Napapagayagaya kan Integridad Nindo an Puso ni Jehova

“Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.”—TAL. 27:11.

1, 2. (a) Anong sahot ni Satanas an isinasaysay kan libro nin Job? (b) Ano an nagpaparisa na padagos na dinuduhagi ni Satanas si Jehova pakalihis kan panahon ni Job?

TINOGOTAN ni Jehova si Satanas na baloon an integridad kan maimbod na lingkod nin Dios na si Job. Bilang resulta, nawaran si Job nin ataman na mga hayop, mga aki, asin marahay na salud. Alagad kan kuestionon ni Satanas an integridad ni Job, bako sanang an tawong si Job an nasa isip nia. “Kublit para sa kublit, asin an gabos na sadiri nin tawo itatao nia para sa saiyang kalag,” an sinabi ni Satanas. An sahot na ini nagpalataw nin sarong isyu na kalabot an iba pa bako sanang si Job bilang indibiduwal asin iyan nagpadagos sa halawig na panahon pagkagadan nia.—Job 2:4.

² Mga 600 na taon pagkatapos kan mga pagbalo ki Job, si Salomon pinasabngan na magsurat: “Magpakadonong ka, aki ko, asin pagayagayaha an sakong puso, tanganing makasimbag ako sa saiya na nagduduhagi sa sako.” (Tal. 27:11) Malinaw nanggad, kan panahon na iyan kinukuestion pa man giraray ni Satanas si Jehova. Apuera dian, sa sarong bisyon na itinao ki apostol Juan, maheheling si Satanas na sinasahotan an mga lingkod nin Dios pakapalayas sa saiya sa langit dai nahaloy pagkaestablisar kan Kahadean nin Dios kan 1914. Iyo, dawa ngonyan, na kita nasa poro nang marhay kan huring mga aldaw kan maraot na sistemang ini,  kinukuestion pa man giraray ni Satanas an integridad kan mga lingkod nin Dios!—Kap. 12:10.

3. Anong mahalagang mga leksion an manonodan niato sa libro nin Job?

³ Kun siring, horophoropa an tolo sa mahalagang mga leksion na manonodan niato sa libro nin Job. Enot, ihinahayag kan mga pagbalo ki Job kun siisay an tunay na kaiwal nin katawohan asin an dahelan nin pagtumang sa banwaan nin Dios. An kaiwal na iyan iyo si Satanas na Diablo. Ikaduwa, ano man na mga pagbalo an tibaad mapaatubang sa sato, an pagkaigwa nin dayupot na relasyon sa Dios makakatabang na mapagdanay niato an satong integridad. Ikatolo, kun mangyari an mga pagbalo asin kita nababalo sa ano man na paagi, tinatabangan kita nin Dios kun paanong tinabangan nia si Job. Ngonyan, ginigibo ini ni Jehova paagi sa saiyang Tataramon, organisasyon, asin banal na espiritu.

Pirmeng Girumdomon Kun Siisay an Tunay na Kaiwal

4. Siisay an dapat basolon sa mga kamugtakan sa kinaban sa presente?

⁴ Dakol an dai naniniwala na igwa nin Satanas. Sa siring, minsan ngani tibaad nahahandal sinda sa mga kamugtakan sa kinaban, dai ninda nasasabotan kun siisay an tunay na dahelan—si Satanas na Diablo. Totoo, an mga tawo mismo an responsable sa kadaklan kan mga kasakitan nin katawohan. Pinili kan satong enot na mga magurang, si Adan asin Eva, na magin independiente sa Kaglalang ninda. Asin poon kaidto, an nagsurunod na henerasyon guminawe sa bako nanggad na madonong na paagi. Pero, an Diablo an nagdaya ki Eva na magrebelde sa Dios. Sia an naghaman sa tahaw nin bakong sangkap asin nagagadan na katawohan nin sarong sistema nin kinaban na kontrolado nia. Huling si Satanas an “dios kan sistemang ini nin mga bagay,” an sosyedad nin tawo nagpapaheling nin kaparehong pangenot na mga karakteristiko na yaon sa saiya—pagigin orgolyoso, pagigin parapakisuhay, pangimon, kahanaban, pangloloko, asin pagigin rebelde. (2 Cor. 4:4; 1 Tim. 2:14; 3:6; basahon an Santiago 3:14, 15.) An siring na mga karakteristiko nagbunga nin mga iriwal sa politika asin relihion, pagkaongis, karatan, asin karibokan, na nagigin dahelan nin orog na kasakitan nin katawohan.

