Gamiton nin Eksperto “an Espada kan Espiritu”

“Akoa . . . an espada kan espiritu, na an boot sabihon, an tataramon nin Dios.”—EFE. 6:17.

1, 2. Paano kita maninigong maghimate sa pangangaipo para sa dugang pang mga parabalangibog kan Kahadean?

KAN maheling ni Jesus an espirituwal na pangangaipo kan mga kadaklan, sinabihan nia an saiyang mga disipulo: “An anihon mahiwas, alagad an mga paraani kakadikit. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” Bako sana iyan an ginibo ni Jesus. Pagkasabi kaiyan, “inapod nia an saiyang doseng disipulo” asin isinugo sinda na maghulit, o ‘mag-ani.’ (Mat. 9:35-38; 10:1, 5) Kan huri, si Jesus “nagpili nin setenta pa asin isinugo sinda nin manduwaduwa” para sa iyo man sanang gibohon.—Luc. 10:1, 2.

² Dakula man an pangangaipo ngonyan para sa mga parabalangibog kan Kahadean. Igwa nin 18,168,323 na nag-atender sa Memorial sa bilog na kinaban kan 2009 taon nin paglilingkod. Lampas 10 milyones an kalabihan kaiyan sa total na bilang nin mga Saksi ni Jehova. An kaomahan talagang hinog na para sa pag-ani. (Juan 4:34, 35) Kun siring, maninigo niatong hagadon sa pamibi na logod madugangan an mga paraani. Alagad paano kita mahiro kaoyon kan siring na mga kahagadan? Magigibo niato iyan paagi sa pagigin mas epektibong mga ministro mantang maigot kitang nakikikabtang sa paghuhulit kan Kahadean asin paggibo nin mga disipulo.—Mat. 28:19, 20; Mar. 13:10.

3. Paanong an espiritu nin Dios may mahalagang kabtang sa pagtabang sa sato na magin mas epektibong mga ministro?

³ Tinokar sa naenot na artikulo kun paano an pagigin ginigiyahan kan espiritu nin Dios nakakatabang sa sato na ‘magtaram kan tataramon nin Dios na may pagkapusoan.’ (Gibo 4:31) An espiritung iyan nakakatabang man sa sato na magin ekspertong mga ministro. An sarong paagi na mapaoswag an satong pagigin epektibo sa ministeryo iyo na gamiton nanggad an marahayon na kasangkapan na itinao ni Jehova Dios—an saiyang nasusurat na Tataramon, an Biblia. Isinurat iyan paagi sa banal na espiritu. (2 Tim. 3:16) An mensahe kaiyan ipinasabong nin Dios. Huli kaini, an ekspertong pagpaliwanag sa satong ministeryo kan sono sa Kasuratan na katotoohan nangangahulogan na ginigiyahan kita kan banal na espiritu. Bago niato pag-olayan kun paano magigibo iyan, aramon niato kun gurano nanggad kamapuersa an Tataramon na iyan.

‘An Tataramon nin Dios Mapuersa’

4. Anong pagbabago an puedeng magibo sa sarong tawo kan mensahe nin Dios na yaon sa Biblia?

⁴ Mapuersa nanggad an tataramon, o mensahe, nin Dios! (Heb. 4:12) Sa piguratibong paagi, an mensahe na naggigikan sa Biblia mas matarom kisa sa arin man na espada na gibo nin tawo, huli ta sa piguratibong paagi minalagbas iyan sagkod sa pagbulag kan mga tolang asin kan hotok kaiyan. An sono sa Kasuratan na katotoohan nakakaabot sa kalaoglaogi nin sarong tawo saka nakakalaog sa saiyang kaisipan asin emosyon, na ihinahayag kun ano talaga sia sa laog. An katotoohan na iyan mapuersa nanggad asin talagang nakakapabago sa saro. (Basahon an Colosas 3:10.) Iyo, an Tataramon nin Dios nakakapabago nin buhay!

