iinaaplikar iyan sa mga Israelita. An Dios nagsabi na si Jacob ‘magigin sarong kongregasyon nin mga banwaan,’ asin nangyari iyan. (Genesis 28:3; 35:11; 48:4) An mga Israelita inapod, o pinili, na magin “kongregasyon ni Jehova,” an “kongregasyon kan tunay na Dios.”—Bilang 20:4; Nehemias 13:1; Josue 8:35; 1 Samuel 17:47; Miqueas 2:5.

5. Anong termino sa Griego an parateng tinatradusir na “kongregasyon,” asin paano puedeng iaplikar an terminong ini?

⁵ An katimbang na termino sa Griego iyo an ek·kle·siʹa, na hale sa duwang terminong Griego na nangangahulogan “luwas” asin “apod.” Ikakaaplikar iyan sa sarong grupo na bakong relihioso, siring baga kan “katiriponan” na prinobokar ni Demetrio  tumang ki Pablo sa Efeso. (Gibo 19:32, 39, 41) Alagad sa pangkagabsan ginagamit iyan kan Biblia para sa Kristianong kongregasyon. An nagkapirang traduksion tinatradusir an terminong ini na “simbahan,” alagad an The Imperial Bible-Dictionary nagsasabi na iyan “nungka . . . na nangangahulogan nin mismong edipisyo na dian an mga Kristiano nagtitiripon para sa pampublikong pagsamba.” Pero, interesante nanggad na sa Kristianong Griegong Kasuratan, mababasa niato na an terminong “kongregasyon” iinaaplikar sa kisuerra apat na manlaenlaen na paagi.

An Linahidan na Kongregasyon nin Dios

6. Ano an ginibo ni David asin ni Jesus sa kongregasyon?

⁶ Iinaaplikar ki Jesus an mga tataramon ni David na yaon sa Salmo 22:22, si apostol Pablo nagsurat: “‘Ipapahayag ko an saimong ngaran sa sakong mga tugang; sa tahaw kan kongregasyon oomawon taka paagi sa pag-awit.’ Bilang resulta [si Jesus] kinaipuhan na magin kabaing kan saiyang ‘mga tugang’ sa gabos na bagay, tangani na sia magin maheherakon asin maimbod na halangkaw na saserdote sa mga bagay na manonongod sa Dios.” (Hebreo 2:12, 17) Inomaw ni David an Dios sa tahaw kan kongregasyon kan suanoy na Israel. (Salmo 40:9) Minsan siring, ano an pinapanongdan ni Pablo kan sabihon nia na inomaw ni Jesus an Dios “sa tahaw kan kongregasyon”? Arin na kongregasyon?

7. Sa anong pangenot na paagi ginagamit kan Kristianong Griegong Kasuratan an terminong “kongregasyon”?

⁷ Makahulogan an binasa niato sa Hebreo 2:12, 17. Ipinapaheling kaiyan na sa mahiwas na kahulogan, si Cristo miembro kan sarong kongregasyon na dian saiyang ipinahayag an ngaran nin Dios sa saiyang mga tugang. Sairisay an mga tugang na idto? An mga minabilog kan “banhi ni Abraham,” an linahidan nin espiritung mga tugang ni Cristo, “mga may kabtang sa langitnon na pag-apod.” (Hebreo 2:16–3:1; Mateo 25:40) Iyo, an pangenot na kahulogan kan “kongregasyon” sa Kristianong Griegong Kasuratan iyo an grupo na kompuesto nin dakol na miembro kan linahidan nin espiritung mga parasunod ni Cristo. An 144,000 na linahidan na ini an minabilog kan “kongregasyon kan mga panganay na nalilista sa kalangitan.”—Hebreo 12:23.

8. Paano sinabi nin patienot ni Jesus an pagkabilog kan Kristianong kongregasyon?

⁸ Sinabi ni Jesus na bibilogon an Kristianong “kongregasyon” na ini. Mga sarong taon bago sia magadan, sinabi nia sa sarong apostol: “Ika si Pedro, asin sa ibabaw kan dakulang gapong ini papatindogon ko an sakong kongregasyon, asin an mga tata nin Hades dai makakadaog kaiyan.” (Mateo 16:18) Tamang nasabotan ni Pedro sagkod ni Pablo na si Jesus mismo an ihinulang dakulang gapo. Nagsurat si Pedro na an mga pinatindog bilang ‘buhay na mga gapo’ nin sarong espirituwal na harong itinogdok sa dakulang gapo, na iyo si Cristo; iyan sarong ‘banwaan para sa espesyal na pagkasadiri tanganing ipahayag nin mahiwas an mga kamurawayan’ kan Saro na nag-apod sa sainda.—1 Pedro 2:4-9; Salmo 118:22; Isaias 8:14; 1 Corinto 10:1-4.