5. Ano an gusto niatong gibohon sa mahalagang marhay na kaaraman na yaon sa sato?

⁵ Mahalagang marhay nanggad an kaaraman na yaon sa sato bilang mga lingkod ni Jehova! Iyo, nasasabotan niato kun siisay an dapat basolon sa naggagrabeng mga kamugtakan sa kinaban. Kun siring, dai daw kita napapahirong makikabtang sa ministeryo sa langtad tanganing isabi sa mga tawo kun siisay an pangenot na paraparibok? Asin bako daw na naoogma kita na manindogan sa kampi kan tunay na Dios, si Jehova, asin ipaliwanag sa iba kun paano nia tataposon si Satanas asin an mga kasakitan nin katawohan?

6, 7. (a) Siisay an responsable sa pagpersegir sa tunay na mga parasamba? (b) Paano niato maaarog an halimbawa ni Eliu kan suanoy na panahon?

⁶ Si Satanas an responsable bako sanang sa dakol na kamondoan sa kinaban kundi pati sa pagtumang na naeeksperyensiahan kan banwaan nin Dios. Desidido siang baloon kita. Sinabihan ni Jesu-Cristo  si apostol Pedro: “Simon, Simon, uya! hinagad ni Satanas na saligsigon kamo siring sa trigo.” (Luc. 22:31) Siring man, an lambang saro sa sato na nagsusunod sa mga lakad ni Jesus makakaeksperyensia nin mga pagbalo sa laen-laen na paagi. Ikinomparar ni Pedro an Diablo sa “nagngangarob na leon, na naghahanap nin masisiba.” Asin si Pablo nagsabi: “An gabos na nagmamawot na mamuhay na may diosnon na debosyon kaibahan ni Cristo Jesus pepersegiron man.”—1 Ped. 5:8; 2 Tim. 3:12.

⁷ Paano niato ikakapaheling na pirme niatong ginigirumdom an tunay na kaiwal kun may mangyaring trahedya sa sarong kapagtubod? Imbes na rumayo kita sa tugang na naapektaran, kita minahiro arog ni Eliu kan suanoy na panahon, na nakipag-olay ki Job bilang tunay na katood. Masurog kita sa satong tugang sa pakikipaglaban sa kaiwal niato gabos na si Satanas. (Tal. 3:27; 1 Tes. 5:25) An satong pasohan iyo na tabangan an satong kapwa lingkod na mapagdanay an integridad nia, ano man an mangyari, asin sa siring pagayagayahon an puso ni Jehova.

8. Taano ta dai nagin mapanggana si Satanas na papondohon si Job sa pagtao nin onra ki Jehova?

⁸ An enot na rogaring na pinangyari ni Satanas na mawara ki Job iyo an saiyang ataman na mga hayop. Mahalaga an mga hayop na iyan, na posibleng marhay na gikanan kan pagbuhay nia. Alagad ginamit man iyan ni Job sa pagsamba. Pagkatapos na pabanalon ni Job an saiyang mga aki, ‘sia nagbangon nin amay pagkaaga asin nagdolot nin mga atang na tinotong segun sa bilang ninda gabos; huli ta, sabi ni Job, “tibaad nagkasala an sakong mga aki asin isinumpa an Dios sa saindang puso.” Siring kaiyan an pirmeng ginigibo ni Job.’ (Job 1:4, 5) Sa siring, si Job regular na nag-aatang ki Jehova nin mga hayop. Kan magpoon na an mga pagbalo, dai na iyan nagin posible. Si Job mayo na nin “mahahalagang bagay” na magagamit nia tanganing tawan nin onra si Jehova. (Tal. 3:9) Alagad puede niang tawan nin onra si Jehova paagi sa mga ngabil nia asin ginibo nia iyan!