5. Sa anong mga paagi magigiyahan kita kan Biblia, asin may anong resulta?

⁵ Dugang pa, an Biblia sarong libro nin daing kaagid na kadonongan. Igwa iyan nin nakakatabang na impormasyon na makakapagtokdo sa mga tawo kun paano mamuhay sa komplikadong kinaban na ini. An Tataramon nin Dios iniilawan bako sanang an mismong mga lakad niato kundi pati an inaagihan niato. (Sal. 119:105) Iyan dakulaon na tabang kun napapaatubang kita sa mga problema o nagdedesisyon manongod sa pagpili nin mga katood, aling-alingan, trabaho, gubing, asin iba pa. (Sal.  37:25; Tal. 13:20; Juan 15:14; 1 Tim. 2:9) An pag-aplikar kan mga prinsipyo sa Tataramon nin Dios nagbubunga nin marahay na pakikiibaiba niato sa mga tawo. (Mat. 7:12; Fil. 2:3, 4) Huling an inaagihan niato naiilawan na marhay sa piguratibong paagi, naheheling niato an panghaloyan na mga epekto kan satong mga desisyon. (1 Tim. 6:9) Ihinula man kan Kasuratan an katuyohan nin Dios sa ngapit, na nakakatabang sa sato na mamuhay kaoyon kan katuyohan na iyan. (Mat. 6:33; 1 Juan 2:17, 18) Makahulogan nanggad na buhay an makakamtan nin saro kun mapagiya sia sa diosnon na mga prinsipyo!

6. Gurano kamapuersang armas an Biblia sa satong espirituwal na pakikilaban?

⁶ Isip-isipa man kun gurano kamapuersang armas an Biblia sa satong espirituwal na pakikilaban. An tataramon nin Dios inapod ni Pablo na “espada kan espiritu.” (Basahon an Efeso 6:12, 17.) Kun an mensahe kan Biblia epektibong ipinepresentar, puedeng patalingkason kaiyan an mga tawo sa espirituwal na pagkaoripon ki Satanas. Iyan espada na nagliligtas nin buhay imbes na naglalaglag kaiyan. Bako daw na maninigo niatong gamiton iyan nin eksperto?

Gamiton Iyan sa Tamang Paagi

7. Taano ta mahalaga na makanood na gamiton na marhay “an espada kan espiritu”?

⁷ Sa pakikilaban nin sarong soldados, magagamit nia sana nin epektibo an saiyang mga armas kun sia nagpraktis asin nakanood na gamiton iyan na marhay. Pareho iyan kan paggamit kan “espada kan espiritu” sa satong espirituwal na pakikilaban. “Gibohon mo an bilog mong makakaya tanganing ikaatubang mo an saimong sadiri na inooyonan nin Dios,” an isinurat ni Pablo, “sarong trabahador na mayo nin dapat na ikasupog, na ginagamit an tataramon kan katotoohan sa tamang paagi.”—2 Tim. 2:15.

8, 9. Ano an matabang sa sato na masabotan an sinasabi kan Biblia? Magtao nin halimbawa.

⁸ Ano an matabang sa sato na ‘gamiton an tataramon kan katotoohan sa tamang paagi’ sa satong ministeryo? Bago niato ikapaabot nin malinaw sa iba an sinasabi kan Biblia, kaipuhan na masabotan niato mismo iyan. Nagkakaipo ini nin pagtao niato nin atension sa konteksto nin sarong bersikulo o kotasyon. Segun sa sarong diksionaryo, “an konteksto nin sarong termino, sentence, o mga tataramon kompuesto nin mga termino, sentence, o tataramon bago asin pagkatapos kaiyan saka nakakatabang na liwanagon an kahulogan kaiyan.”

