Mga Pagpili na Nagbubunga nin Kaogmahan

“BAKO kutana iyan an ginibo ko!” Pirang beses na daw nindong nasabi iyan sa saindong sadiri? Gusto niato gabos na gumibo nin mga pagpili na dai niato pagbabasolan, nangorogna kun an mga pagpiling iyan nakakaapektar sa satong pamumuhay. Pero, paano kita makakagibo nin mga pagpili na nagbubunga nin kaogmahan?

Enot sa gabos, kaipuhan na igwa kita nin mga pamantayan na talagang masasarigan. Igwa daw nin siring na mga pamantayan? Bako iyan an iniisip nin dakol na tawo. Oyon sa sarong surbey sa Estados Unidos, 75 porsiento kan mga senior sa kolehio an naniniwala na mayo nin pamantayan sa kun ano an tama asin sala. Naniniwala man sinda na an mga konsepto manongod sa marahay asin maraot nagkakalaenlaen segun sa “mga pamantayan kan indibiduwal saka pagkalaenlaen sa kultura.”

Talaga daw na rasonableng isipon na personal o popular na opinyon sana an kalabot sa mga pamantayan sa moral? Bako nanggad. Kun an mga tawo libreng gibohon an ano man na gustohon ninda, maresulta iyan sa grabeng kariribokan. Siisay an magugustong mag-istar sa sarong lugar na mayo nin mga ley, mayo nin mga korte, asin mayo nin mga pulis? Apuera kaiyan, an personal na opinyon bako pirmeng masasarigan na giya. Tibaad pilion niato na gibohon an sarong bagay na sa paghona niato tama, tangani sanang maaraman sa huri na napasala kita. Tunay nanggad, an bilog na kasaysayan nin tawo nagpapatunay sa pagigin totoo kan prinsipyong ini sa Biblia: “Bakong kapot nin tawong naglalakaw dawa an paggiya sa saiyang lakad.” (Jeremias 10:23) Kun siring, saen kita makakadolok para sa paggiya kun nagdedesisyon sa importanteng mga isyu sa buhay?

An mayaman na namamahala na nasambitan sa naenot na artikulo madonong na nagdolok ki Jesus. Siring kan naheling niato, sa pagsimbag sa hapot kan hoben na lalaking iyan, sinambit ni Jesus an Ley nin Dios. Minidbid ni Jesus na si Jehova Dios an pinakahalangkaw  na Ginigikanan nin kaaraman asin kadonongan patin aram Nia kun ano an pinakamarahay para sa Saiyang mga linalang. Bilang resulta, si Jesus nagsabi: “An sakong itinotokdo bako ko, kundi kan nagsugo sa sako.” (Juan 7:16) Totoo nanggad, an Tataramon nin Dios sarong masasarigan na gikanan nin paggiya na makakatabang sa sato na gumibo nin madonong na mga pagpili sa buhay. Tokaron niato an pirang prinsipyo na yaon sa Tataramon nin Dios na kun iaaplikar makakadagdag sa satong kaogmahan.

An Bulawan na Reglamento sa Paggawe

Sa saiyang bantog na Sermon sa Bukid, itinokdo ni Jesus an sarong pundamental na prinsipyo na makakatabang sa sato na gumibo nin madonong na mga desisyon sa satong relasyon sa iba. Ini an sinabi nia: “Kun siring, an gabos na boot nindong gibohon sa saindo nin mga tawo, dapat man na gibohon nindo sa sainda.” (Mateo 7:12) An prinsipyong ini sa paggawe parateng inaapod na Bulawan na Reglamento sa Paggawe (sa Ingles, “Golden Rule”).

Naggamit an nagkapira nin kaparehong pananaram sa negatibong paagi: “Dai nindo paggibohon sa iba an habo nindong gibohon sa saindo.” Tanganing ipaheling an kalaenan kan Bulawan na Reglamento sa Paggawe asin kan negatibong paagi nin pagkasabi kaiyan, isip-isipa an parabola ni Jesus manongod sa Samaritano na tataong makipagkapwa-tawo. An sarong Judio binugbog asin binayaan sa tinampo na haros gadan na. Naheling sia nin sarong saserdote asin sarong Levita alagad linampasan sana sia. Huling mayo sindang ginibo na makakadagdag sa kasakitan kan tawong iyan, puedeng sabihon na huminiro sinda kaoyon kan negatibong bersion kan Bulawan na Reglamento sa Paggawe. Sa kabaliktaran, an sarong nag-aaging Samaritano nagpondo tanganing tumabang. Binolong nia an mga lugad kan tawong iyan asin dinara ini sa sarong harong na dadagosan. Ginibo nia para sa tawong iyan an gusto niang gibohon man sa saiya. Inaplikar nia an Bulawan na Reglamento sa Paggawe—asin ginibo nia an tamang pagpili.—Lucas 10:30-37.

