Togotan Nindo an Tataramon nin Dios na Gumiya sa Saindong mga Lakad

“An saimong tataramon ilawan sa sakong bitis, asin liwanag sa sakong dalan.”—SALMO 119:105.

1, 2. Taano an kadaklan na tawo ta dai nagin mapanggana sa paghanap nin tunay na katoninongan asin kaogmahan?

MAY nagigirumdoman daw kamong sarong okasyon na kinaipuhan nindong maghapot sa iba para sa direksion? Tibaad harani na kamo sa saindong dudumanan alagad dai kamo segurado kun arin sa nagkapira na sanang dalan an sisikoan nindo. O tibaad biyo na kamong nalagalag asin kaipuhan nindong umagi sa ibang dalan. Arin man dian, bako daw na madonong na sumunod sa paggiya nin saro na nakakaaram kan lugar? Makakatabang sa saindo an siring na tawo tanganing makaabot kamo sa saindong dudumanan.

² Sa laog nin rinibong taon, an katawohan sa pangkagabsan nagmaigot na giyahan an saindang dalan na mayo kan tabang nin Dios. Minsan siring, huling independiente sa Dios, biyong nalagalag an bakong sangkap na mga tawo. Dai talaga ninda nanonompongan an dalan pasiring sa tunay na katoninongan asin kaogmahan. Taano ta dai ninda kayang manompongan iyan? Labing 2,500 na taon na an nakaagi, si propeta Jeremias nagsabi: “Bakong kapot nin tawong naglalakaw dawa an paggiya sa saiyang lakad.” (Jeremias 10:23) An siisay man na nagpoprobar na giyahan an sadiri niang lakad na dai nag-aako nin masasarigan na tabang siertong mapapaatubang sa pagkasudya. Totoo nanggad, an katawohan nangangaipo nin paggiya!

3. Taano si Jehova Dios ta iyo an may pinakahalangkaw na kualipikasyon na magtao nin paggiya sa katawohan, asin ano an ipinapanuga nia?

³ Si Jehova Dios an may pinakahalangkaw na kualipikasyon na magtao kan siring na paggiya. Taano? Huling nasasabotan nia nin orog kisa siisay man an pagkagibo sa mga tawo. Asin lubos niang naaaraman kun paano napasala asin nalagalag an rasa nin tawo. Naaaraman man nia kun ano an kaipuhan ninda tanganing makabalik sa tamang dalan. Apuera kaini, bilang an Kaglalang, aram pirme ni Jehova an pinakamarahay para sa sato. (Isaias 48:17) Sa siring, lubos kitang makakapagtiwala sa saiyang panuga siring kan nakarekord sa Salmo 32:8: “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan. Magtatao ako nin sadol na nakaturuhok sa saimo.” Mayong duda manongod dian: Si Jehova an nagtatao kan pinakamarahay na paggiya. Alagad paano man nanggad nia kita ginigiyahan?

4, 5. Paano kita puedeng giyahan kan mga tataramon nin Dios?

⁴ Sinabi nin sarong salmista sa pamibi nia ki Jehova: “An saimong tataramon ilawan sa sakong bitis, asin liwanag sa sakong dalan.” (Salmo 119:105) An mga tataramon asin pagirumdom nin Dios manonompongan sa Biblia, asin matatabangan kita kaiyan na mapangganahan an mga olang na tibaad mapaatubang sa sato sa satong dalan. Sa katunayan, kun binabasa niato an Biblia asin nagpapagiya dian, personal niatong naeeksperyensiahan an ilinaladawan sa Isaias 30:21: “An saimong mga talinga makakadangog nin tataramon sa likod mo na nagsasabi: ‘Iyo ini an dalan. Maglakaw kamo dian.’”

