Nabibindikar Nanggad an Pamamahala ni Jehova!
Nabibindikar Nanggad an Pamamahala ni Jehova!
“An Kaharohalangkawe iyo an Namamahala sa kahadean nin katawohan.”—DAN. 4:17.
1, 2. Ano an nagkapirang dahelan kun taano ta bakong mapanggana an pamamahala nin tawo?
AN PAMAMAHALA nin tawo bako nanggad mapanggana! Mayong duda dian. An sarong pangenot na dahelan kaiyan iyo na an mga tawo mayo nin kadonongan na mamahala nin mapanggana. An pagigin bakong mapanggana kan pamamahala nin tawo nangorognang risang-risa ngonyan na dakol na namamahala an nagpapaheling nin pagigin ‘mamomoton sa sainda man sana, mamomoton sa kuarta, mapagpasikat sa sadiri, maabhaw, bakong maimbod, dai maoyonan, parapakaraot, mayong pagpupugol sa sadiri, maringis, mayong pagkamoot sa karahayan, parapasaloib, matagas an payo, asin maabhaw huli sa pag-orgolyo.’—2 Tim. 3:2-4.
2 Kan suanoy na panahon, isinikwal kan satong enot na mga magurang an pamamahala nin Dios. Sa paggibo kaiyan, tibaad inisip ninda na magigin independiente sinda. Pero, an totoo sinda nagpasakop sa pamamahala ni Satanas. An anom na milenyo na salang pamamahala nin tawo—na mapuersang naimpluwensiahan kan “namamahala sa kinaban na ini,” si Satanas—nagresulta ngonyan sa pinakarurong kamugtakan sa kasaysayan nin tawo. (Juan 12:31) Sa pagkomento dapit sa kamugtakan nin katawohan ngonyan, an The Oxford History of the Twentieth Century nagsasabi na mayong kamanungdanan an “paghanap sa sarong sangkap na kinaban.” Iyan nagpapaliwanag: “Bako sanang iyan dai mahahanap, kundi an pagprobar na muknaon iyan nagreresulta sa pinakagrabeng kapahamakan, totalitaryanismo, asin guerra.” Prangka nanggad na pag-admitir iyan na bakong mapanggana an pamamahala nin tawo!
3. Ano an masasabi niato manongod sa nagin paagi kutana nin pamamahala nin Dios kun dai nagkasala si Adan asin Eva?
3 Kun siring, makaturotriste nanggad na isinikwal kan satong enot na mga magurang an solamenteng pamamahala na talagang epektibo—an pamamahala nin Dios! Siempre, dai niato aram nin eksakto kun ano kutana an nagin paagi nin pamamahala ni Jehova sa daga kun si Adan asin Eva nagdanay na maimbod sa saiya. Minsan siring, makakasierto kita na an pag-ako kan bilog na katawohan sa pamamahala nin Dios nagkaigwa kutana nin pagkamoot asin mayo kutana nin ipinapaorog. (Gibo 10:34; 1 Juan 4:8) Huli sa daing kaagid na kadonongan nin Dios, makakasierto man kita na kun an katawohan nagdanay na sakop kan pamamahala ni Jehova, nalikayan kutana an gabos na salang ginibo kan mga parasuportar sa pamamahala nin tawo. An pamamahala nin Dios, o teokrasya, nagin kutanang mapanggana sa ‘pagpanigo sa mawot nin lambang bagay na may buhay.’ (Sal. 145:16) Sa simpleng pagtaram, iyan saro kutanang sangkap na pamamahala. (Deut. 32:4) Makaturotriste nanggad na isinikwal iyan nin mga tawo!