Dakol an paagi na ikakaaplikar niato an susundon na ini sa paggawe na magkakaigwa nin maogmang mga resulta. Ipamugtak na may bagong pamilya na nagbalyo sa saindong pagtaraed. Taano ta dai magsadiring boot na makamidbid asin maogmang akoon an mga miembro kaiyan? Puede nindo sindang tabangan na magin pamilyar sa saindong lugar saka tawan nin atension an saindang mga hapot asin pangangaipo. Paagi sa pagsadiring boot sa pagpaheling nin may pakikipagkapwa-tawong konsiderasyon, mapapatalubo nindo an marahay na relasyon sa saindong bagong mga kataed. Maeeksperyensiahan man nindo an pagkakontento sa pakaaram na ginibo nindo kun ano an nakakapaogma sa Dios. Bako daw na madonong na desisyon iyan?

Mga Pagpili na Basado sa Pagkamoot sa Iba

Apuera sa Bulawan na Reglamento sa Paggawe, nagtao si Jesus nin iba pang instruksion na makakatabang sa saindo na gumibo nin madonong na mga pagpili. Kan hapoton kun ano an nakakalabi sa gabos na togon sa Ley ni Moises, si Jesus nagsimbag: “‘Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip.’ Iyo ini an nakakalabi sa gabos asin enot na togon. An ikaduwa, na arog kaiyan, iyo ini, ‘Kamotan mo an saimong kapwa nin siring sa saimo man sana.’ Sa duwang togon na ini nakasarig an bilog na Ley, asin an Mga Propeta.”—Mateo 22:36-40.

Kan banggi bago sia magadan, itinao ni Jesus sa saiyang mga disipulo an “bagong togon,” na magkaminorootmootan. (Juan 13:34) Taano ta sinabi nia na bago an togon na iyan? Sa katunayan, bako daw na ipinaliwanag na nia na an pagkamoot sa kapwa saro sa duwang togon na dian nakasarig an bilog na Ley? Sa Ley ni Moises, pinagbotan an mga Israelita: “Kamotan mo an saimong kapwa nin siring sa saimo man sana.” (Levitico 19:18) Minsan siring, pinagbotan ngonyan ni Jesus an saiyang mga disipulo na gibohon an labi pa dian. Kan banggi man sanang iyan, sinabihan ni Jesus an saiyang mga disipulo na madali na niang itao an saiyang buhay para sa sainda. Dangan sinabihan nia sinda: “Ini an sakong togon, na kamo magkaminorootmootan siring kan pagkamoot ko sa saindo. Mayo nin siisay man na may pagkamoot na orog pa kaini, na itao nin saro an saiyang kalag para sa saiyang mga katood.” (Juan 15:12, 13) Iyo, bago an togon na ini huli ta hinahagad kaiyan an pag-enot sa intereses nin ibang tawo kisa kan sa sadiring intereses.

Dakol an paagi na ikakapaheling niato an daing kaimotan na pagkamoot, na ginigibo an labi pa sa pag-isip sana sa sadiri niatong intereses. Halimbawa,  ipamugtak na nakaistar kamo sa sarong apartment asin gusto nindong magdangog sa musika sa kosog na nakakapaogmang marhay sa saindo alagad nakakaaburido sa saindong kataed. Andam daw kamong mainaan an saindong kaogmahan tanganing magkaigwa nin katoninongan an saindong kataed? Sa ibang pagtaram, eenoton daw nindo an ikakarahay kan saindong kataed kisa kan sa sadiri nindo?

Isip-isipa an saro pang situwasyon. Sa sarong aldaw nin tiglipot na mahibog an niebe sa Canada, dinalaw nin duwang Saksi ni Jehova an sarong may edad nang lalaki. Sa saindang pag-oolay, nasambitan kan lalaki na huli sa helang sa puso dai nia mahale an niebe sa atubangan kan saiyang harong. Pakalihis nin mga sarong oras, nakadangog sia nin makosog na tanog nin pagpala. Nagbalik an duwang Saksi tanganing halean nin niebe an dalan asin mga tangga pasiring sa saiyang pinto sa delantera. “Naeksperyensiahan ko ngonyan an tunay na Kristianong pagkamoot na ginigibo,” an isinurat nia sa sangang opisina kan Mga Saksi ni Jehova sa Canada. “Iyan talagang nakapaoswag asin nakapabago sa parate nang negatibo kong punto de vista sa kinaban ngonyan. Pinakosog pa kaiyan an sakong dati nang dakulang paggalang sa saindong pambilog na kinaban na mga paghihingoa.” Iyo, an pagpili na tumabang, gurano man garo baga kasadit iyan, makakaapektar sa iba sa positibong paagi. May dakulang kaogmahan nanggad sa paggibo nin siring na mapagsakripisyong mga pagpili!

Mga Pagpili na Basado sa Pagkamoot sa Dios

An saro pang bagay na dapat niatong konsideraron kun naggigibo kita nin mga pagpili iyo an sinabi ni Jesus na nakakalabi sa gabos na togon—na kamotan niato an Dios. An mga tataramon ni Jesus para sa mga Judio, na bilang sarong nasyon igwa na nin dusay na relasyon ki Jehova. Pero, an indibiduwal na mga Israelita kaipuhan na pumili kun baga maglilingkod sinda sa saindang Dios na may pagkamoot na bilog na kalag asin bilog na puso.—Deuteronomio 30:15, 16.

