“Tumangon Nindo an Diablo” Arog kan Ginibo ni Jesus

“Tumangon nindo an Diablo, asin sia madulag sa saindo.”​—SANT. 4:7.

1. Anong pagtumang an aram ni Jesus na aatubangon nia digdi sa daga, asin may anong resulta?

ARAM ni Jesu-Cristo na mapapaatubang sia sa pagtumang kan Diablo. Malinaw an bagay na ini sa sinabi nin Dios sa halas, na sa katunayan an pinanonongdan iyo an maraot na rebeldeng espiritu na nagtaram paagi kaiyan: “Papag-iiwalon taka asin an babae [an langitnon na kabtang kan organisasyon ni Jehova] saka an saimong banhi asin an saiyang banhi. Lulugadon ka nia [ni Jesu-Cristo] sa payo asin lulugadon mo sia sa bool.” (Gen. 3:14, 15; Kap. 12:9) An paglugad ki Jesus sa bool nangangahulogan na temporaryo sana siang magagadan mantang sia yaon digdi sa daga, huling bubuhayon sia liwat ni Jehova sa langitnon na kamurawayan. Alagad an paglugad sa payo kan halas mangangahulogan na an Diablo gagadanon, na huli kaiyan sia nungkang mabubuhay pa.​—Basahon an Gibo 2:31, 32; Hebreo 2:14.

2. Taano ta si Jehova may kompiansa na magigin mapanggana si Jesus sa paglaban sa Diablo?

² May kompiansa si Jehova na mapangganang ootobon ni Jesus an asignasyon kaini asin tutumangon kaini an Diablo mantang yaon digdi sa daga. Taano ta si Jehova makakasiertong marhay sa bagay na ini? Huli ta haloyon na niang linalang si Jesus sa langit bago kaiyan, naobserbaran nia ini, asin aram nia na an “pangenot na trabahador” saka “panganay sa gabos na linalang” na ini makinuyog asin maimbod. (Tal. 8:22-31; Col. 1:15) Kaya kan si Jesus  isugo sa daga asin an Diablo togotan na baloon sia sagkod sa kagadanan, may kompiansa an Dios na magigin mapanggana an Saiyang bugtong na Aki.​—Juan 3:16.

Iniingatan ni Jehova an Saiyang mga Lingkod

3. Ano an saboot kan Diablo sa mga lingkod ni Jehova?

³ Sinambit ni Jesus an Diablo bilang “an namamahala sa kinaban na ini” asin pinatanidan Nia an Saiyang mga disipulo na sinda pepersegiron, arog kan ginibo sa saiya. (Juan 12:31; 15:20) An kinaban, na namumugtak sa kapangyarihan ni Satanas na Diablo, naoongis sa tunay na mga Kristiano huling sinda naglilingkod ki Jehova asin mga parahulit nin katanosan. (Mat. 24:9; 1 Juan 5:19) Partikularmenteng punteriya kan Diablo an natatada kan mga linahidan na pag-abot nin panahon mamamahala kaiba ni Cristo sa saiyang langitnon na Kahadean. Punteriya man ni Satanas an dakol na Saksi ni Jehova na may paglaom na mabuhay sagkod lamang sa paraisong daga. An Tataramon nin Dios nagpapatanid sa sato: “An saindong kaiwal, an Diablo, naglalakaw na siring sa nagngangarob na leon, na naghahanap nin masisiba.”​—1 Ped. 5:8.

4. Ano an nagpapatunay na an banwaan nin Dios mapanggana sa pagtumang sa Diablo sa panahon niato?

⁴ Bilang organisasyon na sinusuportaran ni Jehova Dios, mapanggana niatong tinutumang an Diablo. Isip-isipa an mga katunayan na ini: Sa nakaaging 100 na taon, an nagkapira sa pinakamaisog na mga diktadura sa kasaysayan nagmaigot na paraon an mga Saksi ni Jehova. Alagad an bilang kan mga Saksi padagos na nagdadakol asin uminabot na ngonyan sa haros 7,000,000 sa labing 100,000 na kongregasyon sa bilog na kinaban. An maringis na mga diktadura na nagpersegir sa banwaan ni Jehova iyo an napara!