9. Kasuarin nagpoon na mabilog an kongregasyon nin Dios?

⁹ Kasuarin an ‘banwaan na ini para sa espesyal na pagkasadiri’ nagpoon na mabilog na magin Kristianong kongregasyon? Iyan kaidtong Pentecostes 33 C.E. kan ibubo nin Dios an banal na espiritu sa mga disipulo na nagkatiripon sa Jerusalem. Pagtaodtaod kan aldaw na idto, si Pedro nagtao nin kahangahangang diskurso sa sarong grupo nin mga Judio asin proselito. Dakol an nagkarulugad an puso huli sa kagadanan ni Jesus;  nagsorolsol sinda asin nabautismohan. Mababasa niato sa nasa kasaysayan na bareta na tolong ribo sinda, na kaidto mismo nagin kabtang kan bago asin nag-ooswag na kongregasyon nin Dios. (Gibo 2:1-4, 14, 37-47) Nag-ooswag idto huling padakol nang padakol na Judio asin proselito an nag-ako kan katunayan na an kongregasyon nin Dios bako nang an Israel sa laman. Imbes, an linahidan na mga Kristiano na minabilog sa espirituwal na “Israel nin Dios” nagin nang an tunay na kongregasyon nin Dios.—Galacia 6:16; Gibo 20:28.

10. Ano an relasyon ni Jesus sa kongregasyon nin Dios?

¹⁰ Parateng ipinapaheling kan Biblia an kalaenan ni Jesus asin kan mga linahidan, siring baga kan fraseng “dapit ki Cristo asin sa kongregasyon.” Si Jesus an Payo kan kongregasyon na ini nin linahidan nin espiritung mga Kristiano. Si Pablo nagsurat na ‘ginibo nin Dios si Jesus na payo kan gabos na bagay sa kongregasyon, na iyo an saiyang hawak.’ (Efeso 1:22, 23; 5:23, 32; Colosas 1:18, 24) Ngonyan, igwa pa sa daga nin dikit na sanang natatada kan linahidan na mga miembro kan kongregasyon na ini. Pero, makakasierto kita na namomotan sinda kan saindang Payo, si Jesu-Cristo. An Saiyang namamatean para sa sainda ilinaladawan sa Efeso 5:25: “[Si] Cristo namoot man sa kongregasyon asin itinao an saiyang sadiri para dian.” Sia namomoot sa sainda huling aktibo sindang nagdodolot sa Dios “nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran,” siring ngani kan ginibo ni Jesus kan sia nasa daga pa.—Hebreo 13:15.

“Kongregasyon”—An Iba Pang Kahulogan

11. Sa anong ikaduwang paagi ginagamit kan Kristianong Griegong Kasuratan an “kongregasyon”?

¹¹ Kun beses, ginagamit kan Biblia an terminong “kongregasyon” sa mas limitado o laen na kahulogan, na dai iyan iinaaplikar sa bilog na grupo kan 144,000 na linahidan na minakompuesto sa “kongregasyon nin Dios.” Halimbawa, si Pablo nagsurat sa sarong grupo nin mga Kristiano: “Dai kamo magin mga dahelan nin pagkasingkog sa mga Judio saka sa mga Griego patin sa kongregasyon nin Dios.” (1 Corinto 10:32) Malinaw na kun nakagibo nin sala an sarong Kristiano sa suanoy na Corinto, puedeng magin dahelan iyan nin pagkasingkog nin nagkapira. Pero, posible daw na iyan makapasingkog sa siisay man asin sa gabos na Griego, Judio, o mga linahidan poon kan panahon na idto sagkod sa panahon niato ngonyan? Dai nanggad. Sa siring minalataw na sa bersikulong ini, an “kongregasyon nin Dios” minaaplikar sa mga Kristianong nabubuhay sa sarong depinidong panahon. Huli kaiyan, puedeng sabihon nin saro na an Dios an naggigiya, nagsusuportar, o nagbebendisyon sa kongregasyon, an boot sabihon sa gabos na Kristiano sa sarong itinalaan na panahon, saen man sinda nakaistar. O puede niatong sambiton an kaogmahan asin katoninongan na nangingibabaw sa kongregasyon nin Dios ngonyan, an boot sabihon sa bilog na Kristianong kasararoan nin magturugang.

