Mapagpasalamat na Mag-ako—Bilog na Pusong Magtao

SI JEHOVA, na satong mamomoton na langitnon na Ama, personal na nagmamakolog sa sato. Sinisierto sa sato kan Tataramon nin Dios na nagmamakolog siang marhay sa gabos na lingkod nia. (1 Ped. 5:7) An sarong paagi na ipinapaheling ni Jehova an saiyang pagmakolog iyo an pagtao nia sa sato nin manlaenlaen na klase nin tabang tanganing mapaglingkodan niato sia nin may kaimbodan. (Isa. 48:17) Gusto ni Jehova na aprobetsaran niato an tabang na itinatao nia, nangorogna kun napapaatubang kita sa mga problema na nakakapapurisaw sa sato. Malinaw na ipinapaheling kan Ley ni Moises an katotoohan na iyan.

Sa areglo kan Ley, nagtao si Jehova nin mamomoton na tabang para sa “nagsasakit nin makuri,” arog baga kan ilo, babaeng balo, asin nakikihimanwa. (Lev. 19:9, 10; Deut. 14:29) Aram nia na an nagkapira sa saiyang mga lingkod tibaad mangaipo nin tabang hale sa saindang mga kapwa parasamba. (Sant. 1:27) Huli kaini, an siisay man sa mga lingkod nia dai kaipuhan na mag-alangan na umako nin tabang sa mga pinahiro ni Jehova na magtao kan siring na tabang. Dawa siring, gusto niato na tama an satong saboot kun nag-aako kita nin tabang.

Kadungan kaiyan, idinodoon kan Tataramon nin Dios na an banwaan nin Dios igwa man nin oportunidad na magtao. Girumdomon an salaysay dapit sa “daing sukat na babaeng balo” na naobserbaran ni Jesus sa templo sa Jerusalem. (Luc. 21:1-4) Posibleng marhay na nakinabang sia sa mamomoton na mga probisyon ni Jehova para sa mga babaeng balo arog kan sinambit sa Ley. Pero, minsan ngani an babaeng balo daing sukat, sia ginigirumdom, bakong bilang nag-ako, kundi bilang nagtao. An saiyang matinaong saboot seguradong nakapaogma sa saiya huling, arog kan sinabi ni Jesus, “igwang orog na kaogmahan sa pagtao kisa sa pag-ako.” (Gibo 20:35) Mantang iniisip an katotoohan na iyan, paano kamo puedeng “magin matinao” asin magin maogma bilang resulta kaiyan?—Luc. 6:38.

“Ano an Ibabayad Ko ki Jehova?”

Inisip-isip kan salmista: “Ano an ibabayad ko ki Jehova para sa gabos na pakinabang na itinao nia sa sako?” (Sal. 116:12) Anong mga pakinabang an inako nia? Inataman sia ni Jehova durante nin panahon nin “kasakitan asin kamondoan.” Dugang pa, ‘ilinigtas ni Jehova an saiyang kalag sa kagadanan.’ Ngonyan gusto nia na minsan paano ‘magbayad’ ki Jehova. Ano an puedeng gibohon kan salmista? Sia nagsabi: “An sakong mga promesa ootobon ko ki Jehova.” (Sal. 116:3, 4, 8, 10-14) Determinado siang otobon an gabos na sagradong iprinomesa nia ki Jehova asin an gabos na obligasyon nia sa saiya.

Magigibo man nindo iyan. Paano? Paagi sa pamumuhay kaoyon kan mga ley asin prinsipyo nin Dios sa gabos na panahon. Huli kaini, seguradohon na an saindong pagsamba ki Jehova nagdadanay na pinakaimportanteng bagay sa saindong buhay asin na nagpapagiya kamo sa espiritu nin Dios sa gabos na ginigibo nindo. (Ecl. 12:13; Gal. 5:16-18) Totoo, siempre, dai nindo noarin man lubos na mababayadan si Jehova sa gabos na ginibo nia para sa saindo. Pero, talagang ‘nagpapagayagaya sa puso ni Jehova’ na maheling na bilog na puso nindong itinatao an saindong kosog asin panahon sa  paglilingkod sa saiya. (Tal. 27:11) Sarong marahayon na pribilehio nanggad na mapaogma si Jehova sa paaging ini!