5. Paano nagkakatotoo an Isaias 54:17 para sa mga lingkod ni Jehova?

⁵ Sa pagtaram dapit sa kongregasyon nin suanoy na Israel bilang saiyang simbolikong ‘babae,’ an Dios nanuga: “Ano man na armas na gigibohon tumang sa saimo dai magkakaepekto, asin kokondenaron mo an arin man na dila na matumang sa saimo sa paghokom. Iyo ini an minanang rogaring kan mga lingkod ni Jehova, asin gikan sa sako an saindang katanosan.” (Isa. 54:11, 17) An panugang iyan nagkakatotoo para sa banwaan ni Jehova sa bilog na daga durante kan “huring mga aldaw” na ini. (2 Tim. 3:1-5, 13) Padagos niatong tinutumang an Diablo, asin dai nagkakaepekto an ano man na armas na pinagmamaigotan niang gamiton tanganing paraon an banwaan nin Dios, huling si Jehova nasa kampi niato.​—Sal. 118:6, 7.

6. Ano an sinasabi sa sato kan hula ni Daniel manongod sa kaaabtan kan pamamahala kan Diablo?

⁶ Sa marikas na nagdadangadang na katapusan kan bilog na maraot na sistemang ini nin mga bagay, an gabos na kabtang kan pamamahala ni Satanas biyong paparaon. Sa pagsurat paagi sa pasabong nin Dios, si propeta Daniel naghula: “Sa mga aldaw kan mga hadeng idto [na nag-eeksister sa satong panahon] an Dios nin langit mapatindog nin sarong kahadean [sa langit] na dai noarin man malalaglag. Asin an kahadean mismo dai itatao sa arin man na ibang banwaan. Iyan an maronot asin matapos kan gabos na kahadean na ini [na nag-eeksister ngonyan], asin iyan mismo magdadanay sagkod sa mga panahon na daing talaan.” (Dan. 2:44) Kun mangyari na iyan, mawawara na an pamamahala ni Satanas sagkod an pamamahala nin bakong sangkap na mga tawo. An gabos na kabtang kan sistema nin mga bagay kan Diablo mawawara na sagkod lamang, asin an Kahadean nin Dios mamamahala sa bilog na daga na mayong nagtutumang.​—Basahon an 2 Pedro 3:7, 13.

7. Paano niato naaaraman na an mga lingkod ni Jehova bilang mga indibiduwal mapangganang makakatumang sa Diablo?

⁷ Mayong duwa-duwa na iingatan asin mag-ooswag sa espirituwal an organisasyon ni Jehova. (Basahon an Salmo 125:1, 2.) Kumusta man kita? Sinasabi sa sato kan Biblia na puede kitang magin mapanggana sa pagtumang sa Diablo, siring nanggad kan ginibo ni Jesus. Tunay nanggad, an hula na itinao ni Cristo paagi ki apostol Juan nagpapaheling na sa ibong nin pagtumang ni Satanas, an “sarong dakulang kadaklan” kan mga igwa nin daganon na paglaom makakaligtas sa katapusan kan sistemang ini. Segun sa Kasuratan, sinda nagkukurahaw: “Utang niamo an kaligtasan sa satong Dios, na nakatukaw sa trono, asin sa Kordero [ki Jesu-Cristo].” (Kap. 7:9-14) Sinasabi na si Satanas dinadaog kan mga linahidan, asin sia mapanggana man na tinutumang kan saindang kairiba, an “ibang mga karnero.” (Juan 10:16; Kap. 12:10, 11) Alagad nangangaipo ini nin maigot na paghihingoa asin  odok na pamimibi tanganing ‘iligtas kita sa saro na marigsok.’​—Mat. 6:13.

