Padagos na Tumalubo sa Pagkamoot na sa Magturugang

“Padagos kamong maglakaw sa pagkamoot, kun paanong namotan man kamo kan Cristo.”—EFE. 5:2.

1. Anong mahalagang karakteristiko kan saiyang mga parasunod an sinambit ni Jesus?

AN PAGHUHULIT kan maogmang bareta kan Kahadean nin Dios sa harong-harong midbidan kan Mga Saksi ni Jehova. Pero, laen na aspekto nin Kristianismo an pinili ni Cristo Jesus tanganing mamidbid an saiyang tunay na mga disipulo. Sia nagsabi: “Tinatawan ko kamo nin bagong togon, na kamo magkaminorootmootan; siring kan pagkamoot ko sa saindo, na kamo man magkaminorootmootan. Paagi kaini an gabos makakaaram na kamo an sakong mga disipulo, kun kamo nagkakaminorootmootan.”—Juan 13:34, 35.

2, 3. Ano an epekto sa mga nag-aatender sa satong Kristianong mga pagtiripon kan satong pagkamoot na sa magturugang?

² An pagkamoot kan tunay na Kristianong kasararoan nin magturugang mayong kapareho sa sosyedad nin tawo. Kun paanong minadukot an batbat sa magnet, paagi sa pagkamoot an mga lingkod ni Jehova minadayupot man sa lambang saro na may pagkasararo asin an mga sinsero naaakit sa tunay na pagsamba. Kuanon niatong halimbawa si Marcelino, sarong lalaki sa Cameroon na nabuta sa saiyang pinagtatrabahohan. Pagkatapos kan saiyang aksidente, luminakop an huringhuding na sia nabuta huling sia sarong mangkukulam. Imbes na rangahon sia kan saiyang pastor asin kan ibang miembro kan saiyang iglesia, sia hinale ninda bilang miembro kaiyan. Kan imbitaran sia nin sarong Saksi ni Jehova sa sarong pagtiripon, si Marcelino nag-alangan. Habo na niang maeksperyensiahan na isikwal.

³ Si Marcelino nasorpresa sa nangyari sa Kingdom Hall. Sia maogmang inako asin naranga kan mga katokdoan sa Biblia na nadangog nia. Sia nagpoon na mag-atender sa gabos na pagtiripon kan kongregasyon, nag-oswag sa saiyang pag-adal sa Biblia, asin nabautismohan kan 2006. Ngonyan sinasabi na nia an katotoohan sa saiyang pamilya asin kataraed saka nakapoon na sia nin nagkapirang pag-adal sa Biblia. Gusto ni Marcelino na maeksperyensiahan kan mga inaadalan nia sa Biblia an kaparehong pagkamoot na namatean nia sa tahaw kan banwaan nin Dios.

4. Taano ta maninigo niatong isapuso an sadol ni Pablo na ‘padagos na maglakaw sa pagkamoot’?

⁴ An satong pagkamoot na sa magturugang nakakaakit kaya iyan maninigong papagdanayon niato. Isip-isipa an sarong naglalaad na kalayo sa malipot na banggi, na dian minarani an mga tawo tanganing magpaimbong. Kun dai iyan padagos na lalagan nin gatong kan mga nagpapaimbong dian, mawawara an laad kaiyan. Kaagid kaiyan, an marahayon na bogkos nin pagkamoot sa kongregasyon magigin maluya kun kita bilang indibiduwal na mga Kristiano dai maghihingoa na pakosogon iyan. Paano niato magigibo iyan? Si apostol Pablo nagsimbag: “Padagos kamong maglakaw sa pagkamoot, kun paanong namotan man kamo kan Cristo asin itinao an saiyang sadiri para sa saindo bilang dolot asin atang sa Dios bilang mahamot na parong.” (Efe. 5:2) An hapot na gusto niatong pag-isipan iyo an, Sa anong mga paagi na ako padagos na makakalakaw sa pagkamoot?

“Humiwas Man Kamo”

5, 6. Taano ta sinadol ni Pablo an mga Kristianong taga Corinto na “humiwas”?

