“Kamo mga Katood Ko”
“Kamo mga Katood Ko”
“Kamo mga katood ko kun ginigibo nindo an ipinagboboot ko sa saindo.”—JUAN 15:14.
1, 2. (a) Anong manlaenlaen na kamugtakan an pinaghalean kan mga katood ni Jesus? (b) Taano ta mahalagang marhay na kita magin katood ni Jesus?
MANLAENLAEN na kamugtakan an pinaghalean kan mga lalaking nakatukaw sa kuarto sa itaas kaiba ni Jesus. Parasira an magtugang na si Pedro asin Andres. Si Mateo dating parasingil nin buhis—kabilang sa sarong propesyon na ikinakauyam kan mga Judio. An nagkapira, arog ni Santiago asin Juan, posibleng marhay na midbid na si Jesus poon pa sa pagkaaki. An iba, arog ni Natanael, tibaad pira pa sanang taon siang midbid. (Juan 1:43-50) Pero, an gabos na yaon sa importanteng bangging idto nin Paskua sa Jerusalem kombensido na si Jesus an ipinanugang Mesiyas, an Aki kan buhay na Dios. (Juan 6:68, 69) Sierto nanggad na naogma sinda na madangog siang magsabi sa sainda: “Inapod ko kamong mga katood, huli ta an gabos na bagay na nadangog ko sa sakong Ama ipinaaram ko sa saindo.”—Juan 15:15.
2 Sa pangenot, an mga tataramon na iyan ni Jesus sa saiyang maimbod na mga apostol aplikado sa gabos na linahidan na Kristiano ngonyan asin, siempre pa, sa kairiba nindang “ibang mga karnero.” (Juan 10:16) Ano man an satong kamugtakan, puede kitang magkapribilehio na magin katood ni Jesus. Mahalagang marhay an pakikikatood niato sa saiya huli ta kun kita katood nia, kita katood man ni Jehova. Sa katunayan, imposibleng dumayupot ki Jehova kun dai nguna madayupot ki Cristo. (Basahon an Juan 14:6, 21.) Kun siring, ano an dapat niatong gibohon tanganing magin katood ni Jesus asin magdanay na katood nia? Bago niato pag-olayan an importanteng temang iyan, siyasaton niato an halimbawa mismo ni Jesus sa pagigin marahay na katood asin helingon niato kun ano an manonodan niato sa nagin reaksion sa saiya kan mga disipulo nia.
An Halimbawa ni Jesus sa Pagigin Marahay na Katood
3. Sa ano midbid si Jesus?
3 “Dakol an katood kan mayaman,” an isinurat kan madonong na si Hadeng Salomon. (Tal. 14:20) Ipinapaheling kan obserbasyon na iyan an tendensia nin bakong sangkap na mga tawo na makikatood dahel sa makukua ninda imbes na sa ikakatao ninda. Si Jesus dai nahelingan nin siring na kaluyahan. Dai nakaimpluwensia sa saiya an kuarta o kamugtakan nin sarong tawo sa sosyedad. Totoo, namotan ni Jesus an sarong mayaman na hoben na namamahala asin inagda nia ini na magin saiyang parasunod. Minsan siring, sinabihan nia an tawong iyan na ipabakal an mga bagay na yaon sa saiya asin itao sa mga dukha. (Mar. 10:17-22; Luc. 18:18, 23) Si Jesus midbid, bakong huli sa koneksion nia sa mga mayaman asin prominente, kundi sa pakikatood sa mga hamak asin minemenos.—Mat. 11:19.
4. Taano ta masasabing may katuyawan an mga katood ni Jesus?
4 Iyo nanggad, may katuyawan an mga katood ni Jesus. May beses na si Pedro dai nagin espirituwal an pagmansay sa mga bagay-bagay. (Mat. 16:21-23) Si Santiago asin Juan nagpaheling nin pagigin ambisyoso kan makiolay sinda na itao sa sainda ni Jesus an prominenteng mga posisyon sa Kahadean. Ikinaanggot kan ibang apostol an ginibo ninda, asin an isyu nin pagigin prominente padagos na nagin dahelan nin pagdiriskutiran. Minsan siring, mapasensiang pinagmaigotan ni Jesus na itanos an kaisipan kan saiyang mga katood asin sia dai tolos nairitar sa sainda.—Mat. 20:20-28.