Siring man, an mga pagpili na ginigibo nindo nagpapabanaag kan saboot nindo manongod sa Dios. Halimbawa, mantang nagtatalubo an pag-apresyar nindo sa praktikal na kahalagahan kan Biblia, napapaatubang man kamo sa pagpili. Andam daw kamong ponan an sistematikong pag-adal sa Biblia, na an katuyohan iyo na magin parasunod ni Jesus? An pagpili na gibohon iyan siertong matao sa saindo nin kaogmahan, huli ta si Jesus nagsabi: “Maogma an mga nakakamate kan saindang espirituwal na pangangaipo.”—Mateo 5:3.

Dai niato aram kun baga pinagbasolan kan hoben na namamahala an saiyang desisyon. Minsan siring, aram niato kun ano an nagin saboot ni apostol Pedro pagkatapos na sumunod sia ki Jesu-Cristo sa laog nin dakol na taon. Kan mga 64 C.E., kan madali na siang magadan, pinarigon ni Pedro an boot kan saiyang mga kapagtubod: “Giboha an bilog nindong makakaya na sa katapustapusi manompongan [kamo nin Dios na] daing digta asin dai nin kanawayan patin nasa katoninongan.” (2 Pedro 1:14; 3:14) Malinaw nanggad, dai pinagbasolan ni Pedro an pagpili na ginibo nia labi nang 30 taon bago kaidto, asin pinarigon nia an boot kan iba na magdanay sa pinili ninda.

An pagsunod sa sadol ni Pedro nangangahulogan nin pagpili na akoon an mga paninimbagan nin pagigin saro sa mga disipulo ni Jesus asin otobon an mga togon nin Dios. (Lucas 9:23; 1 Juan 5:3) Tibaad garo baga depisil ini, pero igwa kita kan nakakapakosog liwat sa boot na panuga ni Jesus: “Madia kamo sa  sako, kamo gabos na nagpapagal asin nagagabatan, asin papaginhawahon ko kamo. Pasana nindo an sakong sakal asin makanood kamo sa sako, huli ta ako mahoyo asin may kababaan an puso, asin makakakua kamo nin kaginhawahan para sa saindong kalag. Huli ta an sakong sakal maboot asin an sakong pasan magian.”—Mateo 11:28-30.

Isip-isipa an eksperyensia ni Arthur. Kan sia dies anyos, si Arthur nagpoon na mag-adal na magtugtog nin biolin, tanganing magin propesyonal na biolinista. Kan sia 14 anyos na, sia nagin mapanggana bilang biolinista sa konsierto. Pero, bako siang maogma. An saiyang ama pirmeng may mga hapot manongod sa kahulogan nin buhay asin nag-imbitar sa saiyang harong nin mga nagtotokdo nin relihion; pero, dai sia noarin man nakontento sa saindang mga simbag. Bilang pamilya, pinag-olayan ninda kun baga igwa talaga nin Dios asin kun taano ta tinotogotan nia an karatan. Dangan an ama ni Arthur nagpoon na makipag-olay sa mga Saksi ni Jehova. An pag-oolay na iyan nakaakit sa ama ni Arthur, na nagbunga nin pag-adal sa Biblia kan bilog na pamilya.

Pag-abot nin panahon, nasabotan ni Arthur hale sa Kasuratan kun taano ta tinotogotan nin Dios an pagsakit, asin malinaw na naheling nia an katuyohan nin buhay. Kaiba kan tolo pang miembro kan saiyang pamilya, si Arthur may ginibong pagpili na dai nia pinagbabasolan. Idinusay nia an saiyang buhay ki Jehova. “Ogmahon ako na binendisyonan ako ni Jehova nin kaaraman manongod sa katotoohan asin na ilinigtas nia ako sa pakikipagkompetensia na ordinaryo na sana sa propesyonal na mga musikero. Gigibohon nin mga tawo an minsan ano na sana tanganing magin mapanggana.”

Ikinakaogma pa man giraray ni Arthur an pagtugtog nin biolin tanganing malibang an saiyang mga katood, alagad an saiyang buhay dai nakasentro dian. Imbes, an saiyang buhay nakasentro sa paglilingkod nia sa Dios. Naglilingkod na sia sa saro sa mga sangang opisina kan Mga Saksi ni Jehova. Arog ni Arthur asin nin minilyon na iba pa, alagad bakong arog kan mayaman na hoben na namamahala, puede man kamong gumibo nin pagpili na matao sa saindo kan pinakadakulang kaogmahan—an pag-ako sa pangagda ni Jesus na magin parasunod nia.

[Ritrato sa pahina 6]

An desisyon nindo puedeng magkaigwa nin epekto sa buhay nin ibang mga tawo

[Ritrato sa pahina 7]

Mag-aadal daw kamo kan Biblia asin magigin parasunod ni Jesus?