Mga Tugang na Lalaki—Magtanom Para sa Espiritu Asin Aboton an mga Pribilehio!

“Sia na nagtatanom para sa espiritu mag-aani nin buhay na daing katapusan.”—GAL. 6:8.

1, 2. Paano naootob ngonyan an Mateo 9:37, 38, na minaresulta sa anong pangangaipo sa mga kongregasyon?

NAHEHELING nindo ngonyan an mga pangyayaring magigirumdoman sagkod lamang! An gibohon na sinambit ni Jesu-Cristo lubos nang naootob ngonyan. “An anihon mahiwas, alagad an mga paraani kakadikit,” an sabi ni Jesus. “Kun siring, makimaherak kamo sa Kagurangnan kan anihon na magsubol nin mga paraani sa saiyang anihon.” (Mat. 9:37, 38) An siring na mga pamibi sinisimbag ni Jehova Dios sa daing kaagid na paagi. Durante kan 2009 taon nin paglilingkod, an bilang kan mga kongregasyon nin Mga Saksi ni Jehova sa bilog na kinaban nadagdagan nin 2,031, na uminabot na sa 105,298. Sa promedyo, 757 indibiduwal an nababautismohan kada aldaw!

² Huli sa siring na pag-oswag, kinakaipuhan an kualipikadong mga tugang na lalaki na mangengenot sa pagtotokdo asin pagpapastor sa mga kongregasyon. (Efe. 4:11) Sa nakalihis na mga dekada, nagnombra si Jehova nin kualipikadong mga lalaki tanganing asikasohon an mga pangangaipo kan saiyang mga karnero, asin kompiado kita na padagos niang gigibohon iyan. Sinisierto sa sato kan hula sa Miqueas 5:5 na durante kan huring mga aldaw, an banwaan ni Jehova magkakaigwa nin “pitong pastor” asin “walong duke,” na nagpapaheling na dakol na may kakayahan na lalaki an mangengenot sa sainda.

3. Ipaliwanag an kahulogan kan ‘pagtanom para sa espiritu.’

³ Kun ika sarong lalaki na bautisadong Saksi ni Jehova, ano an makakatabang sa saimo na mawoton na aboton an mga pribilehio nin paglilingkod? An pangenot dian iyo na ‘magtanom ka para sa espiritu.’ (Gal. 6:8) Kalabot sa paggibo kaiyan an pamumuhay sa paagi na nagtotogot sa banal na espiritu nin Dios na makaimpluwensia sa saimong buhay. Magin determinado na dai ‘magtanom para sa laman.’ Dai togotan an mga bagay na arog kan kaginhawahan, libangan, asin aling-alingan na makapaluya kan pagmawot mo na gamiton an saimong sadiri sa paglilingkod sa Dios. An gabos na Kristiano maninigong ‘magtanom para sa espiritu,’ asin pag-abot nin panahon, an mga lalaking naggibo kaiyan tibaad makualipikar nanggad sa mga pribilehio sa kongregasyon. Huling may dakulang pangangaipo ngonyan para sa ministeryal na mga lingkod asin kamagurangan, an artikulong ini nangorognang para sa Kristianong mga lalaki. Kun siring, mga tugang na lalaki, dinadagka niamo kamo na mapagngayongayong konsideraron ini.

Maghingoa Para sa Marahay na Gibo

4, 5. (a) Dinadagka an mga bautisadong lalaki na aboton an anong mga pribilehio sa kongregasyon? (b) Paano hinihingoa nin saro na aboton iyan?

⁴ An sarong Kristianong lalaki dai automatikong nagigin paraataman. Dapat siang maghingoa para sa ‘marahay na gibong’ ini. (1 Tim. 3:1) Kaiba dian an paglilingkod sa mga kapagtubod paagi sa sinserong pag-asikaso sa saindang mga pangangaipo. (Basahon an Isaias 32:1, 2.) An sarong lalaki na naghihingoang aboton an sarong pribilehio na may tamang motibo dai masasabing ambisyoso. Imbes, igwa nanggad sia nin daing kaimotan na pagmawot na makatabang sa iba.

