Mantang Kamo Hoben Pa, Magdesisyon Na Kamo na Maglingkod ki Jehova

“Magpadagos ka sa mga bagay na saimong nanodan asin nakombensir na paniwalaan.”​—2 TIM. 3:14.

1. Paano minamansay ni Jehova an paglilingkod kan hoben na mga Saksi nia?

AN SAGRADONG paglilingkod kan mga hoben mahalagang marhay ki Jehova kaya ipinasabong nia an sarong hula mapadapit sa sainda. “An saimong banwaan gikan sa boot na magpepresentar kan saindang sadiri sa aldaw kan saimong puersa militar,” an awit kan salmista. “Sa kagayonan nin kabanalan, poon sa kaagahon, ika igwa kan saimong grupo nin hoben na mga lalaki siring kan mga tagdo kan ambon.” (Sal. 110:3) Iyo, pinapahalagahan na marhay ni Jehova an mga hoben na andam na maglingkod sa saiya.

2. Anong kinabanon na mga impluwensia mapadapit sa ngapit kan mga hoben an napapaatubang sa sainda ngonyan?

² Kamong mga hoben sa Kristianong kongregasyon, nagdusay na daw kamo ki Jehova? Dakol na hoben an tibaad nadedepisilan sa pagdesisyon na maglingkod sa tunay na Dios. Dinadagka kan mga namomoon sa negosyo, edukador, asin kun beses mga miembro nin pamilya saka mga katood an mga hoben na pagmaigotan na aboton an materyalistikong mga pasohan. Kun pinagmamaigotan kan mga hoben na aboton an espirituwal na mga pasohan, sa parate tinutuya sinda nin ibang tawo. Alagad an totoo iyo na an paglilingkod sa tunay na Dios an pinakamarahay na pamumuhay na puede nindong pagmaigotan na aboton. (Sal. 27:4) Mapadapit digdi, estudyare an tolong hapot: Taano ta maninigo kamong maglingkod sa Dios? Paano kamo magigin mapanggana sa pamumuhay na kaoyon kan saindong pagdusay sa Dios sa ibong kan puedeng sabihon o gibohon nin iba? Anong marahayon na mga oportunidad nin sagradong paglilingkod an puedeng bukas para sa saindo?

An Paglilingkod ki Jehova Iyo an Tamang Gibohon

3. Paano maninigong makaapektar sa sato an mga linalang ni Jehova?

³ Taano ta maninigo kamong maglingkod sa tunay asin nabubuhay na Dios? Itinatao kan Kapahayagan 4:11 an pangenot na dahelan: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan nag-eksister asin nalalang.” Si Jehova iyo an makangangalas na Kaglalang kan gabos na bagay na nag-eeksister. Abaa kagayon kan daga! An mga poon nin kahoy, burak, hayop, dagat, bukid, asin busay​—iyan gabos ginibo ni Jehova. ‘An daga pano kan mga ginibo nin Dios,’ an sabi sa Salmo 104:24. Makakapagpasalamat nanggad kita na mamomoton na tinawan kita ni Jehova nin hawak asin isip na paagi kaiyan ikinakaogma niato an daga asin an marahay na mga bagay na yaon dian! Bako daw na an odok sa pusong pag-apresyar niato sa makangangalas na mga linalang maninigong magmotibar sa sato na maglingkod sa saiya?

4, 5. Anong mga gibo nin Dios an nagpangyari na magin dayupot si Josue ki Jehova?

⁴ An saro pang dahelan na maglingkod ki Jehova yaon sa mga tataramon kan Israelitang namomoon na si Josue. Kan madali nang magadan si Josue, sinabihan nia an banwaan nin Dios: “Aram nindong gayo sa bilog nindong puso asin sa bilog nindong kalag na mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo.” Taano ta makakapagsabi kaini si Josue?​—Jos. 23:14.

