“Isipon Kun Dapat na Magin Anong Klaseng Tawo Kamo!”
“Isipon Kun Dapat na Magin Anong Klaseng Tawo Kamo!”
“Mantang an gabos na bagay na ini tutunawon nin siring, isipon kun dapat na magin anong klaseng tawo kamo sa banal na mga gawe asin gibo nin diosnon na debosyon!”—2 PED. 3:11.
1. Taano an ikaduwang surat ni Pedro ta napapanahon na sadol para sa mga Kristiano kan panahon nia?
KAN gibohon ni apostol Pedro an ikaduwang ipinasabong na surat nia, an Kristianong kongregasyon nag-agi na nin grabeng pagpersegir, alagad dai ini nakapaluya sa kaigotan o pag-oswag kaiyan. Kaya naggamit an Diablo nin saro pang taktika, na dakol na beses nang nagin mapanggana. Arog kan ihinayag ni Pedro, pinagmamaigotan ni Satanas na raoton an banwaan nin Dios paagi sa falsong mga paratokdo na may ‘mga mata na pano nin pagsambay’ asin “puso na napatuod sa pagkaara.” (2 Ped. 2:1-3, 14; Jud. 4) Huli kaiyan, an ikaduwang surat ni Pedro sarong odok sa pusong sadol na magmaimbod.
2. Sa ano nakasentro an 2 Pedro kapitulo 3, asin ano an mga maninigong ihapot niato sa satong sadiri?
2 Si Pedro nagsurat: “Ibinibilang kong tama, sagkod na ako nasa tabernakulong ini, na pukawon kamo paagi sa pagpagirumdom sa saindo, mantang aram ko na an paghale kan sakong tabernakulo madali na . . . Kaya gigibohon ko man an bilog kong makakaya sa gabos na panahon tanganing, pagkahale ko, masabi man nindo mismo an mga bagay na ini.” (2 Ped. 1:13-15) Iyo, aram ni Pedro na madali na siang magadan, alagad minawot nia na padagos na magirumdoman an saiyang napapanahon na mga pagirumdom. Asin tunay nanggad na nagin kabtang iyan kan Biblia asin gabos kita puedeng makabasa kaiyan ngonyan. Partikularmenteng interesante sa sato an kapitulo 3 kan ikaduwang surat ni Pedro huling nakasentro iyan sa “huring mga aldaw” kan presenteng sistema nin mga bagay asin sa pagkalaglag kan piguratibong kalangitan asin daga. (2 Ped. 3:3, 7, 10) Ano an ihinatol sa sato ni Pedro? Paano an pag-aplikar kan saiyang hatol makakatabang sa sato na makamtan an pag-oyon ni Jehova?
3, 4. (a) Ano an may pagdodoon na sinabi ni Pedro, asin ano an ipinatanid nia? (b) Anong tolong punto an pag-oolayan niato?
3 Pagkatapos na sambiton an pagkatunaw kan kinaban ni Satanas, si Pedro nagsabi: “Isipon kun dapat na magin anong klaseng tawo kamo sa banal na mga gawe asin gibo nin diosnon na debosyon!” (2 Ped. 3:11, 12) Sa mga tataramon na ini, lininaw ni Pedro na solamenteng an mga naggigibo kan kabotan ni Jehova asin nagpapaheling nin diosnon na mga kualidad an makakaligtas sa maabot na “aldaw nin pamamalos.” (Isa. 61:2) Sa siring, sinabi pa kan apostol: “Kun siring kamo, mga namomotan, mantang kamo igwa na kan patienot na kaaraman na ini, mag-ingat kamo na dai kamo madara kaiba ninda [falsong mga paratokdo] paagi sa sala kan mga tawong paratumang sa ley asin mahulog kamo hale sa saindong sadiring karigonan.”—2 Ped. 3:17.
4 Huling kabilang si Pedro sa mga may “patienot na kaaraman,” aram nia na sa huring mga aldaw, nangorognang kaipuhan nin mga Kristiano na mag-ingat tanganing mapagdanay an integridad ninda. Kan huri, malinaw na ipinaliwanag ni apostol Juan kun taano. Patienot na niang naheling an pagpalayas ki Satanas sa langit asin an “dakulang kaanggotan” kaini sa mga “nagkukuyog sa mga togon nin Dios asin igwa kan gibohon na pagpatotoo dapit ki Jesus.” (Kap. 12:9, 12, 17) Magigin mapanggana an maimbod na linahidan na mga lingkod nin Dios pati an kairiba nindang maimbod na “ibang mga karnero.” (Juan 10:16) Alagad kumusta kita bilang mga indibiduwal? Mapagdadanay daw niato an satong integridad? Matatabangan kitang magibo iyan kun pagmamaigotan niatong (1) magpatalubo nin diosnon na mga kualidad, (2) magdanay na daing digta asin dai nin kanawayan sa moral asin espirituwal, saka (3) magkaigwa nin tamang pagmansay sa mga pagbalo. Pag-olayan niato an mga puntong ini.
