Arogon an Kaimbodan ni Itai

“DAKULA asin makangangalas an saimong mga gibo, Jehova Dios, an Makakamhan sa Gabos. Matanos asin totoo an saimong mga dalan, Hadeng daing sagkod. Siisay nanggad an dai matatakot sa saimo, Jehova, asin dai magpapamuraway kan saimong ngaran, huli ta ika sana an maimbod?” An awit na ini, na kinanta sa langit kan “mga nanggana sa mabangis na hayop asin sa imahen kaiyan,” nagtataong atension sa kaimbodan nin Dios. (Kap. 15:2-4) Gusto ni Jehova na arogon sia kan mga nagsasamba sa saiya sa pagpaheling kan kawiliwiling kualidad na ini.—Efe. 4:24.

Sa ibong na lado, ginigibo ni Satanas na Diablo an gabos na magigibo nia tanganing isuway an daganon na mga lingkod nin Dios sa pagkamoot kan Dios na sinasamba ninda. Pero, dakol an nagdanay na maimbod sa Dios dawa nasa grabe kasakit na mga kamugtakan. Makakapagpasalamat nanggad kita na pinapahalagahan na marhay ni Jehova an siring na debosyon! Tunay nanggad, sinisierto sa sato: “Si Jehova mamomoton sa hustisya, asin dai nia babayaan an mga maimbod sa saiya.” (Sal. 37:28) Tanganing tabangan kita na magdanay na maimbod, iiniba nia sa saiyang Tataramon an rekord  kan mga ginibo nin dakol na maimbod. An saro kaiyan iyo an mapadapit ki Itai na Giteo.

‘Taga Ibang Daga Asin Sarong Desterado’

Si Itai posibleng marhay na sarong propiong taga Gat, an bantog na siudad sa Filistea, na ginikanan kan higanteng si Goliat asin iba pang masakit daogon na mga kalaban nin Israel. An eksperyensiadong parapakilaban na si Itai nasambitan sa Biblia kaidto sanang panahon na nagrebelde si Absalon ki Hadeng David. Kan panahon na iyan, si Itai asin an 600 na Filisteong lalaki na nagsunod sa saiya nag-iistar bilang desterado sa palibot kan Jerusalem.

An situwasyon ni Itai asin kan mga parasunod nia tibaad nagpagirumdom ki David dapit sa panahon na sia mismo sarong dulag na desterado, kan sia asin an 600 na parapakilaban na Israelita magduman sa teritoryo kan mga Filisteo saka maglaog sa nasasakopan ni Aquis, an hade kan Gat. (1 Sam. 27:2, 3) Ano an gigibohon ni Itai asin kan mga tawohan nia mantang napapaatubang si David sa pagrebelde kan saiyang aki na si Absalon? Sinda daw makampi ki Absalon, magdadanay na neutral, o masuportar ki David asin sa mga tawohan kaini?

Imahinara an eksena kan si David, na nagdudulag hale sa Jerusalem, magpondo sa lugar na inaapod na Bet-merhak, na nangangahulogan na “An Harayong Harong.” Tibaad iyan an huring harong sa Jerusalem kun pasiring sa Bukid nin mga Olibo bago magbalyo sa Kababan nin Cedron. (2 Sam. 15:17; nota sa ibaba) Digdi, siniyasat giraray ni David an saiyang hukbo mantang nag-aagi an mga ini. Uya! Kaiba nia bako sanang an maimbod na mga Israelita kundi gabos man na Kereteo asin gabos na Peleteo. Dugang pa, yaon man an gabos na Giteo—si Itai asin an 600 na parapakilaban nia.—2 Sam. 15:18.

May odok sa pusong empatiya na sinabihan ni David si Itai: “Taano ta maiba ka pa man sa samo? Magbalik ka asin mag-erok ka sa kaibanan kan hade [malinaw na nangangahulogan na si Absalon]; huli ta ika taga ibang daga asin, saro pa, ika sarong desterado hale sa saimong lugar. Kasuodma ka nag-abot asin ngonyan papalagawlagawon taka daw kaiba mi, na mag-iba kun ako minaduman saen man ako magduman? Magbalik ka asin iiba mo an saimong mga tugang, asin pahelingan ka logod ni Jehova nin mamomoton na kabootan asin pagkamapagtitiwalaan!”—2 Sam. 15:19, 20.

