Ano an Itatao Nindo Tanganing Padagos na Mabuhay?
Ano an Itatao Nindo Tanganing Padagos na Mabuhay?
“Ano an itatao nin tawo bilang karibay kan saiyang kalag?”—MAT. 16:26.
1. Taano ta dai inoyonan ni Jesus an pagsaway ni Pedro?
DAI makapaniwala si apostol Pedro sa saiyang nadangog. An saiyang namomotan na Poon, si Jesu-Cristo, ‘prangkang’ nagsasabi na sa dai na mahahaloy Sia magtitios asin magagadan! Bilang simbag, si Pedro—daing duwa-duwa na may marahayon na intension—sinaway si Jesus, na nagsasabi: “Magin maboot ka sa saimong sadiri, Kagurangnan; dai ini noarin man mangyayari sa saimo.” Si Jesus tuminalikod ki Pedro asin nagheling sa ibang mga disipulo. Posibleng marhay na iniisip man ninda an salang opinyon na ini. Dangan sinabi nia ki Pedro: “Padian ka sa hudian ko, Satanas! Ika sarong singkogan sa sako, huli ta iniisip mo, bakong an mga kaisipan nin Dios, kundi an sa mga tawo.”—Mar. 8:32, 33; Mat. 16:21-23.
2. Paano ipinaliwanag ni Jesus an mga kahagadan sa pagigin tunay na disipulo?
2 An sunod na mga tataramon ni Jesus tibaad nakatabang ki Pedro na maheling an dahelan kan mapuersang reaksion ni Jesus sa pagsaway nia. ‘Inapod ni Jesus an kadaklan kaibanan an saiyang mga disipulo’ asin sia nagsabi: “Kun an siisay man boot na sumunod sa sako, paindahan nia an saiyang sadiri asin pasanon an saiyang hariging pasakitan patin padagos na sumunod sa sako. Huli ta an siisay man na boot na magligtas kan saiyang kalag mawawaran kaiyan; alagad an siisay man na mawaran kan saiyang kalag huli sa sako asin sa maogmang bareta magliligtas kaiyan.” (Mar. 8:34, 35) Ginamit digdi ni Jesus an terminong “kalag” tanganing mangahulogan nin “buhay.” Malinaw nanggad, bako sanang madali na niang iatang an saiyang buhay kundi linalaoman man nia na an mga nagsusunod sa saiya magigin andam na iatang an saindang buhay sa paglilingkod sa Dios. Kun gigibohon ninda iyan, dakulang balos an aakoon ninda.—Basahon an Mateo 16:27.
3. (a) Ano an mga ihinapot ni Jesus sa mga naghihinanyog sa saiya? (b) Ano an tibaad ipinagirumdom kan ikaduwang hapot ni Jesus sa mga naghihinanyog sa saiya?
3 Sa okasyon man sanang iyan, nagtao si Jesus nin duwang nakakapukaw sa isip na hapot: “Ano an kapakinabangan para sa sarong tawo na makamtan an bilog na kinaban asin mawara an saiyang kalag?” asin, “Ano talaga an itatao nin tawo bilang karibay kan saiyang kalag?” (Mar. 8:36, 37) An simbag sa enot na hapot malinaw sa punto de vista nin tawo. Mayong kapakinabangan para sa sarong tawo na makamtan an bilog na kinaban kun mawawara nia an saiyang buhay, o kalag. Kapakipakinabang sana an mga rogaring kun buhay an saro tanganing ikaogma iyan. An ikaduwang hapot ni Jesus na: “Ano talaga an itatao nin tawo bilang karibay kan saiyang kalag?” tibaad nagpagirumdom sa mga naghihinanyog sa saiya manongod sa akusasyon ni Satanas kan panahon ni Job: “An gabos na sadiri nin tawo itatao nia para sa saiyang kalag.” (Job 2:4) Para sa nagkapira na dai nagsasamba ki Jehova, an mga tataramon ni Satanas tibaad totoo. Dakol na tawo an magibo nin ano man asin mabalga nin ano man na prinsipyo tangani sanang magdanay na buhay. Pero, an mga Kristiano laen an pagmansay.
