Pagmaigotan na Aboton an “Kabanalan sa Pagkatakot sa Dios”

SA PAG-ATRIBWIR ki Jehova Dios nin kabanalan sa pinakahalangkaw na sokol, an Biblia nagsasabi: “Banal, banal, banal si Jehova.” (Isa. 6:3; Kap. 4:8) An Hebreo asin Griegong mga tataramon para sa “kabanalan” nagtatao kan ideya nin kadalisayan o relihiosong kalinigan, nin pagigin suway sa karamogan. An kabanalan nin Dios nanonongod sa lubos na pagkasangkap nia sa moral.

Bako daw na aasahan kan banal na Dios, si Jehova, na an mga nagsasamba sa saiya magin banal, an boot sabihon, magin malinig sa pisikal saka sa moral asin espirituwal? Sa maliwanag na marhay na pananaram, ipinapaheling kan Biblia na gusto ni Jehova na magin banal an saiyang banwaan. Mababasa niato sa 1 Pedro 1:16: “Kaipuhan kamong magin banal, huli ta ako banal.” Talaga daw na maaarog nin bakong sangkap na mga tawo an kabanalan ni Jehova? Iyo, minsan ngani bakong sa sangkap na paagi. Puede kitang ibilang na banal sa atubangan nin Dios kun kita nagsasamba sa saiya sa malinig na espirituwal na kamugtakan asin kun kita may dayupot na relasyon sa saiya.

Kun siring, paano kita makakapagdanay na malinig sa sarong kinaban na maati sa moral? Anong mga gibo an maninigo niatong rayoan? Anong mga pagbabago sa pagtaram asin paggawe an tibaad kaipuhan niatong gibohon? Helingon niato kun ano an manonodan niato mapadapit digdi sa hinagad nin Dios sa mga Judiong nagbuelta hale sa Babilonya pasiring sa saindang dagang tinuboan kan 537 B.C.E.

‘Magkakaigwa nin Dalan nin Kabanalan’

Ihinula ni Jehova na an saiyang banwaan na nadistiero sa Babilonya ibabalik sa saindang dagang tinuboan. An hula manongod sa pagbabalik igwa kan garantiyang ini: “Magkakaigwa nanggad dian nin tinampo, nin sarong dalan; asin aapodon iyan na Dalan nin Kabanalan.” (Isa. 35:8a) Ipinapaheling kan mga tataramon na ini na bako sanang binukasan ni Jehova an dalan tanganing makapuli an mga Judio kundi inasegurar man nia sinda na poprotehiran nia sinda sa saindang pagbaklay.

Para sa saiyang mga lingkod sa daga sa presenteng panahon, binukasan ni Jehova an “Dalan nin Kabanalan” na minagiya parayo sa Dakulang Babilonya, an pambilog na kinaban na imperyo nin falsong relihion. Kan 1919 pinatalingkas nia an linahidan na mga Kristiano sa espirituwal na kaoripnan sa falsong relihion, asin progresibo nindang hinale sa saindang pagsamba an gabos na falsong katokdoan. Bilang mga parasamba ki Jehova ngonyan, igwa kita nin malinig asin trangkilong espirituwal na kamugtakan na dian puede kitang sumamba ki Jehova saka magkaigwa nin matoninong na relasyon sa saiya asin sa satong kapwa.

Pinili kan mga miembro kan “sadangoton na aripompon” nin linahidan na mga Kristiano asin kan nagdadakol na “dakulang kadaklan” nin “ibang mga karnero” na lumakaw sa dalan na banal saka iniimbitaran ninda an iba na umiba sa sainda. (Luc. 12:32; Kap. 7:9; Juan 10:16) An “Dalan  nin Kabanalan” bukas sa gabos na andam ‘na idolot an saindang hawak bilang sarong atang na buhay, banal, inaako nin Dios.’​—Roma 12:1.

