Kamo daw ‘Padagos na Maglalakaw Segun sa Espiritu’?
Kamo daw ‘Padagos na Maglalakaw Segun sa Espiritu’?
“Padagos kamong maglakaw segun sa espiritu asin dai kamo makakagibo nin ano man na horot nin laman.”—GALACIA 5:16.
1. Paano mahahale an kahaditan manongod sa pagkakasala tumang sa espiritu?
IGWA nin paagi na mahale an kahaditan manongod sa pagkakasala tumang sa banal na espiritu ni Jehova. Iyan paagi sa paggibo kan sinabi ni apostol Pablo: “Padagos kamong maglakaw segun sa espiritu asin dai kamo makakagibo nin ano man na horot nin laman.” (Galacia 5:16) Kun totogotan niatong giyahan kita kan banal na espiritu nin Dios, dai kita madadaog nin salang mga kamawotan nin laman.—Roma 8:2-10.
2, 3. Kun padagos kitang naglalakaw segun sa espiritu, paano kita maaapektaran?
2 Mantang ‘padagos kitang naglalakaw segun sa espiritu,’ an puersa aktiba nin Dios mamotibar sa sato na kuyogon si Jehova. Ipapaheling niato an diosnon na mga kualidad sa satong ministeryo, sa kongregasyon, sa harong, asin sa iba pang kamugtakan. An bunga kan espiritu magigin risang-risa sa satong pakikiiba sa satong agom, sa satong mga aki, sa satong mga kapagtubod, asin sa iba pa.
3 An pamumuhay “dapit sa espiritu sa pagheling nin Dios” nagpapangyari sa sato na pumondo sa pagkakasala. (1 Pedro 4:1-6) Kun nasa irarom kita kan impluwensia nin espiritu, siertong dai kita makakagibo nin kasalan na daing kapatawadan. Alagad sa anong iba pang kapakipakinabang na paagi na maaapektaran kita kun padagos kitang naglalakaw segun sa espiritu?
Magdanay na Dayupot sa Dios Asin ki Cristo
4, 5. Paano an paglakaw segun sa espiritu nakakaapektar sa satong pagmansay ki Jesus?
4 Huling naglalakaw kita segun sa banal na espiritu, napapagdanay niato an dayupot na relasyon sa Dios asin sa saiyang Aki. Sa pagsurat manongod sa espirituwal na mga regalo, sinabihan ni Pablo an mga kapagtubod sa Corinto: “Gusto kong ipaaram sa saindo [dating mga parasamba sa idolo] na mayo nin siisay man na nagtataram paagi sa espiritu nin Dios an nagsasabi: ‘Si Jesus isinumpa!’ asin mayo nin siisay man an makakapagsabi: ‘Si Jesus Kagurangnan!’ apuera paagi sa banal na espiritu.” (1 Corinto 12:1-3) Ano man na espiritu na nagpapahiro sa mga tawo na magsumpa ki Jesus seguradong hale ki Satanas na Diablo. Pero, bilang mga Kristiano na naglalakaw segun sa banal na espiritu, kombensido kita na ibinangon ni Jehova si Jesus hale sa mga gadan asin ginibo siang mas halangkaw kisa gabos na iba pang linalang. (Filipos 2:5-11) Igwa kita nin pagtubod sa atang na pantubos ni Cristo asin inako niato si Jesus bilang an Kagurangnan na ninombrahan nin Dios tanganing mangataman sa sato.
5 An nagkapirang naghihingakong Kristiano kan enot na siglo C.E. nagnegar na si Jesus napadigdi sa laman. (2 Juan 7-11) An pag-ako kan salang punto de vistang iyan an nagin dahelan tanganing isikwal kan nagkapira an totoong mga katokdoan manongod ki Jesus, an Mesiyas. (Marcos 1:9-11; Juan 1:1, 14) An paglakaw segun sa banal na espiritu minaolang sa sato na madara kan siring na apostasiya. Alagad paagi sana sa pagdadanay na mapagbantay sa espirituwal na makakapagpadagos kita sa pag-ako kan dai na kutana maninigong kabootan ni Jehova asin ‘padagos kita na maglalakaw sa katotoohan.’ (3 Juan 3, 4) Kun siring, magin determinado kita na sayumahan an gabos na apostasiya tanganing mapagdanay niato an makosog na relasyon sa satong langitnon na Ama.
