Binabantayan Kita ni Jehova Para sa Satong Ikakarahay

‘An mga mata ni Jehova naglilibot sa bilog na daga tanganing ipaheling an saiyang kosog para duman sa mga bilog an puso para sa saiya.’​—2 CRON. 16:9.

1. Taano ta sinisiyasat kita ni Jehova?

SI Jehova iyo an sangkap na Ama. Midbid nia kitang marhay kaya aram nia dawa an “tendensia kan [satong] mga kaisipan.” (1 Cron. 28:9) Minsan siring, dai nia kita sinisiyasat tangani sanang hanapan kita nin sala. (Sal. 11:4; 130:3) Imbes, sia may pagkamoot na gusto kitang protehiran sa ano man na tibaad makadanyar sa satong relasyon sa saiya o magsapeligro kan satong oportunidad na magkamit nin buhay na daing katapusan.​—Sal. 25:8-10, 12, 13.

2. Para kiisay ipinapaheling ni Jehova an saiyang kosog?

² Si Jehova daing kaagid sa kapangyarihan asin naheheling nia an gabos. Sa dahelan na iyan, matatabangan nia an mga maimbod sa saiya noarin man sinda mag-apod sa saiya, asin masusuportaran nia sinda durante nin mga pagbalo sa sainda. ‘An mga mata ni Jehova naglilibot sa bilog na daga tanganing ipaheling an saiyang kosog para duman sa mga bilog an puso para sa saiya,’ an sabi kan 2 Cronica 16:9. Mangnohon na ginagamit ni Jehova an saiyang kosog para sa mga naglilingkod sa saiya na may bilog na puso, sarong puso na dalisay asin sinsero an motibo. Dai sia nagpapaheling nin siring na pagmakolog sa mga madaya o mapagsaginsagin.​—Jos. 7:1, 20, 21, 25; Tal. 1:23-33.

 Lumakaw na Kaibanan nin Dios

3, 4. Ano an boot sabihon kan ‘paglakaw na kaibanan nin Dios,’ asin anong mga halimbawa sa Biblia an nagtatao nin liwanag sa bagay na ini?

³ Para sa dakol, bakong kapanipaniwala na an mga tawo totogotan kan Kaglalang kan satong mahiwason na uniberso na lumakaw na kaibanan nia sa espirituwal na paagi. Pero, iyan mismo an gusto ni Jehova na gibohon niato. Kan mga panahon kan Biblia, si Enoc asin Noe ‘naglakaw na kaibanan nin Dios.’ (Gen. 5:24; 6:9) Si Moises “nagpadagos na marigon na garo baga nakakaheling kan Saro na dai naheheling.” (Heb. 11:27) Si Hadeng David mapakumbabang naglakaw na kaibanan kan saiyang langitnon na Ama. Sia nagsabi: “Huli ta [si Jehova] yaon sa sakong too, dai ako matatanyog.”​—Sal. 16:8.

⁴ Siempre, dai kita puedeng literal na kumapot sa kamot ni Jehova asin lumakaw na kaibanan nia. Alagad magigibo niato iyan sa piguratibong paagi. Paano? An salmistang si Asaf nagsurat: “Ako danay na kaiba mo; kinapotan mo an too kong kamot. Paagi sa saimong hatol gigiyahan mo ako.” (Sal. 73:23, 24) Sa simpleng pagtaram, naglalakaw kita na kaibanan ni Jehova kun maingat niatong sinusunod an saiyang hatol, na sa pangenot inaako niato paagi sa saiyang nasusurat na Tataramon saka paagi sa “maimbod asin mapagmansay na oripon.”​—Mat. 24:45; 2 Tim. 3:16.

5. Paano binabantayan ni Jehova bilang mamomoton na ama an mga maimbod sa saiya, asin ano an maninigo niatong magin saboot sa saiya?