Magpatalubo nin Diosnon na mga Kualidad
5, 6. Anong mga kualidad an maninigo niatong pagmaigotan na mapatalubo, asin taano ta nangangaipo ini nin “odok na paghihingoa”?
5 Sa enot na kabtang kan ikaduwang surat ni Pedro, sinabi nia: “Paagi sa saindong pagtao, bilang simbag, kan gabos na odok na paghihingoa, idagdag sa saindong pagtubod an moral na karahayan, sa saindong moral na karahayan an kaaraman, sa saindong kaaraman an pagpupugol sa sadiri, sa saindong pagpupugol sa sadiri an pakatagal, sa saindong pakatagal an diosnon na debosyon, sa saindong diosnon na debosyon an kapadangatan na sa magturugang, sa saindong kapadangatan na sa magturugang an pagkamoot. Huli ta kun an mga bagay na ini nasa saindo asin nagsosopay, iingatan kamo kaiyan na dai magin inaktibo o daing bunga mapadapit sa tamang kaaraman dapit sa satong Kagurangnan na Jesu-Cristo.”—2 Ped. 1:5-8.
6 Totoo, kaipuhan an “odok na paghihingoa” tanganing magibo an mga aktibidad na nakakatabang sa sato na magpatalubo nin diosnon na mga kualidad. Halimbawa, kaipuhan an paghihingoa tanganing makaatender sa gabos na Kristianong pagtiripon, mabasa aroaldaw an Biblia, asin mapagdanay an marahay na programa nin personal na pag-adal. Asin tibaad kaipuhan an paghihingoa pati an marahay na pagplano tanganing magkaigwa nin regular, nakakaogma, asin makahulogan na banggi nin Pampamilyang Pagsamba. Alagad kun tuod na kita sa sarong marahay na rutina, nagigin mas madaling gibohon an mga aktibidad na iyan—nangorogna kun naheheling na niato an mga pakinabang.
7, 8. (a) Ano an sinabi nin nagkapira dapit sa banggi nin Pampamilyang Pagsamba? (b) Paano ka nakikinabang sa saindong pampamilyang pagsamba?
7 Dapit sa areglo na pampamilyang pagsamba, sarong tugang na babae an nagsurat: “Nakakatabang iyan sa samo na manodan an dakolon na tema.” An saro pa nagsabi: “Sa totoo lang, habo ko kaidtong mahale an Pag-adal sa Libro kan Kongregasyon. Iyan an paborito kong pagtiripon. Alagad ngonyan na igwa na kami nin banggi nin Pampamilyang Pagsamba, narerealisar ko na aram ni Jehova kun ano an kaipuhan mi asin kun noarin mi iyan kaipuhan.” Sarong payo nin pamilya an nagsabi: “Dakulang tabang nanggad sa samo an pampamilyang pagsamba. Nakakaogma nanggad an areglong ini na ibinagay sa espesipikong mga pangangaipo mi bilang mag-agom! Pareho ming naririsa na nag-ooswag kami sa pagpaheling kan bunga kan banal na espiritu, asin mas nagigin magayagaya kami sa samong ministeryo orog kisa kasuarin man.” An saro pang payo nin pamilya nagsabi: “An mga aki naggigibo kan sadiri nindang pagsiyasat asin dakol an nanonodan—saka nagugustohan ninda iyan. Huli sa areglong iyan, orog nanggad kaming nagin kompiado na aram ni Jehova an mga ikinakahadit mi asin sinisimbag nia an samong mga pamibi.” Arog man daw kaiyan an namamatean nindo sa marahayon na espirituwal na probisyon na ini?
8 Dai pagtogotan an bakong gayong importanteng mga bagay na makaolang sa pampamilyang pagsamba. Sarong mag-agom an nagsabi, “Kada Huebes nin banggi sa nakaaging apat na semana, may nangyayari sa samong pamilya na dikit pang makaolang sa pag-adal mi, alagad dai niamo tinogotan na makaolang iyan.” Siempre, may mga panahon na tibaad kaipuhan nindong liwaton an saindong iskedyul. Pero, magin determinado na dai kanselaron an saindong banggi nin Pampamilyang Pagsamba—dawa sarong semana!