12. Sa anong ikatolong kahulogan na ginagamit sa Biblia an “kongregasyon”?

¹² An ikatolong paagi na ginagamit kan Biblia an “kongregasyon” minaaplikar sa gabos na Kristiano sa sarong geograpikong lugar. Mababasa niato: “An kongregasyon sa bilog na Judea asin Galilea patin Samaria luminaog sa panahon nin katoninongan.” (Gibo 9:31) Labi sa sarong grupo nin mga Kristiano an yaon sa medyo mahiwas na lugar na iyan, alagad an gabos na grupong iyan sa Judea, Galilea, asin Samaria inaapod na “kongregasyon.” Huli sa bilang nin nabautismohan kan Pentecostes 33 C.E. asin dai nahaloy pakatapos kaiyan, tibaad labi pa ngani sa sarong grupo an regular na nagtitiripon sa lugar na sakop kan Jerusalem. (Gibo 2:41, 46, 47; 4:4; 6:1, 7) Si Herodes Agripa I namahala sa Judea sagkod na sia magadan kan 44 C.E., asin malinaw sa 1 Tesalonica 2:14 na kan mga 50 C.E, igwa nin dakol na kongregasyon sa Judea. Sa siring, kun nababasa niato na ‘pinapasakitan ni Herodes an nagkapira sa mga kabilang sa kongregasyon,’ tibaad nanonongod iyan sa bako sanang sarong grupo na nagtitiripon sa Jerusalem.—Gibo 12:1.

13. Ano an ikaapat asin ordinaryong paagi na ginagamit kan Biblia an “kongregasyon”?

¹³ Ikaapat, an mas limitado asin ordinaryo pa nganing gamit kan terminong “kongregasyon” nanonongod sa mga Kristiano na minabilog sa saro sanang lokal na kongregasyon, arog kan nasa sarong harong. Nasambitan ni Pablo an mga “kongregasyon sa Galacia.” Igwa nin labi sa sarong kongregasyon  sa darudakulang probinsiang iyan nin Roma. Duwang beses na ginamit ni Pablo an plural na “mga kongregasyon” mapadapit sa Galacia, na kaiba an mga nasa Antioquia, Derbe, Listra, asin Iconio. An kualipikadong kamagurangan na lalaki, o mga paraataman, ninombrahan sa lokal na mga kongregasyon na ini. (1 Corinto 16:1; Galacia 1:2; Gibo 14:19-23) Oyon sa Kasuratan, an gabos na idto “mga kongregasyon nin Dios.”—1 Corinto 11:16; 2 Tesalonica 1:4.

14. Ano an ikakakonklusyon niato sa paggamit kan “kongregasyon” sa nagkapirang teksto?

¹⁴ Sa nagkapirang kamugtakan, an mga grupo sa Kristianong mga pagtiripon seguradong sadit, na nagkakaigo sana sa sarong pribadong harong. Minsan siring, an tataramon na “kongregasyon” iinaplikar sa nagkapira sa siring na mga grupo. An mga aram niato iyo idtong mga kongregasyon na nasa harong ni Aquila asin Prisca, Nimfa, asin Filemon. (Roma 16:3-5; Colosas 4:15; Filemon 2) Ini maninigong magin gikanan nin pamparigon sa boot sa lokal na mga kongregasyon ngonyan na medyo sadit asin tibaad regular pa nganing nagtitiripon sa sarong pribadong harong. Rinekonoser ni Jehova an siring na saradit na kongregasyon kan enot na siglo, asin sierto na rinerekonoser man nia iyan ngonyan, na binebendisyonan iyan paagi kan saiyang espiritu.

An mga Kongregasyon Nag-oomaw ki Jehova

15. Paano naheling an pagpunsionar kan banal na espiritu sa nagkapirang naenot na kongregasyon?

¹⁵ Nasambitan niato na bilang kaotoban kan Salmo 22:22, inomaw ni Jesus an Dios sa tahaw kan kongregasyon. (Hebreo 2:12) Dapat na arog man kaiyan an gibohon kan saiyang maimbod na mga parasunod. Kan enot na siglo kan an tunay na mga Kristiano lahidan kan banal na espiritu na magin mga aki nin Dios asin sa siring mga tugang ni Cristo, inako nin nagkapira an dagdag asin espesyal na pagpunsionar kan espiritu. Inako ninda an milagrosong mga balaog kan espiritu. An nagkapirang pagpaheling kan siring na mga balaog iyo an espesyal na pagtaram nin kadonongan o kaaraman, an kapangyarihan na magpaomay o magpropesiya, o dawa an abilidad na makapagtaram sa mga lenguaheng dai ninda aram.—1 Corinto 12:4-11.

