Ano an Makakatabang sa Saindo na Magpadagos sa Ministeryo?

NAMATEAN na daw nindo na nanluluya kamong gayo kaya gusto na nindong magpondo sa paghuhulit? An grabeng pagtumang, kahaditan, maluyang salud, panggigipit nin kairiba, o dai paghimate kan mga tawo tibaad magpadepisil sa sato na magpadagos. Pero, isip-isipa an halimbawa ni Jesus. Tinagalan nia an pinakamasakit na pagbalo “huli sa kagayagayahan na ibinugtak sa atubangan nia.” (Heb. 12:2) Aram nia na paagi sa pagpatunay na biyong daing basehan an mga sahot sa Dios, napapagayagaya nia an puso ni Jehova.—Tal. 27:11.

Paagi sa pagpadagos sa ministeryo, mapapagayagaya man nindo an puso ni Jehova. Minsan siring, paano kun garo baga nauubos na an espirituwal na kosog nindo huli sa nagkapirang olang? Si Krystyna, na gurang na asin maluya an salud, nag-admitir: “Normal na sa sako na mapagal asin magmondo nin makuri. An sakong mga problema sa paggurang, arog baga nin maluyang salud asin mga kahaditan sa pangaroaldaw na buhay, temporaryong nakakapaluya sa kaigotan ko.” Ano an makakatabang sa saindo na magpadagos sa ministeryo sa ibong kan siring na mga olang?

Arogon an mga Propeta

Tanganing makapagpadagos sa paghuhulit, puedeng pagmaigotan kan maimbod na mga parahayag kan Kahadean na magkaigwa nin kaisipan na arog kan sa suanoy na mga propeta. Arog halimbawa ni Jeremias. Kan sinugo tanganing maglingkod bilang propeta, nag-alangan sia kan primero. Pero, nakapagpadagos si Jeremias sa saiyang masakit na asignasyon sa laog nin labing 40 taon huling nakanood sia na lubos na magtiwala sa Dios.—Jer. 1:6; 20:7-11.

Napaparigon an boot ni Henryk sa halimbawa ni Jeremias. Sia nagsabi: “Durante kan labing 70 taon ko sa ministeryo, may mga beses na nanluya an sakong boot huli sa reaksion nin mga tawo—pagtumang o kawaran ninda nin interes. Sa mga panahon na iyan, ginigirumdom ko an halimbawa ni Jeremias. An pagkamoot nia ki Jehova asin an makosog na espirituwalidad nia an nagtao sa saiya nin kosog na padagos na maghula.” (Jer. 1:17) Napakosog man an boot ni Rafał sa halimbawa ni Jeremias. Sia nagsabi: “Imbes na magkonsentrar sa saiyang sadiri asin sa mga saboot nia, si Jeremias nagsarig sa Dios. Daing takot siang nagpadagos minsan ngani dakol an naaanggot. Pinagmamaigotan kong girumdomon iyan.”

An saro pang propeta na an halimbawa nakakatabang sa dakol na magpadagos sa ministeryo iyo si Isaias. Sinabi sa saiya nin Dios na dai sia hihinanyogon kan saiyang mga kahimanwa. “Gibohang dai nag-aako an puso kan banwaan na ini, asin gibohang dai naghihimate an mismong mga talinga ninda,” an sabi ni Jehova. Segurado daw na dai magigin mapanggana si Isaias? Bakong arog kaiyan sa pagheling nin Dios! Kan sugoon sia bilang propeta, sia nagsabi: “Uya ako! Sugoa ako.” (Isa. 6:8-10) Nagdanay si Isaias sa sugo sa saiya. Arog man daw kaiyan an saindong simbag sa pagboot na maghulit?

Arog kan ginibo ni Isaias, tanganing makapagpadagos sa ministeryo sa ibong kan dai paghimate nin mga tawo, dapat niatong likayan na magkonsentrar sa negatibong mga reaksion. Linalabanan ni Rafał an panluluya nin boot sa paaging ini: “Pinagmamaigotan ko na dai magkonsentrar sa makolog na sinasabi nin mga tawo. An mga tawo sa samong teritoryo may deretso na ipaheling an ano man na gusto nindang magin reaksion ninda.” Sinabi pa ni Anna: “Dai ko pigpaparaisip an ano man na bakong magayon o nakakapanluya sa boot. An pamibi asin pag-estudyar sa teksto kan aldaw bago ako maglingkod sa langtad iyo an nakakatabang sa sako na gibohon iyan. Madaling nawawara an ano man na negatibong kaisipan.”