⁵ Bilang sarong aki na nagdakula sa Egipto, siertong naaraman ni Josue an manongod sa panuga ni Jehova na tawan an mga Israelita nin sadiri  nindang daga. (Gen. 12:7; 50:24, 25; Ex. 3:8) Dangan nagmasid si Josue kan ponan ni Jehova na otobon an panugang iyan paagi sa pagpaabot nin Sampulong Damat sa Egipto asin pagpirit sa matagas na si Faraon na togotan an mga aki ni Israel na maghale. Kabilang si Josue sa mga ilinigtas sa Dagat na Pula, dangan naheling nia kan si Faraon asin an hukbo kaini malantopan kan dagat na iyan. Durante nin halawig na pagbaklay sa “dakula asin makangingirhat na kaawagan” kan Desierto nin Sinai, naheling ni Josue kun paano itinao ni Jehova an gabos na pangangaipo kan mga Israelita. Mayo ni saro sa sainda an nagadan huli sa paha o gutom. (Deut. 8:3-5, 14-16; Jos. 24:5-7) Kan panahon nang sakopon kan mga Israelita an poderosong mga nasyon na Cananeo asin sadirihon an Dagang Panuga, naheling ni Josue kun paano sinda sinuportaran sa gibohon na ini kan Dios na sinasamba nia asin kan iba pang Israelita.​—Jos. 10:14, 42.

6. Ano an makakatabang sa saindo na pataluboon an kamawotan na maglingkod sa Dios?

⁶ Aram ni Josue na inotob ni Jehova an Saiyang mga panuga. Huli kaini, sinabi ni Josue: “Kun para sa sako asin sa sakong kasararo sa harong, kami maglilingkod ki Jehova.” (Jos. 24:15) Kumusta man kamo? Kun hinohorophorop nindo an mga panuga na inotob na kan tunay na Dios asin an mga panuga na ootobon pa nia, minamawot daw nindo na maglingkod sa saiya siring kan ginibo ni Josue?

7. Taano ta sarong mahalagang marhay na lakdang an pagpabautismo sa tubig?

⁷ An pag-estudyar sa mga gibo nin paglalang ni Jehova asin an paghorophorop sa saiyang makangangalas asin biyong masasarigan na mga panuga, maninigong magpahiro sa saindo na bako sanang magdusay ki Jehova kundi simbolisaran man an pagdusay na iyan paagi sa pagpabautismo sa tubig. An pagpabautismo sarong mahalagang marhay na lakdang na dapat gibohon kan mga gustong maglingkod sa Dios. Lininaw ini kan satong Arogan, si Jesus. Kan madali nang ponan an saiyang gibohon bilang Mesiyas, nagpresentar sia ki Juan na Bautisador tanganing magpabautismo. Taano ta ginibo ni Jesus an lakdang na iyan? “Ako naghilig hale sa langit, bakong sa paggibo kan sadiri kong kabotan,” an sinabi nia pagkatapos, “kundi kan kabotan nia na nagsugo sa sako.” (Juan 6:38) Tanganing simbolisaran an pagpresentar nia na gibohon an kabotan kan saiyang Ama, si Jesus nagpabautismo.​—Mat. 3:13-17.

8. Taano ta nagdesisyon si Timoteo na sambahon an Dios, asin ano an tibaad kaipuhan nindong gibohon?

⁸ Estudyaran man an kamugtakan ni Timoteo, sarong hoben na Kristiano na pag-abot nin panahon tinawan ni Jehova nin dakol na gibohon asin pribilehio. Taano ta nagdesisyon si Timoteo na sambahon an tunay na Dios? Sinasabi sa sato kan Biblia na ‘nanodan nia an mga bagay asin nakombensir sia na paniwalaan iyan.’ (2 Tim. 3:14) Kun kamo nag-adal sa Tataramon nin Dios asin nakombensir na maniwala na totoo an katokdoan kaiyan, an kamugtakan nindo kapareho kan ki Timoteo. Kaipuhan na nindong gumibo nin desisyon ngonyan. Taano ta dai nindo ipakipag-olay sa saindong mga magurang an gusto nindong gibohon? Kaiba an kamagurangan sa kongregasyon, matatabangan ninda kamo na masabotan an mga kahagadan na sono sa Kasuratan para sa bautismo.​—Basahon an Gibo 8:12.

