Mga Hapot Hale sa mga Parabasa

Igwa daw nin mga bitis an halas na nakipag-olay ki Eva?

Siring kan nakasurat sa Genesis 3:14, kinaolay ni Jehova Dios an halas na nagdaya ki Eva sa hardin nin Eden. An Dios nagsabi: “Huli ta ginibo mo an bagay na ini, ika an sarong sinumpa sa gabos na magarong hayop asin sa gabos na layas na hayop kan kapatagan. Sa saimong daghan ika magkakamang asin kabokabo an saimong kakakanon sa gabos na aldaw kan saimong buhay.” Dai espesipikong sinasabi kan Biblia na an hayop na ginamit sa pagsugot ki Eva dating may mga bitis alagad nawara an mga iyan. Minsan ngani an mga tataramon sa Genesis 3:14 tibaad gumiya sa nagkapira na mag-isip nin arog kaiyan, dai man kita kaipuhan na magkonklusyon na may mga bitis an halas bago kan sumpang ini. Taano ta dai?

Sa pangenot huli ta an talagang pinanonongdan kan paghokom ni Jehova iyo si Satanas—an dai naheheling na espiritu na naggamit sa hamak na hayop na iyan sa salang paagi. Ilinaladawan kan Biblia si Satanas bilang “ama kan kaputikan” asin “orihinal na halas.” Minalataw na an duwang pananaram na ini pinanonongdan an paggamit ni Satanas nin sarong naheheling na hayop, sarong halas, na magtaram para sa saiya tanganing sutsutan si Eva na suwayon an pagboot nin Dios.—Juan 8:44; Kapahayagan 20:2.

Nilalang nin Dios an mga halas, asin minalataw na nginaranan ni Adan an mga halas bago kan pandadaya ni Satanas. Dai puedeng basolon an daing isip na halas na nakipag-olay ki Eva. Dai kaiyan aram na kinokontrol iyan ni Satanas, asin dai kaiyan masasabotan an paghokom nin Dios sa mga nagin masumbikal.

Kun siring, taano ta nagtaram an Dios manongod sa ibinabang kamugtakan kan halas? An ugale nin halas sa natural na palibot kaiyan, na nagkakamang sa daghan kaiyan asin paluwasluwas an dila kaiyan na garo baga madila sa kabokabo, angay na nagsisimbolisar sa ibinabang kamugtakan ni Satanas. Dating halangkaw an saiyang posisyon bilang saro sa mga anghel nin Dios, alagad sia ibinugtak sa hamak na kamugtakan na inaapod sa Biblia na Tartaro.—2 Pedro 2:4.

Dugang pa, kun paanong an bool nin sarong tawo puedeng lugadon nin sarong literal na halas, si Satanas sa saiyang ibinabang kamugtakan iyo an ‘malugad sa bool’ kan “banhi” nin Dios. (Genesis 3:15) An pangenot na kabtang kan banhing iyan iyo si Jesu-Cristo, na temporaryong nagsakit sa kamot kan mga alipores ni Satanas. Alagad sa kahurihurihi, an simbolikong payo kan halas permanenteng roronoton ni Cristo asin kan saiyang binuhay liwat na linahidan na Kristianong kairiba. (Roma 16:20) Sa siring, an pagpanongod nin Dios kan saiyang sumpa sa naheheling na halas angay na naglaladawan sa ibinabang kamugtakan asin pangultimong kalaglagan kan dai naheheling na “orihinal na halas,” si Satanas na Diablo.