16. Ano an sarong katuyohan kan milagrosong mga balaog kan espiritu?

¹⁶ Mapadapit sa pagtaram nin laen na tataramon, si Pablo nagsabi: “Mag-aawit ako nin pag-omaw na may balaog kan espiritu, alagad mag-aawit man ako nin pag-omaw sa sakong isip.” (1 Corinto 14:15) Naheling nia na importanteng nasasabotan nin iba an saiyang tataramon asin sa siring matotokdoan sinda. Kamawotan ni Pablo na omawon si Jehova sa kongregasyon. Sinadol nia an iba na igwa nin mga balaog kan  espiritu: “Maghingoa kamong magin abunda sa mga ini para sa pagparigon kan kongregasyon,” an boot sabihon an lokal na kongregasyon kun saen sinda nagpaheling kan balaog na ini. (1 Corinto 14:4, 5, 12, 23) Malinaw nanggad, si Pablo interesado sa lokal na mga kongregasyon, na naaaraman na sa lambang saro kaini, an mga Kristiano magkakaigwa nin mga oportunidad na omawon an Dios.

17. Kun dapit sa lokal na mga kongregasyon ngonyan, sa ano kita makakasierto?

¹⁷ Padagos na ginagamit asin sinusuportaran ni Jehova an saiyang kongregasyon. Binebendisyonan Nia an grupo na kompuesto nin dakol na miembro kan linahidan na mga Kristiano sa daga ngonyan. Maheheling ini paagi sa abundang suplay nin espirituwal na kakanon na inaako kan banwaan nin Dios. (Lucas 12:42) Binebendisyonan nia an pambilog na kinaban na kasararoan nin magturugang sa kabilogan. Asin binebendisyonan nia an lokal na mga kongregasyon, na dian inoomaw niato an satong Kaglalang paagi sa satong mga ginigibo asin nakakapakosog sa espirituwal na mga komento. Dian kita nag-aako nin pagtotokdo asin pagsasanay tanganing maomaw niato an Dios sa iba pang mga kamugtakan, kun sa pisikal mayo kita sa satong lokal na kongregasyon.

18, 19. Ano an gustong gibohon kan sinserong mga Kristiano sa arin man na lokal na kongregasyon?

¹⁸ Girumdomon na sinadol ni apostol Pablo an mga Kristiano sa lokal na kongregasyon sa Filipos, Macedonia: “Ini an padagos kong ipinapamibi, na . . . mapano kamo nin matanos na bunga, na paagi ki Jesu-Cristo, para sa kamurawayan asin kaomawan nin Dios.” Kaiba dian an pagsabi ninda sa iba, sa mga taga luwas, kan manongod sa saindang pagtubod ki Jesus asin sa saindang makangangalas na paglaom. (Filipos 1:9-11; 3:8-11) Huli kaiyan, sinadol ni Pablo an mga kapwa Kristiano: “Paagi [ki Jesus] danay kitang magdolot sa Dios nin atang nin pag-omaw, na iyo, an bunga nin mga ngabil na nagpapahayag sa publiko kan saiyang ngaran.”—Hebreo 13:15.

¹⁹ Naoogma daw kamong marhay na omawon an Dios “sa tahaw kan kongregasyon,” siring kan ginibo ni Jesus, asin na gamiton an saindong mga ngabil tanganing omawon si Jehova sa atubangan kan mga dai pa nakakamidbid asin nakakapag-omaw sa saiya? (Hebreo 2:12; Roma 15:9-11) Minsan paano, an personal na simbag niato tibaad nakadepende sa saboot niato manongod sa kabtang kan satong lokal na kongregasyon sa katuyohan nin Dios. Sa masunod na artikulo, estudyaran niato kun paano dinidirehiran asin ginagamit ni Jehova an satong lokal na kongregasyon asin kun ano an maninigong magin kabtang kaiyan sa satong buhay ngonyan.

Nagigirumdoman daw Nindo?

• Paano nagpoon an “kongregasyon nin Dios” na kompuesto nin linahidan na mga Kristiano?

• Ano an tolong dugang pang paagi na ginagamit kan Biblia an terminong “kongregasyon”?

• Mapadapit sa kongregasyon, ano an gustong gibohon ni David, Jesus, asin kan enot na siglong mga Kristiano, asin paano ini maninigong makaapektar sa sato?

[Mga Hapot Para sa Pag-adal]

[Ritrato sa pahina 21]

Si Jesus an pundasyon nin anong kongregasyon?

[Ritrato sa pahina 23]

An lokal na mga grupo nin mga Kristiano nagtitiripon bilang “mga kongregasyon nin Dios”

[Ritrato sa pahina 24]

Arog kan mga Kristiano sa Benin, maoomaw niato si Jehova sa tahaw kan nagkakasararong mga kadaklan