Ibinilang na Angay sa Kahadean
Ibinilang na Angay sa Kahadean
“Ini sarong patotoo kan matanos na paghokom nin Dios, na nagreresulta sa pagkabilang sa saindo na angay sa kahadean nin Dios.”—2 TES. 1:5.
1, 2. Ano an katuyohan nin Dios kun mapadapit sa paghokom, asin siisay an magibo kan paghokom?
KAN mga taon 50 C.E., si apostol Pablo nasa Atenas. Huling napupurisaw sa lakop na idolatriya na naheling nia duman, napahiro sia na magtao nin marahayon na patotoo. Tinapos nia an saiyang mga tataramon paagi sa sarong pahayag na seguradong nakaapod sa atension kan mga pagano na naghihinanyog sa saiya. Sia nagsabi: “Ngonyan sinasabihan [nin Dios] an katawohan na sinda gabos saen man na lugar maninigong magsorolsol. Huli ta sia nagtalaan nin aldaw na katuyohan niang hokoman an ineerokan na daga sa katanosan paagi sa sarong lalaki na saiyang ninombrahan, asin sia nagtao nin garantiya sa gabos na tawo ta binuhay nia sia liwat hale sa mga gadan.”—Gibo 17:30, 31.
2 Kanigoan kaseryosong bagay na horophoropon an katunayan na an Dios nagtalaan sa ngapit nin aldaw nin paghokom sa katawohan! Gigibohon an paghokom na iyan kan saro na dai nginaranan ni Pablo sa saiyang pahayag sa Atenas alagad aram niato na sia iyo an binuhay liwat na si Jesu-Cristo. An paghokom ni Jesus mangangahulogan nin buhay o kagadanan.
3. Taano ta nakipagtipan si Jehova ki Abraham, asin siisay an may espesyal na kabtang sa kaotoban kaiyan?
3 An Aldaw nin Paghokom na iyan magigin 1,000 taon an lawig. Pangengenotan iyan ni Jesus sa ngaran ni Jehova bilang Hade kan Kahadean nin Dios, alagad dai sia magsosolo. Nagpili si Jehova nin iba pa hale sa katawohan tanganing maghade kaiba ni Jesus asin maghokom durante kan aldaw na iyan na sangribong taon an lawig. (Ikomparar an Lucas 22:29, 30.) Haros 4,000 na taon na an nakaagi, ibinugtak ni Jehova an pundasyon para sa Aldaw nin Paghokom na iyan kan sia makipagtipan sa saiyang maimbod na lingkod na si Abraham. (Basahon an Genesis 22:17, 18.) Malinaw na an tipan na iyan nagkaepekto kan 1943 B.C.E. Siempre, dai lubos na nasabotan ni Abraham kun ano an magigin kahulogan kan tipan na iyan sa katawohan. Pero, puede niatong masabotan ngonyan na sa irarom kan mga kondisyon kaiyan, an banhi ni Abraham igwa nin espesyal na kabtang sa kaotoban kan katuyohan nin Dios na maghokom sa katawohan.
4, 5. (a) Siisay an pangenot na kabtang kan banhi ni Abraham, asin ano an sinabi nia manongod sa Kahadean? (b) Kasuarin binukasan an paglaom na magin kabtang kan areglo kan Kahadean?
4 An pangenot na kabtang kan banhi ni Abraham iyo si Jesus, na kan 29 C.E. linahidan kan banal na espiritu asin nagin an ipinanugang Mesiyas, o Cristo. (Gal. 3:16) Gagamiton ni Jesus an sunod na tolo may kabangang taon sa paghuhulit kan maogmang bareta kan Kahadean sa Judiong nasyon. Pagkatapos na arestaron si Juan Bautista, ipinaheling ni Jesus na makakalaom an iba na makikabtang sa Kahadean na iyan kan sabihon nia: “Poon kan mga aldaw ni Juan Bautista sagkod ngonyan an kahadean kan kalangitan iyo an pasohan na pinagmamaigotan na aboton nin mga tawo, asin an mga nagmamaigot nakakapangapot dian.”—Mat. 11:12.