Pataluboon an Dayupot na Relasyon ki Jehova

9. Ano an pinakamahalaga niatong rogaring?

⁹ Baga man kita mayaman o dukha, hoben o may edad na, may marahay o maluyang salud, makakapatalubo kita nin dayupot na relasyon ki Jehova. Ano man an mga pagbalo na napapaatubang sa sato, an pagkaigwa nin dayupot na relasyon sa Dios makakatabang na mapagdanay niato an satong personal na integridad asin na mapagayagaya niato an puso ni Jehova. Dawa an nagkapirang indibiduwal na limitado an kaaraman sa katotoohan makosog an boot na nanindogan asin napagdanay an integridad ninda.

10, 11. (a) Ano an ginibo kan saro sa satong mga tugang na babaeng Saksi kan mapaatubang sa mga pagbalo sa integridad? (b) Anong mapuersang simbag an itinao ki Satanas kan Saksing ini?

¹⁰ Isip-isipa an halimbawa ni Tugang na Valentina Garnovskaya, saro sa dakol na Saksi sa Rusya na napagdanay an integridad ninda sa ibong nin grabeng mga pagbalo siring kan maimbod na si Job. Kan 1945, kan sia mga 20 anyos na, sarong lalaking Saksi an nagpatotoo sa saiya. Nagbuelta sia nin duwa pang beses tanganing ipakipag-olay  an Biblia, alagad pagkatapos kaiyan sia nungka na niang naheling giraray. Dawa siring, si Valentina nagpoon na maghulit sa saiyang kataraed. Bilang resulta, sia inarestar asin sinentensiahan nin walong taon sa sarong kampo. Kan 1953 sia pinaluwas asin tolos-tolos na ipinadagos nia an paghuhulit. Sa giraray sia inarestar asin ibinilanggo—na ngonyan sampulong taon. Pagkatapos nin nagkapirang taon sa sarong kampo, ibinalyo sia sa ibang kampo. Sa kampong iyan, igwa nin nagkapirang babaeng Saksi na may kopya kan Biblia. Sarong aldaw ipinaheling ki Valentina nin sarong babaeng Saksi an Biblia. Kanigoan an kaogmahan nia! Imahinara nanggad, an saro pang Biblia na solamenteng naheling ni Valentina kasuarin man iyo an Biblia kan lalaking Saksi na nagpatotoo sa saiya kan 1945!

¹¹ Kan 1967, pinatalingkas si Valentina asin sa katapustapusi sinimbolisaran an saiyang pagdusay ki Jehova paagi sa bautismo sa tubig. Maigot na ginamit nia an saiyang katalingkasan sa pakikikabtang sa ministeryo sagkod 1969. Minsan siring, kan taon na iyan, sia inarestar giraray, asin sa panahon na ini sia sinentensiahan nin tolong taon sa bilanggoan. Pero, si Valentina padagos na naghulit. Bago sia magadan kan 2001, natabangan nia an 44 katawo na makanood kan katotoohan. Sia nag-21 taon sa mga bilanggoan asin kampo. Nagin andam sia na isakripisyo an gabos na bagay, kaiba an katalingkasan nia, tanganing mapagdanay an saiyang integridad. Kan sia madali nang magadan, si Valentina nagsabi: “Dai ako noarin man nagkaigwa nin sadiri kong istaran. An gabos na bagay na sadiri ko nasa saro sanang maleta, pero ako maogma asin kontento sa paglilingkod ki Jehova.” Mapuersa nanggad na simbag an itinao ni Valentina ki Satanas, na nagsasabi na an mga tawo dai magdadanay na maimbod sa Dios sa atubangan nin mga pagbalo! (Job 1:9-11) Makakasierto kita na pinagayagaya nia an puso ni Jehova asin na gustong-gusto nin Dios na mag-abot an panahon na bubuhayon nia liwat si Valentina asin an gabos na iba pa na nagadan na maimbod.—Job 14:15.