5, 6. (a) Taano ta si Jesus nagdanay na katood kan kadaklan sa mga apostol? (b) Taano ta tinapos ni Jesus an saiyang pakikikatood ki Judas?
5 Si Jesus nagdanay na katood kan bakong sangkap na mga tawong ini bakong huli ta sia sobra kakonsintidor o dai nia naheheling an saindang mga pagkabakong sangkap. Imbes, an hineling nia iyo an saindang marahay na mga intension asin positibong mga kualidad. Halimbawa, si Pedro, Santiago, asin Juan napatorog imbes na suportaran si Jesus sa pinakamasakit na situwasyon. Natural sana na si Jesus nadesganar sa sainda. Minsan siring, naheling nia na marahay an saindang mga motibo, na nagsasabi: “Siempre, an espiritu nagmamawot na gayo, alagad an laman maluya.”—Mat. 26:41.
6 Sa kabaliktaran, tinapos ni Jesus an saiyang pakikikatood ki Judas Iscariote. Minsan ngani si Judas nakapagsagin na katood, narisa ni Jesus na tinogotan kan dating dayupot na kaibaibang ini na magin maraot an saiyang puso. Huling si Judas nagin katood kan kinaban, tinuyo nia na sia magin kaiwal nin Dios. (Sant. 4:4) Kun siring, pinahale na ni Jesus si Judas kan Saiyang ipahayag na katood Nia an natatada pang 11 maimbod na apostol.—Juan 13:21-35.
7, 8. Paano ipinahayag ni Jesus an saiyang pagkamoot sa mga katood nia?
7 Si Jesus dai nagheling sa mga sala kan saiyang maimbod na mga katood asin ginibo nia an para sa pinakaikakarahay ninda. Halimbawa, ipinamibi nia sa saiyang Ama na protehiran sinda durante kan mga pagbalo sa sainda. (Basahon an Juan 17:11.) Nagpaheling si Jesus nin konsiderasyon sa saindang pisikal na mga limitasyon. (Mar. 6:30-32) Asin sia bako sanang interesado na sabihon sa sainda kun ano an iniisip nia kundi na madangog asin masabotan man kun ano an iniisip asin saboot ninda.—Mat. 16:13-16; 17:24-26.
8 Si Jesus nabuhay asin nagadan para sa saiyang mga katood. Totoo, aram nia na dapat niang itao an saiyang buhay bilang legal na kahagadan tanganing panigoan an pamantayan nin hustisya kan saiyang Ama. (Mat. 26:27, 28; Heb. 9:22, 28) Alagad itinao ni Jesus an saiyang buhay bilang kapahayagan nin pagkamoot. “Mayo nin siisay man na may pagkamoot na orog pa kaini,” an sabi ni Jesus, “na itao nin saro an saiyang kalag para sa saiyang mga katood.”—Juan 15:13.
Ano an Reaksion kan mga Disipulo sa Pakikikatood ni Jesus?
9, 10. Ano an nagin reaksion kan mga tawo sa pagigin matinao ni Jesus?
9 Si Jesus matinao nin materyal na mga bagay, mapinadangat, asin nagtatao nin dakol na panahon sa iba. Bilang resulta, an mga tawo naparani an boot sa saiya asin naogma man na magtao sa saiya. (Luc. 8:1-3) Base sa personal na eksperyensia, si Jesus makakasabi: “Magin matinao, asin an mga tawo magtatao sa saindo. Iuula ninda sa saindong paa an marahay na takad, dusok, ginugo asin naglilipwas. Huli ta sa takadan na itinatakad nindo, iyan man sana an itatakad ninda sa saindo.”—Luc. 6:38.