⁵ Sa mga Kristiano sa suanoy na Corinto, si apostol Pablo nagsurat: “An samong ngoso buminuka sa saindo, mga taga Corinto, an samong puso huminiwas. Kamo dai napipiot sa samo, kundi kamo napipiot sa sadiri nindong mamomoton na mga kapadangatan. Kaya, sa pagbalos nin siring man sana—ako nagtataram na garo sa mga aki—humiwas man kamo.” (2 Cor. 6:11-13) Taano ta sinadol ni Pablo an mga taga Corinto na humiwas sa saindang pagkamoot?

⁶ Estudyare kun paano nagpoon an kongregasyon  sa suanoy na Corinto. Si Pablo nagduman sa Corinto kan tigrakdag kan 50 C.E. Dawa ngani depisil an paghuhulit kan ponan nia iyan duman, an apostol dai nagpondo. Sa halipot na panahon, dakol sa siudad na iyan an nagtubod sa maogmang bareta. Sa laog nin “sarong taon may anom na bulan,” si Pablo nagin sibot sa pagtotokdo asin pagpakosog sa bagong kongregasyon. Malinaw nanggad, sia may hararom na pagkamoot sa mga Kristianong taga Corinto. (Gibo 18:5, 6, 9-11) Igwa sinda kan gabos na dahelan na mamotan asin igalang man sia. Minsan siring, an nagkapira sa kongregasyon ruminayo sa saiya. Tibaad an pira sa sainda dai nagustohan an saiyang prangkang hatol. (1 Cor. 5:1-5; 6:1-10) An iba tibaad naghinanyog sa pagpakaraot kan “labi-labi karahay na mga apostol.” (2 Cor. 11:5, 6) Gusto ni Pablo an tunay na pagkamoot kan gabos niang tugang. Kaya pinakiolayan nia sinda na “humiwas” paagi sa pagdayupot sa saiya asin sa iba pang kapagtubod.

7. Paano kita puedeng “humiwas” sa pagpaheling nin pagkamoot na sa magturugang?

⁷ Kumusta man kita? Paano kita puedeng “humiwas” sa pagpaheling nin pagkamoot na sa magturugang? An mga magkakaedad o magkakapareho an pinaghalean na grupong etniko tibaad natural sanang magin dayupot sa lambang saro. Asin an mga may pararehong hilig sa aling-alingan sa parate nag-iiribanan nin dakol na oras. Alagad kun an mga pinagkakainteresan niato na kapareho kan sa nagkapirang Kristiano nagigin dahelan na mapasuway kita sa iba, kaipuhan kitang “humiwas.” Madonong na hapoton niato an satong sadiri: ‘Bihira daw akong makiibaiba sa ministeryo o sa sosyal na mga aktibidad sa mga tugang na bako kong kadayupot? Sa Kingdom Hall, ako daw daing gayo nakikiibaiba sa mga bagohan huling naniniwala ako na kaipuhan na maglihis nguna an panahon bago ninda ako magin katood? Tinitino ko daw an mga gurang sagkod hoben sa kongregasyon?’

8, 9. Paano an hatol na nasa Roma 15:7 makakatabang sa sato na tinohon an lambang saro sa paagi na nagpapaoswag sa satong pagkamoot na sa magturugang?

⁸ Kun dapit sa pagtino sa lambang saro, an mga tataramon ni Pablo sa mga taga Roma makakatabang sa sato na magkaigwa kan tamang pagmansay sa satong mga kapwa parasamba. (Basahon an Roma 15:7.) An termino sa Griego na trinadusir na “akoon” nangangahulogan na “maboot o mapag-istimar na akoon, saka ibilang na kairiba asin katood nin saro.” Kan mga panahon kan Biblia, kun inaako nin sarong mapag-istimar na kag-imbitar sa saiyang harong an mga katood, ipinapaaram nia sa sainda na naoogma nanggad siang maheling sinda. Sa piguratibong paagi, siring kaiyan an pag-ako sa sato ni Cristo, asin sinasadol kita na arogon sia sa pag-ako sa mga kapwa parasamba.

⁹ Mantang tinitino niato an satong mga tugang sa Kingdom Hall asin sa iba pang lugar, puede niatong tawan nin atension an mga dai niato naheling o dai niato nakaolay kasuarin pa sana. Taano ta dai kita makipag-olay sa sainda nin pirang minuto? Sa sunod na pagtiripon, puede man niatong gibohon iyan sa iba pa. Sa halipot na panahon, maogma na niatong nakaolay an haros gabos na tugang niato. Dai kita dapat maghadit kun dai niato nakaolay an gabos sa sarong aldaw. Mayo nin siisay man na maninigong maghinanakit kun dai niato sinda nagigibong tinohon sa lambang pagtiripon.