12. Ano an papel kan pagkamoot sa relasyon niato ki Jehova?

¹² An pagkamoot niato ki Jehova an basehan kan pakikikatood niato sa saiya. Hinahangaan niato an mga kualidad nin Dios asin ginigibo an ano man na magigibo niato tanganing mamuhay kaoyon kan mga katuyohan nia. Kabaliktaran sa sinabi kan Diablo, gikan sa boot asin lubos niatong itinatao an satong pagkamoot ki Jehova. An odok sa pusong pagkamoot na ini nagpapakosog sa sato tanganing papagdanayon an integridad kun binabalo kita. Sa kabtang ni Jehova, “babantayan nia an mismong dalan kan mga maimbod sa saiya.”—Tal. 2:8; Sal. 97:10.

13. Paano minamansay ni Jehova an ginigibo niato para sa saiya?

¹³ Pinapahiro kita kan pagkamoot na tawan nin onra an ngaran ni Jehova, dawa kun sa pagmate niato limitado an nagigibo niato. Naheheling nia an marahay na mga motibo niato asin dai nia kita hinuhusgaran kun dai niato nagigibo an gabos na gusto niatong gibohon. An mahalaga bako sanang kun ano an ginigibo niato kundi pati kun taano ta ginigibo niato iyan. Minsan ngani si Job nagmomondo nin makuri asin dakol an tinios, sinabi nia sa mga nagsasahot sa saiya an manongod sa pagkamoot nia sa mga dalan ni Jehova. (Basahon an Job 10:12; 28:28.) Sa ultimong kapitulo kan libro nin Job, ipinahayag nin Dios an kaanggotan nia ki Elifaz, Bildad, asin Zofar huling dai sinda nagtaram nin totoo. Kadungan kaiyan, ipinarisa ni Jehova an pag-oyon nia ki Job paagi sa apat na beses na pag-apod ki Job na “sakuyang lingkod” asin pagtao sa saiya nin instruksion na ipamibi an tolong nagkasala. (Job 42:7-9) Logod na gumawe man kita sa paagi na mamansayon kita ni Jehova na may pag-oyon.

Sinusuportaran ni Jehova an Maimbod na mga Lingkod Nia

14. Paano tinabangan ni Jehova si Job na itanos an kaisipan nia?

¹⁴ Napagdanay ni Job an integridad nia minsan  ngani bako siang sangkap. Kun beses, kan grabe an pagsakit nia, nagkaigwa sia nin salang pagmansay. Halimbawa, sia nagsabi ki Jehova: “Nag-aarang ako sa saimo para sa tabang, alagad dai mo ako sinisimbag . . . Sa bilog na kakosogan kan saimong kamot ika nagtatanom sa boot nin kaanggotan sa sako.” Dugang pa, si Job nagtao nin sobrang importansia sa pagtao nin katanosan sa sadiri nia kan sia magsabi: “Dai ako nasasala” asin “mayo nin kadahasan sa sakong mga palad, asin an sakong pamibi dalisay.” (Job 10:7; 16:17; 30:20, 21) Minsan siring, may kabootan na tinabangan ni Jehova si Job paagi sa pagtao nin sunod-sunod na hapot na nagrayo nin atension ki Job. Nakatabang man iyan ki Job na maheling nin mas malinaw an kadakulaan nin Dios kun ikokomparar sa kasaditan nin tawo. Inako ni Job an paggiya asin itinanos an sadiri nia.—Basahon an Job 40:8; 42:2, 6.

15, 16. Sa anong mga paagi nagtatao si Jehova nin tabang sa mga lingkod nia ngonyan?

¹⁵ Si Jehova nagtatao man nin maboot asin marigon na paggiya sa mga lingkod nia ngonyan. Dugang pa, nagkakamit kita nin mahalagang mga pakinabang. Halimbawa, itinao ni Jesu-Cristo an atang na pantubos asin sa siring nagbugtak nin basehan para sa kapatawadan nin mga kasalan. Basado sa atang na iyan, puede kitang magkaigwa nin dayupot na relasyon sa Dios sa ibong kan pagkabakong sangkap niato. (Sant. 4:8; 1 Juan 2:1) Kun napapaatubang kita sa mga pagbalo, namimibi man kita para sa suporta asin nagpapakosog na tabang kan banal na espiritu nin Dios. Saro pa, yaon sa sato an kompletong Biblia, asin kun babasahon niato iyan asin hohorophoropon an laog kaiyan, iinaandam niato an satong sadiri sa mga pagbalo sa pagtubod. An pag-adal nakakatabang sa sato na masabotan an mga isyu dapit sa unibersal na soberaniya asin personal na integridad.