4. Sagkod saen an pagtogot ni Jehova ki Satanas na mamahala?
4 Pero, marahay na girumdomon na minsan ngani tinogotan ni Jehova an mga tawo na mamahala sa saindang sadiri, dai nia noarin man binutasan an saiyang deretso na mamahala sa mga linalang nia. Dawa an makapangyarihan na hade kan Babilonya napiritan na akoon na sa katapustapusi “an Kaharohalangkawe iyo an Namamahala sa kahadean nin katawohan.” (Dan. 4:17) Pag-abot nin panahon, papangyayarihon kan Kahadean nin Dios na maotob an kabotan nia. (Mat. 6:10) Totoo, sa halipot na panahon, tinogotan ni Jehova si Satanas na umakto bilang an “dios kan sistemang ini nin mga bagay” tanganing makatao an Dios nin nakakakombensir na simbag sa mga isyung pinalataw kan paratumang na iyan. (2 Cor. 4:4; 1 Juan 5:19) Minsan siring, nungka na kayang gibohon ni Satanas an orog pa kisa sa itinotogot sana ni Jehova. (2 Cron. 20:6; ikomparar an Job 1:11, 12; 2:3-6.) Asin pirmeng igwa nin mga indibiduwal na nagpapasakop sa Dios, dawa ngani sinda namumuhay sa kinaban na pinamamahalaan kan dakulang Kaiwal nin Dios.
An Pamamahala nin Dios sa Israel
5. Ano an ipinanuga kan Israel sa Dios?
5 Poon kan panahon ni Abel sagkod sa panahon kan mga patriarka, dakol na maimbod na indibiduwal an nagsamba ki Jehova asin nagkuyog sa saiyang mga pagboot. (Heb. 11:4-22) Kan kaaldawan ni Moises, si Jehova nakipagtipan sa mga naggikan sa patriarkang si Jacob, asin ini nagin an nasyon nin Israel. Kan 1513 B.C.E., nanuga an mga Israelita na sinda asin an mga naggikan sa sainda aakoon si Jehova bilang an Namamahala, na nagsasabi: “An gabos na sinabi ni Jehova andam niamong gibohon.”—Ex. 19:8.
6, 7. Ano an nagin mga karakteristiko kan pamamahala nin Dios sa Israel?
6 May katuyohan si Jehova sa pagpili sa mga Israelita na magin banwaan nia. (Basahon an Deuteronomio 7:7, 8.) Kalabot sa pagpiling ini bako sanang an kapakanan kan mga Israelita. Kalabot man dian an ngaran asin soberaniya nin Dios, asin iyan an orog na mahalaga. An Israel dapat na magserbing saksi sa katotoohan na si Jehova an solamenteng tunay na Dios. (Isa. 43:10; 44:6-8) Huli kaini, si Jehova nagsabi sa nasyon na iyan: “Ika sarong banal na banwaan ki Jehova na saimong Dios, asin pinili ka ni Jehova na magin saiyang banwaan, sarong espesyal na rogaring, hale sa gabos na banwaan na nasa ibabaw kan daga.”—Deut. 14:2.
7 Kinonsiderar kan pamamahala nin Dios an pagigin bakong sangkap kan mga Israelita. Kadungan kaiyan, an saiyang mga ley sangkap asin nagpapabanaag kan mga kualidad kan Kagtao kaiyan. An mga togon ni Jehova na itinao paagi ki Moises malinaw na nagtatampok kan kabanalan nin Dios, kan saiyang pagkamoot sa hustisya, pagigin andam na magpatawad, asin pagpapasensia. Kan huri, kan kaaldawan ni Josue asin kan saiyang henerasyon, kinuyog kan nasyon an mga togon ni Jehova asin nagkamit sinda nin katoninongan asin espirituwal na mga bendisyon. (Jos. 24:21, 22, 31) Ipinaheling kan peryodong iyan sa kasaysayan nin Israel an kapangganahan kan pamamahala ni Jehova.
May Maraot na Resulta an Pamamahala nin Tawo
8, 9. Ano an bakong madonong na kahagadan kan Israel, asin ano an mga resulta?