“Dai Maagi Dian an Marigsok”

Kan 537 B.C.E., kinaipuhan kan nagbalik na mga Judio na maabot an sarong mahalagang kahagadan. Mapadapit sa mga kualipikadong lumakaw sa “Dalan nin Kabanalan,” an Isaias 35:8b nagsasabi: “Dai maagi dian an maati. Asin iyan magigin para sa naglalakaw sa dalan, asin mayo nin mga lolong na maglalakawlakaw dian.” Huling an katuyohan kan pagbalik nin mga Judio sa Jerusalem iyo na establisaron giraray an dalisay na pagsamba, mayo nin lugar para sa mga may maimot na mga motibo, mayo nin paggalang sa sagradong mga bagay, o maati sa espirituwal. Kaipuhan kan nagbalik na mga Judio na papagdanayon an halangkaw na mga pamantayan ni Jehova sa moral. An mga nagmamawot kan pabor nin Dios ngonyan kaipuhan na maabot an kaparehong kahagadan. Dapat nindang pagmaigotan na aboton an “kabanalan sa pagkatakot sa Dios.” (2 Cor. 7:1) Kun siring, anong maating mga gibo an dapat niatong rayoan?

“Hayag na an mga gibo kan laman,” an isinurat ni apostol Pablo, “asin an mga iyan iyo an pakikisaro, pagkamaati, malaswang gawe-gawe.” (Gal. 5:19) An pakikisaro may koneksion sa gabos na seksuwal na aktibidad na kalabot an paggamit kan ikinabuhay na ginigibo kan bakong mag-agom. Kalabot sa malaswang gawe-gawe an “pagigin sobra kaimoral; pagigin makirag; daing supog na gawe-gawe; kadustaan nin gawe-gawe.” An pakikisaro sagkod malaswang gawe-gawe malinaw nanggad na kontra sa kabanalan ni Jehova. Huli kaini, an mga padagos na naggigibo nin siring na mga bagay dai tinotogotan na magin kabtang kan Kristianong kongregasyon o itinitiwalag dian. Totoo man iyan sa mga naggigibo nin grabeng pagkamaati, an boot sabihon, “gabos na klaseng pagkamaati na may kahanaban.”​—Efe. 4:19.

An “pagkamaati” sarong termino na dian kaiba an kadakol na kasalan. An Griegong tataramon para dian nanonongod sa ano man na klase nin ati​—sa paggawe, sa pagtaram, asin sa relihiosong pakikiasosyar sa mga daing pagtubod. Kaiba dian an mga gibo na may kalabot na pagkamaati na tibaad dai kaipuhan an hudisyal na aksion. * Alagad an mga naggigibo daw nin siring na pagkamaati nagmamaigot na mamuhay sa kabanalan?

Ipamugtak na an sarong Kristiano patagong nagpoon na magheling nin pornograpiya. Padikitdikit, mantang napupukaw an saiyang maating mga horot, nagluluya an saiyang determinasyon na magdanay na malinig sa atubangan ni Jehova. An saiyang gawe-gawe tibaad dai pa nakaabot sa punto na iyan magin grabeng pagkamaati, alagad sia dai nagpapadagos sa paghorophorop sana sa ‘ano man na malinig, marahay an dangog, may moral na karahayan, asin kaomaw-omaw.’ (Fil. 4:8) An pornograpiya maati asin nakakadanyar nanggad sa relasyon nin saro sa Dios. An ano man na klase nin pagkamaati maninigo na dai ngani masambitan sa sato.​—Efe. 5:3.

Isip-isipon an saro pang halimbawa. Ipamugtak na ginigibo nang ugale nin sarong Kristiano an masturbasyon​—an tuyong paggamit kan saiya mismong ikinabuhay tanganing mapukaw sia sa sekso—​baga man ini may kaibang pornograpiya o mayo. Minsan ngani an tataramon na “masturbasyon” mayo sa Biblia, igwa daw nin ano man na  pagduda na iyan sarong ugale na nakakaramog sa isip asin emosyon? Bako daw na an padagos na paggibo nin arog kaining karamogan makakadanyar na gayo sa personal na relasyon nin saro ki Jehova asin gigibohon an saro na maati sa pagheling nin Dios? Isapuso niato an konseho ni apostol Pablo na “magpakalinig kita sa lambang ramog nin laman asin espiritu” saka “gadanon [niato] an mga kabtang kan [satong] hawak na yaon sa ibabaw kan daga kun dapit sa pakikisaro, pagkamaati, seksuwal na horot, nakakadanyar na mawot, asin kaaraan.”​—2 Cor. 7:1; Col. 3:5.