An Sangkap na Halimbawa sa Pagtumang sa Diablo

8. Ano an enot na nakarekord na sugot na ginamit kan Diablo ki Jesus sa kaawagan, asin ano an reaksion ni Cristo?

⁸ An Diablo nagprobar na raoton an integridad ni Jesus. Sa kaawagan, naggamit si Satanas nin mga sugot sa pagmamaigot nia na ikompromiso ni Jesus an pagkuyog kaini ki Jehova. Minsan siring, si Jesus nagtao nin sangkap na halimbawa sa pagtumang ki Satanas. Pagkatapos na mag-ayuno nin 40 aldaw asin 40 banggi, posibleng marhay na si Jesus may makosog na pagmawot na kumakan. “Kun ika aki nin Dios,” an sabi ni Satanas, “sabihi an mga gapong ini na magin tinapay.” Alagad habo ni Jesus na gamiton para sa personal na pakinabang an kapangyarihan na itinao sa saiya nin Dios. Imbes, si Jesus nagsabi: “Nasusurat, ‘An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.’”​—Mat. 4:1-4; Deut. 8:3.

9. Taano ta dapat niatong labanan an mga pagprobar kan Diablo na aprobetsaran an satong natural na pisikal na mga pagmawot?

⁹ Ngonyan, hinihingoa kan Diablo na aprobetsaran an natural na pisikal na mga pagmawot kan mga lingkod ni Jehova. Kun siring, dapat kitang magin determinado na labanan an seksuwal na mga sugot, na nangorognang lakop sa imoral na kinaban na ini. An Tataramon nin Dios may pagdodoon na nagsasabi: “Ano! Dai kamo nakakaaram na an mga bakong matanos dai magmamana kan kahadean nin Dios? Dai kamo magpalagalag. Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki . . . an magmamana kan kahadean nin Dios.” (1 Cor. 6:9, 10) Kun siring, malinaw nanggad na an mga tawong imoral an pamumuhay asin habong magbakle dai totogotan na mag-istar sa bagong kinaban nin Dios.

10. Segun sa Mateo 4:5, 6, ano an saro pang sugot na ginamit ni Satanas sa pagprobar na raoton an integridad ni Jesus?

¹⁰ Mapadapit sa saro sa mga sugot na inatubang ni Jesus sa kaawagan, an Kasuratan nagsasabi: “Dinara sia kan Diablo sa banal na siudad, asin ibinugtak sia kaini sa ibabaw kan torre kan templo asin nagsabi sa saiya: ‘Kun ika aki nin Dios, tumagbang ka; huli ta nasusurat, “Pagbobotan nia an saiyang mga anghel mapadapit sa saimo, asin dadarahon ka ninda sa saindang mga kamot, tanganing dai noarin man tumama sa gapo an saimong bitis.”’” (Mat. 4:5, 6) Ipinarisa ni Satanas na ikakapaheling kaini sa pambihirang paagi an pagigin Mesiyas ni Jesus. Pero, sa katunayan, magigin sala asin aroganteng gibo kutana iyan, na dai ooyonan saka dai susuportaran nin Dios. Sa giraray, pinagdanay ni Jesus an saiyang integridad ki Jehova asin nagsimbag sia paagi sa pagkotar nin teksto. Sia nagsabi: “Sa giraray nasusurat, ‘Dai mo pagbaloon si Jehova na saimong Dios.’”​—Mat. 4:7; Deut. 6:16.

11. Paano kita tibaad sugotan ni Satanas, asin ano an puedeng magin resulta kaiyan?

¹¹ Tibaad sugotan kita ni Satanas na maghingoang magin bantog sa manlaenlaen na paagi.  Tibaad pagmaigotan niang sutsutan kita na arogon an kinabanon na mga uso sa paggubing asin pagpakarhay sa sadiri o makikabtang sa kuestionableng aling-alingan. Alagad kun satong babaliwalaon an hatol sa Biblia asin aarogon an kinaban, makakaasa daw kita na poprotehiran kita kan mga anghel sa maraot na mga epekto kan siring na paggawe? Minsan ngani pinagsolsolan ni David an saiyang mga kasalan may koneksion ki Bat-seba, dai sia prinotehiran sa mga epekto kan saiyang mga ginibo. (2 Sam. 12:9-12) Dai niato pagbaloon si Jehova sa salang mga paagi, na tibaad paagi sa pakikikatood sa kinaban.​—Basahon an Santiago 4:4; 1 Juan 2:15-17.