10. Anong oportunidad na daing kaagid sa halaga an bukas sa gabos sa kongregasyon, asin paano niato lubos na maaaprobetsaran iyan?

¹⁰ An pagtino sa iba iyo an enot na lakdang sa pag-ako sa sainda. Iyan sarong lakdang na puedeng  magresulta sa nakakaogmang pag-orolay asin nagdadanay na mga pagkakatood. Halimbawa, kun an mga nag-aatender sa mga kombension asin asamblea magpamidbid sa iba asin magpoon na makipag-olay, inaantisipar nindang magherelingan giraray. An mga boluntaryo sa pagtogdok nin mga Kingdom Hall saka an mga nakikikabtang sa pag-ayuda sa parate nagigin marahay na magkakatood huling naaaraman ninda an marahay na mga kualidad kan lambang saro paagi sa mga bagay na iriba nindang naeeksperyensiahan. Dakol an oportunidad na magkaigwa nin nagdadanay na pagkakatood sa organisasyon ni Jehova. Kun kita ‘mapahiwas,’ madakol an satong katood, na nagpapakosog sa pagkamoot na nagpapasararo sa sato sa tunay na pagsamba.

Magtao nin Panahon sa Iba

11. Siring kan ipinapaheling sa Marcos 10:13-16, anong halimbawa an itinao ni Jesus?

¹¹ An gabos na Kristiano puedeng magmaigot na magin madaling dolokon arog ni Jesus. Estudyare kun ano an nagin reaksion ni Jesus kan probaran kan saiyang mga disipulo na olangon an mga magurang na darahon sa saiya an saindang mga aki. “Pabayae nindo na dumolok sa sako an saradang na aki,” an sabi nia. “Dai nindo sinda pagpugolan, huli ta an kahadean nin Dios para sa mga siring sa sainda.” Dangan “kinugos nia an mga aki asin pinonan na bendisyonan sinda, na ipinapatong an saiyang mga kamot sa sainda.” (Mar. 10:13-16) Imahinara kun gurano nanggad kaogma an mga aking idto kan sinda pahelingan nin siring na mamomoton na atension kan Dakulang Paratokdo!

12. Ano an makakaolang sa sato sa pakikipag-olay sa iba?

¹² Maninigong hapoton nin lambang Kristiano an saiyang sadiri, ‘Andam daw akong magtao nin panahon sa iba o ako daw garo baga parateng sibot-sibot?’ Kun beses, an mga ugale na bako man talagang sala puedeng magin olang na makapoon nin pag-oolay. Halimbawa, kun parate kitang naggagamit nin cell phone o earphones tanganing magdangog sa mga rekording sa presensia nin iba, tibaad isipon ninda na habo niato sindang makaibanan. Kun parateng naheheling nin iba na biyong nakasentro an satong atension sa paggamit nin pocket-size na komputer, tibaad isipon ninda na dai kita interesadong makipag-olay sa sainda. Siempre, may “panahon na dai maggirong.” Alagad kun may mga tawo sa palibot niato, sa parate iyan “panahon na magtaram.” (Ecl. 3:7) Tibaad may magsabi, “Mas gusto kong magsolosolo” o “Habo kong makipag-olay kun aga.” Minsan siring, an makikatood na pakikipag-olay dawa kun bako niatong ugale iyan prueba nin pagkamoot na “dai naghahanap kan sadiring kapakanan kaiyan.”—1 Cor. 13:5.

13. Dinagka ni Pablo si Timoteo na magkaigwa nin anong pagmansay sa Kristianong mga tugang?

¹³ Dinagka ni Pablo an hoben na si Timoteo na igalang an gabos na miembro kan kongregasyon. (Basahon an 1 Timoteo 5:1, 2.) Maninigo man niatong trataron an mga gurang na Kristiano na garo satong mga ina saka ama asin an mga hoben na garo satong mga tugang, an boot sabihon, mga aki kan sato mismong mga magurang. Kun igwa kita kan saboot na iyan, dai mamamatean nin siisay man sa satong namomotan na mga tugang na sinda garo mga estranghero kun kaibanan kita.