⁵ Hinihingoa nin saro na makualipikar bilang ministeryal na lingkod asin maabot an katongdan nin paraataman paagi sa pagmamaigot na maabot an mga kualipikasyon na yaon sa Kasuratan. (1 Tim. 3:1-10, 12, 13; Tito 1:5-9) Kun ika sarong nagdusay na lalaki, hapoton an saimong sadiri: ‘Lubos daw akong nakikikabtang sa paghuhulit,  asin tinatabangan ko daw an iba na gibohon iyan? Pinapakosog ko daw an sakong mga kapwa parasamba paagi sa pagkaigwa nin sinserong interes sa saindang kapakanan? Midbid daw ako bilang marahay na paraadal kan Tataramon nin Dios? Pinapaoswag ko daw an kalidad kan sakong mga komento? Maigot ko daw na inaasikaso an mga asignasyon na ipinagkatiwala sa sako kan kamagurangan?’ (2 Tim. 4:5) Maninigong seryosong pag-isipan an siring na mga hapot.

6. Ano an pangenot na makakatabang tanganing makualipikar sa mga paninimbagan sa kongregasyon?

⁶ An saro pang paagi na makualipikar sa mga paninimbagan sa kongregasyon iyo na ‘magin makosog sa pagkatawo nindo sa laog na may puersa paagi sa espiritu nin Dios.’ (Efe. 3:16) An pagigin ministeryal na lingkod o magurang sa Kristianong kongregasyon dai nakakamtan paagi sa borotohan. Makakamtan sana an pribilehiong ini paagi sa espirituwal na pag-oswag. Paano mo mahihimong umoswag sa espirituwal? An sarong paagi iyo na “padagos [kang] maglakaw segun sa espiritu” asin magpatalubo kan bunga kaiyan. (Gal. 5:16, 22, 23) Mantang ipinapabanaag mo an espirituwal na mga kualidad na kaipuhan tanganing maasikaso an dagdag na mga pribilehio asin mantang iinaaplikar mo an sadol para sa pag-oswag, ‘an saimong pag-oswag maheheling kan gabos na tawo.’—1 Tim. 4:15.

Kaipuhan an Pagigin Mapagsakripisyo

7. Ano an kalabot sa paglilingkod sa iba?

⁷ Kalabot sa paglilingkod sa iba an pagpapagal asin kaipuhan dian an pagigin mapagsakripisyo. Huling an Kristianong mga paraataman mga espirituwal na pastor, ikinakahadit nanggad ninda an mga problema kan aripompon. Mangnohon kun paano naapektaran si apostol Pablo kan mga paninimbagan sa saiyang pagpapastor. Sinabihan nia an mga kapagtubod sa Corinto: “Sa labi-labing kasakitan asin kakologan nin puso nagsurat ako sa saindo na may dakol na luha, bakong tanganing kamo mapamondo, kundi tanganing maaraman nindo an pagkamoot ko orog na para sa saindo.” (2 Cor. 2:4) Malinaw nanggad na bilog na pusong inotob ni Pablo an saiyang gibohon.

8, 9. Magtao nin mga halimbawa sa Biblia kun paano inasikaso nin mga lalaki an mga pangangaipo kan iba.

⁸ Kaidto pa, an pagigin mapagsakripisyo  midbidan na nin mga lalaking nagpapagal para sa mga lingkod ni Jehova. Halimbawa, dai nanggad niato maiimahinar na sinasabihan ni Noe an saiyang kasararo sa harong: ‘Sabihan na lang nindo ako kun tapos na an arka tanganing makaiba ako sa saindo.’ Si Moises dai nagsabi sa mga Israelita sa Egipto: ‘Magherilingan na lang kita sa Dagat na Pula. Bahala na kamo kun paano marikas na makakaabot duman.’ Si Josue nungkang nagsabi: ‘Sabihan na lang nindo ako kun narumpag na an mga lanob kan Jerico.’ Asin dai ni Isaias itinokdo an iba asin sinabi: ‘Uto sia! Sugoa sia.’—Isa. 6:8.