4. Taano ta an mga hapot ni Jesus igwa nin mas hararom na kahulogan para sa mga Kristiano?
4 Aram niato na si Jesus dai nagdigdi sa daga tanganing tawan kita nin marahay na salud, kayamanan, asin halawig na buhay sa kinaban na ini. Nagdigdi sia tanganing buksan an oportunidad na mabuhay sagkod lamang sa bagong kinaban, asin an paglaom sa buhay na iyan iyo an pinapahalagahan niatong marhay. (Juan 3:16) Masasabotan nin sarong Kristiano na an kahulogan kan enot na hapot ni Jesus iyo na, “Ano an kapakinabangan para sa sarong tawo na makamtan an bilog na kinaban asin mawara an saiyang paglaom na buhay na daing katapusan?” An simbag iyo na, Mayo nanggad iyan nin pakinabang. (1 Juan 2:15-17) Tanganing tabangan kita na masimbag an ikaduwang hapot ni Jesus, marahay gayod na hapoton niato an satong sadiri, ‘Gurano ako kaandam na magsakripisyo ngonyan tanganing masegurado an sakong paglaom na buhay sa bagong kinaban?’ An simbag niato sa hapot na iyan, na maheheling sa satong pamumuhay, naghahayag kun gurano kakosog an paglaom na iyan sa satong puso.—Ikomparar an Juan 12:25.
5. Paano niato maaako an balaog na buhay na daing katapusan?
5 Siempre, dai sinasabi ni Jesus na an buhay na daing katapusan puedeng akoon bilang bayad. An buhay—dawa an medyo halipot na buhay niato sa sistemang ini nin mga bagay—sarong balaog. Dai kita makakabakal kaiyan o makakagibo nin ano man tanganing magin maninigo kaiyan. An solamenteng paagi na maaako niato an balaog na buhay na daing katapusan iyo na ‘magtubod ki Cristo Jesus’ asin ki Jehova, “an parabalos sa mga maigot na naghahanap sa saiya.” (Gal. 2:16; Heb. 11:6) Minsan siring, an pagtubod dapat na ipaheling paagi sa mga gibo, huling “an pagtubod na daing mga gibo gadan.” (Sant. 2:26) Huli kaini, kun orog niatong hinohorophorop an hapot ni Jesus, marahay na seryoso niatong pag-isipan kun gurano kita kaandam na magsakripisyo sa sistemang ini nin mga bagay asin kun ano an andam niatong gibohon sa paglilingkod ki Jehova tanganing ipaheling na an satong pagtubod talagang buhay.
“An Cristo Dai Nagpanigo sa Saiyang Sadiri”
6. Ano an prioridad ni Jesus?
6 Imbes na isentro ni Jesus an saiyang pagheling sa iinaalok kan kinaban kan saiyang panahon, nagkonsentrar sia sa mahahalagang bagay asin sinayumahan nia an sugot na magkaigwa nin materyal na mga bagay para sa sadiring interes. Ipinaheling kan saiyang pamumuhay an pagsasakripisyo asin pagkuyog sa Dios. Imbes na panigoan an saiyang sadiri, sia nagsabi: “Danay kong ginigibo an mga bagay na nakakapaogma sa [Dios].” (Juan 8:29) Gurano kaandam si Jesus na paogmahon an Dios?
7, 8. (a) Anong pagsakripisyo an ginibo ni Jesus, asin paano sia binalosan? (b) Ano an maninigo niatong ihapot sa satong sadiri?
7 Sa sarong pangyayari, sinabi ni Jesus sa saiyang mga disipulo: “An Aki nin tawo nagdigdi, bakong tanganing paglingkodan, kundi tanganing maglingkod asin itao an saiyang kalag bilang pantubos na karibay nin dakol.” (Mat. 20:28) Bago kaidto, kan ponan ni Jesus na patanidan an saiyang mga parasunod na sa dai na mahahaloy kaipuhan niang “itao an saiyang kalag,” sinadol sia ni Pedro na magin maboot sa saiyang sadiri. Pero, dai nadara si Jesus. Gikan sa boot niang itinao an saiyang kalag, an saiyang sangkap na buhay bilang tawo, para sa katawohan. Bilang resulta kan bakong maimot na pamumuhay ni Jesus, an saiya mismong ngapit nagin segurado. Sia binuhay liwat asin “ilinangkaw sa too nin Dios.” (Gibo 2:32, 33) Sa siring, sia nagin marahayon na halimbawa para sa sato.