10 Siempre, may mga nagprobar talaga na makiibaiba ki Jesus huli sana sa makukua ninda sa saiya. Binayaan si Jesus kan bakong tunay na mga katood na ini kan mamisinterpretar ninda an sarong bagay na sinabi nia. Imbes na magtiwala ki Jesus, tolos sindang nagkongklusyon nin sala asin binayaan sia. Sa kabaliktaran, maimbod an mga apostol. Parateng nababalo an pakikikatood ninda ki Cristo, alagad ginibo ninda an saindang pinakamakakaya na suportaran sia sa marahay asin masakit na mga panahon. (Basahon an Juan 6:26, 56, 60, 66-68.) Kan huring banggi ni Jesus bilang tawo digdi sa daga, ipinahayag nia an saiyang pagpahalaga sa mga katood nia, na nagsasabi: “Kamo an mga nagdanay na kadamay ko sa mga pagbalo sa sako.”—Luc. 22:28.
11, 12. Ano an sinierto giraray ni Jesus sa mga disipulo, asin ano an nagin reaksion ninda?
11 Dai nahaloy pagkatao ni Jesus nin komendasyon sa saiyang mga disipulo huli sa kaimbodan ninda, binayaan sia kan mismong mga lalaking ini. Sa halipot na panahon, tinogotan ninda na madaog nin pagkatakot sa tawo an saindang pagkamoot ki Cristo. Sa giraray, pinatawad sinda ni Jesus. Pagkagadan asin pagkabuhay nia liwat, sia nagpaheling sa sainda asin sinierto nia sa sainda na sia katood pa man giraray ninda. Dugang pa, ipinagkatiwala nia sa sainda an sagradong sugo—an gumibo nin mga disipulo “sa mga tawo kan gabos na nasyon” asin magin mga saksi nia “sagkod sa kaporoporohi kan daga.” (Mat. 28:19; Gibo 1:8) Ano an nagin reaksion kan mga disipulo?
12 Ginibo kan mga disipulo an bilog na makakaya ninda sa pagpalakop kan mensahe kan Kahadean. Sa tabang kan banal na espiritu ni Jehova, tolos nindang nalakopan an Jerusalem kan saindang katokdoan. (Gibo 5:27-29) Dawa an huma nin kagadanan dai nakadesganar sa sainda na kuyogon an pagboot ni Jesus na gumibo nin mga disipulo. Pakalihis sana nin pirang dekada pagkaako ninda kan pagboot ni Jesus, si apostol Pablo nakapagsurat na an maogmang bareta ikinahulit na “sa gabos na linalang sa sirong nin langit.” (Col. 1:23) Iyo nanggad, pinatunayan kan mga disipulong ini na pinahalagahan ninda an pagkakatood ninda ni Jesus!
13. Sa anong mga paagi tinogotan kan mga disipulo ni Jesus na magkaigwa nin epekto sa sainda an mga katokdoan nia?
13 Tinogotan man kan mga nagin disipulo na magkaigwa nin epekto sa saindang personal na buhay an mga katokdoan ni Jesus. Para sa dakol, nangahulogan ini nin darakulang pagbabago sa saindang gawe-gawe asin personalidad. An nagkapirang bagong disipulo dating mga homoseksuwal, parasambay, paraburat, o parahabon. (1 Cor. 6:9-11) An iba kinaipuhan na bagohon an saindang pagheling sa mga tawong iba an rasa. (Gibo 10:25-28) Pero, kinuyog ninda si Jesus. Hinale ninda an saindang daan na personalidad asin sinalidahan iyan kan bagong personalidad. (Efe. 4:20-24) Aram na ninda an “isip ni Cristo,” na sinasabot asin inaarog an saiyang pag-iisip asin paghiro.—1 Cor. 2:16.