Si propeta Ezequiel naglingkod sa matagas an payong mga Judio na dinarang bihag sa Babilonya. (Ezeq. 2:6) Kun dai ipinaabot kan propeta an mga tataramon nin Dios sa mga tawo asin may maraot na tawo na nagadan na dai nakadangog kan patanid, si  Ezequiel personalmente kutanang maninimbag. Si Jehova nagsabi ki Ezequiel: “An saiyang dugo hahagadon ko sa saimong sadiring kamot.”—Ezeq. 3:17, 18.

Pinagmamaigotan ni Henryk na magkaigwa nin punto de vista na arog kan ki Ezequiel: “Gusto kong magin malinig sa dugo kan gabos na tawo. An mahalagang marhay na buhay nin mga tawo an nakataya.” (Gibo 20:26, 27) Arog man kaiyan an saboot ni Zbigniew: “Kinaipuhan ni Ezequiel na magpadagos ano man an iniisip kan iba. Nakakatabang ini sa sako na mansayon an paghuhulit segun sa punto de vista kan Kaglalang.”

Dai Kamo Nagsosolo

Dai kamo nagsosolo kun kamo naghuhulit. Arog ni apostol Pablo, masasabi niato: “[Kita] mga kapwa trabahador nin Dios.” (1 Cor. 3:9) Si Krystyna, na nag-admitir na kun minsan nagmomondo sia nin makuri, nagsabi: “Iyan an dahelan kaya padagos akong nakikimaherak ki Jehova na logod tawan ako nin kosog. Pirme niang itinatao an hinahagad ko.” Iyo, kaipuhan niato an espiritu nin Dios bilang suporta sa satong ministeryo!—Zac. 4:6.

Kun naghuhulit kita, an banal na espiritu nagtatabang man sa sato na magpaheling kan mga kualidad kan “bunga kan espiritu.” (Gal. 5:22, 23) Nakakatabang man iyan sa sato na padagos na maghulit, ano man an mangyari. Nagsabi si Henryk: “An paghuhulit nakakatabang sa sako na paoswagon an personalidad ko. Nakakanood ako na magin mapasensia asin makonsiderasyon saka dai tolos sumuko.” An pagpadagos sa ministeryo sa ibong nin manlaenlaen na olang makakatabang sa saindo na pataluboon nin orog pa an mga bunga kan espiritu.

Sa paggiya sa daing kaagid na gibohon na ini, ginagamit ni Jehova an saiyang mga anghel. (Kap. 14:6) Ihinahayag kan Biblia na may “manampulong ribo nin manampulong ribo asin rinibong ribo-ribo” nin siring na espiritung mga linalang. (Kap. 5:11) Sa paggiya ni Jesus, sinusuportaran kan mga anghel an mga lingkod nin Dios digdi sa daga. Isinasaisip daw nindo iyan kun naglilingkod kamo?

“An paghorophorop sa bagay na an mga anghel kaiba niato sa ministeryo nakakaparigon sa sakong boot,” an sabi ni Anna. “Pinapahalagahan ko an pagtabang ninda sa sato sa pagdirehir ni Jehova asin Jesus.” Sarong pribilehio nanggad na makapaglingkod kaiba kan maimbod na mga anghel!

Kumusta man an mga kapwa parahayag kan Kahadean? Sarong bendisyon sa sato na makamidbid an kadakol na maimbod na Saksi. Daing duda na naeeksperyensiahan nindo an pagigin totoo kan talinhaga sa Biblia: “Sa batbat, an batbat mismo minatarom. Kaya an tawo minapatarom sa lalawgon nin ibang tawo.”—Tal. 27:17.

An pagmiministeryo kaibanan nin iba nagtatao sa sato nin marahayon na oportunidad na makaobserbar nin epektibong mga paagi na tibaad bago sa sato. Si Elżbieta nagsabi, “An paghuhulit kaiba nin laen-laen na parahayag nagtatao sa sako nin mga oportunidad na magpaheling nin pagkamoot sa sakong mga kapagtubod sagkod sa mga tawong nanonompongan mi.” Pagmaigotan na makikabtang sa ministeryo kaiba nin laen-laen na parahayag. Makakatabang iyan na magin interesante an saindong ministeryo.

