Gamiton an Kada Aldaw kan Saindong Buhay sa Ikakamuraway nin Dios

“PAGKAAGA ipadangog mo sa sako an saimong mamomoton na kabootan,” an pamibi ki Jehova kan salmistang si David. “Ipaaram mo sa sako an dalan na maninigo kong lakawan.” (Sal. 143:8) Kun kamo minabangon asin nagpapasalamat ki Jehova para sa sarong bagong aldaw nin buhay, kamo daw, arog ni David, nakikimaherak ki Jehova na logod giyahan kamo kun paano madesisyon asin kun ano an pinakamarahay na gibohon? Daing duda na ginigibo nindo iyan.

Bilang nagdusay na mga lingkod ni Jehova, “baga man [kita] nagkakakan o nag-iinom o ano pa man an ginigibo,” pinagmamaigotan niatong “gibohon an gabos na bagay sa ikakamuraway nin Dios.” (1 Cor. 10:31) Aram niato na an paagi kan satong pamumuhay sa aroaldaw magsalang makakatao nin onra ki Jehova o dai. Ginigirumdom man niato na an Tataramon nin Dios nagsasabi na si Satanas nag-aakusar sa mga tugang ni Cristo—asin, sa katunayan, sa gabos na lingkod nin Dios digdi sa daga—“aldaw asin banggi.” (Kap. 12:10) Kun siring, determinado kitang magtao nin simbag sa falsong mga akusasyon ni Satanas asin pagayagayahon an puso ni Jehova paagi sa paggibo nin sagradong paglilingkod sa satong langitnon na Ama “aldaw asin banggi.”—Kap. 7:15; Tal. 27:11.

Estudyaran niato nin halipot an duwang importanteng paagi na magagamit niato an kada aldaw kan satong buhay sa ikakamuraway nin Dios. An enot kalabot an paggibo niato nin tamang mga prioridad asin an ikaduwa, pagpaheling nin konsiderasyon sa iba.

Gumawe Kaoyon kan Satong Panuga

Paagi sa satong pagdusay ki Jehova, ipinahayag niato an satong odok sa pusong pagmawot na paglingkodan sia. Kita nanuga man ki Jehova na kita malakaw sa saiyang mga dalan “aroaldaw”—iyo, sagkod lamang. (Sal. 61:5, 8) Kun siring, paano kita minagawe kaoyon kan panugang iyan? Paano niato ipinapaheling kada aldaw an satong bilog na pusong pagkamoot ki Jehova?

Malinaw nanggad na sinasabi kan Tataramon nin Dios an mga paninimbagan na inaasahan ni Jehova na ootobon niato. (Deut. 10:12, 13) An nagkapira nakalista sa kahon na may titulong  “Mga Paninimbagan na Itinao nin Dios,” sa pahina 22. An gabos na asignasyon na ini itinao nin Dios asin sa siring mahalaga ini. Paano kita nagdedesisyon kun arin an magigin prioridad niato kun may duwang paninimbagan o labi pa na sarabay na nagkakaipo kan satong atension?

Prioridad niato an satong sagradong paglilingkod, na kaiba an pag-adal sa Biblia, pamimibi, Kristianong mga pagtiripon, asin ministeryo. (Mat. 6:33; Juan 4:34; 1 Ped. 2:9) Pero, bako sanang espirituwal na mga aktibidad an ginigibo niato sa bilog na aldaw. Kaipuhan na iiba sa satong iskedyul an pagtrabaho, pag-eskuela, asin dakol na paninimbagan sa harong. Dawa siring, ginigibo niato an satong pinakamakakaya na iareglo an sekular na trabaho asin iba pang aktibidad sa paagi na iyan dai nakakaolang sa satong sagradong paglilingkod, arog baga kan pag-atender sa Kristianong mga pagtiripon. Halimbawa, kun nagpaplanong magbakasyon, sinesegurado niato na dai kita mapalta sa pagsongko kan paraataman sa sirkito, sa aldaw nin espesyal na asamblea, sa pansirkitong asamblea, o sa pandistritong kombension. Kun beses, tibaad puede niatong sarabay na gibohon an nagkapira sa satong mga paninimbagan. Halimbawa, puede niatong gibohon na sarong proyekto nin pamilya an paglinig sa Kingdom Hall o gamiton an oras nin pangudto sa trabaho o eskuelahan tanganing magpatotoo sa mga katrabaho o kapwa estudyante. Tunay nanggad, kun kaipuhan niatong gumibo nin desisyon sa satong buhay—siring baga kan paghanap nin trabaho, pagpili nin edukasyon o mga katood—gusto niatong magiyahan an satong mga desisyon kan pinakaprioridad niato sa buhay—an pagsamba ki Jehova, an satong mamomoton na Ama.—Ecl. 12:13.

 Magpaheling nin Konsiderasyon sa Iba

Gusto ni Jehova na kita magpaheling nin pagmakolog sa iba asin gumibo nin marahay sa sainda. Sa ibong na lado, si Satanas nagpapalakop nin kaimotan. An saiyang kinaban pano nin mga tawong “mamomoton sa sainda man sana” asin “mamomoton sa kasingawan” saka mga tawong ‘nagtatanom para sa laman.’ (2 Tim. 3:1-5; Gal. 6:8) Daing gayo iniisip nin dakol an mga epekto sa iba kan saindang mga ginigibo. “An mga gibo kan laman” risang-risa sa gabos na lugar.—Gal. 5:19-21.