Pakikikatood ki Cristo Ngonyan
14. Ano an ipinanuga ni Jesus na gigibohon nia durante “kan pagtatapos kan sistema nin mga bagay”?
14 An dakol sa mga Kristianong idto kan enot na siglo personal na midbid si Jesus o naheling sia pagkabuhay nia liwat. Siempre pa, dai kita nagkaigwa kan pribilehiong iyan. Kun siring, paano kita magigin mga katood ni Cristo? An sarong paagi iyo an pagkuyog sa paggiya kan maimbod asin mapagmansay na grupong oripon, na kompuesto kan linahidan nin espiritung mga tugang ni Jesus na buhay pa digdi sa daga. Nanuga si Jesus na durante “kan pagtatapos kan sistema nin mga bagay,” nonombrahan nia an oripon na ini na “mamahala sa gabos niang rogaring.” (Mat. 24:3, 45-47) Ngonyan, an dakulang mayoriya kan mga gustong makikatood ki Cristo bakong miembro kan grupong oripon na ini. Ano an epekto sa saindang pakikikatood ki Cristo kan reaksion ninda sa paggiya na nareresibi ninda hale sa maimbod na grupong oripon?
15. Ano an nagdedeterminar kun baga an saro karnero o kanding?
15 Basahon an Mateo 25:31-40. Inapod ni Jesus na mga tugang nia an mga makompuesto sa maimbod na grupong oripon. Sa ilustrasyon manongod sa pagsuruwaysuway sa mga karnero asin kanding, malinaw na sinabi ni Jesus na an pagtratar niato sa saiyang mga tugang pagtratar na man niato sa saiya. Sa katunayan, sinabi nia na mamimidbid an karnero asin kanding sa paagi nin pagtratar nin saro sa dawa ‘pinakasadit kan saiyang mga tugang.’ Kun siring, an pagsuportar sa maimbod na grupong oripon iyo an pangenot na paagi na ikakapaheling kan mga may daganon na paglaom an saindang pagmawot na magin katood ni Cristo.
16, 17. Paano niato ikakapaheling an satong pakikikatood sa mga tugang ni Cristo?
16 Kun an paglaom nindo mabuhay sa daga sa pagsakop kan Kahadean nin Dios, paano nindo ikakapaheling an saindong pakikikatood sa mga tugang ni Cristo? Pag-olayan niato an tolo sanang paagi. Enot, paagi sa bilog na pusong pakikikabtang sa paghuhulit. Pinagbotan ni Cristo an saiyang mga tugang na ihulit an maogmang bareta sa bilog na kinaban. (Mat. 24:14) Minsan siring, an natatada pa sa mga tugang ni Cristo digdi sa daga ngonyan masasakitan na isaabaga an paninimbagan na iyan kun mayo nin tabang kan saindang kairiba na ibang mga karnero. An totoo, kada maghulit an mga miembro kan grupong ibang mga karnero, tinatabangan ninda an mga tugang ni Cristo na otobon an sagradong sugo sa sainda. An maimbod asin mapagmansay na grupong oripon odok na pinapahalagahan an pakikikatood na ini, arog man ni Cristo.
17 An ikaduwang paagi na makakatabang sa mga tugang ni Cristo an mga kabilang sa grupong ibang mga karnero iyo an pinansial na pagsuportar sa paghuhulit. Dinagka ni Jesus an saiyang mga parasunod na makikatood paagi sa “bakong matanos na kayamanan.” (Luc. 16:9) Dai man ini nangangahulogan na puede niatong bakalon an pakikikatood ki Jesus o ki Jehova. Imbes, paagi sa paggamit kan satong materyal na kayamanan sa pagpaoswag kan intereses kan Kahadean, pinapatunayan niato an satong pakikikatood asin pagkamoot, bako sanang sa tataramon, kundi “sa gibo asin katotoohan.” (1 Juan 3:16-18) Itinatao niato an siring na pinansial na suporta kun kita nakikikabtang sa paghuhulit, nagdodonar nin kuarta para sa pagtogdok asin pagmantener kan satong mga pasilidad na pinagtitiriponan, saka nagkokontribwir nin pondo para sa pambilog na kinaban na paghuhulit. Baga man sadit o dakula an kantidad na ikinokontribwir niato, siertong pinapahalagahan ni Jehova sagkod ni Jesus an satong maogmang pagtatao.—2 Cor. 9:7.