8 Pero, sa paglihis nin panahon, an mga Israelita parateng minatalikod sa pamamahala nin Dios kaya nawara ninda an proteksion nia. Pag-abot nin panahon, paagi ki propeta Samuel, an Israel naghagad nin tawong hade. Sinabi ni Jehova ki Samuel na itao an kahagadan ninda. Minsan siring, si Jehova nagsabi pa: “Bakong ika an isinikwal ninda, kundi ako an isinikwal ninda sa pagigin hade sa sainda.” (1 Sam. 8:7) Minsan ngani tinogotan ni Jehova an Israel na magkaigwa nin naheheling na hade, pinatanidan nia sinda na may maraot na resulta an pamamahala nin tawong hade.—Basahon an 1 Samuel 8:9-18.
9 Ipinaheling kan kasaysayan na totoo an patanid ni Jehova. An pamamahala nin tawong hade nagresulta sa seryosong mga problema sa Israel, nangorogna kun an hadeng iyan bakong maimbod. Paagi sa paggirumdom sa halimbawang iyan nin Israel, bakong makangangalas na sa bilog na panahon, dai nagin mapanggana sa pagtao nin permanente asin marahay na mga resulta an gobyerno nin mga tawo na dai nakakamidbid ki Jehova. Totoo, an nagkapirang politiko nag-aarang na bendisyonan nin Dios an mga paghihingoa ninda na magkaigwa nin katoninongan asin katiwasayan, alagad paano bebendisyonan nin Dios an mga dai nagpapasakop sa pamamahala nia?—Sal. 2:10-12.
Sarong Bagong Nasyon na Sakop kan Pamamahala nin Dios
10. Taano ta sinalidahan an Israel bilang piniling nasyon nin Dios?
10 An nasyon nin Israel dai nagin maimbod sa paglilingkod ki Jehova. Sa kahurihurihi, isinikwal ninda an nombrado nin Dios na Mesiyas, asin sinda isinikwal ni Jehova saka nagdesisyon sia na salidahan sinda nin sarong grupo nin mga tawo na magigin sarong bagong nasyon. Bilang resulta, kan taon 33 C.E. naestablisar an Kristianong kongregasyon nin linahidan na mga parasamba ki Jehova. An kongregasyon na iyan garo man sana sarong bagong nasyon na sakop kan autoridad kan pamamahala ni Jehova. Inapod iyan ni Pablo na “Israel nin Dios.”—Gal. 6:16.
11, 12. Kun dapit sa pangangataman, ano an mga pagkakaagid kan Israel asin kan “Israel nin Dios”?
11 An orihinal na nasyon nin Israel asin an bagong “Israel nin Dios” may mga pagkakalaen asin pagkakaagid. Bakong arog kan suanoy na Israel, an Kristianong kongregasyon mayong tawong hade asin dai kaiyan kaipuhan na magdolot nin mga atang na hayop para sa mga nagkakasala. An sarong pagkakaagid kan nasyon nin Israel asin kan Kristianong kongregasyon iyo an areglo dapit sa kamagurangan na lalaki. (Ex. 19:3-8) An siring na Kristianong kamagurangan dai nagpapakangkagurangnan sa aripompon. Imbes, sinda nagpapastor sa kongregasyon asin gikan sa boot na nangengenot sa Kristianong mga aktibidad. Mamomoton na tinatratar ninda an lambang indibiduwal sa kongregasyon, na sinda gabos tinatawan nin onra asin dignidad.—2 Cor. 1:24; 1 Ped. 5:2, 3.
12 Paagi sa paghorophorop sa pagtratar nin Dios sa Israel, an mga miembro kan “Israel nin Dios” asin an saindang kaibaiba na “ibang mga karnero” nakakapatalubo nin orog na pagpahalaga ki Jehova asin sa pamamahala nia. (Juan 10:16) Halimbawa, ipinapaheling kan kasaysayan na an namamahalang mga tawo sa Israel naimpluwensiahan na gayo an saindang mga sakop, sa ikakarahay man o ikakaraot ninda. Itinatadom kan bagay na iyan sa isip kan mga nangengenot sa mga Kristiano na, minsan ngani dai sinda namamahala arog kan suanoy na mga hade, sinda dapat na pirmeng magpaheling nin marahay na halimbawa nin pagtubod.—Heb. 13:7.