Huling napapahiro kan banal na espiritu ni Jehova, laen nanggad an paggawe kan mga nagpapaheling nin pagkamoot, kabootan, asin karahayan sa saindang pagtratar sa iba! (Gal. 5:22) An Tataramon nin Dios nagsasabi sa sato na enoton an mga pangangaipo nin iba kisa kan sa sato. Kun siring, interesado nanggad kita sa lambang saro, pero nag-iingat kita na dai makiaram sa personal na mga bagay-bagay. (1 Cor. 10:24, 33; Fil. 2:3, 4; 1 Ped. 4:15) Kita nagpapaheling nin nangorognang konsiderasyon sa mga kapagtubod. Pero, nagmamaigot man kitang magin matinabang sa mga daing pagtubod. (Gal. 6:10) Makakahanap daw kamo nin oportunidad ngonyan na magpaheling nin kabootan sa saro na nakamidbid nindo?—Helingon an kahon na  “Magpaheling sa Sainda nin Konsiderasyon,” sa pahina 23.

An pagpaheling nin konsiderasyon ginigibo bako sanang sa sarong espesyal na panahon o partikular  na situwasyon. (Gal. 6:2; Efe. 5:2; 1 Tes. 4:9, 10) Imbes, kita aroaldaw na nagmamaigot na aramon an mga kamugtakan nin iba asin tolos na nagtatabang kun kaipuhan, dawa ngani tibaad bakong kombenyente para sa sato an paggibo kaiyan. Boot niatong magin buka an palad paagi sa pagtao nin ano man na makakaya niato—an satong panahon, materyal na mga rogaring, eksperyensia, asin kadonongan. Sinisierto sa sato ni Jehova na kun kita matinao sa iba, sia magigin matinao man sa sato.—Tal. 11:25; Luc. 6:38.

Sagradong Paglilingkod “Aldaw Asin Banggi”

Posible daw talaga na gumibo nin sagradong paglilingkod ki Jehova “aldaw asin banggi”? Iyo, paagi sa pagigin regular asin maigot sa gabos na aspekto kan satong pagsamba. (Gibo 20:31) Puedeng magin okupado nin sagradong paglilingkod an satong buhay paagi sa aroaldaw na pagbasa asin paghorophorop sa Tataramon nin Dios, pamimibi nin daing ontok, pagmamaigot na umatender sa gabos na pagtiripon, asin pag-aprobetsar sa lambang oportunidad na magpatotoo.—Sal. 1:2; Luc. 2:37; Gibo 4:20; 1 Tes. 3:10; 5:17.

Personal daw niatong ginigibo an siring na sagradong paglilingkod ki Jehova? Kun iyo, an pagmawot niato na paogmahon sia asin magtao nin simbag sa mga akusasyon ni Satanas mababanaag sa gabos na aspekto kan satong pamumuhay sa aroaldaw. Nagmamaigot kitang pamurawayon si Jehova sa gabos na ginigibo niato asin sa ano man na situwasyon niato. Tinotogotan niato an saiyang mga prinsipyo na giyahan kita sa satong pagtaram asin paggawe saka sa paggibo nin mga desisyon. Ipinapaheling niato an satong pagpahalaga sa saiyang mamomoton na pangangataman asin suporta paagi sa lubos na pagsarig sa saiya asin paggamit kan pinakamakakaya niato sa paglilingkod sa saiya. Asin inaako niato an saiyang hatol asin disiplina kun, huli sa satong pagkabakong sangkap, dai niato naaabot an saiyang mga pamantayan.—Sal. 32:5; 119:97; Tal. 3:25, 26; Col. 3:17; Heb. 6:11, 12.

Padagos kitang mamuhay kada aldaw sa ikakamuraway nin Dios. Paagi sa paggibo kaiyan, kita magkakaigwa nin kaginhawahan para sa satong kalag asin magkakamit nin mamomoton na pangangataman kan satong langitnon na Ama sagkod lamang.—Mat. 11:29; Kap. 7:16, 17.

[Kahon/Mga Ritrato sa pahina 22]

 Mga Paninimbagan na Itinao nin Dios

• Mamibi nin parate.—Roma 12:12.

• Basahon asin pag-adalan an Biblia, na personal na iinaaplikar iyan.—Sal. 1:2; 1 Tim. 4:15.

• Sambahon si Jehova sa kongregasyon.—Sal. 35:18; Heb. 10:24, 25.

• Tawan an satong mga kapamilya nin materyal, espirituwal, asin emosyonal na mga pangangaipo.—1 Tim. 5:8.

• Ihulit an maogmang bareta kan Kahadean, asin gumibo nin mga disipulo.—Mat. 24:14; 28:19, 20.

• Asikasohon an satong pisikal, espirituwal, asin emosyonal na salud, na kaiba dian an pag-areglo nin kapakipakinabang na pag-aling-aling.—Mar. 6:31; 2 Cor. 7:1; 1 Tim. 4:8, 16.

• Asikasohon an mga paninimbagan sa kongregasyon.—Gibo 20:28; 1 Tim. 3:1.

• Siertohon na marahay an kamugtakan kan satong harong asin Kingdom Hall.—1 Cor. 10:32.

[Kahon/Ritrato sa pahina 23]

 Magpaheling sa Sainda nin Konsiderasyon

• Sarong may edad nang tugang na lalaki o babae.—Lev. 19:32.

• Sarong nasasakitan huli sa pisikal o emosyonal na helang. —Tal. 14:21.

• Sarong kakongregasyon na may pangangaipong gayo na kaya nindong itao.—Roma 12:13.

• Sarong miembro kan saindo mismong pamilya.—1 Tim. 5:4, 8.

• Sarong kapagtubod na nagadanan nin agom.—1 Tim. 5:9.

• Sarong mahigos na magurang sa kongregasyon na kakongregasyon nindo.—1 Tes. 5:12, 13; 1 Tim. 5:17.