Asikasohon an Saindong Sadiri

Tanganing mapagdanay an satong entusiasmo sa ministeryo, kita dapat na magplanong marhay, magkaigwa nin marahay na rutina nin personal na pag-adal, asin magpahingalo nin igo. Sa ibang pagtaram, kaipuhan niatong asikasohon an satong sadiri sa espirituwal sagkod sa pisikal.

An Biblia nagsasabi: “An mga plano kan mahigos seguradong nagbubunga nin bentaha.” (Tal. 21:5) Si Zygmunt, na ngonyan 88 anyos na, nagsabi: “An pagigin sistematiko ko sa paglilingkod nakakatabang sa sako na magin mabunga. Maingat kong pinapakarhay an sakong iskedyul tanganing magkaigwa nin igong panahon sa pagpatotoo.”

An lubos na kaaraman sa Kasuratan nagpapakosog asin nagsasangkap sa sato sa ministeryo. Kun paanong kaipuhan niato na magkakan nin literal na kakanon tanganing makapagpadagos, dapat man na regular kitang magkakan nin espirituwal na kakanon tanganing makapagpadagos sa paghuhulit. An aroaldaw na pagkakan sa Tataramon nin Dios asin an paglaog sa isip nin espirituwal na “kakanon sa tamang panahon” makakapakosog sa sato sa ministeryo.—Mat. 24:45-47.

Naggibo si Elżbieta nin kinakaipuhan na mga pagbabago sa estilo nin pamumuhay nia tanganing mag-oswag sa saiyang ministeryo. Sia nagsabi: “Dakol na oras an binawas ko sa pagheling nin telebisyon tanganing magkaigwa ako nin mas dakol na panahon  sa pag-andam sa ministeryo. Kun binabasa ko an Biblia kada banggi, iniisip ko an mga tawong nanompongan ko sa teritoryo. Hinahanap ko an mga teksto asin artikulo na puedeng makatabang sa sainda.”

An pagkaigwa nin tamang pahingalo makakatabang sa saindo na mapagdanay na makosog an saindong hawak asin lubos na makapakikabtang sa ministeryo. Sa kabaliktaran, an sobrang pag-aling-aling puedeng magkaigwa nin negatibong epekto sa kualidad kan saindong gibohon. Si Andrzej na sarong maigot na parahayag, nagsabi: “An kakulangan nin pahingalo nagreresulta sa sobrang kapagalan, asin huli kaiyan madali na nanluluya an boot. Ginigibo ko an gabos kong makakaya tanganing malikayan iyan.”—Ecl. 4:6.

Sa ibong kan satong maigot na paghihingoa, medyo kadikit na tawo an nagpapahalaga sa maogmang bareta. Minsan siring, dai noarin man lilingawan ni Jehova an satong ginibo. (Heb. 6:10) Dawa ngani dakol an habo na makipag-olay sa sato, tibaad pag-olayan ninda an satong pagdalaw pagkahale ta. An epekto puedeng magin garo baga arog kan mababasa niato mapadapit ki Ezequiel: “Siertong maaaraman [kan mga tawo] na nagkaigwa nin sarong propeta mismo sa tahaw ninda.” (Ezeq. 2:5) Totoo, an satong ministeryo bakong pasil, alagad nakakakua kita nin naheheling na mga pakinabang dian asin iyo man an mga tawo na naghihinanyog sa sato.

“An pakikikabtang sa ministeryo nakakatabang sa sato na isulog an bagong personalidad asin magpaheling nin pagkamoot sa Dios saka sa satong kapwa,” an sabi ni Zygmunt. “Sarong pribilehio na makikabtang sa nagliligtas-buhay na gibohon na ini. Dai na iyan noarin man maootro nin arog kaini kahiwas o sa arog man kaining mga kamugtakan,” an sabi pa ni Andrzej. Magkakamit man kamo nin dakol na bendisyon huli sa pagpapadagos sa ministeryo ngonyan.—2 Cor. 4:1, 2.

[Mga Ritrato sa pahina 31]

An pag-asikaso sa satong espirituwal asin pisikal na mga pangangaipo nakakatabang sa sato na magpadagos sa ministeryo