14. Ano an nagkapirang pakinabang nin nakakapakosog na pakikipag-olay sa iba?

¹⁴ Mantang iinaayon niato an iba sa nakakapakosog na pakikipag-olay, kita nakakatabang sa saindang espirituwalidad asin ikakarahay sa emosyon. Maogmang nagigirumdoman nin sarong tugang na lalaki, na naglilingkod sa sangang opisina, an nagkapirang gurang na Bethelite na regular na nakikipag-olay sa saiya kan sia bagohan pa sa Bethel. An saindang nakakaparigon na mga tataramon nagpamate sa saiya na sia talagang kabtang kan pamilyang Bethel. Ngonyan pinagmamaigotan niang arogon sinda paagi sa pakikipag-olay sa saiyang mga kapwa Bethelite.

An Kapakumbabaan Nakakatabang sa Sato na Makipagkatoninongan

15. Ano an nagpapaheling na kun beses kita nagkakaigwa nin dai pagkakaoyon?

¹⁵ Si Euodias asin Sintique, duwang Kristiana sa suanoy na Filipos, minalataw na nadepisilan na resolberan an sarong problema na naglataw sa pag-oltanan ninda. (Fil. 4:2, 3) Huli sa mainit na diskutiran ni Pablo asin Bernabe na naaraman nin dakol, may panahon na nagsuwayan sinda. (Gibo 15:37-39) Ipinapaheling kan mga pagkasaysay na ini na kun beses an tunay na mga parasamba nagkakaigwa nin dai pagkakaoyon. Si Jehova nagtatao sa sato nin tabang na maresolberan an mga iriwal asin ikabalik an mga pagkakatood. Alagad may sarong bagay na hinahagad nia sa sato.

16, 17. (a) Gurano kahalaga an kapakumbabaan sa pagresolber sa personal na mga iriwal? (b) Paano an pagkasaysay dapit sa pagdolok ni Jacob ki Esau nagpapaheling kan kahalagahan nin kapakumbabaan?

 ¹⁶ Imahinara na kamo asin an sarong katood mabiahe na nakalunad sa auto. Bago kamo makabiahe, dapat kamong gumamit nin liabe tanganing paandaron an makina kan auto. Nangangaipo man nin pinakaliabe tanganing maponan an pagresolber sa personal na dai pagkasinabotan. An pinakaliabeng iyan iyo an kapakumbabaan. (Basahon an Santiago 4:10.) Siring sa ipinapaheling kan minasunod na halimbawa na sono sa Kasuratan, an pinakaliabeng iyan nakakatabang sa mga dai nagkakasinabotan na magpoon na iaplikar an mga prinsipyo sa Biblia.

¹⁷ Beinteng taon an luminihis poon kan maanggot nin grabe si Esau huli sa pagkawara kan saiyang pagkamatua na napaduman sa saiyang kakambal, si Jacob, asin gusto niang gadanon ini. An kambal madali nang maghelingan giraray pakalihis kan bilog na panahon na iyan, “asin si Jacob natakot na gayo asin nahadit.” Naisip nia na dakula an posibilidad na salakayon sia ni Esau. Alagad sa paghelingan na iyan, may ginibo si Jacob na dai inaasahan ni Esau. Sia “duminuko sa daga” mantang minadolok sia sa saiyang tugang. Ano an sunod na nangyari? “Si Esau duminalagan sa pagsabat sa saiya, asin kinugos nia sia asin kinugos sia sa liog asin hinadokan sia, asin naghiribi sinda.” Nalikayan an peligro na magkaigwa nin labanan. An kapakumbabaan ni Jacob nakatabang na mapangganahan an ano man na pagkaongis na tibaad nakatanom sa boot ni Esau.—Gen. 27:41; 32:3-8; 33:3, 4.

18, 19. (a) Kun may lumataw na personal na mga iriwal, taano ta mahalagang marhay na kita na an mag-enot na mag-aplikar kan sono sa Kasuratan na hatol? (b) Taano ta dai kita maninigong magpondo kun sa primero bakong positibo an reaksion kan nakaiwal niato?