⁵ Minsan siring, mangnohon na an Salmo 119:105 nagsasambit nin duwang magkakonektadong katuyohan kan Tataramon nin Dios. Enot, iyan nagseserbing ilawan sa satong bitis. Kun inaatubang niato an pangaroaldaw na mga problema, an mga prinsipyo sa Biblia maninigong maggiya sa satong mga lakad tanganing makagibo kita nin madonong na mga desisyon asin malikayan an mga silo kan kinaban na ini. Ikaduwa, an mga pagirumdom nin Dios nagtataong liwanag sa satong  dalan, na nagtatabang sa sato na gumibo nin mga pagpili na kaoyon kan satong paglaom na mabuhay sagkod lamang sa ipinanuga nin Dios na Paraiso. Huling maliwanag na marhay an dalan sa enotan, masasabotan niato an magigin mga resulta—marahay man o maraot—nin sarong partikular na paggawe. (Roma 14:21; 1 Timoteo 6:9; Kapahayagan 22:12) Helingon niato nin mas detalyado kun paanong an mga tataramon nin Dios na nasa Biblia puedeng magin ilawan sa satong bitis asin liwanag sa satong dalan.

“Ilawan sa Sakong Bitis”

6. Sa anong mga situwasyon na an mga tataramon nin Dios puedeng magin ilawan sa satong bitis?

⁶ Aroaldaw, naggigibo kita nin mga desisyon. An nagkapirang desisyon garo baga bakong gayong importante, alagad kun beses tibaad mapaatubang kita sa mga situwasyon na minabalo kan satong moralidad, pagkasadiosan, o kan satong neutral na paninindogan. Tanganing mapangganang maatubang an siring na mga pagbalo, dapat na “napatuod an [satong] kakayahan sa pagrisa na mamidbid an tama sagkod an sala.” (Hebreo 5:14) Paagi sa pagkua nin tamang kaaraman sa Tataramon nin Dios asin pagpatalubo nin pakasabot sa mga prinsipyo kaiyan, sinasanay niato an satong konsensia tanganing makagibo kita nin mga desisyon na nakakapaogma ki Jehova.—Talinhaga 3:21.

7. Iladawan an sarong situwasyon na an sarong Kristiano tibaad magkaigwa nin tendensia na makiasosyar sa daing pagtubod na mga katrabaho.

⁷ Estudyare an sarong halimbawa. Kamo daw sarong adulto na sinserong naghihingoa na pagayagayahon an puso ni Jehova? (Talinhaga 27:11) Kun iyo, dapat kamong tawan nin komendasyon. Alagad imahinara na itinatao saindo nin nagkapirang katrabaho an sarong tiket tanganing ibanan nindo sinda sa pagdalan nin sarong karawat. Ikinakaogma ninda an pakiibaiba sa saindo sa trabaho asin gusto nindang makibarkada sa saindo sa luwas kan trabaho. Tibaad naniniwala kamong marhay na an mga indibiduwal na ini bakong maraot na mga tawo. Tibaad igwa pa ngani sinda nin nagkapirang marahay na prinsipyo. Ano an gigibohon nindo? Igwa daw nin ano man na peligro sa pag-ako kan imbitasyon? Paano an Tataramon nin Dios makakatabang saindo na makagibo nin marahay na desisyon sa bagay na ini?

8. Anong mga prinsipyo sa Kasuratan an nakakatabang sa sato na mangatanosan manongod sa pakikiasosyar?

⁸ Estudyare an nagkapirang prinsipyo sa Kasuratan. An enot na puedeng maglaog sa isip nindo iyo an yaon sa 1 Corinto 15:33, na nagsasabi: “An maraot na pag-iriba nakakaraot sa marahay na mga ugale.” An pagsunod daw sa prinsipyong ini naghahagad na biyo nindong rayoan an mga daing pagtubod? An sono sa Kasuratan na simbag sa hapot na iyan dai. Huli ta si apostol Pablo mismo nagpaheling nin mamomoton na konsiderasyon sa “gabos na klase nin tawo,” kaiba an mga daing pagtubod. (1 Corinto 9:22) An kahulogan mismo nin Kristianismo naghahagad na magpaheling kita nin interes sa iba—kaiba an mga bako niatong kapagtubod. (Roma 10:13-15) Sa katunayan, paano niato masusunod an hatol na ‘gumibo kan marahay sa gabos’ kun isinusuway niato an satong sadiri sa mga tawo na tibaad nangangaipo kan satong tabang?—Galacia 6:10.