6. Anong mga kualidad an ibinubunga kan espiritu nin Dios sa mga naglalakaw segun sa espiritu?
6 Ilinista ni Pablo na kabilang sa “mga gibo kan laman” na siring kan pakikisaro saka malaswang gawe an pag-apostata paagi sa pagbalik giraray sa idolatriya asin an mga sekta. Alagad nagpaliwanag sia: “Idtong mga sadiri ni Cristo Jesus nagpako kan laman kaibahan na an mga horot asin mawot kaiyan. Kun kita nabubuhay segun sa espiritu, padagos man kitang maglakaw na tanos segun sa espiritu.” (Galacia 5:19-21, 24, 25) Anong mga kualidad an ibinubunga kan puersa aktiba nin Dios sa mga nabubuhay asin naglalakaw segun sa espiritu? “An mga bunga kan espiritu,” an surat ni Pablo, “iyo an pagkamoot, kagayagayahan, katoninongan, pakatios, kabootan, karahayan, pagtubod, kahoyoan, pagpupugol sa sadiri.” (Galacia 5:22, 23) Pag-olayan niato an mga aspektong ini kan mga bunga kan espiritu.
“Magkaminorootmootan”
7. Ano an pagkamoot, asin ano an nagkapira sa mga karakteristiko kaiyan?
7 An pagkamoot—na sarong aspekto kan mga bunga kan espiritu—sa parate kalabot an hararom na kapadangatan asin bakong maimot na pagmakolog sa iba, na may mainit na pagkadayupot sa sainda. Sinasabi kan Kasuratan na “an Dios pagkamoot” huling sia an mismong personipikasyon kan kualidad na iyan. An dakulaon na pagkamoot nin Dios asin kan saiyang Aki para sa katawohan naheheling paagi sa atang na pantubos ni Jesu-Cristo. (1 Juan 4:8; Juan 3:16; 15:13; Roma 5:8) Bilang mga parasunod ni Jesus, namimidbid kita paagi sa satong pagkaminorootmootan. (Juan 13:34, 35) Sa katunayan, kita pinagbotan na “magkaminorootmootan.” (1 Juan 3:23) Asin sinabi ni Pablo na an pagkamoot matinios asin maboot. Bako iyan na maimon, asin dai iyan nananagsag, dai minagawe nin bakong disente, o dai naghahanap kan saiyang sadiring kapakanan. An pagkamoot dai napapaanggot o dai nagkukuenta kan danyos. Naggagayagaya iyan sa katotoohan, bakong sa pagkabakong matanos. An pagkamoot nakakatios, nagtutubod, naglalaom, asin nagtatagal kan gabos na bagay. Dugang pa, nungka iyan na nasusudya.—1 Corinto 13:4-8.
8. Taano ta maninigo kitang magpaheling nin pagkamoot sa mga kapwa parasamba ki Jehova?
8 Kun totogotan niato an espiritu nin Dios na ikapaheling niato an pagkamoot, maheheling an kualidad na iyan sa satong relasyon sa Dios asin sa kapwa. (Mateo 22:37-39) “An dai namomoot nagdadanay sa kagadanan,” an isinurat ni apostol Juan. “An lambang naoongis sa saiyang tugang paragadan, asin kamo nakakaaram na mayo nin paragadan na igwa pa dian sa saiya nin buhay na daing katapusan.” (1 Juan 3:14, 15) Makakapaili sana an sarong paragadan sa sarong siudad na pailihan sa Israel kun mayo sia nin pagkaongis sa nagadan. (Deuteronomio 19:4, 11-13) Kun ginigiyahan kita kan banal na espiritu, ipapaheling niato an pagkamoot sa Dios, sa mga kapwa parasamba, asin sa iba pa.