⁹ Tanganing masabotan nin tama an sono sa Kasuratan na kotasyon kaipuhan niatong konsideraron an nakapalibot na teksto. An sarong halimbawa kaiyan iyo an sinabi ni Pablo sa Galacia 5:13. Sia nagsurat: “Siempre, inapod kamo manongod sa katalingkasan, mga tugang; dai lang nindo paggamiton an katalingkasan na ini tanganing panigoan an laman, kundi paagi sa pagkamoot maglingkod kamo sa lambang saro.” Anong katalingkasan an sinasabi digdi ni Pablo? Iyan daw katalingkasan sa kasalan asin kagadanan, sa pagkaoripon sa falsong mga paniniwala, o sa iba pang bagay? Ihinahayag kan konteksto na an sinasabi ni Pablo iyo an katalingkasan na bunga kan pagigin ‘tinubos sa sumpa kan Ley.’ (Gal. 3:13, 19-24; 4:1-5) An pinanonongdan nia iyo an katalingkasan bilang Kristiano. An mga nagpapahalaga sa katalingkasan na iyan  nagpapaoripon sa lambang saro huli sa pagkamoot. An mga bakong mamomoton pinapakaraot an lambang saro asin nag-iiriwal.—Gal. 5:15.

10. Tanganing masabotan nin tama an kahulogan kan Kasuratan, anong mga impormasyon an maninigo niatong konsideraron, asin paano niato makukua an impormasyon na iyan?

¹⁰ An tataramon na “konteksto” may iba pang kahulogan. Kaiba sa mga kaparehong kahulogan kan “konteksto” iyo an “detalye, mga kamugtakan, . . . situwasyon.” Tanganing masabotan nin tama an kahulogan nin sarong teksto, maninigo niatong konsideraron an iba pang impormasyon, arog baga kan kun siisay an nagsurat kan partikular na libro sa Biblia saka kun kasuarin asin sa anong mga kamugtakan iyan isinurat. Nakakatabang man na maaraman an katuyohan kan pagsurat kan libro asin, kun posible, an tradisyon, moral na paggawe, asin pagsamba nin mga tawo kan panahon na idto. *

11. Anong pag-ingat an maninigo niatong gibohon kun nagpapaliwanag nin mga teksto?

¹¹ Bako sanang pagpaliwanag nin tama kan sono sa Kasuratan na mga katotoohan an kalabot sa ‘paggamit kan tataramon kan katotoohan sa tamang paagi.’ Maninigo kitang mag-ingat na dai gamiton an Biblia tanganing takoton an mga tawo. Minsan ngani puede niatong gamiton an Kasuratan tanganing idepensa an katotoohan arog kan ginibo ni Jesus kan sinusugotan sia kan Diablo, an Biblia bakong pamakol na ginagamit bilang panakot sa mga naghihinanyog sa sato. (Deut. 6:16; 8:3; 10:20; Mat. 4:4, 7, 10) Maninigo niatong himateon an sadol ni apostol Pedro: “Pakangbanalon nindo an Cristo bilang Kagurangnan sa saindong puso, na pirmeng andam na gumibo nin pagdepensa sa atubangan nin lambang tawo na naghahagad sa saindo nin rason para sa saindong paglaom, alagad ginigibo iyan na may mahoyong boot asin hararom na paggalang.”—1 Ped. 3:15.

12, 13. Anong “mga bagay na marigonon an pagkaestablisar” an mapapatumba kan katotoohan kan Tataramon nin Dios? Magtao nin halimbawa.

¹² Kun ginagamit nin tama an katotoohan kan Tataramon nin Dios, ano an magigibo kaiyan? (Basahon an 2 Corinto 10:4, 5.) Mapapatumba kan sono sa Kasuratan na katotoohan an “mga bagay na marigonon an pagkaestablisar,” an boot sabihon, ikakabuyagyag kaiyan an falsong mga doktrina, nakakadanyar na mga gibohon, asin mga pilosopiya na nagpapabanaag kan bakong sangkap na kadonongan nin tawo. Puede niatong gamiton an Biblia tanganing haleon an ano man na ideya na “pinapatindog tumang sa kaaraman nin Dios.” Magagamit an mga katokdoan kan Biblia tanganing tabangan an iba na ioyon sa katotoohan an saindang kaisipan.