9. Paano tinabangan ni Jehova si Jeremias, asin ano an manonodan niato sa saiyang halimbawa?
9 Si propeta Jeremias sarong marahay na halimbawa para sa sato. Kinaipuhan nia an espirituwal na tabang na itinao sa saiya ni Jehova asin pinahalagahan niang marhay iyan. Paagi sa tabang na iyan, nakapaghulit sia na may pakatagal sa mga tawong dai naghihimate. “An tataramon ni Jehova . . . nagin siring sa naglalaad na kalayo na nalalaom sa sakong mga tolang,” an sabi nia. (Jer. 20:8, 9) Nakatabang man iyan sa saiya na tagalan an masakit na mga panahon na suminagkod sa kalaglagan kan Jerusalem. Ngonyan, igwa kita kan kompletong nasusurat na Tataramon nin Dios. Kun maigot niatong pinag-aadalan iyan asin tinotogotan an kaisipan nin Dios na magin kaisipan niato, arog ni Jeremias, kita magayagayang makakatagal sa ministeryo, makakapagdanay na maimbod sa ibong nin mga pagbalo, asin makakapagdanay na malinig sa moral asin espirituwal.—Sant. 5:10.
Magdanay na “Daing Digta Asin Dai nin Kanawayan”
10, 11. Taano ta dapat niatong gibohon an bilog niatong makakaya na magdanay na “daing digta asin dai nin kanawayan,” saka ano an hinahagad kaiyan sa sato?
10 Bilang mga Kristiano, aram niato na nabubuhay na kita sa panahon kan katapusan. Kun siring, dai kita nagngangalas kun taano ta bangkag an kinaban sa mga bagay na ikinakauyam na gayo ni Jehova, arog baga nin kahanaban, kabikoan sa sekso, asin kadahasan. An estratehiya ni Satanas puedeng sumaryohon sa paaging ini: ‘Kun dai kayang patakoton an mga lingkod nin Dios, tibaad puede sindang raoton.’ (Kap. 2:13, 14) Huli kaini, dapat niatong isapuso an mamomoton na konseho ni Pedro: ‘Giboha an bilog nindong makakaya na sa katapustapusi manompongan nin Dios na kamo daing digta asin dai nin kanawayan patin nasa katoninongan.’—2 Ped. 3:14.
11 An pananaram na “giboha an bilog nindong makakaya” kaagid kan naenot na sadol ni Pedro na magtao nin “gabos na odok na paghihingoa.” Malinaw nanggad, aram ni Jehova—an saro na nagpasabong ki Pedro na sabihon iyan—na kaipuhan niatong maghingoa na magdanay na “daing digta asin dai nin kanawayan,” na dai naaatian kan ramog kan kinaban ni Satanas. Kaiba sa paghihingoa niato an pagprotehir sa satong puso na dai madaog nin salang mga pagmawot. (Basahon an Talinhaga 4:23; Santiago 1:14, 15.) Kaiba man dian an marigon na paninindogan tumang sa mga dai nakakaintindi kan satong Kristianong pamumuhay asin “padagos na nagtataram na may panglilibak manongod sa [sato].”—1 Ped. 4:4.
12. Anong pagsierto an yaon sa Lucas 11:13?
12 Huli sa pagkabakong sangkap niato, nasasakitan kitang gibohon an tama. (Roma 7:21-25) Kita makakalaom sana na magigin mapanggana kun madolok kita ki Jehova, na buka an palad na nagtatao nin banal na espiritu sa mga sinserong naghahagad sa saiya. (Luc. 11:13) An espiritu man na iyan nakakatabang sa sato na magpatalubo nin mga kualidad na inooyonan nin Dios asin nakakatabang sa sato na makaya bako sanang an mga sugot kundi pati an mga pagbalo sa buhay, na tibaad maggrabe pa mantang nagdadangadang an aldaw ni Jehova.
Togotan an mga Pagbalo na Pakosogon Kamo
13. Kun mapaatubang kita sa mga pagbalo, ano an makakatabang sa sato na magtagal?
13 Sagkod na nabubuhay kita sa daan na sistemang ini nin mga bagay, mapapaatubang kita sa manlaenlaen na pagbalo. Alagad, imbes na pangluyahan nin boot, taano ta dai nindo mansayon an mga pagbalo bilang oportunidad na patunayan an saindong pagkamoot sa Dios asin pakosogon an saindong pagtubod sa saiya asin sa Tataramon nia? Si disipulo Santiago nagsurat: “Ibilang nindong bilog na kagayagayahan, mga tugang, kun kamo napapaatubang sa manlaenlaen na pagbalo, sa pakaaram na ining nabalong kualidad kan saindong pagtubod nagbubunga nin pakatagal.” (Sant. 1:2-4) Girumdomon man na “si Jehova tataong magligtas sa mga tawong may diosnon na debosyon hale sa pagbalo.”—2 Ped. 2:9.