“An Kagayagayahan ni Jehova Iyo an Saindong Kuta”
9, 10. Ano an kagayagayahan, asin ano an nagkapirang dahelan na magin magayagaya?
9 An kagayagayahan iyo an pagkaigwa nin dakulang kaogmahan. Si Jehova iyo an “maogmang Dios.” (1 Timoteo 1:11; Salmo 104:31) Ikinakaogmang marhay kan Aki an paggibo kan kabotan kan saiyang Ama. (Salmo 40:8; Hebreo 10:7-9) Asin “an kagayagayahan ni Jehova iyo an [satong] kuta.”—Nehemias 8:10.
10 An tao nin Dios na kagayagayahan nagtatao sa sato nin hararom na satispaksion kun ginigibo niato an kabotan nin Dios dawa sa mga panahon nin kasakitan, pagmondo, o persekusyon. Kanigoan na kaogmahan an itinatao sa sato kan “mismong kaaraman nin Dios”! (Talinhaga 2:1-5) An magayagayang relasyon niato sa Dios nakabasar sa tamang kaaraman asin pagtubod sa saiya saka sa atang na pantubos ni Jesus. (1 Juan 2:1, 2) An pagigin kabtang kan iyo sanang tunay na internasyonal na kasararoan nin magturugang saro pang gikanan nin kagayagayahan. (Sofonias 3:9; Haggeo 2:7) An satong paglaom sa Kahadean asin an dakulang pribilehio na magpahayag kan maogmang bareta nagpapagayagaya sa sato. (Mateo 6:9, 10; 24:14) Nagpapagayagaya man sa sato an paglaom na buhay na daing katapusan. (Juan 17:3) Mantang igwa kita kan siring na marahayon na paglaom, dapat na ‘maggayagaya sana’ kita.—Deuteronomio 16:15.
Magin Mapagpatoninong Asin Matinios
11, 12. (a) Ano an kahulogan nin katoninongan? (b) Ano an epekto sa sato kan diosnon na katoninongan?
11 An katoninongan—na saro pang aspekto kan mga bunga kan espiritu—sarong kamugtakan nin pagigin trangkilo asin pagigin libre sa kahaditan. An satong langitnon na Ama iyo an Dios nin katoninongan, asin itinatao sa sato an garantiya: “Si Jehova mismo mabendisyon nin katoninongan sa saiyang banwaan.” (Salmo 29:11; 1 Corinto 14:33) Si Jesus nagsabi sa saiyang mga disipulo: “Winawalatan ko kamo nin katoninongan, itinatao ko sa saindo an sakong katoninongan.” (Juan 14:27) Paano iyan makakatabang sa saiyang mga parasunod?
12 An katoninongan na itinao ni Jesus sa saiyang mga disipulo nagpakalma kan saindang puso asin isip saka naghale kan saindang takot. Nangorognang nagkaigwa sinda nin katoninongan kan akoon ninda an ipinanugang banal na espiritu. (Juan 14:26) Sa impluwensia kan banal na espiritu asin bilang simbag sa satong mga pamibi ngonyan, naeeksperyensiahan niato an daing kaparehong “katoninongan nin Dios,” na nagpapakalma sa satong puso asin isip. (Filipos 4:6, 7) Apuera kaiyan, an espiritu ni Jehova nagtatabang sa sato na magin kalmado asin mapagpatoninong sa mga kapagtubod asin sa iba pa.—Roma 12:18; 1 Tesalonica 5:13.
13, 14. Ano an pakatios, asin taano ta maninigo kitang magpaheling kaiyan?