Magkontribwir sa Ikakarahay kan Kongregasyon

Daing duda na maoyon kamo na nakinabang kamo sa Kristianong kongregasyon sa dakol na paagi. Paagi sa kongregasyon, si Jehova nagtatao nin abundang espirituwal na kakanon. Inako nindo an katotoohan na nagpatalingkas sa saindo sa mga sala nin relihion asin espirituwal na kadikloman. (Juan 8:32) Sa mga pagtiripon kan kongregasyon, mga asamblea, asin mga kombension na iinareglo kan “maimbod asin mapagmansay na oripon,” nagkaigwa kamo nin kaaraman na magiya pasiring sa buhay na daing katapusan sa paraisong daga na mayo na nin kolog asin pagsakit. (Mat. 24:45-47) Dai man lamang niato mabibilang an gabos na pakinabang na inako niato—asin aakoon pa—paagi sa kongregasyon nin Dios. Ano an puede man nindong itao sa kongregasyon?

Si apostol Pablo nagsurat: “An bilog na hawak, paagi sa pagkasorogpon na may pagkaoroyon asin pagpangyaring magtarabangan paagi sa lambang pagsokmolan na nagtatao kan kinakaipuhan, sono sa pagpunsionar kan kanya-kanyang kabtang segun sa tamang sokol, nagbubunga kan pagtalubo kan hawak para sa pagkosog mismo kaiyan sa pagkamoot.” (Efe. 4:15, 16) Mantang an tekstong iyan sa pangenot aplikado sa grupo kan linahidan na mga Kristiano, an prinsipyo kaiyan puedeng iaplikar sa gabos na Kristiano ngonyan. Iyo, an lambang miembro kan kongregasyon makakakontribwir sa ikakarahay asin ikakaoswag kan kongregasyon. Sa anong mga paagi?

Magigibo niato ini paagi sa pagmamaigot na sa gabos na panahon kita magin gikanan nin pamparigon sa boot asin espirituwal na kaginhawahan para sa iba. (Roma 14:19) Makakakontribwir man kita sa “pagtalubo kan hawak” paagi sa pagpatalubo kan bunga kan espiritu nin Dios sa gabos na pagtratar niato sa mga kapagtubod. (Gal. 5:22, 23) Dugang pa, puede kitang humanap nin mga oportunidad na ‘gumibo kan marahay sa gabos, alagad nangorogna sa mga may relasyon sa sato sa pagtubod.’ (Gal. 6:10; Heb. 13:16) An gabos sa kongregasyon—lalaki asin babae, hoben asin gurang—makakakontribwir sa ‘pagpakosog sa hawak na iyan sa pagkamoot.’

Dugang pa, puede niatong gamiton an satong mga kakayahan, kosog, asin materyal na rogaring tanganing makikabtang sa nagliligtas-buhay na gibohon kan kongregasyon. “Inako nindong daing bayad,” an sabi ni Jesu-Cristo. Ano an maninigo niatong gibohon huli kaiyan? “Itao man nindong daing bayad,” an sabi nia. (Mat. 10:8) Kun siring, lubos na makikabtang sa mahalagang marhay na gibohon na paghuhulit kan Kahadean asin paggibo nin mga disipulo. (Mat. 24:14; 28:19, 20) Limitado daw an saindong kakayahan sa paggibo kaini? Girumdomon an daing sukat na babaeng balo na ilinadawan ni Jesus. An itinao nia limitadong gayo. Pero, sinabi ni Jesus na orog pa an ginibo nia kisa sa gabos na iba pa. Segun sa itinotogot kan saiyang kamugtakan, itinao nia an gabos na kaya niang itao.—2 Cor. 8:1-5, 12.

Mag-ako na May Tamang Saboot

Minsan siring, tibaad may mga panahon na kaipuhan nindo na mag-ako nin suporta hale sa kongregasyon. Dai noarin man mag-alangan na akoon an ano man na tabang na puedeng itao kan kongregasyon kun nasasakitan kamo huli sa panggigipit na itinatao kan sistemang ini. Nagtao si Jehova nin kualipikado asin mapagmakolog na mga lalaki tanganing “pastoran an kongregasyon”—tanganing magtabang sa saindo kun nag-aagi kamo nin mga pagbalo asin kahorasaan. (Gibo 20:28) Gusto kan kamagurangan asin kan iba pa sa kongregasyon na rangahon, suportaran, asin protehiran kamo durante nin masakit na mga panahon.—Gal. 6:2; 1 Tes. 5:14.