9. Paano an pagpabautismo nindo tibaad makaapektar sa iba?

⁹ Kun mabautismohan kamo, ini marahayon na kapinonan sa paglilingkod sa tunay na Dios. Paagi sa paggibo kan lakdang na ini, minalaog kamo sa garo man sana halawig na paurombasan na an premyo iyo an buhay na daing katapusan asin an kagayagayahan na nakakamtan ngonyan paagi sa paggibo kan kabotan nin Dios. (Heb. 12:2, 3) Magtatao man kamo nin kagayagayahan sa mga kapamilya nindo  na naglaog na sa paurombasan asin sa saindong mga katood sa Kristianong kongregasyon. An pinakaimportante sa gabos, pagagayagayahon nindo an puso ni Jehova. (Basahon an Talinhaga 23:15.) Totoo, tibaad dai masabotan kan iba kun taano ta nagdesisyon kamo na sambahon si Jehova, asin tibaad kuestionon ninda an saindong desisyon. Tibaad tumangon pa ngani ninda kamo. Alagad mapapangganahan nindo an mga kadepisilan na ini.

Kun Kuestionon o Tumangon Kamo kan Iba

10, 11. (a) Ano an tibaad ihapot sa saindo nin mga tawo manongod sa desisyon nindo na maglingkod sa Dios? (b) Ano an manonodan nindo sa paagi nin pagsimbag ni Jesus sa mga hapot manongod sa tunay na pagsamba?

¹⁰ Tibaad magngalas an saindong mga kaklase, kataed, asin paryente sa desisyon nindo na maglingkod ki Jehova. Tibaad hapoton ninda kamo kun taano ta nagdesisyon kamo na gibohon ini asin tibaad hapoton ninda kamo manongod sa saindong tinutubod. Ano an maninigong magin reaksion nindo? Siempre, kaipuhan nindong analisaron an saindong kaisipan asin saboot tanganing ikapaliwanag nindo an mga dahelan kan ginibo nindong desisyon. Asin sa pagsimbag sa mga hapot manongod sa saindong mga tinutubod, an halimbawa ni Jesus an pinakamarahay na maaarog nindo.

¹¹ Kan an Judiong mga namomoon sa relihion usisaon si Jesus manongod sa pagkabuhay liwat, dinara nia an saindang atension sa sarong teksto na dai ninda nakonsiderar. (Ex. 3:6; Mat. 22:23, 31-33) Kan maghapot ki Jesus an sarong eskriba kun arin an nakakalabi sa gabos na togon, kinotar Nia an angay na mga bersikulo sa Biblia. An lalaking iyan nagpasalamat ki Jesus huli sa simbag. (Lev. 19:18; Deut. 6:5; Mar. 12:28-34) An paggamit ni Jesus kan Kasuratan asin an saiyang paagi nin pagtaram an nagin dahelan na ‘magkabaranga mapadapit sa saiya an kadaklan,’ asin huli kaiyan dai sia kayang gibohan nin maraot kan mga nagtutumang sa saiya. (Juan 7:32-46) Kun sinisimbag nindo an mga hapot manongod sa saindong pagtubod, gamiton nindo an Biblia asin magsimbag kamo “na may mahoyong boot asin hararom na paggalang.” (1 Ped. 3:15) Kun dai nindo aram an simbag sa sarong hapot, admitiron iyan asin sabihon na masiyasat kamo. Dangan, siyasaton an temang iyan, na ginagamit an Watch Tower Publications Index o Watchtower Library na nasa CD-ROM. Paagi sa marahay na pag-andam, ‘maaaraman nindo kun paano kamo dapat na sumimbag.’​—Col. 4:6.

12. Taano ta dai nindo maninigong togotan na manluya an saindong boot huli sa persekusyon?

¹² Tibaad bako sanang mga hapot an mapaatubang sa saindo manongod sa saindong paninindogan asin mga tinutubod. Ini huli ta an kinaban kontrolado kan kaiwal nin Dios, si Satanas na Diablo. (Basahon an 1 Juan 5:19.) Bakong realistiko na laoman na an gabos matao nin komendasyon o maoyon, asin tibaad mapaatubang kamo sa pagtumang. An nagkapira tibaad ‘magtaram na may panlilibak manongod sa saindo,’ asin tibaad padagos nindang ginigibo iyan. (1 Ped. 4:4) Alagad girumdomon na dai kamo nagsosolo. Si Jesu-Cristo pinersegir man. Si apostol Pedro iyo man, asin sia nagsurat: “Mga namomotan, dai kamo magngalas sa naglalaad [na pagdusa] dian sa saindo, na nangyayari sa saindo bilang pagbalo, na garo baga pambihirang bagay an nangyayari sa saindo. Sa kabaliktaran, padagos kamong maggayagaya mantang kamo mga kadamay sa mga pagdusa kan Cristo.”​—1 Ped. 4:12, 13.