8 Hinatolan ni apostol Pablo an mga Kristiano sa Roma na ‘dai magpanigo’ sa saindang sadiri asin ipinagirumdom nia sa sainda na “dawa an Cristo dai nagpanigo sa saiyang sadiri.” (Roma 15:1-3) Kaya, kun siring, gurano kita kaandam na iaplikar an hatol na iyan kan apostol asin na magsakripisyo bilang pag-arog ki Cristo?
Mawot ni Jehova na Itao Niato an Satong Pinakamakakaya
9. Ano sa katunayan an ginigibo nin sarong Kristiano kun idinudusay nia an saiyang sadiri sa Dios?
9 Sa suanoy na Israel, kahagadan sa Ley ni Moises na patalingkason an mga oripon na Hebreo magsalang sa ikapitong taon nin kaoripnan o durante kan taon nin Jubileo. Minsan siring, igwa sinda nin saro pang opsion. Kun an sarong oripon namoot sa kagsadiri sa saiya, puede niang pilion na magdanay na oripon sa pamilya kaini sa bilog niang buhay. (Basahon an Deuteronomio 15:12, 16, 17.) Ginigibo man niato an kaparehong pagpili kun idinudusay niato sa Dios an satong sadiri. Boluntaryo kitang minaoyon na gibohon an kabotan nin Dios, bako na sunodon an mga gusto niato. Sa paggibo kaiyan, ipinapaheling niato an satong hararom na pagkamoot ki Jehova asin an satong kamawotan na paglingkodan sia sagkod lamang.
10. Sa anong paagi na kita rogaring nin Dios, asin an katunayan na iyan maninigong magkaigwa nin anong epekto sa satong kaisipan asin gawe-gawe?
10 Kun sa presente ika nakikipag-adal sa Biblia sa mga Saksi ni Jehova, nakikikabtang sa paghuhulit kan maogmang bareta, asin nag-aatender sa Kristianong mga pagtiripon, dapat kang tawan nin komendasyon. Naglalaom kami na sa dai na mahahaloy ika mapapahiro na idusay an saimong sadiri ki Jehova asin ihahapot mo an ihinapot kan Etiope ki Felipe: “Ano an nakakaolang sa sako na mabautismohan?” (Gibo 8:35, 36) Sa siring, an saimong relasyon sa Dios magigin arog kan sa mga Kristiano na sinuratan ni Pablo: “Kamo bakong sadiri nindo man sana, huli ta kamo binakal nin sarong halaga.” (1 Cor. 6:19, 20) Baga man an satong paglaom langitnon o daganon, kun idinusay niato an satong sadiri ki Jehova, sia an Kagsadiri sa sato. Kun siring, mahalaga nanggad na daogon niato an maimot na mga mawot asin “umontok na [kita] sa pagigin oripon nin mga tawo”! (1 Cor. 7:23) Marahayon nanggad na pribilehio na magin maimbod na lingkod ni Jehova tanganing gamiton nia siring sa gusto nia!
11. Sinasadol an mga Kristiano na magdolot nin anong atang, asin ano talaga an kahulogan kaiyan, siring kan ilinaladawan kan mga atang sa Ley ni Moises?
11 Sinadol ni Pablo an mga kapagtubod: “Idolot nindo an saindong hawak bilang sarong atang na buhay, banal, inaako nin Dios, sarong sagradong paglilingkod na igwa kan saindong kakayahan na mangatanosan.” (Roma 12:1) Tibaad ipinagirumdom kan mga tataramon na iyan sa mga Kristianong Judio an dapit sa mga atang na kabtang kan saindang pagsamba bago sinda nagin parasunod ni Jesus. Puedeng aram ninda na sa Ley ni Moises, an mga hayop na idinodolot sa altar ni Jehova dapat na iyo an pinakamarahay na klase. Dai inaako an ano man na maluyang klase. (Mal. 1:8, 13) Totoo man iyan kun idinodolot niato an satong hawak bilang “sarong atang na buhay.” Itinatao niato ki Jehova an satong pinakamakakaya, bako sanang an tada kaiyan pagkatapos na mapanigoan niato an gabos na personal na kamawotan niato. Kun idinudusay niato an satong sadiri sa Dios, lubos niatong itinatao an satong “kalag,” an satong buhay—kaiba an satong kosog, mahahalagang bagay, asin mga abilidad. (Col. 3:23) Ano an kahulogan kaiyan sa praktikal na paagi?