5 Interesante nanggad, bago sabihon an manongod sa mga ‘mangangapot’ sa Kahadean kan kalangitan, si Jesus nagsabi: “Totoong sinasabi ko sa saindo, Sa tahaw kan mga ipinangaki nin mga babae mayo pa nin sarong ibinangon na orog na dakula kisa ki Juan Bautista; alagad an saro na sadit sa kahadean kan kalangitan orog pa kadakula kisa sa saiya.” (Mat. 11:11) Taano ta siring kaiyan? Huli ta an paglaom na magin kabtang kan areglo kan Kahadean dai pa lubos na binubukasan sa mga maimbod sagkod na ibubo an banal na espiritu kan Pentecostes 33 C.E. Kan panahon na idto, gadan na si Juan Bautista.—Gibo 2:1-4.
An Banhi ni Abraham Ipinahayag na Matanos
6, 7. (a) Sa anong paagi na an banhi ni Abraham magigin “siring kan mga bitoon sa kalangitan”? (b) Anong bendisyon an inako ni Abraham, asin anong kaagid na bendisyon an inako kan saiyang banhi?
6 Sinabihan si Abraham na an saiyang banhi papadakolon asin magigin “siring kan mga bitoon sa kalangitan” saka kan mga baybay sa baybayon. (Gen. 13:16; 22:17) Sa ibang pagtaram, sa panahon ni Abraham imposibleng maaraman kan mga tawo kun pira an makompuesto sa banhing ini. Minsan siring, pag-abot nin panahon ihinayag an eksaktong bilang kan saiyang espirituwal na banhi. Apuera ki Jesus, may bilang iyan na 144,000.—Kap. 7:4; 14:1.
7 Mapadapit sa pagtubod ni Abraham, an Tataramon nin Dios nagsasabi: “[Si Abraham] tuminubod ki Jehova; asin ibinilang nia iyan na katanosan sa saiya.” (Gen. 15:5, 6) Totoo, mayong tawo na lubos na matanos. (Sant. 3:2) Minsan siring, huli sa pambihirang pagtubod ni Abraham, trinatar sia ni Jehova na garo man sana sia matanos asin inapod pa ngani sia na Saiyang katood. (Isa. 41:8) An mga minakompuesto sa espirituwal na banhi ni Abraham kaiba ni Jesus ipinahayag man na matanos, asin nagtatao ini sa sainda nin mas dakula pa nganing mga bendisyon kisa sa inako ni Abraham.
8. Anong mga bendisyon an binukasan sa mga miembro kan banhi ni Abraham?
8 An linahidan na mga Kristiano ipinahayag na matanos huli ta nagtubod sinda sa atang na pantubos ni Jesus. (Roma 3:24, 28) Sa pagheling ni Jehova, sinda inabsuelto sa kasalan asin puedeng lahidan nin banal na espiritu tanganing magin espirituwal na mga aki nin Dios, mga tugang ni Jesu-Cristo. (Juan 1:12, 13) Sinda minalaog sa bagong tipan asin minakompuesto sa sarong bagong nasyon, an “Israel nin Dios.” (Gal. 6:16; Luc. 22:20) Kahangahanga nanggad na pribilehio an irinerepresentar kan gabos na iyan! Bilang resulta kan mga ginibong ini nin Dios para sa sainda, an linahidan na mga Kristiano dai naglalaom na mabuhay sagkod lamang digdi sa daga. Isinasakripisyo ninda an siring na oportunidad para sa dai ikaladawan na kagayagayahan na makaibanan si Jesus durante kan Aldaw nin Paghokom asin mamahalang kaiba nia sa kalangitan.—Basahon an Roma 8:17.
9, 10. (a) Kasuarin an mga Kristiano enot na linahidan nin banal na espiritu, asin ano an mangyayari sa sainda sa ngapit? (b) Anong tabang an inako kan linahidan na mga Kristiano?