9. Anong hatol sa Biblia an nakakatabang sa sato na magin timbang sa satong relasyon sa mga katrabaho niato?

⁹ Minsan siring, may malinaw na pagkakalaen an pakikiamigo sa sarong katrabaho asin pagigin  dayupot na amigo kan sarong iyan. Digdi minalaog an saro pang prinsipyo sa Kasuratan. Si apostol Pablo nagpatanid sa mga Kristiano: “Dai kamo makipagsakal na bakong timbang sa mga dai nagtutubod.” (2 Corinto 6:14) Ano an boot sabihon kan frase na “dai kamo makipagsakal na bakong timbang”? An ibang traduksion sa Biblia tinatawan nin kahulogan an mga tataramon na iyan na “dai makipadis,” “dai magprobar na makipag-ibanan bilang magkapantay,” o “dai makipagrelasyon nin bakong angay.” Noarin nagigin bakong angay an relasyon sa sarong katrabaho? Noarin iyan minalampas sa limitasyon asin nagigin pakipagsakal na bakong timbang? An Tataramon nin Dios, an Biblia, puedeng gumiya kan saindong lakad sa situwasyon na ini.

10. (a) Paano si Jesus nagpili nin mga kaibaiba? (b) Anong mga hapot an makakatabang sa saro na makagibo nin madonong na mga desisyon manongod sa pakikiasosyar?

¹⁰ Estudyare an halimbawa ni Jesus, na poon kan paglalang namoot na sa mga tawo. (Talinhaga 8:31) Mantang nasa daga, nagkaigwa sia nin dayupot na relasyon sa saiyang mga parasunod. (Juan 13:1) “Nakamate [pa ngani sia] nin pagkamoot” sa sarong lalaki na napasala nin paniniwala. (Marcos 10:17-22) Alagad nagbugtak man si Jesus nin malinaw na mga limitasyon sa pagpili nia nin dayupot na mga kaibaiba. Dai sia nakidayupot sa mga tawo na mayo nin sinserong interes sa paggibo kan kabotan kan saiyang Ama. Sa sarong okasyon, si Jesus nagsabi: “Kamo mga katood ko kun ginigibo nindo an ipinagboboot ko sa saindo.” (Juan 15:14) Totoo, tibaad magin marahay an pakiibaiba nindo sa sarong partikular na katrabaho. Alagad hapoton an saindong sadiri: ‘Andam daw an tawong ini na gibohon an ipinagboboot ni Jesus? Gusto daw niang makanood manongod ki Jehova, an saro na ipinagboot sa sato ni Jesus na sambahon? Igwa daw sia nin moral na mga pamantayan na kapareho kan moral na mga pamantayan ko bilang Kristiano?’ (Mateo 4:10) Mantang nakikipag-olay kamo sa saindong mga katrabaho asin iiniinsistir an pag-aplikar kan mga pamantayan sa Biblia, magigin risang-risa an simbag sa mga hapot na ini.

11. Sambiton an mga situwasyon na dian an mga tataramon nin Dios maninigong gumiya sa satong mga lakad.

¹¹ Igwa nin dakol pang ibang situwasyon na dian an mga tataramon nin Dios magigin siring sa ilawan sa satong bitis. Halimbawa, an sarong Kristiano na mayo nin trabaho tibaad alokan nin kaipuhan na marhay na trabaho. Minsan siring, an iskedyul nakakaubos nin kosog asin panahon, asin kun aakoon nia an trabaho, dai nia maaatenderan an nagkapirang Kristianong pagtiripon asin malilipasan an iba pang aktibidad na may koneksion sa tunay na pagsamba. (Salmo 37:25) An saro pang Kristiano tibaad nasusugotan na marhay na magheling nin aling-alingan  na malinaw na minalapas sa mga prinsipyo sa Biblia. (Efeso 4:17-19) An saro pa tibaad madaling makolgan an boot huli sa mga pagkabakong sangkap nin mga kapagtubod. (Colosas 3:13) Sa gabos na situwasyon na iyan, maninigong togotan niato an Tataramon nin Dios na magin ilawan sa satong bitis. An totoo, paagi sa pagsunod sa mga prinsipyo sa Biblia, mapanggana niatong maaatubang an ano man na problema sa buhay. An Tataramon nin Dios “kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.”—2 Timoteo 3:16.