18. Taano ta maninigo niatong kuyogon an basado sa Biblia na paggiya na itinatao kan kamagurangan sa kongregasyon?
18 An ikatolong paagi na pinapatunayan niato gabos na kita katood ni Cristo iyo an pakikikooperar sa paggiya na itinatao kan kamagurangan sa kongregasyon. An mga lalaking ini ninombrahan kan banal na espiritu sa paggiya ni Cristo. (Efe. 5:23) “Magin makinuyog kamo sa mga nangengenot sa saindo asin magin mapagpasakop,” an isinurat ni apostol Pablo. (Heb. 13:17) Kun beses, tibaad masakit para sa sato na kuyogon an basado sa Biblia na paggiya na itinatao sa sato kan lokal na kamagurangan. Posibleng marhay na aram niato an saindang mga pagkabakong sangkap, asin puedeng makaraot ini sa satong pagmansay sa saindang hatol. Pero, si Cristo, an Payo kan kongregasyon, naoogmang gamiton an bakong sangkap na mga lalaking ini. Kun siring, an reaksion niato sa autoridad ninda direktang may epekto sa satong pakikikatood ki Cristo. Kun pinapalampas niato an mga sala kan kamagurangan asin magayagayang sinusunod an saindang paggiya, pinapatunayan niato an satong pagkamoot ki Cristo.
Kun Saen Kita Makakakua nin Marahay na mga Katood
19, 20. Ano an makukua niato sa laog kan kongregasyon, asin ano an sunod na pag-oolayan niato?
19 Padagos kitang inaataman ni Jesus bako sanang paagi sa pangangataman kan mamomoton na mga pastor kundi paagi man sa pagtao sa sato nin espirituwal na mga ina asin tugang na lalaki saka tugang na babae sa laog kan kongregasyon. (Basahon an Marcos 10:29, 30.) Kan enot kamong makiasosyar sa organisasyon ni Jehova, ano an nagin reaksion kan saindong mga paryente? Logod na sinuportaran ninda an saindong mga paghihingoa na dumayupot sa Dios asin ki Cristo. Alagad si Jesus nagpatanid na kun beses “an magigin mga kaiwal nin saro iyo an kasararo nia mismo sa harong.” (Mat. 10:36) Nakakaranga nanggad na maaraman na sa laog kan kongregasyon, makakakua kita nin mga madayupot sa sato nin labi pa sa literal na tugang!—Tal. 18:24.
20 Siring sa ipinarisa kan personal na pataratara ni Pablo sa kongklusyon kan saiyang surat sa kongregasyon sa Roma, sia nagkaigwa nin dakol na dayupot na katood. (Roma 16:8-16) Tinapos ni apostol Juan an ikatolong surat nia paagi sa mga tataramon na: “Ipaabot mo an sakuyang pangungumusta sa mga katood segun sa ngaran.” (3 Juan 14) Malinaw na sia nagkaigwa man nin dakol na nagdadanay na katood. Paano niato maaarog an halimbawa ni Jesus asin kan enot na mga disipulo paagi sa pagkaigwa asin pagpapadanay nin makosog na pakikikatood sa satong espirituwal na mga tugang? Pag-oolayan sa sunod niatong artikulo an simbag sa hapot na ini.
Ano an Isisimbag Nindo?
• Anong halimbawa an itinao ni Jesus sa pagigin marahay na katood?
• Ano an nagin reaksion kan mga disipulo sa pakikikatood ni Jesus?
• Paano niato mapapatunayan na kita katood ni Cristo?
[Mga Hapot Para sa Pag-adal]
[Ritrato sa pahina 14]
Interesado si Jesus sa iniisip asin saboot kan saiyang mga katood
[Mga Ritrato sa pahina 16]
Paano niato ikakapaheling an satong pagmawot na magin katood ni Cristo?