Nagigirumdoman daw Nindo?

Naapresyar daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Helingon kun masisimbag nindo an minasunod na mga hapot:

• Paano niato matibay na ikakataram an “dalisay na lenguahe,” an katotoohan manongod sa Dios asin sa saiyang mga katuyohan? (Sof. 3:9)

Siring sa itinataram na lenguahe, tanganing magin matibay sa pagtaram kan “dalisay na lenguahe,” kaipuhan niatong maghinanyog nin maingat, arogon an mga matibay magtaram, tuomon an mga ngaran kan mga libro kan Biblia saka an nagkapirang teksto sa Biblia, otrohon an mga bagay na satong nanonodan, magbasa na may boses, analisaron an gramatika, o arogan nin katotoohan, magmaigot na umoswag, magtao nin mga panahon sa pag-adal, asin magpraktis sa “pagtaram” kan dalisay na lenguahe.​—8/15, pahina 21-25.

• Ano an nagkapirang bagay na kalabot sa pag-aram sa naturalesa nin Dios?

“Jehova an saiyang ngaran,” asin gusto nia na mamidbid niato sia paagi sa ngaran na iyan. (Ex. 15:3) Sia “an Dios nin pagkamoot asin nin katoninongan.” (2 Cor. 13:11) Sia an “Dios nin kaaraman” asin “nin kaligtasan.” (1 Sam. 2:3; Sal. 25:5) An Dios marani sa mga nagmimidbid sa saiya sa siring na paagi.​—9/1-E, pahina 4-7.

• Paano an ideya dapit sa “lubid na tinolotolo” ikakaaplikar sa pag-agoman?

An “lubid na tinolotolo” piguratibong pananaram. (Ecl. 4:12) Kun iinaaplikar sa pag-agoman, kaiba dian an agom na lalaki asin agom na babae, an duwang kabtang kan lubid, na nakapurupot sa prinsipal na kabtang kaiyan, an Dios. An pagigin kasaro nin Dios nagtatao sa mag-agom nin espirituwal na kosog na makaya an mga problema asin kamtan an kaogmahan.​—9/15, pahina 16.

• Ano an boot sabihon kan “pagpatong kan mga kamot” na sinambit sa Hebreo 6:2?

Imbes na iaplikar sa pagnombra sa Kristianong kamagurangan, posibleng marhay na an boot sabihon kaiyan iyo an pagpatong kan mga kamot tanganing magtao nin milagrosong mga balaog kan banal na espiritu. (Gibo 8:14-17; 19:6 )​—9/15, pahina 32.

• Anong mga pangangaipo kan mga aki an minimidbid nin marahay na ama?

An nagkapira sa mga kaipuhan ninda iyo an (1) pagkamoot nia, (2) positibong halimbawa, (3) maogmang kamugtakan, (4) edukasyon dapit sa espirituwal na mga bagay, (5) disiplina, (6) proteksion.​—10-12, pahina 18-21.

• Paano makakatao nin onra sa iba an mga nangengenot?

An sarong paagi na magigibo iyan nin sarong magurang sa kongregasyon iyo an nungkang paghagad sa iba na gibohon an mga bagay na habo niang gibohon. Siring man, nagpapaheling sia nin onra paagi sa pagtao nin mga dahelan kan mga kahagadan nia o kan mga instruksion na itinatao nia.​—10/15, pahina 22.

• Ano an nagkapirang liabe sa pagpapadanay nin kapanugaan sa pag-agom?

An duwa iyo ini: (1) Gibohon na prioridad an saindong pag-agoman. (2) Likayan an gabos na klase nin pagtraydor sa agom. Baga man an saindong pag-agoman marigon o nagkakaigwa nin tension, kaipuhan na maaraman kan saindong agom na determinado kamong gibohon na magin mapanggana an pag-agoman; makakatabang an duwang liabeng iyan.​—11/1-E, pahina 18-21.

• Ano an manonodan nin Kristianong magurang sa kongregasyon sa kun paano ginamit nin sarong pastor na Israelita an saiyang baston na nakakurba an poro?

An sarong pastor naggagamit nin baston, o sogkod, na nakakurba an poro tanganing giyahan an saiyang aripompon. Mantang an mga karnero minalaog o minaluwas sa toril, an mga ini ‘minaagi sa irarom kan sogkod’ asin mabibilang nia an mga ini. (Lev. 27:32) Kaagid kaiyan, kaipuhan na midbidon asin bantayan nin Kristianong pastor an aripompon nin Dios na nasa pangangataman nia.​—11/15, pahina 9.

• Paano ikakapaheling nin sarong ina na minamansay nia na mahalaga an kalinigan?

An kakanon puedeng maatian sa manlaenlaen na paagi, kaya naghuhugas sia kan saiyang kamot bago magkapot nin kakanon asin tinatakopan nia ini. Pinapagdadanay nia na malinig an harong tanganing makalikay sa mga problema dapit sa kino asin mga insekto. Kaiba sa iba pang lakdang an pagpapadanay na malinig an mga gubing, asin an regular na paglaba saka pagkarigos. An siring na mga lakdang kaoyon kan Biblia.​—12/1-E, pahina 9-11.