13. Taano ta makakapaggayagaya an mga Kristiano kun sinda pinepersegir?

¹³ An pagtagal sa persekusyon o pagtumang huli sa pagigin Kristiano sarong dahelan na maggayagaya. Taano? Huli ta kun yaon sa saindo an pag-oyon kan kinaban, ipinaparisa kaini na kamo namumuhay kaoyon kan mga pamantayan ni Satanas​—bakong nin Dios. Si Jesus nagpatanid: “Herak man sa  saindo, kun an gabos na tawo nagtataram nin marahay dapit sa saindo, huli ta siring man kaini an ginibo kan saindang mga apoon sa falsong mga propeta.” (Luc. 6:26) Ipinaparisa kan persekusyon na si Satanas asin an saiyang kinaban anggot sa saindo huli ta naglilingkod kamo ki Jehova. (Basahon an Mateo 5:11, 12.) Asin kun kamo “pinag-oolog-olog huli sa ngaran ni Cristo,” iyan sarong bagay na dapat ipaggayagaya.​—1 Ped. 4:14.

14. Ano an puedeng magin marahay na resulta kun an saro nagdadanay na maimbod ki Jehova sa ibong nin persekusyon?

¹⁴ Kun kamo nagdadanay na maimbod ki Jehova sa ibong nin pagtumang, igwa nin kisiera apat na kapakipakinabang na resulta. Nagpapatotoo kamo manongod sa Dios asin sa saiyang Aki. An saindong maimbod na pakatagal nagpaparigon sa boot kan saindong Kristianong mga tugang. An nagkapirang nagmamasid na dai midbid si Jehova tibaad mapahiro na hanapon sia. (Basahon an Filipos 1:12-14.) Mantang naeeksperyensiahan nindo kun paano si Jehova nagtatao nin kosog tanganing matagalan an mga pagbalo, nagtatalubo man an saindong pagkamoot sa saiya.

“Sarong Dakulang Pinto” an Bukas Para sa Saindo

15. Anong “dakulang pinto” an binukasan para ki apostol Pablo?

¹⁵ Mapadapit sa saiyang ministeryo sa Efeso, si apostol Pablo nagsurat: “Sarong dakulang pinto na pasiring sa gibohon an binukasan para sa sakuya.” (1 Cor. 16:8, 9) Iyan iyo an pinto na pasiring sa dakulang gibohon na paghuhulit kan maogmang bareta asin paggibo nin mga disipulo sa siudad na iyan. Paagi sa paglaog sa pintong iyan, dakol an natabangan ni Pablo na makanood manongod ki Jehova asin sambahon Sia.

16. Paano an linahidan na natatada naglaog sa “sarong bukas na pinto” kan 1919?

¹⁶ Kan 1919 ibinugtak kan pinamuraway na si Jesu-Cristo an “sarong bukas na pinto” sa atubangan kan linahidan na natatada. (Kap. 3:8) Sinda naglaog sa pintong iyan asin nagpoon na maghulit kan maogmang bareta, na nagtotokdo kan katotoohan sa Biblia na igwa nin orog na kaigotan kisa kasuarin pa man. Ano an nagin resulta kan saindang ministeryo? An maogmang bareta nakaabot na ngonyan sagkod sa kaporoporohi kan daga, asin mga pitong milyon an may paglaom na magkamit nin buhay na daing sagkod sa bagong kinaban nin Dios.

17. Paano kamo makakalaog sa “sarong dakulang pinto na pasiring sa gibohon”?

¹⁷ “Sarong dakulang pinto na pasiring sa gibohon” an bukas pang marhay para sa gabos na lingkod ni Jehova. An mga minalaog dian nakakanompong nin kagayagayahan asin pagkakontento mantang orog sindang nakikikabtang sa paghuhulit kan maogmang bareta. Kamong mga hoben na lingkod ni Jehova, gurano kadakula kan pagpapahalaga nindo sa daing kaparehong pribilehio na pagtabang sa iba na ‘magtubod sa maogmang bareta’? (Mar. 1:14, 15) Pinag-isipan na daw nindo an pagregular payunir o pag-auxiliary payunir? May iba pang oportunidad na puedeng bukas para sa dakol sa saindo, arog baga kan pagtogdok nin mga Kingdom Hall, paglilingkod sa Bethel, asin pagmimisyonero. Mantang nauubos na an panahon sa marigsok na kinaban ni Satanas, an pakikikabtang sa mga paaging ini nin paglilingkod sa Kahadean nagigin orog na apurado kada aldaw. Malaog daw kamo sa “dakulang pinto” mientras na may panahon pa?