9 Kan Pentecostes 33 C.E., sarong grupo nin maimbod na mga tawo an tinawan nin oportunidad na mapabilang sa mga mamamahala kaiba ni Jesus durante kan Aldaw nin Paghokom. Mga 120 kan mga disipulo ni Jesus an nabautismohan sa banal na espiritu asin sa siring nagin an enot na linahidan na mga Kristiano. Minsan siring, para sa sainda, kapinonan pa sana iyan. Poon kaidto, kaipuhan nindang ipaheling an saindang kaimbodan ki Jehova sa ibong kan gabos na pagbalo na ipapaabot sa sainda ni Satanas. Kaipuhan nindang magin maimbod sagkod sa kagadanan tanganing akoon ninda an korona nin langitnon na buhay.—Kap. 2:10.
10 Sa katuyohan na ini, paagi sa saiyang Tataramon asin paagi kan Kristianong kongregasyon, si Jehova nagtatao sa linahidan na mga Kristiano nin sadol asin pagparigon sa boot na kaipuhan ninda. Halimbawa, si apostol Pablo nagsurat sa linahidan na mga Kristiano sa Tesalonica: “Arog kan ginigibo nin ama sa saiyang mga aki, kami padagos na nagsadol sa lambang saro sa saindo, asin nagranga patin nagpatotoo sa saindo, sa katuyohan na kamo padagos na maglakaw na angay sa Dios na nag-aapod saindo sa saiyang kahadean asin kamurawayan.”—1 Tes. 2:11, 12.
11. Anong nakasurat na probisyon an ginibo ni Jehova para sa mga miembro kan “Israel nin Dios”?
11 Sa mga dekada pagkatapos na pilion an enot na mga miembro kan kongregasyon nin linahidan na mga Kristiano, pinagmarhay ni Jehova na magkaigwa nin permanenteng rekord kan ministeryo ni Jesus digdi sa daga saka kan Saiyang mga pagtratar asin konseho sa enot na siglong linahidan na mga Kristiano. Sa siring, idinugang ni Jehova an ipinasabong na Kristianong Griegong Kasuratan sa nag-eeksister nang ipinasabong na Hebreong Kasuratan. Sa pangenot, an Hebreong Kasuratan isinurat para sa nasyon nin Israel sa laman durante kan panahon na igwa sinda nin espesyal na relasyon sa Dios. Pangenot man na isinurat an Kristianong Griegong Kasuratan para sa “Israel nin Dios,” an mga linahidan bilang mga tugang ni Cristo asin espirituwal na mga aki nin Dios. Siempre, dai iyan nangangahulogan na an mga bakong Israelita dai magkakaigwa nin dakulang pakinabang sa pag-adal sa Hebreong Kasuratan. Kaagid kaiyan, an mga Kristiano na dai linahidan nin banal na espiritu nagkakaigwa nin dai masokol na mga pakinabang sa pag-adal asin pamumuhay kaoyon kan mga konseho na mababasa sa Kristianong Griegong Kasuratan.—Basahon an 2 Timoteo 3:15-17.
12. Anong pagirumdom an itinao ni Pablo sa linahidan na mga Kristiano?
12 An enot na siglong mga Kristiano ipinahayag na matanos asin linahidan nin banal na espiritu tanganing paagi kaiyan akoon ninda an saindang langitnon na mana. An pagigin linahidan ninda dai nangahulogan na paghahadean ninda an kapwa ninda linahidan na mga Kristiano mantang nasa daga pa an mga ini. Minalataw na dai naintindihan kan enot na mga Kristiano an bagay na iyan asin nagpoon sindang magmawot nin dai maninigong pagkaprominente sa mga tugang ninda sa kongregasyon. Bilang resulta, si Pablo napahiro na maghapot: “Mga basog na kamo, bakong iyo? Mga mayaman na kamo, bako daw? Nagpoon na kamong mamahala bilang mga hade minsan mayo kami, bakong iyo? Asin mawot ko nanggad na kamo nakapagpoon nang mamahala bilang mga hade, tanganing kami man mamahala kaiba nindo bilang mga hade.” (1 Cor. 4:8) Kun siring, ipinagirumdom ni Pablo sa mga linahidan kan panahon nia: “Bakong dahel sa kami an mga kagurangnan kan saindong pagtubod, kundi kami mga kapwa trabahador para sa saindong kagayagayahan.”—2 Cor. 1:24.