“Liwanag sa Sakong Dalan”

12. Paanong an mga tataramon nin Dios liwanag sa satong dalan?

¹² Sinasabi man sa Salmo 119:105 na an mga tataramon nin Dios puedeng magin liwanag sa satong dalan, na liniliwanagan an dalan sa enotan. Bako kitang ignorante kun dapit sa ngapit, huling ipinapaliwanag kan Biblia an kahulogan kan makamomondong mga kamugtakan sa kinaban asin kun ano an kaaabtan kaiyan. Iyo, narerealisar niato na nabubuhay kita sa “huring mga aldaw” kan marigsok na sistemang ini nin mga bagay. (2 Timoteo 3:1-5) An pakaaram sa mangyayari sa ngapit maninigong magkaigwa nin hararom na epekto sa kun paano kita namumuhay ngonyan. Si apostol Pedro nagsurat: “Mantang an gabos na bagay na ini tutunawon nin siring, isipon kun dapat na magin anong klase kamong tawo sa banal na mga gawe asin gibo nin diosnon na debosyon, na hinahalat asin pinapagdadanay na harani sa isip an presensia kan aldaw ni Jehova!”—2 Pedro 3:11, 12.

13. Paano an pagkaapurado kan satong panahon maninigong makaapektar sa satong kaisipan asin sa satong estilo nin pamumuhay?

¹³ An satong kaisipan asin an satong estilo nin pamumuhay maninigong magpabanaag kan satong marigon na kombiksion na an “kinaban malihis sana asin siring man an mawot kaiyan.” (1 Juan 2:17) An pag-aplikar kan mga giya sa Biblia makakatabang sa sato na makagibo nin madonong na mga desisyon mapadapit sa mga pasohan niato sa ngapit. Halimbawa, si Jesus nagsabi: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:33) Kaomaw-omaw nanggad na maheling an dakol na hoben na nagpapaheling nin pagtubod sa mga tataramon ni Jesus paagi sa pagpapadagos sa bilog na panahon na ministeryo. An iba—kaiba an bilog na pamilya—boluntaryong nagbalyo sa kadagaan na may dakulang pangangaipo para sa mga parabalangibog kan Kahadean.

14. Paano pinahiwas nin sarong Kristianong pamilya an saindang ministeryo?

¹⁴ Estudyare an sarong Kristianong pamilya na may apat na miembro na nagbalyo hale sa Estados Unidos pasiring sa Republika Dominikana  tanganing maglingkod sa sarong kongregasyon sa sarong banwaan na may populasyon na 50,000. An kongregasyon kompuesto nin kisuerra 130 parahayag kan Kahadean. Pero, kan Abril 12, 2006, kisuerra 1,300 an nag-atender sa Memorial kan kagadanan ni Jesus! An langtad sa lugar na iyan ‘maputi nang marhay para sa pag-ani’ na pakaagi nin lima sanang bulan, an ama, ina, aking lalaki, asin aking babae na ini nagkokondukta na nin total na 30 pag-adal sa Biblia. (Juan 4:35) An ama nagpaliwanag: “An kongregasyon igwa nin 30 tugang na lalaki asin babae na nagbalyo digdi tanganing tumabang. Mga 20 an hale sa Estados Unidos, mantang an iba pa hale sa Bahamas, Canada, España, Italia, asin Nueva Zelandia. Sinda nag-abot na entusiastikong makikabtang sa ministeryo. Asin nagkaigwa iyan nin dakulang epekto sa entusiasmo kan lokal na mga tugang.”

15. Anong mga bendisyon an nakamtan nindo huli sa pag-enot sa saindong buhay kan intereses kan Kahadean?

¹⁵ Siempre, dakol an mayo sa kamugtakan na bumalyo sa ibang nasyon tanganing maglingkod kun saen mas dakula an pangangaipo. Alagad an mga nasa kamugtakan—o makakapag-adaptar kan saindang kamugtakan tanganing gibohon iyan—siertong makakaeksperyensia nin kadakol na bendisyon paagi sa pakikikabtang sa aspektong ini kan ministeryo. Asin saen man kamo naglilingkod, dai pagtogotan na mawara an kagayagayahan na puedeng mapasaindo kun paglilingkodan nindo si Jehova sa bilog nindong kosog. Kun eenoton nindo sa saindong buhay an intereses kan Kahadean, ipinapanuga ni Jehova na ‘uulaan kamo nin bendisyon sagkod na mayo na nin kulang.’—Malaquias 3:10.