13 An pakatios konektado sa pagigin mapagpatoninong, huli ta an satong mapasensiang pakatagal sa pagprobokar o sala nagtataong paglaom na marahay pa an situwasyon. An Dios matinios. (Roma 9:22-24) Ipinaheling man ni Jesus an kualidad na ini. Puede kitang makinabang sa pagpaheling ni Jesus nin pakatios huli ta si Pablo nagsurat: “An dahelan na ako naherakan iyo na tanganing paagi sa sako bilang an nangongorog na halimbawa ikapahayag ni Cristo Jesus an gabos niang pakatios bilang arogan kaidtong matubod sa saiya manongod sa buhay na daing katapusan.”—1 Timoteo 1:16.
14 An kualidad na pakatios nakakatabang sa sato na magtagal kun sinasabihan o ginigibohan kita nin nakakakolog o daing konsiderasyon na mga bagay. Sinadol ni Pablo an mga kapwa nia Kristiano: “Magin matinios sa gabos.” (1 Tesalonica 5:14) Mantang gabos kita bakong sangkap asin nakakagibo nin sala, seguradong gusto niatong magin mapasensia sa sato an mga tawo, na magin matinios sinda kun nakakagibo kita nin sala sa pakikiiba niato sa sainda. Kun siring, maghingoa logod kita na “magin matinios na may kagayagayahan.”—Colosas 1:9-12.
Magpaheling nin Kabootan Asin Karahayan
15. Itao an kahulogan nin kabootan, asin magsambit nin mga halimbawa kaiyan.
15 Ikinakapaheling an kabootan kun nagpapaheling kita nin interes sa iba paagi sa makiamigo asin matinabang na mga tataramon asin gibo. Si Jehova maboot, asin iyo man an saiyang Aki. (Roma 2:4; 2 Corinto 10:1) An kabootan kahagadan sa mga lingkod nin Dios asin ni Cristo. (Miqueas 6:8; Colosas 3:12) Dawa an nagkapira na mayo nin personal na relasyon sa Dios nakapagpaheling nin “pambihirang kabootan nin tawo.” (Gibo 27:3; 28:2) Kun siring, daing duwa-duwa na makakapagpaheling kita nin kabootan kun ‘padagos kitang malakaw segun sa espiritu.’
16. Ano an nagkapirang kamugtakan na maninigong magpahiro sa sato na magpaheling nin kabootan?
16 An kabootan puedeng ipaheling dawa kun rasonableng maanggot kita huli sa nakakakolog na mga tataramon o daing konsiderasyon na gawe-gawe nin saro. “Maanggot kamo nin grabe, alagad ta dai kamo magkasala,” an sabi ni Pablo. ‘Dai nindo pagpasolnopon an saldang na kamo may kaanggotan, ni tawan man nin lugar an Diablo. Magin maboot sa lambang saro, mapagmalasakit sa mamomoton na paagi, na andam na nagpapatarawadtawadan siring na an Dios man andam na nagpatawad sa saindo paagi ki Cristo.’ (Efeso 4:26, 27, 32) Nangorognang angay na magpaheling nin kabootan sa mga nakakaeksperyensia nin kasakitan. Siempre, an Kristianong magurang sa kongregasyon dai nagpapaheling nin kabootan kun dai sia nagtatao nin sono sa Kasuratan na sadol tangani sanang dai makolgan an boot nin saro na malinaw na namemeligrong bayaan an dalan nin “karahayan asin katanosan patin katotoohan.”—Efeso 5:9.
17, 18. Ano an kahulogan nin karahayan, asin ano an maninigong magin papel kan kualidad na ini sa satong buhay?
17 An karahayan iyo an pagigin ekselente sa moral. An Dios marahay sa absolutong kahulogan kaiyan. (Salmo 25:8; Zacarias 9:17) Si Jesus may karahayan asin ekselente sa moral. Pero, dai nia inako an titulong “Marahay” kan sia apodon kaidto na “Marahay na Paratokdo.” (Marcos 10:17, 18) Minalataw na ini huli ta minimidbid nia an Dios bilang an nakakalabi sa gabos na halimbawa nin karahayan.