¹⁸ An Biblia igwa nin marahayon na hatol dapit sa pagresolber sa mga iriwal. (Mat. 5:23, 24; 18:15-17; Efe. 4:26, 27) * Minsan siring, kun dai niato mapakumbabang iaaplikar an hatol na iyan, madedepisilan kitang makipagkatoninongan. An paghalat sa nakaiwal niato na magpaheling nin kapakumbabaan bako an solusyon kun kita puede man na magpaheling kaiyan.

¹⁹ Kun an enot niatong mga pagprobar na makipagkatoninongan garo baga bakong mapanggana huli sa sarong dahelan, dai kita maninigong mawaran nin paglaom. Tibaad kaipuhan kan tawong iyan nin panahon tanganing makapag-isip-isip. Si Jose trinaydor kan saiyang mga tugang. Haloy na panahon an naglihis bago ninda sia nakaatubang bilang primer ministro nin Egipto. Minsan siring, sa katapustapusi, nagbago an saboot ninda asin sinda nakimaherak na patawadon. Pinatawad sinda ni Jose, asin an mga aki ni Jacob nagin sarong nasyon na nagkapribilehio na magdara kan ngaran ni Jehova. (Gen. 50:15-21) Paagi sa pagpapadanay nin katoninongan sa satong mga tugang,  nakakatabang kita para sa pagkasararo asin kagayagayahan kan kongregasyon.—Basahon an Colosas 3:12-14.

Mamoot Kita “sa Gibo Asin Katotoohan”

20, 21. Anong leksion an manonodan niato sa paghanaw ni Jesus kan bitis kan saiyang mga apostol?

²⁰ Kan madali nang magadan si Jesus, sinabi nia sa saiyang mga apostol: “Ako nagtao sa saindo nin arogan, tanganing, kun ano an ginibo ko sa saindo, iyo man an maninigong gibohon nindo.” (Juan 13:15) Katatapos pa sana niang hanawan an bitis kan 12. An ginibo ni Jesus bako sanang sarong ritual ni akto sana nin kabootan. Bago isaysay ni Juan an dapit sa paghanaw kan bitis, sia nagsurat: “Si Jesus, huling namoot sa saiyang mga sadiri na yaon sa kinaban, namoot sa sainda sagkod sa katapusan.” (Juan 13:1) An pagkamoot ni Jesus sa saiyang mga disipulo an nagpahiro sa saiya na gibohon an paglilingkod na sa parate ginigibo nin sarong oripon. Ngonyan dapat na may kapakumbabaan sindang gumibo nin mamomoton na mga bagay sa lambang saro. Iyo, an tunay na pagkamoot na sa magturugang maninigong magpahiro sa sato na magmakolog asin magmalasakit sa gabos na Kristianong tugang niato.

²¹ Si apostol Pedro, na an bitis hinanawan kan Aki nin Dios, nakasabot kan kahulogan kan ginibo ni Jesus. Sia nagsurat: “Ngonyan na dinalisay na nindo an saindong kalag paagi sa saindong pagkuyog sa katotoohan na an ibinunga bakong ipokritong kapadangatan na sa magturugang, magkaminorootmootan kamo nin makosog gikan sa puso.” (1 Ped. 1:22) Si apostol Juan, na an bitis hinanawan man kan Kagurangnan, nagsurat: “Saradit na aki, mamoot kita, bakong sa tataramon ni sa dila, kundi sa gibo asin katotoohan.” (1 Juan 3:18) Logod na pahiroon kita kan satong puso na patunayan an satong pagkamoot na sa magturugang paagi sa gibo.

[Nota sa Ibaba]

Nagigirumdoman daw Nindo?

• Sa anong mga paagi kita puedeng “humiwas” sa satong pagkaminorootmootan?

• Ano an makakatabang sa sato na magtao nin panahon sa iba?

• Ano an papel nin kapakumbabaan sa pakikipagkatoninongan?

• Ano an maninigong magpahiro sa sato na magmakolog sa mga kapagtubod?

[Mga Hapot Para sa Pag-adal]

[Ritrato sa pahina 21]

Maogmang akoon an mga kapagtubod

[Ritrato sa pahina 23]

Dai pagpalampason an mga oportunidad na magtao nin panahon sa iba