⁵ Huling pinapahalagahan ni Jehova an mga naglalakaw na kaibanan nia, sia siring sa sarong mamomoton na ama na nagbabantay sa sainda, nag-aataman sa sainda, nagpoprotehir sa sainda, asin nagtotokdo sa sainda. “Papangyayarihon ko na ika magkaigwa nin pakarorop asin totokdoan taka sa dalan na maninigo mong lakawan,” an sabi nin Dios. “Magtatao ako nin sadol mantang ako nakaturuhok sa saimo.” (Sal. 32:8) Hapoton an saimong sadiri: ‘Naiimahinar ko daw an sadiri ko na naglalakaw na nakakapot sa kamot ni Jehova, sabi ngani, na naghihinanyog sa saiyang kadonongan asin nakakaaram na mamomoton siang nakaturuhok sa sako? An pakaaram ko daw dapit sa saiyang presensia nakakaimpluwensia sa sakong mga kaisipan, pananaram, asin gibo? Asin kun ako nasasala, minamansay ko daw si Jehova, bako bilang sarong Dios na daing malasakit asin sobra kaestrikto, kundi bilang sarong mamomoton saka maheherakon na Ama na gustong tabangan an mga nagsosolsol na magin dayupot liwat sa saiya?’​—Sal. 51:17.

6. Taano ta nakakalabi si Jehova sa magurang na tawo?

⁶ Kun beses, puede kitang tabangan ni Jehova dawa bago pa kita makalakaw sa salang dalan. Halimbawa, tibaad naheheling nia na an satong puso, na may tendensiang magin madaya, nagpopoon nang magmawot nin mga bagay na sala. (Jer. 17:9) Sa siring na situwasyon, puede pa ngani siang humiro nin mas amay kisa sa mga magurang na tawo huli ta an saiyang “nagliliwanag na mga mata” igwa nin kakayahan na helingon an talagang nasa laog niato asin siyasaton an satong kairairaroming mga kaisipan. (Sal. 11:4; 139:4; Jer. 17:10) Isip-isipa an nagin reaksion nin Dios sa sarong situwasyon na nangyari sa buhay ni Baruc, an personal na sekretaryo asin dayupot na katood ni propeta Jeremias.

Sarong Tunay na Ama ki Baruc

7, 8. (a) Siisay si Baruc, asin anong nakakaraot na mga kamawotan an tibaad nagpoon na tumalubo sa saiyang puso? (b) Paano ipinaheling ni Jehova an saiyang sa amang pagmakolog ki Baruc?

⁷ Si Baruc sarong propesyonal na sekretaryo na maimbod na naglingkod kaiba ni Jeremias sa asignasyon na nagin depisil​—an pagpahayag kan mga paghokom ni Jehova sa Juda. (Jer. 1:18, 19) May panahon na si Baruc, na tibaad kabilang sa sarong prominenteng pamilya, nagpoon na maghanap nin “darakulang bagay” para sa saiyang sadiri. Tibaad pinonan niang pataluboon an personal na mga ambisyon o pagmawot na umasenso sa materyal. Ano man an kamugtakan, naheling ni Jehova na an peligrosong kaisipan na ini nagtatalubo na sa puso ni Baruc. Paagi ki Jeremias, huminiro tolos si Jehova dapit sa bagay na iyan, na sinasabi ki Baruc: “Ika nagsabing: ‘Herak man sa sakuya ngonyan ta dinugangan ni Jehova nin kamondoan an sakuyang kakologan! Napagal ako huli sa sakuyang pag-agagha, asin dai ako nakanompong nin pahingaloan.’” Dangan an Dios nagsabi: “Nagpaparahanap ka nin darakulang bagay para sa saimo man sana. Dai ka na magparahanap.”​—Jer. 45:1-5.

⁸ Minsan ngani marigon niang trinatar si Baruc, si Jehova dai naanggot, kundi nagpaheling sia nin  tunay na sa amang pagmakolog. Malinaw nanggad, naheling nin Dios na an mga kamawotan kan tawong iyan dai nagpaheling nin maraot o tusong puso. Aram man ni Jehova na an Jerusalem asin Juda nasa huring mga aldaw na kaiyan, asin habo nia na mapasala si Baruc durante kan delikadong panahon na iyan. Huli kaini, tanganing mapagmata sa realidad an saiyang lingkod, ipinagirumdom nin Dios ki Baruc na Sia ‘may darang kapahamakan sa gabos na laman,’ na sinasabi pa na kun si Baruc mahiro na may kadonongan, sia mabubuhay. (Jer. 45:5) Garo man sana sinabi nin Dios: ‘Magin realistiko ka, Baruc. Isip-isipa an madali nang mangyari sa makasalan na Juda asin Jerusalem. Magdanay kang maimbod asin mabuhay! Poprotehiran taka.’ Malinaw na naabot ni Jehova an puso ni Baruc, huling ini positibong naghimate asin nakaligtas sa pagkalaglag kan Jerusalem, na nangyari pakalihis nin 17 taon.