¹³ Kuanon niatong halimbawa an nangyari sa 93 anyos na babaeng taga India. Poon sa pagkaomboy tinokdoan siang maniwala sa reenkarnasyon. Kan sia makipag-adal sa Biblia paagi sa pakipagsuratan sa saiyang aking lalaki na nakaistar sa ibang nasyon, tolos niang inako an nanonodan nia manongod ki Jehova asin sa mga panuga Nia. Minsan siring, an katokdoan dapit sa reenkarnasyon nakagamot na gayo sa saiyang isip, kaya nagkontra sia kan suratan sia kan saiyang aki manongod sa kamugtakan kan mga gadan. Sia nagsabi: “Dai ko talaga  masabotan an katotoohan sa Kasuratan nindo. An gabos na relihion nagtotokdo na may imortal na bagay sa laog niato. Kaidto pa naniniwala na ako na an hawak nagagadan asin sarong dai naheheling na kabtang an paorootrong nabubuhay sa laen-laen na hawak sa laog nin mga 8,400,000 na beses. Paanong bako ining totoo? Sala daw an kadaklan na relihion?” Mapapatumba daw kan “espada kan espiritu” an siring na paniniwala na marigonon an pagkaestablisar? Pagkatapos nin dugang pang sono sa Kasuratan na pagtokar sa temang iyan, sia nagsurat pakalihis nin nagkapirang semana: “Sa katapustapusi, nasasabotan ko na kun ano talaga an katotoohan manongod sa kagadanan. Ipinaggagayagaya ko nanggad an bagay na sa pagkabuhay liwat, maheheling niato an satong gadan nang mga namomotan. Logod na dumatong tolos an Kahadean nin Dios.”

Gamiton Iyan na May Pangongombensir

14. Ano an boot sabihon kan pagkombensir sa mga naghihinanyog sa sato?

¹⁴ Bako sanang pagkotar nin mga teksto an kalabot sa epektibong paggamit kan Biblia sa ministeryo. Si Pablo nagtaram na may “pangongombensir,” asin maninigo na kita iyo man. (Basahon an Gibo 19:8, 9; 28:23.) An tataramon na “kombensiron” nangangahulogan nin “paoyonon.” An saro na nakombensir “napatubod na marhay kaya nagtitiwala [sia] sa sarong bagay.” Kun kinokombensir niato an sarong tawo na akoon an sarong katokdoan kan Biblia, pinapaoyon niato sia na magtiwala sa katokdoan na iyan. Tanganing magibo ini, kaipuhan niatong kombensiron an naghihinanyog sa sato na totoo an sinasabi niato. Magigibo niato ini sa minasunod na mga paagi.

15. Paano nindo puedeng darahon an atension sa Biblia sa paagi na nagbubunga nin paggalang dian?

¹⁵ Darahon an atension sa Tataramon nin Dios sa paagi na nagbubunga nin paggalang dian. Kun kamo nag-iintrodusir nin teksto, idoon na mahalaga na maaraman an kaisipan nin Dios dapit sa temang pinag-oolayan. Pagkahapot nindo asin pagkasimbag kan kagharong, puede nindong sabihon an arog kaini, ‘Helingon niato kun paano niato maaaraman an pagmansay nin Dios dapit digdi.’ O puede kamong maghapot, ‘Ano daw an saboot nin Dios manongod sa situwasyon na ini?’ An pag-introdusir kan teksto sa paaging ini nagdodoon na an Biblia hale sa Dios asin tinatabangan kaiyan an naghihinanyog na pahalagahan nanggad an Biblia. Nangorognang mahalaga iyan kun kita nagpapatotoo sa saro na naniniwala sa Dios alagad bakong pamilyar sa itinotokdo kan Biblia.—Sal. 19:7-10.

16. Ano an makakatabang sa saindo na ipaliwanag nin tama an mga teksto?

¹⁶ Dai sana basta basahon an mga teksto; ipaliwanag iyan. Pinagkatodan na ni Pablo na ‘ipaliwanag asin patunayan paagi sa mga reperensia’ an mga itinotokdo nia. (Gibo 17:3) An sarong teksto sa Kasuratan sa parate labi sa saro an punto, asin tibaad kaipuhan nindong idoon an espesipikong mga tataramon na aplikado sa tinotokar nindo. Puede nindong gibohon ini paagi sa pag-otro kan mga tataramon na nagpapalataw kan punto o paagi sa pagbangon nin mga hapot na makakatabang sa kagharong na masabotan kun arin iyan. Dangan, ipaliwanag an kahulogan kan kabtang na iyan kan teksto. Pagkatapos kaiyan, tabangan an naghihinanyog sa saindo na maheling kun paano an teksto aplikado sa saiya personalmente.