Pagkompleto sa Ihinulang Bilang
13. Paano nagpadagos an pag-apod sa mga linahidan pagkatapos kan 33 C.E.?
13 Bakong gabos na 144,000 na linahidan na mga Kristiano pinili kan enot na siglo. An pag-apod sa sainda nagpadagos sa bilog na panahon kan mga apostol dangan minalataw na medyo kadikit an mga inapod sa suminunod na mga siglo. Minsan siring, nagpadagos an pagpili sa mga linahidan sa suminunod na mga siglo na suminagkod sa modernong mga panahon. (Mat. 28:20) Sa kahurihurihi, pakapoon ni Jesus na maghade kan 1914, marikas na nag-oswag an mga pangyayari.
14, 15. Ano an nangyari sa satong panahon mapadapit sa pag-apod kan mga pinili?
14 Enot, hinale ni Jesus sa kalangitan an gabos na gira kan pagtumang sa pamamahala nin Dios. (Basahon an Kapahayagan 12:10, 12.) Dangan tinawan nia nin atension an pagtipon sa natatada pang magigin mga miembro kan saiyang gobyernong Kahadean tanganing makompleto an bilang na 144,000. Sa kabangaan kan dekada nin 1930, haros kompleto na an bilang na iyan asin an dakol sa mga naghihimate sa paghuhulit mayo kan kamawotan na magduman sa langit. An espiritu dai nagpapatotoo sa sainda na sinda mga aki nin Dios. (Ikomparar an Roma 8:16.) Imbes, ipinamidbid ninda an saindang sadiri na kabilang sa “ibang mga karnero,” na igwa kan paglaom na mabuhay sagkod lamang sa paraisong daga. (Juan 10:16) Huli kaini, pakalihis nin 1935 an pangenot na katuyohan kan paghuhulit iyo an pagtipon sa “sarong dakulang kadaklan,” an mga naheling ni apostol Juan sa bisyon asin an mga makakaligtas sa “dakulang kahorasaan.”—Kap. 7:9, 10, 14.
15 Dawa siring, sa nag-aging mga taon poon kan dekada nin 1930, inapod an nagkapirang indibiduwal sa langitnon na paglaom. Taano? Sa nagkapirang kamugtakan, tibaad sinalidahan ninda an mga indibiduwal na dating inapod alagad dai nagin maimbod. (Ikomparar an Kapahayagan 3:16.) Nagtaram pa ngani si Pablo manongod sa personal na mga kamidbid nia na nagbaya sa katotoohan. (Fil. 3:17-19) Sairisay an aapodon ni Jehova tanganing magin mga kasalida? Siempre, sia an madesisyon kaiyan. Pero, garo baga rasonable na an saiyang aapodon, bakong mga bagong makombertir, kundi mga indibiduwal na—kapareho kan mga disipulo na kaolay ni Jesus kan ponan nia an selebrasyon kan Memorial—minsan paano napatunayan na an saindang kaimbodan. *—Luc. 22:28.