Itinotogot kan kinaban na ini na pinapamahalaan ni Satanas an maating gawe-gawe, na dinadagka pa ngani iyan. An paglaban sa sugot na gumawe nin maati puedeng magin depisil nanggad. Alagad an tunay na mga Kristiano dapat na dai “naglalakaw siring sa paglakaw kan mga nasyon sa pagigin daing kamanungdanan kan saindang isip.” (Efe. 4:17) Totogotan sana kita ni Jehova na padagos na lumakaw sa “Dalan nin Kabanalan” kun linilikayan niato an maating gawe-gawe, patago man o hayag.

“Dai Dian Magkakaigwa nin Leon”

Tanganing kamtan an pabor kan banal na Dios, si Jehova, tibaad kaipuhan nin nagkapira na gumibo nin dakulaon na mga pagbabago sa paggawe asin sa pagtaram. An Isaias 35:9 nagsasabi: “Dai dian magkakaigwa nin leon, asin an naninibang mabangis na mga hayop dai matukad dian,” an boot sabihon, sa “Dalan nin Kabanalan.” Sa piguratibong pagtaram, an mga tawong madahas asin agresibo sa paggawe saka pagtaram ikinokomparar sa mabangis na mga hayop. Dai nanggad sinda magkakaigwa nin lugar sa bagong kinaban nin Dios na may katanosan. (Isa. 11:6; 65:25) Kun siring, mahalagang marhay na bayaan kan mga nagmamawot kan pag-oyon nin Dios an siring na garo sa hayop na mga ugale asin magmaigot sinda na mamuhay sa kabanalan.

“Magkaharale na sa saindo an gabos na maraot an kamawotan na kapaitan asin kaanggotan asin grabeng pagkaanggot asin sirilyakan patin mapanlibak na pagtaram kaiba an gabos na karatan,” an sadol sa sato kan Kasuratan. (Efe. 4:31) Sa Colosas 3:8, mababasa niato: ‘Haleon nindo an gabos na iyan sa saindo, an grabeng pagkaanggot, kaanggotan, karatan, mapanlibak na pagtaram, asin malaswang orolay hale sa saindong ngoso.’ An pananaram na “mapanlibak na pagtaram” na ginamit sa duwang bersikulong ini sa pundamental nanonongod sa mapanraot, makasusupog, o mapaglanghad na pagtaram.

Ngonyan, an nakakakolog asin malaswang pagtaram nagin ordinaryo na sanang marhay, dawa sa harong. An mga mag-agom nagtataram nin makolog, maringis, o mapagmenos sa lambang saro asin sa saindang mga aki. An arog kaining klase nin berbal na karingisan maninigo na mayo sa Kristianong mga pamilya.​—1 Cor. 5:11.

Pagmamaigot na Aboton an “Kabanalan sa Pagkatakot sa Dios”​—Sarong Bendisyon!

Sarong pribilehio nanggad na maglingkod sa banal na Dios, si Jehova! (Jos. 24:19) Mahalagang marhay an espirituwal na paraiso na dian kita dinara ni Jehova. An pagpapadanay sa satong gawe-gawe na banal sa pagheling ni Jehova iyo nanggad an pinakamarahay na paagi nin pamumuhay.

Dai na nanggad mahahaloy, an ipinanuga nin Dios na Paraiso digdi sa daga tunay na mangyayari. (Isa. 35:1, 2, 5-7) An mga nagmamawot kaiyan asin padagos na nagmamaigot na aboton an diosnon na pamumuhay bebendisyonan na magkaigwa nin lugar duman. (Isa. 65:17, 21) Kun siring, padagos nanggad niatong sambahon an Dios sa malinig na espirituwal na kamugtakan asin papagdanayon niato an dayupot na relasyon sa saiya.

[Nota sa Ibaba]

[Ritrato sa pahina 26]

Ano an hinagad tanganing makalakaw an mga Judio sa “Dalan nin Kabanalan”?

[Ritrato sa pahina 27]

An pornograpiya nakakadanyar sa relasyon nin saro ki Jehova

[Ritrato sa pahina 28]

“Magkaharale na sa saindo an . . . sirilyakan patin mapanlibak na pagtaram”