Madonong na Gamiton an Saindong Panahon
12, 13. Ano an sarong paagi na ikakatao niato ki Jehova an satong pinakamakakaya?
12 An sarong paagi tanganing itao ki Jehova an pinakamakakaya niato iyo an madonong na paggamit kan satong panahon. (Basahon an Efeso 5:15, 16.) Nangangaipo iyan nin pagpupugol sa sadiri. Huli sa mga impluwensia kan kinaban kaiba an minanang pagkabakong sangkap, may tendensia kita na gamiton an panahon para sana sa satong kaogmahan o personal na pakinabang. Totoo, “para sa gabos na bagay igwa nin itinalaan na panahon,” kaiba an makawiwiling pagpahirohingalo asin an sekular na pagtatrabaho tanganing maotob niato an satong Kristianong mga obligasyon. (Ecl. 3:1) Minsan siring, an sarong nagdusay na Kristiano kinakaipuhan na magdanay na timbang asin madonong na gamiton an saiyang panahon.
13 Kan si Pablo magsongko sa Atenas, nariparo nia na “an gabos na taga Atenas asin an mga taga ibang daga na nag-ontok dian daing ibang ginigibo sa saindang oras nin pagpahingalo kundi an pag-estorya nin sarong bagay o pagdangog sa sarong bagay na bago.” (Gibo 17:21) Ngonyan, dakol man an nagsasayang kan saindang panahon. Kaiba sa modernong mga pandisturbo iyo an pagheling nin telebisyon, pagkawat nin video games, asin paggamit nin Internet. Padagos na nagdadakol an mga pandisturbo na paorog nang paorog na nakakaubos kan satong panahon. Kun totogotan niato an mga iyan na kuanon an satong panahon, tibaad mapabayaan niato an satong espirituwal na mga pangangaipo. Tibaad maniwala pa ngani kita na sibot kitang marhay kaya dai na niato maasikaso an “orog na mahalagang mga bagay”—mga bagay na konektado sa paglilingkod ki Jehova.—Fil. 1:9, 10.
14. Anong mga hapot an maninigo na seryosong horophoropon niato?
14 Kun siring, bilang sarong nagdusay na lingkod ni Jehova, hapota an saimong sadiri, ‘Kaiba daw sa aroaldaw na iskedyul ko an pagbasa sa Biblia, paghorophorop, asin pamimibi?’ (Sal. 77:12; 119:97; 1 Tes. 5:17) ‘Nagtatagama daw ako nin panahon tanganing mag-andam para sa Kristianong mga pagtiripon? Pinaparigon ko daw an boot nin iba paagi sa pagkomento durante nin mga pagtiripon?’ (Sal. 122:1; Heb. 2:12) Sinasabi kan Tataramon nin Dios na si Pablo asin Bernabe naggamit nin “harohalawig na panahon sa pagtaram na may pagkapusoan paagi sa autoridad ni Jehova.” (Gibo 14:3) Puede mo daw na bagohon an saimong mga kamugtakan tanganing gumamit nin orog na panahon, “harohalawig na panahon” pa ngani, sa paghuhulit, tibaad paagi sa pagpapayunir?—Basahon an Hebreo 13:15.
15. Paano madonong na ginagamit kan kamagurangan an saindang panahon?
15 Kan si apostol Pablo asin si Bernanbe magsongko sa Kristianong kongregasyon sa Antioquia, “naghaloy sinda sa kaibanan kan mga disipulo” tanganing parigonon an boot kan mga ini. (Gibo 14:28) Ginagamit man kan mamomoton na kamagurangan ngonyan an dakol na panahon ninda tanganing pakosogon an iba. Apuera sa saindang ministeryo sa langtad, pinagmamaigotan kan kamagurangan na pastoran an aripompon, hanapon an nawawarang karnero, tabangan an naghehelang, asin asikasohon an dakol na iba pang paninimbagan sa laog kan kongregasyon. Kun ika sarong bautisadong tugang na lalaki, itinotogot daw kan saimong mga kamugtakan na aboton mo an dugang pang mga pribilehio nin paglilingkod?