16. Mapadapit sa mga linahidan, sa ano kita nagpapasalamat, asin ano an may pagsarig niatong tinutubod?
16 Minsan siring, garo baga bakong gabos na inapod sa langitnon na paglaom poon kan dekada nin 1930 mga kasalida kan mga dai nagin maimbod. Minalataw na sinegurado ni Jehova na igwa kitang makakaibanan na linahidan na mga Kristiano durante kan ultimong mga aldaw kan sistemang ini nin mga bagay sagkod sa paglaglag sa “Dakulang Babilonya.” * (Kap. 17:5) Asin makakasarig kita na an gabos na miembro kan 144,000 makokompleto sa itinalaan na panahon ni Jehova asin sa kahurihurihi an gabos na iyan mamamahala sa gobyernong Kahadean. Makakapagtiwala man kita sa ihinulang Tataramon na an padagos na nagdadakol na dakulang kadaklan magdadanay na maimbod bilang grupo. Dai na mahahaloy, ‘maluwas iyan sa dakulang kahorasaan’ na ipinaabot sa kinaban ni Satanas asin magayagaya sindang malaog sa bagong kinaban nin Dios.
An Langitnon na Gobyerno nin Dios Haros Kompleto Na!
17. Oyon sa 1 Tesalonica 4:15-17 asin Kapahayagan 6:9-11, ano na an nangyari sa linahidan na mga Kristiano na nagadan na maimbod?
17 Poon kan 33 C.E., manampulong ribo kan linahidan na mga Kristiano an nagpaheling nin makosog na pagtubod asin maimbod na nakatagal sagkod sa kagadanan. An mga ini ibinilang nang mga maninigo na umako kan Kahadean asin—minalataw na poon kan enot na mga panahon kan presensia ni Cristo—inako na ninda an langitnon na balos na iyan.—Basahon an 1 Tesalonica 4:15-17; Kapahayagan 6:9-11.
18. (a) Sa ano makakasarig an mga natatada pa kan mga linahidan? (b) Paano minamansay kan mga kabilang sa ibang mga karnero an linahidan na Kristianong mga tugang ninda?
18 An kabilang sa mga linahidan na nasa daga pa makakasarig nanggad na kun sinda magdanay na maimbod, aakoon man ninda sa dai na mahahaloy an balos kan saindang kaimbodan. An minilyon kan ibang mga karnero, kun hinohorophorop an pagtubod kan linahidan na mga tugang ninda, minaoyon sa mga tataramon ni apostol Pablo, na nagsabi manongod sa linahidan na mga tugang sa Tesalonica: “Ipinag-oorgolyo niamo kamo sa mga kongregasyon nin Dios huli sa saindong pakatagal asin pagtubod sa gabos na paglamag asin kahorasaan na saindong tinitios. Ini sarong patotoo kan matanos na paghokom nin Dios, na nagreresulta sa pagkabilang sa saindo na angay sa kahadean nin Dios, na para kaiyan kamo tunay na nagdudusa.” (2 Tes. 1:3-5) Kun magadan an huring miembro kan mga linahidan na nasa daga, noarin man mangyari iyan, makokompleto na an langitnon na gobyerno nin Dios. Magigin dahelan nanggad iyan nin kagayagayahan—sa langit sagkod sa daga!
[Mga Nota sa Ibaba]
^ par. 15 Helingon an isyu kan An Torrengbantayan na Abril 1, 1992, pahina 6, parapo 17.
^ par. 16 Helingon an “Mga Hapot Hale sa mga Parabasa” sa An Torrengbantayan na Mayo 1, 2007.
Ikakapaliwanag daw Nindo?
• Ano an ihinayag nin Dios ki Abraham na igwa nin koneksion sa Aldaw nin Paghokom?
• Taano ta si Abraham ipinahayag na matanos?
• Ano an ibubunga para sa mga banhi ni Abraham kan pagpahayag sa sainda na matanos?
• Anong pagsarig an yaon sa gabos na Kristiano?
[Mga Hapot Para sa Pag-adal]
[Ritrato sa pahina 20]
Pinarigon ni Jesus an boot kan saiyang mga parasunod na pagmaigotan na aboton an Kahadean
[Ritrato sa pahina 21]
Kan Pentecostes 33 C.E., pinonan ni Jehova na pilion an sekondaryong mga miembro kan banhi ni Abraham
[Mga Ritrato sa pahina 23]
An ibang mga karnero nagpapasalamat na kaiba ninda an linahidan na mga Kristiano durante kan huring mga aldaw