Pero, seguradohon na kun nag-aako kamo nin kaipuhan na tabang, akoon nindo iyan na may tamang saboot. Pirmeng akoon na may pagpapahalaga an suportang itinatao sa saindo. Mansayon an siring na tabang na itinatao nin mga kapagtubod bilang kapahayagan kan dai na kutana maninigong kabootan nin Dios. (1 Ped. 4:10) Taano ta mahalaga iyan? Huli ta habo niato na an satong pag-ako magin arog kan pag-ako nin dakol sa kinaban—dai man lamang nagpapasalamat.

Magin Timbang Asin Rasonable

Sa surat nia sa kongregasyon sa Filipos, si Pablo nagsurat mapadapit ki Timoteo: “Mayo na ako nin  iba na may kaisipan na arog kan sa saiya na mangangataman nin tunay sa mga bagay mapadapit sa saindo.” Dangan, sinabi pa ni Pablo: “An gabos na iba pa naghahanap kan sadiri nindang kapakanan, bakong kan ki Cristo Jesus.” (Fil. 2:20, 21) Mantang iniisip an seryosong obserbasyon ni Pablo, paano niato malilikayan ngonyan an sobrang pagparaisip sa ‘sadiri sana niatong kapakanan’?

Maninigo na dai niato noarin man obligaron an iba sa kongregasyon na tawan kita kan saindang panahon asin atension tanganing tabangan kita sa satong mga problema. Taano ta dai? Isipon nindo ini: Daing duda, magpapasalamat kitang marhay kun may itinaong materyal na tabang sa sato an sarong tugang para sa sarong emerhensia. Alagad oobligaron daw niato sia na itao sa sato an siring na materyal na tabang? Siempre dai. Sa medyo kaagid na paagi, minsan ngani an satong mamomoton na mga tugang pirmeng naoogma na tabangan kita, kaipuhan niatong magin timbang asin rasonable sa inaasahan niatong panahon na itatao ninda sa sato. Total, ano man na tabang an gibohon kan satong mga kapagtubod tanganing makaya niato an masakit na mga panahon, gusto niatong gibohon ninda iyan nin gikan sa boot.

Daing duda na an saindong Kristianong mga tugang pirmeng andam na tabangan kamo. Pero, kun minsan tibaad dai talaga ninda kayang itao an gabos nindong kaipuhan. Kun mangyari iyan, makakasierto kamo na ano man na pagbalo an tibaad mapaatubang sa saindo, aatamanon kamo ni Jehova, arog kan ginibo nia sa salmista.—Sal. 116:1, 2; Fil. 4:10-13.

Kaya, sa siring, dai mag-alangan na mapagpasalamat na akoon an ano man na probisyon na itinatao ni Jehova sa saindo—lalo na sa mga panahon nin kapurisawan asin problema. (Sal. 55:22) Gusto niang gibohon nindo iyan. Minsan siring, gusto man nia na magin “maogmang paratao” kamo. Kun siring, magin ‘desisyon nanggad kan saindong puso’ na magtao bilang pagsuportar sa tunay na pagsamba segun sa ano man na itinotogot kan saindong kamugtakan. (2 Cor. 9:6, 7) Sa paaging iyan, magigibo nindo an duwa—mapagpasalamat na mag-ako asin bilog na pusong magtao.

[Kahon/Mga Ritrato sa pahina 31]

“Ano an ibabayad ko ki Jehova para sa gabos na pakinabang na itinao nia sa sako?”—Sal. 116:12

▪ Maghanap nin mga oportunidad na ‘gumibo kan marahay sa gabos’

▪ Magin gikanan nin pamparigon sa boot asin espirituwal na kaginhawahan para sa iba

▪ Lubos na makikabtang sa paggibo nin mga disipulo sagkod sa itinotogot kan saindong kamugtakan