12. Anong sugot an sinambit sa Mateo 4:8, 9, asin ano an nagin reaksion kan Aki nin Dios?

¹² An saro pang sugot na ginamit kan Diablo sa kaawagan may kalabot na pag-alok ki Jesus nin politikal na kapangyarihan. Ipinaheling ni Satanas ki Jesus an gabos na kahadean sa kinaban saka an kamurawayan kan mga iyan asin sia nagsabi: “An gabos na bagay na ini itatao ko sa saimo kun ika lumuhod asin gumibo nin sarong akto nin pagsamba sa sako.” (Mat. 4:8, 9) Maraoton nanggad na pagprobar iyan na kuanon an pagsamba na para ki Jehova asin sutsutan si Jesus na magin bakong maimbod sa Dios! Huling hinorophorop nia an pagmawot na sambahon sia, an dating maimbod na anghel na iyan nagin an makasalan, maaraon, asin maraoton na parasugot na si Satanas na Diablo. (Sant. 1:14, 15) Minsan siring, biyong kabaliktaran, si Jesus determinadong magdanay na maimbod sa saiyang langitnon na Ama asin huli kaiyan sia nagsabi: “Humale ka, Satanas! Huli ta nasusurat, ‘Si Jehova na saimong Dios an dapat mong sambahon, asin sa saiya ka sana dapat na maggibo nin sagradong paglilingkod.’” Sa siring, tinumang giraray ni Jesus an Diablo paagi sa malinaw asin determinadong pananaram. An Aki nin Dios habong magin kabtang kan kinaban ni Satanas asin nungkang masamba sa saro na iyan na marigsok!​—Mat. 4:10; Deut. 6:13; 10:20.

“Tumangon Nindo an Diablo, Asin Sia Madulag sa Saindo”

13, 14. (a) Paagi sa pagpaheling ki Jesus kan gabos na kahadean sa kinaban, ano an iinaalok sa saiya kan Diablo? (b) Paano si Satanas nagpoprobar na raoton kita?

¹³ Paagi sa pagpaheling ki Jesus kan gabos na kahadean sa kinaban, iinaalok sa saiya kan Diablo an kapangyarihan na dai pa nakamtan nin siisay man na tawo. Naghohona si Satanas na maaakit si Jesus sa mga bagay na naheling kaini asin makakakombensir iyan ki Jesus na puede siang magin an pinakamakapangyarihan na namomoon sa politika sa daga. Ngonyan, an Diablo dai nag-aalok sa sato nin mga kahadean, alagad sia nagpoprobar nanggad na raoton an satong puso paagi sa satong mga naheheling, nadadangog, asin naiisip.

¹⁴ Kontrolado ni Satanas an kinaban na ini. Huli kaini, kontrolado nia an media. Kun siring, bakong makangangalas na sagom sa imoralidad saka kadahasan an mga bagay na iinaalok kan kinaban tanganing helingon, dangogon, asin basahon. An mga nagpapaanunsio sa kinaban na ini nagmamaigot na pataluboon sa sato an pagmawot na bumakal nin kadakol na bagay na dai man niato kaipuhan. Paagi kaiyan, daing ontok na sinusugotan kita kan Diablo paagi sa materyalistikong mga atraksion na puedeng makaakit sa satong pagheling, pagdangog, asin pag-isip. Alagad kun dai niato hineheling, dinadangog, asin binabasa an mga bagay na bakong oyon sa Kasuratan, garo man sana sinasabi niato: “Humale ka, Satanas!” Sa siring, inaarog niato si Jesus sa pagigin marigon asin desidido niato na haboan an maating kinaban ni Satanas. An bagay na kita bakong kabtang kan kinaban ni Satanas maheheling man sa kun paano kita may kosog nin boot na nagpapamidbid bilang mga Saksi ni Jehova asin mga parasunod ni Cristo kun nasa pinagtatrabahohan, eskuelahan, pagtaraed, asin kun kaiba an satong mga paryente.​—Basahon an Marcos 8:38.