16. Ano an nagkapirang paagi na ‘makakagibo kita nin marahay sa mga may relasyon sa sato sa pagtubod’?
16 Dakol an nakanompong nin kagayagayahan paagi sa pagtabang sa pag-ayuda sa mga nagin biktima nin natural o gibo nin tawo na mga kalamidad. Halimbawa, sarong tugang na babae na mga 65 anyos asin naglilingkod sa Bethel an nagbiahe nin hararayong distansia sa nagkapirang pangyayari tanganing magboluntaryo bilang sarong nagtatabang sa pag-ayuda. Taano ta ginamit nia an saiyang bakasyon sa paaging iyan? Sia nagsabi: “Minsan ngani mayo ako nin espesyal na mga kakayahan, saro idtong pribilehio na gibohon an ano man na kinakaipuhan. Naparigon akong marhay na maheling an makosog na pagtubod kan sakong mga tugang na nagin biktima nin grabeng kawaran nin materyal na mga bagay.” Apuera kaini, rinibo sa bilog na kinaban an nagtatabang sa pagtogdok nin mga Kingdom Hall asin Assembly Hall. Paagi sa pakikikabtang sa siring na mga aktibidad, daing kaimotan ‘kitang naggigibo nin marahay sa mga may relasyon sa sato sa pagtubod.’—Gal. 6:10.
“Ako Kaiba Nindo sa Gabos na Aldaw”
17. Ano an personalmenteng itatao mo bilang karibay kan buhay na daing katapusan?
17 An sosyedad nin tawo na siblag sa Dios mawawara na. Dai niato aram nin eksakto kun noarin iyan mangyayari. Pero, aram nanggad niato na “nainaan na an panahon na natatada” asin “an kamugtakan kan kinaban na ini nagbabago.” (Basahon an 1 Corinto 7:29-31.) Iyan nagtatao nin orog pang kahulogan sa hapot ni Jesus: “Ano talaga an itatao nin tawo bilang karibay kan saiyang kalag?” Seguradong gigibohon niato an ano man na pagsasakripisyo na hinahagad sa sato ni Jehova tanganing makamtan niato an “tunay na buhay.” (1 Tim. 6:19) Tunay nanggad, kaipuhan na himateon niato an konseho ni Jesus na ‘padagos na sumunod sa saiya’ asin “hanapon nguna an kahadean.”—Mat. 6:31-33; 24:13.
18. Puede kitang magkaigwa nin anong kompiansa, asin taano?
18 Totoo, an pagsunod ki Jesus bakong pirmeng pasil, asin siring kan ipinatanid ni Jesus, iyan nagin dahelan na an nagkapira magadan sa sistemang ini nin mga bagay. Minsan siring, kapareho ni Jesus, linilikayan niato an sugot na ‘magin maboot sa satong sadiri.’ Nagtutubod kita sa pagpasarig sa boot na itinao nia sa saiyang linahidan na mga parasunod kan enot na siglo: “Ako kaiba nindo sa gabos na aldaw sagkod sa pagtatapos kan sistema nin mga bagay.” (Mat. 28:20) Kun siring, gamiton logod niato sa pinakalubos na paaging posible an satong panahon asin mga kakayahan para sa sagradong paglilingkod. Kun ginigibo niato iyan, ipinapaheling niato an satong kompiansa na ililigtas kita ni Jehova sa dakulang kahorasaan o bubuhayon nia liwat kita sa bagong kinaban. (Heb. 6:10) Sa siring, ikakapaheling ta kun gurano niato pinapahalagahan na marhay an balaog na buhay.
Ano an Isisimbag Nindo?
• Paano ipinaheling ni Jesus na pambihira an saiyang pagigin andam na maglingkod sa Dios asin sa tawo?
• Taano ta maninigong paindahan nin saro an saiyang sadiri, asin paano ini gigibohon?
• Sa suanoy na Israel, anong klaseng mga atang an solamenteng inaako ni Jehova, asin paano kita ginigiyahan kaiyan ngonyan?
• Sa anong mga paagi madonong na magagamit niato an satong panahon?
[Mga Hapot Para sa Pag-adal]
[Mga Ritrato sa pahina 26]
Pirmeng ginigibo ni Jesus an mga bagay na nakakapaogma sa Dios
[Ritrato sa pahina 28]
Itinao kan mapagpahalagang mga Israelita an saindang pinakamakakaya tanganing suportaran an tunay na pagsamba
[Mga Ritrato sa pahina 29]
Mapapaogma niato an Dios paagi sa madonong na paggamit kan satong panahon