Kun Paano si Jehova Namamahala Ngonyan
13. Ano an importante asin makahulogan na nangyari kan 1914?
13 An mga Kristiano ngonyan ibinabalangibog sa kinaban na madali nang matapos an pamamahala nin tawo sa katawohan. Kan 1914, inestablisar ni Jehova an saiyang Kahadean sa kalangitan na pinamamahalaan kan saiyang nombradong Hade, si Jesu-Cristo. Kan panahon na iyan, tinawan nia si Jesus nin autoridad na ‘mandaog asin taposon an saiyang pandadaog.’ (Kap. 6:2) Sinabihan an bago pa sanang patukawon sa trono na Hade: “Mandaog ka sa tahaw kan saimong mga kaiwal.” (Sal. 110:2) Makamomondo, an mga nasyon pirmeng nagsasayumang magpasakop sa pamamahala ni Jehova. Sinda padagos na minagawe na garo baga “mayong Jehova.”—Sal. 14:1.
14, 15. (a) Paano kita ngonyan pinamamahalaan kan Kahadean nin Dios, asin huli kaini, ano an mga maninigo niatong ihapot sa satong sadiri? (b) Paano naheheling dawa ngonyan an pagigin nakakalabi kan pamamahala nin Dios?
14 Pira na sanang linahidan na miembro kan “Israel nin Dios” an nabubuhay pa sa daga, asin bilang mga tugang ni Jesus, sinda padagos na naglilingkod bilang “mga embahador na kasalida ni Cristo.” (2 Cor. 5:20) Sinda ninombrahan bilang sarong grupong maimbod asin mapagmansay na oripon tanganing mag-asikaso asin magtao nin espirituwal na kakanon sa mga linahidan saka sa nagdadakol na Kristiano, na minilyon na ngonyan, na may paglaom na mabuhay sagkod lamang digdi sa daga. (Mat. 24:45-47; Kap. 7:9-15) An bendisyon ni Jehova sa areglong iyan risang-risa sa espirituwal na abundansia na nakakamtan kan tunay na mga parasamba ngonyan.
15 Marahay na hapoton kan lambang saro sa sato an satong sadiri: ‘Lubos ko daw na rinerekonoser an mga paninimbagan na maninigo kong akoon sa laog kan Kristianong kongregasyon? Ako daw nagsusuportar na marhay sa pamamahala ni Jehova? Ipinag-oorgolyo ko daw na magin sakop kan namamahalang Kahadean ni Jehova? Determinado daw akong padagos na sabihon sa iba an manongod sa Kahadean nin Dios sagkod sa pinakarasonableng magigibo ko?’ Bilang grupo, kita gikan sa boot na nagpapasakop sa pagdirehir kan Namamahalang Grupo asin nakikikooperar sa nombradong kamagurangan sa mga kongregasyon. Sa siring na mga paagi, ipinapaheling niato na satong inaako an pamamahala nin Dios. (Basahon an Hebreo 13:17.) An gikan sa boot na pagpasakop nagreresulta sa pagkasararo sa bilog na kinaban na daing kaagid sa nagkakabarangang kinaban na ini. Iyan nagbubunga man nin katoninongan asin katanosan saka nagpapamuraway ki Jehova, na nagpapaheling na an saiyang pamamahala iyo nanggad an pinakamarahay.