¹⁶ Dugang pa, nakikinabang kitang marhay sa pagigin kabtang kan lakop sa daga na kasararoan nin magturugang na tinatawan ni Jehova nin espirituwal na kakanon paagi sa “maimbod asin mapagmansay na oripon.” (Mat. 24:45-47) Sa kada saro kan poko mas o menos 100,000 na kongregasyon kan Mga Saksi ni Jehova, ginigibo an mga pagtiripon na nagtotokdo asin nagpapakosog sa sato na atubangon an posibleng mga pagbalo sa pagtubod. Ikakailustrar ini paagi sa eksperyensia ni Sheila, sarong daragitang Saksi na nakaistar sa Alemania.

17. Iilustrar an kadonongan kan maingat na pagsunod sa instruksion kan organisasyon ni Jehova ngonyan.

¹⁷ Sarong aldaw sa eskuelahan, temporaryong mayo nin maestra sa klase ni Sheila. An mga kaklase nia nagdesisyon na mag-eksperimento sa Ouija board, na sarong bagay na ginagamit sa espiritismo. Tolos na naghale si Sheila sa kuarto kan klase, asin naogma sia na ginibo nia iyan kan naaraman nia an nangyari kan huri. Mantang ginagamit kan mga estudyante an Ouija board, namatean kan nagkapira sa sainda an presensia nin mga demonyo asin sinda nagdaralagan huli sa pagkataranta. Pero, ano an nakatabang ki Sheila na magdesisyon na tolos na humale sa kuarto? “Dai pa sana nahahaloy bago mangyari ini, tinokar sa pagtiripon sa Kingdom Hall an mga peligro sa paggamit nin mga Ouija board. Kaya aram ko kun ano an gigibohon ko,” an paliwanag ni Sheila. “Gusto kong paogmahon si Jehova, siring kan sinasabi kan Biblia sa Talinhaga 27:11.” Marahay sana ta si Sheila nasa pagtiripon asin naghinanyog na marhay sa programa!

18. Ano an personal na desisyon nindong gibohon?

¹⁸ Logod na an lambang saro sa sato magin desidido na sunodon nin maingat an instruksion na inaako niato hale sa organisasyon nin Dios. Paagi sa regular na pag-atender sa mga pagtiripon, pagbasa sa Biblia, pag-adal sa mga babasahon na basado sa Biblia, pamimibi, asin pakikiiba sa maygurang na mga Kristiano, nakukua niato an paggiya asin suporta na kaipuhan niato. Gusto ni Jehova na kita magin mapanggana, asin may kompiansa sia na padagos kitang magigin maimbod. Marahayon nanggad an pribilehio niato na omawon an ngaran ni Jehova, papagdanayon an integridad, asin pagayagayahon an puso ni Jehova!

Nagigirumdoman daw Nindo?

• Si Satanas an responsable sa anong mga kamugtakan asin pagbalo?

• Ano an pinakamahalagang rogaring na yaon sa sato?

• Ano an basehan kan satong pakikikatood ki Jehova?

• Ano an nagkapira sa mga paagi na sinusuportaran kita ni Jehova ngonyan?

[Mga Hapot Para sa Pag-adal]

[Ritrato sa pahina 8]

Napapahiro daw kamong isabi sa iba an mahalagang marhay na kaaraman na yaon sa saindo?

[Ritrato sa pahina 9]

Matatabangan niato an mga kapwa parasamba na mapagdanay an integridad ninda

[Ritrato sa pahina 10]

Andam si Valentina na isakripisyo an gabos na bagay tanganing mapagdanay an saiyang integridad