17. Paano kamo makakapangatanosan basado sa Kasuratan sa paagi na nakakakombensir?

¹⁷ Mangatanosan basado sa Kasuratan sa paagi na nakakakombensir. Paagi sa odok sa pusong pakiolay asin marahay na lohika, si Pablo nakakakombensir na “nangatanosan sa sainda basado sa Kasuratan.” (Gibo 17:2, 4) Arog nia, pagmaigotan na aboton an puso kan naghihinanyog sa saindo. ‘Sakdohon’ an nasa puso nia paagi sa paggamit nin maboot na mga hapot na nagpapabanaag nin personal na interes sa indibiduwal. (Tal. 20:5) Likayan na magin pabiglabigla. Ipresentar an mga argumento sa malinaw asin lohikong paagi. Iyan maninigo na sinusuportaran nin nakakakontentong  ebidensia. An mga sinasabi nindo maninigong marigon na nakabasar sa Tataramon nin Dios. Mas marahay na maggamit nin sarong teksto na ipinapaliwanag asin iiniilustrar an punto kisa duwa o tolong teksto na basta sana binasa nin marikas. An paggamit nin nagsusuportar na ebidensia ‘nakakadagdag man sa mga ngabil nin tibay sa pangongombensir.’ (Tal. 16:23) Kun minsan, tibaad kaipuhan na magsiyasat asin magtao nin dagdag na impormasyon. Kinaipuhan na maaraman kan 93 anyos na babaeng nasambitan sa enotan kun taano ta lakop na gayo an katokdoan dapit sa imortal na kalag (o espiritu). An pakasabot sa kun saen naggikan an doktrinang iyan asin kun paano iyan nakalaog sa kadaklan na relihion kan kinaban nakatabang na marhay tanganing makombensir siang akoon an sinasabi kan Biblia dapit sa temang iyan. *

Padagos na Gamiton Iyan nin Eksperto

18, 19. Taano ta maninigo niatong padagos na gamiton nin eksperto “an espada kan espiritu”?

¹⁸ “An kamugtakan kan kinaban na ini nagbabago,” an sabi kan Biblia. An mga maraot orog na nagraraot. (1 Cor. 7:31; 2 Tim. 3:13) Kaya mahalagang marhay na padagos niatong patumbahon an “mga bagay na marigonon an pagkaestablisar” paagi sa paggamit kan “espada kan espiritu, na an boot sabihon, an tataramon nin Dios.”

¹⁹ Ikinakaogma nanggad niato na igwa kita kan Tataramon nin Dios, an Biblia, asin na gamiton an mapuersang mensahe kaiyan tanganing haleon an falsong mga katokdoan asin hulitan an mga sadiosan an puso! Mayo nin nakagamot na bagay na mas mapuersa pa sa mensaheng iyan. Kun siring, pagmaigotan nanggad niato na gamiton nin eksperto “an espada kan espiritu” sa itinao sa sato nin Dios na gibohon na pagbalangibog kan Kahadean.

[Mga Nota sa Ibaba]

Ano an Nanodan Nindo?

• Gurano kamapuersa an Tataramon nin Dios?

• Paano niato ‘magagamit an tataramon kan katotoohan sa tamang paagi’?

• Ano an nagigibo kan mensahe kan Biblia sa “mga bagay na marigonon an pagkaestablisar”?

• Paano nindo mapapaoswag an saindong pangongombensir sa ministeryo?

[Mga Hapot Para sa Pag-adal]

[Kahon/Ritrato sa pahina 12]

Kun Paano Gagamiton na May Pangongombensir an Tataramon nin Dios

▪ Magtabang na mapatalubo an paggalang sa Biblia

▪ Ipaliwanag an Kasuratan

▪ Mangatanosan nin nakakakombensir tanganing maabot an puso

[Ritrato sa pahina 11]

Dapat na makanood kang gamiton nin epektibo “an espada kan espiritu”