⁹ An satong pangenot na halimbawa nin lalaki na tinogotan an espiritu nin Dios na magmotibar sa saiya iyo si Jesu-Cristo. Gikan sa boot na inako nia an saiyang asignasyon na maglingkod bilang Parabalukat nin katawohan. (Juan 3:16) Bako daw na an mapagsakripisyong pagkamoot ni Jesus nagpapahiro sa sato na magin mapagsakripisyo man? Kan ilinaladawan nin sarong haloy nang magurang sa kongregasyon an saboot nia sa aripompon, sia nagsabi: “Nakapahiro na marhay sa sako an mga tataramon ni Jesus ki Pedro—pastoran mo an saradit kong karnero. Sa paglihis nin mga taon, naheling ko kun paano puedeng makapakosog sa iba an pira sanang mamomoton na tataramon o simpleng akto nin kabootan. An pagpapastor sarong gibohon na ikinakaogma kong marhay.”—Juan 21:16.

10. Ano an makakapahiro sa Kristianong mga lalaki na arogon an halimbawa ni Jesus sa paglilingkod sa iba?

¹⁰ Kun mapadapit sa aripompon nin Dios, siertong bobooton nin nagdusay na mga lalaki sa kongregasyon na ipabanaag an saboot ni Jesus, na nagsabi: “Papaginhawahon ko kamo.” (Mat. 11:28) An pagtubod sa Dios asin pagkamoot sa kongregasyon nagpapahiro sa Kristianong mga lalaki na maghingoa para sa marahay na gibong ini, na dai iniisip na grabeng pagsasakripisyo o kadakol na trabaho an kalabot dian. Pero, paano kun an saro mayo nin interes na aboton an sarong pribilehio? Mapapatalubo daw nin sarong tugang na lalaki an pagmawot na maglingkod sa kongregasyon?

Pataluboon an Pagmawot na Maglingkod

11. Paano mapapatalubo nin saro an pagmawot na maglingkod sa iba?

¹¹ Kun an pakamate nin kakulangan nakakaolang sa saindo na aboton an sarong pribilehio, angay na ipamibi na logod tawan kamo nin banal na espiritu. (Luc. 11:13) Tatabangan kamo kan espiritu ni Jehova na makaya an ano man na ikinakahadit nindo sa bagay na ini. Hale sa Dios an mismong pagmawot na maglingkod, huling an espiritu ni Jehova an nagmomotibar sa sarong tugang na lalaki na aboton an mga pribilehio dangan nagpapakosog sa saiya na magibo an sagradong paglilingkod. (Fil. 2:13; 4:13) Kun siring, angay na hagadon ki Jehova na tabangan kamo na magpatalubo nin pagmawot na akoon an mga pribilehio nin paglilingkod.—Basahon an Salmo 25:4, 5.

12. Paano an saro magkakaigwa nin igong kadonongan tanganing maasikaso an mga paninimbagan na ipinagkatiwala sa saiya?

¹² An sarong Kristiano tibaad magdesisyon na dai aboton an sarong pribilehio huling naoobserbaran nia na an mga pangangaipo kan aripompon garo baga nakakapagal asin komplikado. O tibaad isipon nia na bakong igo an saiyang kadonongan tanganing magsaabaga nin mga paninimbagan. Kun iyan an kamugtakan, tibaad magkaigwa sia nin kadonongan paagi sa pagigin mas maigot na paraadal kan Tataramon nin Dios asin mga publikasyon na basado sa Biblia. Tibaad marahay na hapoton nia an saiyang sadiri, ‘May iskedyul daw ako na pag-adalan an Tataramon nin Dios, asin namimibi daw ako para sa kadonongan?’ Si disipulo Santiago nagsurat: “Kun an siisay man sa saindo kulang nin kadonongan, padagos siang maghagad sa Dios, huli ta sia abundang nagtatao sa gabos asin dai nang-aanggot; asin iyan itatao sa saiya.” (Sant. 1:5) Naniniwala daw kamo sa ipinasabong na mga tataramon na ini? Bilang simbag sa pamibi ni Salomon, tinawan sia nin Dios nin “madonong asin mapagsabot na puso” na nakatabang sa saiya na maaraman an kalaenan kan marahay sa maraot kun naghohokom. (1 Ha. 3:7-14) Totoo, naiiba an situwasyon ni Salomon. Pero, makakasarig kita na an Dios magtatao nin kadonongan sa mga lalaking pinagkatiwalaan nin mga paninimbagan sa kongregasyon tanganing maasikaso ninda nin tama an saiyang mga karnero.—Tal. 2:6.