“Namitan Nindo Asin Helingon Nindo na si Jehova Marahay”

18, 19. (a) Ano an nakatabang ki David na magkaigwa nin makosog na kamawotan na maglingkod ki Jehova? (b) Ano an nagpapaheling na nungkang pinagbasolan ni David an paglilingkod sa Dios?

¹⁸ An pinasabngan na salmista inimbitaran an iba na ‘namitan asin helingon na si Jehova marahay.’ (Sal. 34:8) Kan si Hadeng David kan suanoy na Israel sarong solteritong pastor, ilinigtas sia ni Jehova sa pagsalakay nin mababangis na hayop. Tinabangan sia nin Dios sa saiyang pakikipaglaban ki Goliat asin isinalbar sia sa dakol na iba pang kalamidad. (1 Sam.  17:32-51; Sal. 18, nota sa itaas) Huli sa dakulang mamomoton na kabootan nin Dios, napahiro si David na magsurat: “Dakol na bagay an saimo mismong ginibo, O Jehova na sakong Dios, an saimo nganing makangangalas na mga gibo asin an saimong mga paghorophorop sa samo; mayo nin ikakabaing sa saimo.”​—Sal. 40:5.

¹⁹ Namotan na marhay ni David si Jehova asin gusto niang omawon Sia sa bilog niang puso asin isip. (Basahon an Salmo 40:8-10.) Sa paglihis nin mga taon, nungkang pinagbasolan ni David an paggamit kan saiyang buhay sa pagsamba sa tunay na Dios. An pamumuhay na may diosnon na debosyon iyo an saiyang pinakadakulang kayamanan​—sarong gikanan nin daing kaparehong kaogmahan. Kan si David gurang na, sia nagsabi: “Ika an sakong paglaom, O Soberanong Kagurangnan na Jehova, an sakong kompiansa poon sa sakong pagkaniaki. Asin minsan sagkod sa kagurangan asin pagkaubanon, O Dios, dai mo ako pabayaan.” (Sal. 71:5, 18) An pagtitiwala ni David ki Jehova asin an pakikikatood nia sa Saiya nagin mas makosog, dawa ngani nagluya sia sa pisikal.

20. Taano ta an paglilingkod sa Dios iyo an pinakamarahay na paagi na magagamit nindo an saindong buhay?

²⁰ An buhay ni Josue, David, asin Timoteo dagdag na patotoo na an paglilingkod ki Jehova iyo an pinakamarahay na paagi na magagamit an saindong buhay. An pangmadalian na materyal na mga bentaha nin sarong karera sa kinaban na ini dai makakapareho sa panghaloyan na mga pakinabang na inaako nindo sa ‘paglilingkod ki Jehova sa bilog nindong puso saka kalag.’ (Jos. 22:5) Kun dai ka pa nagdusay ki Jehova paagi sa pamibi, hapota an saimong sadiri, ‘Ano an nakakapugol sa sako na magin saro sa Mga Saksi ni Jehova?’ Kun kamo bautisado nang parasamba ki Jehova, gusto daw nindong madagdagan an saindong kagayagayahan sa buhay? Kun siring, pahiwason an saindong ministeryo, asin padagos na umoswag sa espirituwal. Ipapaheling sa saindo kan sunod na artikulo kun paano kamo puedeng umoswag sa espirituwal paagi sa pagsunod sa halimbawa ni apostol Pablo.

Ano an Isisimbag Nindo?

• Magtao nin duwang dahelan kun taano ta maninigo kitang maglingkod sa Dios.

• Ano an nakatabang ki Timoteo na magdesisyon na maglingkod sa Dios?

• Taano ta maninigo kamong magdanay na marigon kun napapaatubang sa persekusyon?

• Anong mga oportunidad para sa paglilingkod an puedeng bukas para sa saindo?

[Mga Hapot Para sa Pag-adal]

[Ritrato sa pahina 18]

An paglilingkod ki Jehova iyo an pinakamarahay na pamumuhay

[Ritrato sa pahina 19]

Kaya daw nindong simbagon an mga hapot manongod sa saindong pagtubod?