Makinabang sa Paggiya ni Jehova

16. Paano kita makikinabang kun totogotan niato na giyahan kita kan mga tataramon nin Dios?

¹⁶ Siring kan naheling na niato, an mga tataramon ni Jehova naggigiya sa sato sa duwang magkakonektadong paagi. Nagseserbi iyan na ilawan sa satong bitis, na nagtatabang sa sato na umabante sa tamang direksion asin naggigiya sa sato kun kaipuhan niatong gumibo nin mga desisyon. Asin iyan nagtataong liwanag sa satong dalan, na nagpapangyari sa sato na maheling nin malinaw an nakatagama sa ngapit. Dangan, tinatabangan kita kaiyan na sunodon an konseho ni Pedro: “Pasariga an saindong isip para sa gibohon, lubos na papagdanayon an saindong toltol na pag-iisip; ibugtak an saindong paglaom sa dai na kutana maninigong kabootan na dadarahon sa saindo sa pagkahayag ni Jesu-Cristo.”—1 Pedro 1:13.

17. Paano an pag-adal sa Biblia makakatabang sa sato na sunodon an paggiya nin Dios?

¹⁷ Daing duwa-duwa na si Jehova nagtatao nin paggiya. An hapot iyo ini, Masunod daw kamo dian? Tanganing masabotan an paggiya na itinatao ni Jehova, magin determinado kamong magbasa nin sarong kabtang kan Biblia aroaldaw. Horophoropon an saindong binabasa, pagmaigotan na masabotan an kabotan ni Jehova sa mga bagay-bagay, asin isipon an manlaenlaen na paagi na puede nindong ikaaplikar sa saindong buhay an saindong nabasa. (1 Timoteo 4:15) Dangan gamiton an saindong “kakayahan na mangatanosan” kun minagibo kamo nin personal na mga desisyon.—Roma 12:1.

18. Kun tinotogotan niatong giyahan kita kan Tataramon nin Dios, anong mga bendisyon an aakoon niato?

¹⁸ Kun totogotan niato iyan, an mga prinsipyo na manonompongan sa Tataramon nin Dios magtataong liwanag sa sato asin magtatao sa sato kan paggiya na kaipuhan niato kun naggigibo kita nin mga desisyon manongod sa tamang dalan na dapat sunodon. Makakakompiar kita na an isinurat na mga tataramon ni Jehova “nagpapadonong sa daing eksperyensia.” (Salmo 19:7) Kun tinotogotan niato an Biblia na gumiya sa sato, magkakaigwa kita nin malinig na konsensia asin nin pagkakontento na gikan sa pagpaogma ki Jehova. (1 Timoteo 1:18, 19) Kun tinotogotan niato an mga tataramon nin Dios na gumiya sa satong mga lakad aroaldaw, babalosan kita ni Jehova nin bendisyon na buhay daing katapusan sa ngapit.—Juan 17:3.

Nagigirumdoman daw Nindo?

• Taano ta mahalagang togotan si Jehova Dios na giyahan an satong mga lakad?

• Sa anong paagi na an mga tataramon nin Dios puedeng magin ilawan sa satong bitis?

• Paanong an mga tataramon nin Dios puedeng magin liwanag sa satong dalan?

• Paanong an pag-adal sa Biblia makakatabang sa sato na sunodon an paggiya nin Dios?

[Mga Hapot Para sa Pag-adal]

[Ritrato sa pahina 15]

Noarin nagigin bakong madonong an pakikiasosyar sa daing pagtubod?

[Ritrato sa pahina 16]

An dayupot na mga kaibaiba ni Jesus iyo idtong mga naggibo kan kabotan ni Jehova

[Mga Ritrato sa pahina 17]

Ipinapaheling daw kan satong estilo nin pamumuhay na ineenot niato an intereses kan Kahadean?