9. Paano nindo sisimbagon an mga hapot na pinalataw sa parapo?

⁹ Mantang hinohorophorop nindo an pagkasaysay manongod ki Baruc, isip-isipa an minasunod na mga hapot asin teksto: An pagtratar nin Dios ki Baruc naghahayag nin ano manongod ki Jehova asin sa saiyang mga saboot sa mga lingkod nia? (Basahon an Hebreo 12:9.) Huli sa delikadong mga panahon na kinabubuhayan niato, ano an manonodan niato sa hatol nin Dios ki Baruc asin sa reaksion ni Baruc? (Basahon an Lucas 21:34-36.) Bilang pag-arog ki Jeremias, paano ikakapabanaag nin Kristianong kamagurangan an pagmakolog ni Jehova sa Saiyang mga lingkod?​—Basahon an Galacia 6:1.

Ipinapabanaag kan Aki an Pagkamoot kan Ama

10. Paano si Jesus nasangkapan na gibohon an saiyang katongdan bilang Payo kan Kristianong kongregasyon?

¹⁰ Durante kan mga panahon bago kan mga Kristiano, an pagkamoot ni Jehova sa saiyang banwaan ihinayag paagi sa saiyang mga propeta asin iba pang maimbod na lingkod. Ngonyan, an pagkamoot na iyan naheheling, orog sa gabos, sa Payo kan Kristianong kongregasyon, si Jesu-Cristo. (Efe. 1:22, 23) Huli kaini, sa libro nin Kapahayagan, si Jesus ilinaladawan bilang sarong kordero na may “pitong mata, mga mata na nangangahulogan kan pitong espiritu nin Dios na isinugo sa bilog na daga.” (Kap. 5:6) Iyo, huling itinao ki Jesus an lubos na kapangyarihan kan banal na espiritu nin Dios, sia igwa nin sangkap na pakabatid. Naheheling man nia kun ano an satong panlaog na pagkatawo, asin aram nia an gabos na nangyayari.

11. Ano an papel ni Cristo, asin paano an saiyang saboot sa sato nagpapabanaag kan saboot kan saiyang Ama?

¹¹ Pero, arog ni Jehova, si Jesus bakong garo sarong pulis sa langit. Sinisiyasat nia kita paagi sa mga mata nin pagkamoot. An titulong “Amang Daing Sagkod,” na saro sa mga titulo ni Jesus,  nagpapagirumdom sa sato kan saiyang papel sa pagtao nin buhay na daing katapusan sa gabos na nagtutubod sa saiya. (Isa. 9:6) Dugang pa, bilang Payo kan Kristianong kongregasyon, puedeng pahiroon ni Cristo an andam asin maygurang sa espirituwal na mga Kristiano, nangorogna an kamagurangan, na magtao nin karangahan o hatol sa mga nangangaipo kaiyan.​—1 Tes. 5:14; 2 Tim. 4:1, 2.

12. (a) Ano an ihinahayag manongod ki Jesus kan mga surat sa pitong kongregasyon sa Asia Minor? (b) Paano ipinapabanaag kan kamagurangan an saboot ni Cristo sa aripompon nin Dios?

¹² An hararom na interes ni Cristo sa aripompon maheheling sa mga surat sa kamagurangan kan pitong kongregasyon sa Asia Minor. (Kap. 2:1–3:22) Sa mga surat na iyan, parehong ipinarisa ni Jesus an saiyang pakaaram sa nangyayari sa lambang kongregasyon asin an rarom kan saiyang pagmakolog sa mga parasunod nia. Orog na totoo iyan ngonyan mantang an bisyon sa Kapahayagan naootob durante kan “Aldaw kan Kagurangnan.” * (Kap. 1:10) An pagkamoot ni Cristo sa parate ipinapahayag paagi sa kamagurangan, na naglilingkod bilang espirituwal na mga pastor kan kongregasyon. Puede niang pahiroon an ‘balaog na mga lalaking’ ini na magtao nin karangahan, pagparigon sa boot, o hatol kun kaipuhan. (Efe. 4:8; Gibo 20:28; basahon an Isaias 32:1, 2.) Minamansay daw nindo an saindang mga paghihingoa bilang kapahayagan kan interes ni Cristo sa saindo personalmente?