18 Naoolang an satong kakayahan na gumibo nin marahay huli sa minana niatong kasalan. (Roma 5:12) Minsan siring, ikakapaheling niato an kualidad na ini kun ipinapamibi niato na logod ‘tokdoan kita nin Dios nin karahayan.’ (Salmo 119:66) Sinabihan ni Pablo an mga kapagtubod sa Roma: “Ako man mismo nakokombensir manongod sa saindo, mga tugang ko, na kamo mismo pano man nin karahayan, kun paanong kamo pinano nin bilog na kaaraman.” (Roma 15:14) An sarong Kristianong paraataman dapat na “mamomoton sa karahayan.” (Tito 1:7, 8) Kun kita ginigiyahan kan espiritu nin Dios, mamimidbid kita huli sa karahayan, asin ‘gigirumdomon kita ni Jehova huli sa karahayan na ginigibo niato.’—Nehemias 5:19; 13:31.
“Pagtubod na Mayo nin Pagsaginsagin”
19. Itao an kahulogan nin pagtubod, kaoyon kan Hebreo 11:1.
19 An pagtubod—na kabtang man kan mga bunga kan espiritu—“iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling.” (Hebreo 11:1) Kun igwa kita nin pagtubod, segurado kita na maootob an gabos na ipinapanuga ni Jehova. Makosog na marhay an nakakakombensir na ebidensia kan dai naheheling na mga katunayan kaya an pagtubod sinasabing katumbas kan ebidensiang iyan. Halimbawa, an pag-eksister kan mga bagay na linalang nakakakombensir sa sato na igwa nin Kaglalang. Iyan an klase nin pagtubod na ipapaheling niato kun padagos kitang naglalakaw segun sa espiritu.
20. Ano an “kasalan na madaling nakakagapos sa sato,” asin paano niato malilikayan iyan asin an mga gibo kan laman?
20 An kawaran nin pagtubod iyo “an kasalan na madaling nakakagapos sa sato.” (Hebreo 12:1) Kaipuhan kitang magsarig sa espiritu nin Dios tanganing malikayan an mga gibo nin laman, materyalismo, asin falsong mga katokdoan na puedeng makaraot sa pagtubod. (Colosas 2:8; 1 Timoteo 6:9, 10; 2 Timoteo 4:3-5) An espiritu nin Dios nagpapangyari na ikapaheling kan mga lingkod ni Jehova sa presenteng panahon an pagtubod na kapareho kan pagtubod kan mga saksi bago kan mga Kristiano asin kan iba pa na nasambitan sa Biblia. (Hebreo 11:2-40) Asin an sato mismong “pagtubod na mayo nin pagsaginsagin” posibleng marhay na magpakosog sa pagtubod kan iba.—1 Timoteo 1:5; Hebreo 13:7.
Magpaheling nin Kahoyoan Asin Pagpupugol sa Sadiri
21, 22. Ano an kahulogan nin kahoyoan, asin taano ta maninigo niatong ipaheling iyan?
21 An kahoyoan iyo an pagigin kalmado sa ugale asin gawe-gawe. An saro sa mga kualidad nin Dios iyo an kahoyoan nin boot. Aram niato ini huling si Jesus, na sarong tawong mahoyo, sangkap na ipinabanaag an personalidad ni Jehova. (Mateo 11:28-30; Juan 1:18; 5:19) Kun siring, ano an hinahagad sa sato bilang mga lingkod nin Dios?