13, 14. (a) Ipaliwanag kun ano an nagin epekto ki Pablo kan “pagkamoot na yaon sa Cristo.” (b) Ano an maninigong magin epekto sa sato kan “pagkamoot na yaon sa Cristo”?

¹³ An saro pang tabang sa pagpatalubo kan pagmawot na maglingkod sa iba iyo an paghorophorop  sa gabos na ginibo sa sato ni Jehova asin kan saiyang Aki. Halimbawa, isip-isipa an 2 Corinto 5:14, 15. (Basahon.) Paanong “itinutulod [kita] kan pagkamoot na yaon sa Cristo”? Pambihirang marhay an pagkamoot na ipinaheling ni Cristo paagi sa pagtao kan saiyang buhay para sa sato segun sa kabotan nin Dios, kaya mantang nag-oorog an pagpapahalaga niato dian, orog man na napapahiro an satong boot. An pagkamoot ni Cristo nakaimpluwensia ki Pablo. Nakatabang iyan sa saiya na magin bakong maimot asin magin pangenot na pasohan an paglilingkod sa Dios asin sa kapwa na nasa laog asin luwas kan kongregasyon.

¹⁴ An paghorophorop sa pagkamoot ni Cristo sa mga tawo nagpapahiro sa sato na magpasalamat. Bilang resulta, narerealisar niato na bako nanggad tama na padagos kitang ‘magtanom para sa laman’ paagi sa paghihingoang maabot an maimot na mga pasohan asin pamumuhay na pangenot an pagpanigo sa satong sadiri. Imbes, naggigibo kita nin mga pagliliwat tanganing magin pangenot an ipinapagibo sa sato nin Dios. Napapahiro kitang “magpaoripon” sa satong mga tugang huli sa pagkamoot. (Basahon an Galacia 5:13.) Kun minamansay niato an satong sadiri na mga oripon na mapakumbabang naglilingkod para sa nagdusay na mga lingkod ni Jehova, tatrataron niato sinda nin may dignidad asin paggalang. Tunay nanggad, dai niato aarogon an mapagkritika asin mapaghusgar na ugale na pinapalakop ni Satanas.—Kap. 12:10.

Paghihingoa nin Bilog na Pamilya

15, 16. Ano an papel kan mga miembro nin pamilya tanganing an sarong lalaki makualipikar bilang ministeryal na lingkod o magurang sa kongregasyon?

¹⁵ Kun an sarong tugang na lalaki igwa nin agom asin mga aki, an kamugtakan kan saiyang pamilya kinokonsiderar sa pagdeterminar kun baga kualipikado siang magin ministeryal na lingkod o magurang sa kongregasyon. Tunay nanggad, an espirituwalidad asin reputasyon kan saiyang pamilya may direktang koneksion sa pagnombra sa saiya. Idinodoon kaini an kahalagahan kan papel nin pamilya sa pagsuportar sa agom na lalaki asin ama mantang naghihingoa siang maglingkod para sa intereses kan kongregasyon bilang ministeryal na lingkod o magurang sa kongregasyon.—Basahon an 1 Timoteo 3:4, 5, 12.

¹⁶ Naoogma si Jehova kun nagtatarabangan an mga miembro nin Kristianong pamilya. (Efe. 3:14, 15) An payo nin pamilya kaipuhan na magin timbang tanganing maasikaso an mga paninimbagan sa kongregasyon asin makapangenot sa saiyang kairiba sa harong “sa marahayon na paagi.” Huli kaini, an magurang sa kongregasyon o ministeryal na lingkod mahalagang marhay na mag-adal sa Biblia kaiba kan saiyang agom asin mga aki tanganing an gabos makinabang sa Pampamilyang Pagsamba kada semana. Maninigo siang regular na makikabtang sa ministeryo sa langtad kaiba ninda. Huli sa iyo man sanang dahelan, mahalaga para sa mga miembro kan pamilya na makipagtabangan sa mga paghihingoa kan payo kan pamilya.