Tabang sa Tamang Panahon

13-15. Paano puedeng simbagon nin Dios an satong mga pamibi? Magtao nin mga halimbawa.

¹³ Namibi na daw kamo nin maigot tanganing humagad nin tabang dangan sinimbag iyan paagi sa nakakaparigon sa boot na pagdalaw nin sarong Kristianong maygurang sa espirituwal? (Sant. 5:14-16) O tibaad uminabot an tabang paagi sa sarong pahayag sa Kristianong pagtiripon o paagi sa impormasyon sa saro sa mga publikasyon niato. Sa parate, an mga paaging ini an ginagamit ni Jehova sa pagsimbag sa mga pamibi. Halimbawa, pagkatapos na magpahayag an sarong magurang sa kongregasyon, dinolok sia nin sarong tugang na babae na nagin biktima nin grabeng inhustisya nagkapirang semana bago kan pahayag na iyan. Imbes na magreklamo an tugang na ini manongod sa problema nia, nagpahayag sia nin hararom na pag-apresyar sa nagkapirang punto sa mga teksto na pinalataw sa pahayag. Iyan aplikado sa situwasyon nia asin nagtao sa saiya nin dakulang karangahan. Maogma nanggad sia na nag-atender sia sa pagtiripon na iyan!

¹⁴ Mapadapit sa tabang na inaako paagi sa pamibi, isip-isipa an halimbawa nin tolong bilanggo na nakanood kan katotoohan sa Biblia mientras na nasa karsel asin nagin dai pa bautisadong mga parahayag. Huli sa sarong madahas na pangyayari, dinugangan an mga restriksion sa gabos na bilanggo sa presohan na iyan. Nagin dahelan iyan nin pagprotesta. Nagdesisyon an mga bilanggo na pagkatapos kan pamahaw sa sunod na aga, dai ninda ibabalik an saindang mga plato bilang pagpaheling nin pakisuway. Nasa masakit na kamugtakan ngonyan an tolong dai pa bautisadong parahayag na ini. Kun maiba sinda sa pagrebeldeng iyan, lalapason ninda an hatol ni Jehova na nasa Roma 13:1. Kun dai sinda maiba dian, tibaad magbalos sa sainda an anggot na mga bilanggo.

¹⁵ Mantang mayo sinda nin oportunidad na makaolay an lambang saro, an tolong lalaking ini namibi na logod tawan sinda nin kadonongan. Kan sunod na aga, naaraman kan tolo na eksaktong parareho an solusyon na napagdesisyonan ninda​—dai na sana sinda mapamahaw. Kan sa huri mag-abot  an mga guardia tanganing kuanon an mga plato, an tolong lalaking iyan mayo nin plato na ibabalik. Naogma nanggad sinda na an “Paradangog nin pamibi” harani sa sainda!​—Sal. 65:2.

Pag-atubang sa Ngapit na May Kompiansa

16. Paano ipinapaheling kan paghuhulit an pagmakolog ni Jehova sa mga arog-karnero?

¹⁶ An pambilog na kinaban na paghuhulit saro pang ebidensia kan pagmakolog ni Jehova sa mga tawo na sadiosan an puso, saen man sinda nag-iistar. (Gen. 18:25) Puedeng giyahan ni Jehova, sa parate paagi sa mga anghel, an saiyang mga lingkod pasiring sa mga arog-karnero​—dawa kun an mga ini nakaistar sa mga lugar na dai pa nahuhulitan kan maogmang bareta. (Kap. 14:6, 7) Halimbawa, paagi sa sarong anghel, giniyahan nin Dios si Felipe, na sarong ebanghelisador kan enot na siglo, na manompongan an sarong opisyal na Etiope asin ipaliwanag digdi an Kasuratan. Ano an nagin resulta? Inako kan lalaki an maogmang bareta asin sia nagin bautisadong parasunod ni Jesus. *​—Juan 10:14; Gibo 8:26-39.