Ipinahayag ni Itai an saiyang marigon na kaimbodan. Sia nagsimbag: “Mantang nabubuhay si Jehova asin mantang nabubuhay an kagurangnan kong hade, sa lugar na duman tibaad mamugtak an kagurangnan kong hade, baga man sa kagadanan o sa buhay, duman mamumugtak an saimong lingkod!” (2 Sam. 15:21) Tibaad ipinagirumdom kaini ki David an kaagid na mga tataramon kan saiyang lola sa tuhod na si Rut. (Rut 1:16, 17) Huling napahiro an puso sa sinabi ni Itai, si David nagsabi sa saiya: “Lakaw asin magbalyo ka” sa Kababan nin Cedron. Sa puntong iyan, “nagbalyo si Itai na Giteo, asin siring man an gabos niang tawohan asin an gabos na saradit na aking kaiba nia.”—2 Sam. 15:22.

“Sa Pagtokdo sa Sato”

“An gabos na bagay na isinurat kaidto isinurat sa pagtokdo sa sato,” an sabi kan Roma 15:4. Kaya marahay na maghapot kita, Anong mga leksion an manonodan niato sa halimbawa ni Itai? Pag-isipan kun ano an tibaad nagpahiro sa saiya na magin maimbod ki David. Minsan ngani si Itai taga ibang daga asin sarong desterado hale sa Filistea, minidbid nia si Jehova bilang an nabubuhay na Dios asin si David bilang linahidan ni Jehova. Nahimo ni Itai na baliwalaon an pagkainongisan kan mga Israelita asin Filisteo. Minansay nia si David bako sanang bilang an naggadan sa kampeon kan mga Filisteo na si Goliat asin sa dakol pang kahimanwa ni Itai. (1 Sam. 18:6, 7) Minansay ni Itai si David bilang sarong tawo na namomoot ki Jehova asin daing duda na tinawan nia nin atension an pambihirang mga kualidad ni David. Bilang resulta, nagkaigwa si David nin halangkaw na pagpapahalaga ki Itai. Iyo nanggad, ibinugtak pa ngani ni David an un-tersio (¹/₃) kan saiyang hukbo “sa kamot ni Itai” sa huring pakikilaban sa hukbo ni Absalon!—2 Sam. 18:2.

Maninigo man kitang maghingoa na baliwalaon an pagkakalaen sa kultura, rasa, o etniko—ano man na natatada pang daing binabasaran na pagkaongis saka pagkaanggot—asin pahalagahan an marahay na mga kualidad nin iba. Ipinapaheling kan pagigin magkatood ni David asin ni Itai na an  pakamidbid asin pagkamoot niato ki Jehova makakatabang sa sato na mapangganahan an siring na mga olang.

Mantang hinohorophorop niato an halimbawa ni Itai, puede niatong hapoton an satong sadiri: ‘Nagpapaheling daw ako nin kaagid na kaimbodan sa David na Orog na Dakula, si Cristo Jesus? Ipinapaheling ko daw an sakong kaimbodan paagi sa maigot na pakikikabtang sa paghuhulit kan Kahadean asin paggibo nin mga disipulo?’ (Mat. 24:14; 28:19, 20) ‘Sagkod saen an andam kong gibohon tanganing patunayan an sakong kaimbodan?’

An mga payo nin pamilya nakikinabang man paagi sa paghorophorop sa halimbawa nin kaimbodan ni Itai. An kaimbodan nia ki David asin an desisyon nia na suportaran an hade na linahidan nin Dios nagkaigwa nin epekto sa mga tawohan ni Itai. Siring man, an mga desisyon na ginigibo kan mga payo nin pamilya bilang pagsuportar sa tunay na pagsamba may epekto sa saindang pamilya asin tibaad magresulta pa ngani sa temporaryong mga kadepisilan. Pero, sinisierto sa sato: “Sa sarong maimbod [si Jehova] mahiro na may kaimbodan.”—Sal. 18:25.

Pagkatapos kan pakikilaban ni David ki Absalon, mayo nang sinasabi an Kasuratan manongod ki Itai. Minsan siring, an halipot na pagkasambit sa saiya sa Tataramon nin Dios nagtatao nin pambihirang pakarorop sa saiyang personalidad durante kan masakit na panahon na iyan sa buhay ni David. An pagkasambit ki Itai sa ipinasabong na rekord prueba na pinapahalagahan asin binabalosan ni Jehova an siring na kaimbodan.—Heb. 6:10.