Ika daw Maglilingkod Giraray?

17, 18. (a) Kun an sarong tugang na lalaki nawara sa pribilehio, ano an tibaad kaipuhan na gibohon nia? (b) Ano an marahay na magin saboot nin sarong tugang na dating naglilingkod bilang magurang sa kongregasyon o ministeryal na lingkod?

¹⁷ Tibaad ika dating magurang sa kongregasyon o ministeryal na lingkod. Namomotan mo si Jehova asin makakasegurado ka na nagmamakolog pa man giraray sia sa saimo. (1 Ped. 5:6, 7) Sinabihan ka daw na kaipuhan mong gumibo nin nagkapirang pagliliwat? Magin andam na akoon an sala asin bagohon iyan sa tabang nin Dios. Likayan na magraot an boot. Magin madonong asin positibo. Sarong magurang sa kongregasyon na naglingkod sa laog nin dakol na taon alagad nawara sa  pribilehio an nagsabi: “Dawa bako na akong magurang sa kongregasyon, nagin determinasyon ko na papagdanayon an kaigotan ko sa pag-atender sa mga pagtiripon, paglilingkod sa langtad, asin pagbasa sa Biblia—sarong pasohan na naabot ko. Nakanood akong magin mapasensia huli ta uminabot nin haros pitong taon an inisip kong saro o duwang taon sanang paghalat bago makapaglingkod giraray bilang magurang sa kongregasyon. Durante kan panahon na iyan, nakatabang na marhay sa sako an pagparigon sa boot na dai mapagal kundi padagos na aboton an mga pribilehio.”

¹⁸ Kun ika sarong tugang na lalaki na nasa arog kaiyan na kamugtakan, dai madesganar. Isip-isipon kun paano binebendisyonan ni Jehova an saimong ministeryo asin pamilya. Pakosogon an espirituwalidad kan saimong pamilya, dalawon an mga may helang, asin parigonon an boot kan mga maluya. Orog sa gabos, pahalagahan an pribilehio mo na omawon an Dios asin ibalangibog an maogmang bareta kan Kahadean bilang saro sa mga Saksi ni Jehova. *—Sal. 145:1, 2; Isa. 43:10-12.

Gumibo Liwat nin Pagsiyasat

19, 20. (a) Dinadagka an gabos na bautisadong lalaki na gibohon an ano? (b) Ano an pag-oolayan sa sunod na artikulo?

¹⁹ Orog kisa kasuarin man, mas dakula an pangangaipo ngonyan para sa mga paraataman asin ministeryal na lingkod. Kun siring, dinadagka niamo an gabos na bautisadong lalaki na siyasaton liwat an mga kamugtakan ninda asin hapoton an saindang sadiri, ‘Kun bako akong ministeryal na lingkod o magurang sa kongregasyon, ano daw an dahelan?’ Togotan an espiritu nin Dios na tabangan kamo na magkaigwa kan tamang saboot sa mahalagang marhay na bagay na ini.

²⁰ An gabos na miembro kan kongregasyon makikinabang sa diosnon asin mapagsakripisyong mga paghihingoa kan saindang mga kapagtubod. Kun nakikikabtang kita sa maboot asin daing kaimotan na mga gibo, makakamtan niato an kagayagayahan na resulta nin paglilingkod sa iba asin pagtanom para sa espiritu. Minsan siring, arog kan ipapaheling sa sunod na artikulo, dai niato dapat na mapamondo an banal na espiritu nin Dios. Paano niato malilikayan iyan?

[Nota sa Ibaba]

Ano an Isisimbag Nindo?

• Ano an sinisierto sa sato kan hula sa Miqueas 5:5?

• Ipaliwanag kun ano an kalabot sa pagigin mapagsakripisyo.

• Paano mapapatalubo nin saro an pagmawot na maglingkod sa iba?

• Gurano kahalaga an pagtatarabangan nin pamilya tanganing an sarong lalaki makualipikar bilang ministeryal na lingkod o magurang sa kongregasyon?

[Mga Hapot Para sa Pag-adal]

[Mga Ritrato sa pahina 25]

Ano an magigibo mo tanganing maabot an sarong pribilehio?