22 Bilang mga Kristiano, linalaoman kita na ‘magpaheling nin kahoyoan sa gabos na tawo.’ (Tito 3:2) Nagpapaheling kita nin kahoyoan sa satong ministeryo. An mga may espirituwal na mga kualipikasyon sinasadol na pakarhayon giraray an napapasalang Kristiano paagi “sa espiritu nin kahoyoan.” (Galacia 6:1) Gabos kita makakakontribwir sa Kristianong pagkasararo asin katoninongan paagi sa pagpaheling nin “kababaan nin isip asin kahoyoan.” (Efeso 4:1-3) Makakapaheling kita nin kahoyoan kun pirme kitang naglalakaw segun sa espiritu asin igwa nin pagpupugol sa sadiri.
23, 24. Ano an pagpupugol sa sadiri, asin paano iyan nakakatabang sa sato?
23 An pagpupugol sa sadiri nagpapangyari sa sato na makontrol an satong kaisipan, pagtaram, asin gawe-gawe. Si Jehova ‘padagos na nagpugol’ sa pagtratar sa Babilonyong mga paralaglag kan Jerusalem. (Isaias 42:14) An saiyang Aki ‘nagwalat sa sato nin modelo’ paagi sa pagpupugol sa sadiri kan sia nagsasakit. Asin sinadol ni apostol Pedro an mga kapwa Kristiano na ‘idagdag sa saindang kaaraman an pagpupugol sa sadiri.’—1 Pedro 2:21-23; 2 Pedro 1:5-8.
24 An Kristianong kamagurangan linalaoman na tataong magpugol sa sadiri. (Tito 1:7, 8) An totoo, an gabos na ginigiyahan kan banal na espiritu puedeng magpugol sa sadiri asin sa siring makakalikay sa imoralidad, malaswang pagtaram, o ano pa man na puedeng magresulta sa dai pag-oyon ni Jehova. Kun totogotan niato an espiritu nin Dios na ikapaheling niato an pagpupugol sa sadiri, maheheling ini nin iba huli sa satong diosnon na pagtaram asin paggawe.
Padagos na Maglakaw Segun sa Espiritu
25, 26. Paano an paglakaw segun sa espiritu nakakaapektar sa presenteng pakikiiba niato asin sa satong mga oportunidad sa ngapit?
25 Kun kita naglalakaw segun sa espiritu, magigin maigot kitang mga parabalangibog kan Kahadean. (Gibo 18:24-26) Kita magigin nakakaogmang mga kaibaiba, asin nangorognang maoogmang marhay na makiiba sa sato an mga tawo na may diosnon na debosyon. Kapareho kan mga tawo kaidto na giniyahan kan banal na espiritu, kita man magigin mga gikanan nin espirituwal na pagparigon sa boot kan mga kapwa parasamba ki Jehova. (Filipos 2:1-4) Bako daw na iyan man an gusto kan gabos na Kristiano?
26 Sa kinaban na ini na kontrolado ni Satanas, bakong pasil na maglakaw segun sa espiritu. (1 Juan 5:19) Minsan siring, minilyon an naggigibo kaiyan ngonyan. Kun nagtitiwala kita ki Jehova sa bilog niatong puso, ikakaogma niato an buhay ngonyan asin padagos kitang makakalakaw sagkod lamang sa matanos na mga dalan kan mamomoton na Paratao kan banal na espiritu.—Salmo 128:1; Talinhaga 3:5, 6.
Ano an Simbag Nindo?
• Paano an “paglakaw segun sa espiritu” nakakaapektar sa satong relasyon sa Dios asin sa saiyang Aki?
• An mga bunga kan banal na espiritu kompuesto nin anong mga kualidad?
• Ano an nagkapirang paagi na ikakapaheling an mga bunga kan espiritu nin Dios?
• Paano an paglakaw segun sa espiritu nakakaapektar sa satong buhay sa presente asin sa satong mga oportunidad sa ngapit?
[Mga Hapot Para sa Pag-adal]
[Ritrato sa pahina 23]
An banal na espiritu ni Jehova nagpapaoswag nin pagkamoot sa mga kapagtubod niato
[Ritrato sa pahina 24]
Magpaheling nin kabootan paagi sa nakakatabang na mga tataramon asin gibo