Mapanggana an Pamamahala nin Dios
16. Anong desisyon an napapaatubang sa lambang saro ngonyan?
16 Marikas na nagdadangadang an panahon na mareresolberan na an mga isyung pinalataw sa Eden. Huli kaini, panahon na ngonyan na magdesisyon an mga tawo. An lambang indibiduwal dapat na magdesisyon kun baga aakoon nia an pamamahala ni Jehova o sia magdadanay na sakop kan pamamahala nin tawo. Pribilehio niato na tabangan an mga mahoyo na magdesisyon nin tama. Dai na mahahaloy, sa Armagedon, permanente nang sasalidahan kan pamamahala ni Jehova an mga gobyerno nin tawo na impluwensiado ni Satanas. (Dan. 2:44; Kap. 16:16) Matatapos na an pamamahala nin tawo, asin mamamahala na sa bilog na daga an Kahadean nin Dios. An pamamahala ni Jehova mabibindikar, sa pinakalubos na kahulogan kan terminong iyan.—Basahon an Kapahayagan 21:3-5.
17. Anong mga katotoohan an nakakatabang sa mga mahoyo na magdesisyon nin tama mapadapit sa pamamahala?
17 An mga dai pa nakagibo nin depinidong desisyon apabor ki Jehova maninigong mapagngayongayong isip-isipon an mga pakinabang na itatao sa katawohan kan pamamahala nin Dios. Dai naresolberan kan pamamahala nin tawo an problema dapit sa krimen, kaiba na an terorismo. Hahaleon kan pamamahala nin Dios an gabos na maraot digdi sa daga. (Sal. 37:1, 2, 9) An pamamahala nin tawo nagresulta sa daing ontok na guerra, alagad an pamamahala nin Dios ‘papaontokon an mga guerra sagkod sa kaporoporohi kan daga.’ (Sal. 46:9) Iyo, ibabalik pa ngani kan pamamahala nin Dios an katoninongan sa pag-oltanan nin mga tawo asin hayop! (Isa. 11:6-9) An kadukhaan asin pagkagutom nagin danay nang mga karakteristiko kan pamamahala nin tawo, alagad hahaleon iyan kan pamamahala nin Dios. (Isa. 65:21) Dawa an namamahalang mga tawo, na may pinakamarahay na mga intension, dai nahale an helang asin kagadanan, alagad sa pamamahala nin Dios, ikakaogmang marhay kan mga gurang asin may helang an pakabalik sa saindang kakosogan nin pagkahoben. (Job 33:25; Isa. 35:5, 6) Tunay nanggad, an daga magigin sarong paraiso na magkakaigwa pa ngani nin pagkabuhay liwat kan mga gadan.—Luc. 23:43; Gibo 24:15.
18. Paano niato ikakapaheling na nagtutubod kita na an pamamahala nin Dios iyo an pinakamarahay?
18 Iyo, hahaleon kan pamamahala nin Dios an gabos na danyos na ginibo ni Satanas kan impluwensiahan nia an satong enot na mga magurang na tumalikod sa saindang Kaglalang. Asin isip-isipa, si Satanas naggigibo nin danyos sa laog nin mga 6,000 nang taon, alagad an Dios, paagi ki Cristo, hahaleon an gabos na danyos na iyan sa laog nin 1,000 taon! Saro nanggad iyan na pinakalataw na ebidensia kan pagigin nakakalabi kan pamamahala nin Dios! Bilang mga Saksi para sa satong Dios, sia inaako niato bilang Namamahala sa sato. Huli kaini, ipaheling niato kada aldaw, an totoo kada oras, kan satong buhay na kita mga parasamba ki Jehova, mga sakop kan saiyang Kahadean, asin ipinag-oorgolyo niato an pagigin saiyang mga Saksi. Asin gamiton niato an lambang oportunidad na sabihon sa siisay man na maghihinanyog na an pamamahala ni Jehova iyo an pinakamarahay.
Kun Mapadapit sa Pamamahala nin Dios, Ano an Nanodan Niato sa Pagbasa kan . . .
• Hebreo 13:17?
[Mga Hapot Para sa Pag-adal]
[Mga Ritrato sa pahina 29]
Pirmeng pinagdadanay ni Jehova an saiyang pamamahala
[Ritrato sa pahina 31]
An gikan sa boot na pagpasakop sa pamamahala ni Jehova nagreresulta sa pagkasararo sa bilog na kinaban