17. Taano ta dai kita maninigong magparahadit nin sobra manongod sa ngapit?

¹⁷ Mantang an presenteng sistema nin mga bagay pasiring sa katapusan kaiyan, mapadagos an ihinulang “mga kolog nin kasakitan.” (Mat. 24:8) Halimbawa, tibaad maglangkaw na gayo an mga presyo nin kakanon huli sa nagdadakulang pangangaipo dian, maraot na kamugtakan nin panahon, o kadaihan nin kasegurohan sa ekonomiya. Tibaad magin mas depisil na makakua nin trabaho, asin an mga empleyado tibaad mapiritan na magtrabaho nin mas halawig. Ano man an mangyari, dai kaipuhan na magparahadit nin sobra an gabos na ineenot an espirituwal na mga bagay asin nagpapadanay nin ‘simpleng mata.’ Aram ninda na namomotan sinda nin Dios asin aatamanon nia sinda. (Mat. 6:22-34) Halimbawa, isip-isipa kun paano itinao ni Jehova an materyal na pangangaipo ni Jeremias durante kan maribok na katapusan kan Jerusalem kan 607 B.C.E.

18. Paano pinatunayan ni Jehova an saiyang pagkamoot ki Jeremias durante kan pagsalikop sa Jerusalem?

¹⁸ Durante kan huring kabtang kan pagsalikop kan mga Babilonyo sa Jerusalem, si Jeremias nakabilanggo kaidto sa Patyo kan Bantay. Paano sia makakakua nin kakanon? Kun talingkas kutana sia, makakahanap sia kaiyan. Pero, sia biyong nakadepende sa mga nakapalibot sa saiya, na an kadaklan sa sainda naoongis sa saiya! Alagad, si Jeremias nagtiwala bakong sa mga tawo kundi sa Dios, na nanuga na aatamanon sia. Inotob daw ni Jehova an saiyang panuga? Iyo nanggad! Sinegurado nia na si Jeremias mag-aako aroaldaw nin “sarong bilog na tinapay . . . sagkod na naubos an gabos na tinapay sa siudad.” (Jer. 37:21) Si Jeremias, saka si Baruc, Ebed-melec, asin iba pa, nakaligtas sa panahon na iyan nin tiggutom, helang, patin kagadanan.​—Jer. 38:2; 39:15-18.

19. Mantang inaatubang niato an ngapit, ano an maninigo na determinado niatong gibohon?

¹⁹ Iyo, “an mga mata ni Jehova nasa mga matanos, asin an saiyang mga talinga nasa saindang pagngayongayo.” (1 Ped. 3:12) Naggagayagaya daw kamo sa pagigin mapagbantay kan saindong langitnon na Ama? Namamatean daw nindo na kamo ligtas asin tiwasay sa pakaaram na binabantayan nia kamo para sa saindong ikakarahay? Kun siring, magin determinado kamong padagos na lumakaw na kaibanan nin Dios​—ano man an tibaad nakatagama sa ngapit. Makakasegurado kita na pirmeng maingat na babantayan ni Jehova bilang mamomoton na ama an gabos na maimbod sa saiya.​—Sal. 32:8; basahon an Isaias 41:13.

[Mga Nota sa Ibaba]

Ikakapaliwanag daw Nindo?

• Paano niato ikakapaheling na kita ‘naglalakaw na kaibanan nin Dios’?

• Paano ipinaheling ni Jehova an saiyang pagkamoot ki Baruc?

• Bilang Payo kan Kristianong kongregasyon, paano ipinapabanaag ni Jesus an mga kualidad kan saiyang Ama?

• Sa anong mga paagi niato ikakapaheling na nagtitiwala kita sa Dios durante kan delikadong mga panahon na ini?

[Mga Hapot Para sa Pag-adal]

[Mga Ritrato sa pahina 9]

Arog kan ginibo ni Jeremias ki Baruc, ipinapabanaag kan Kristianong kamagurangan ngonyan an pagmakolog ni Jehova

[Ritrato sa pahina 10]

Paano si Jehova puedeng magtao nin tabang sa tamang panahon?