15. Taano ta an pagtumang ki Satanas nangangahulogan nin padagos na pagigin mapagbantay?

¹⁵ Pagkatapos kan ikatolo na bakong mapangganang pagprobar kan Diablo na ikompromiso ni Jesus an Saiyang integridad sa Dios, “binayaan sia kan Diablo.” (Mat. 4:11) Minsan siring, dai intension ni Satanas na pumondo sa pagsugot ki Jesus, huling sinasabi sa sato: “Kaya an Diablo, huling natapos na an gabos na pagsugot [sa kaawagan], binayaan sia sagkod sa ibang kombenyenteng panahon.” (Luc. 4:13) Kun kita nagigin mapanggana sa pagtumang sa Diablo, maninigo niatong pasalamatan si Jehova. Alagad maninigo man niatong hagadon sa Dios na logod padagos kitang tabangan, huling an Diablo mabalik tanganing sugotan kita sa ibang panahon na kombenyente sa saiya​—asin  bako sanang sa panahon na tibaad inaasahan niato na susugotan kita. Huli kaini, dapat kitang magdanay na mapagbantay sa gabos na panahon, na andam na maghingoa sa paggibo nin sagradong paglilingkod ki Jehova ano man na mga pagbalo an dapat niatong atubangon.

16. Anong makapangyarihan na puersa an itinatao sa sato ni Jehova, asin taano ta maninigo niatong hagadon iyan paagi sa pamibi?

¹⁶ Tanganing tabangan kita sa satong mga paghihingoa na tumangon an Diablo, maninigo na hagadon niato paagi sa pamibi an pinakamakapangyarihan na puersa sa uniberso​—an banal na espiritu nin Dios, asin aakoon niato iyan. Papangyayarihon kita kaiyan na magibo an mga bagay na imposible niatong magibo sa sadiri niatong kosog. Sinierto ni Jesus sa saiyang mga parasunod na itatao sa sainda an espiritu nin Dios paagi sa pagsabi nia: “Kun kamo, minsan ngani [bakong sangkap asin sa siring medyo] maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” (Luc. 11:13) Padagos niatong hagadon ki Jehova paagi sa pamibi an saiyang banal na espiritu. Kun an pinakamakapangyarihan na puersang ini an nagsusuportar sa sato sa determinasyon niato na tumangon an Diablo, puede kitang magin mapanggana. Apuera sa regular asin odok na pamimibi, kaipuhan niatong isulog an bilog na espirituwal na pangalasag hale sa Dios tanganing ‘marigon kitang makapanindogan tumang sa mga pakana, o mga katusohan, kan Diablo.’​—Efe. 6:11-18, nota sa ibaba.

17. Anong kagayagayahan an nakatabang ki Jesus na tumangon an Diablo?

¹⁷ May saro pang bagay na nakatabang ki Jesus na tumangon an Diablo, asin makakatabang man iyan sa sato. An Biblia nagsasabi: “Huli sa kagayagayahan na ibinugtak sa atubangan [ni Jesus] tinagalan nia an hariging pasakitan, na hinamak an kasupganan, asin nagtukaw sa too kan trono nin Dios.” (Heb. 12:2) Puede man kitang magkaigwa nin kaparehong kagayagayahan paagi sa pagsuportar sa soberaniya ni Jehova, pagtaong onra sa saiyang banal na ngaran, asin pagpapadanay na nasa atubangan niato an balos na buhay na daing katapusan. Maeeksperyensiahan nanggad niato an kagayagayahan kun si Satanas asin an gabos niang gibo haleon na sagkod lamang saka ‘sadirihon na kan mga mahoyo an daga patin makanompong sinda nin labi-labi nanggad na kaogmahan sa nagsosopay na katoninongan’! (Sal. 37:11) Kun siring, padagos na tumangon an Diablo, arog kan ginibo ni Jesus.​—Basahon an Santiago 4:7, 8.

Ano an Isisimbag Nindo?

• Ano an prueba na iniingatan ni Jehova an saiyang banwaan?

• Paano si Jesus nagtao nin halimbawa sa pagtumang ki Satanas?

• Sa anong mga paagi nindo puedeng tumangon an Diablo?

[Mga Hapot Para sa Pag-adal]

[Ritrato sa pahina 29]

An pakikikatood niato sa kinaban pakikiiwal niato sa Dios

[Ritrato sa pahina 31]

Hinaboan ni Jesus an gabos na kahadean sa kinaban na iinalok sa saiya ni Satanas