14. Paano an halimbawa ni Jose nakakaparigon kan saimong boot?
14 Isip-isipa an halimbawa kan aki ni Jacob, si Jose, na ipinabakal kan mismong mga tugang nia tanganing magin oripon. (Gen. 37:23-28; 42:21) Nawaran daw nin pagtubod si Jose huli sa karingisan na iyan? Naghinanakit daw sia sa Dios huli ta itinogot Nia na mangyari sa saiya an maraot na bagay na iyan? An Tataramon nin Dios malinaw na nagsisimbag na dai! Dugang pa, dai dian natapos an mga pagbalo ki Jose. Pag-abot nin panahon, sia putik na inakusaran na nagprobar na manglugos, dangan ibinilanggo sia. Pero, sa giraray marigon na pinagdanay nia an saiyang diosnon na debosyon. (Gen. 39:9-21) Tinogotan nia an mga pagbalo na pakosogon sia, asin huli kaini binendisyonan nanggad sia.
15. Ano an manonodan niato sa halimbawa ni Noemi?
15 Totoo, an mga pagbalo puedeng makapamondo o biyong makapaluya pa ngani kan satong boot. Tibaad kun minsan namamatean iyan kaidto ni Jose. Siertong namamatean man iyan nin iba pang maimbod na lingkod nin Dios. Isip-isipa si Noemi, na nagadanan nin agom asin duwang aki. “Dai nindo ako pag-apodon na Noemi,” an sabi nia. “Apodon nindo akong Mara [nangangahulogan na “Mapait”], huli ta tinawan ako nin dakulang kapaitan kan Makakamhan sa Gabos.” (Rut 1:20, 21, nota sa ibaba) An reaksion ni Noemi natural sana asin masasabotan. Pero, arog ni Jose, dai nawara an saiyang pagtubod ni nagluya an integridad nia. Huli kaiyan, binendisyonan ni Jehova an marahay na babaeng iyan. (Rut 4:13-17, 22) Dugang pa, sa maabot na daganon na Paraiso, hahaleon nia an gabos na danyos na kagigibohan ni Satanas asin kan saiyang maraot na kinaban. “An dating mga bagay dai na magigirumdoman, ni mapapasapuso man iyan.”—Isa. 65:17.
16. Ano an maninigo niatong magin saboot dapit sa pamimibi, asin taano?
16 Ano man na pagbalo an mapaatubang sa sato, yaon an pagkamoot nin Dios tanganing tabangan kita. (Basahon an Roma 8:35-39.) Minsan ngani dai mapondo si Satanas sa pagmamaigot na paluyahon an boot niato, dai sia magigin mapanggana kun magdadanay kitang “toltol an isip” asin “puka sa pagpamibi.” (1 Ped. 4:7) Si Jesus nagsabi: “Kun siring, magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na bagay na ini na nakatalagang mangyari, asin sa pagtindog sa atubangan kan Aki nin tawo.” (Luc. 21:36) Mangnohon na ginamit ni Jesus an tataramon na “nagngangayongayo,” na nangangahulogan nin odok nanggad sa pusong pamimibi. Sa pagsadol sa sato na magngayongayo, idinoon ni Jesus na panahon ini na seryosohon niato an satong kamugtakan sa atubangan nia asin kan saiyang Ama. Solamenteng an mga igwa nin inooyonan na kamugtakan an may paglaom na makaligtas sa aldaw ni Jehova.
Magdanay na Aktibo sa Paglilingkod ki Jehova
17. Kun depisil an saindong hinuhulitan na teritoryo, paano kamo makikinabang sa marahay na halimbawa kan mga propeta kan suanoy?
17 An pakikikabtang sa espirituwal na mga aktibidad nakakarepresko sa sato. Ipinapagirumdom kaini sa sato an mga tataramon ni Pedro: “Isipon kun dapat na magin anong klaseng tawo kamo sa banal na mga gawe asin gibo nin diosnon na debosyon!” (2 Ped. 3:11) Pangenot sa mga gibong iyan an pagbalangibog kan maogmang bareta. (Mat. 24:14) Totoo, sa nagkapirang teritoryo tibaad depisil an paghuhulit, posibleng huli sa pagkaindiperente o pagtumang o huling sibot-sibot an mga tawo sa saindang pangaroaldaw na mga ikinakahadit sa buhay. Napaatubang man dian an mga lingkod ni Jehova kan suanoy. Pero, nungka sindang suminuko kundi “paorootro” sindang nagbalik dara an mensahe hale sa Dios. (Basahon an 2 Cronica 36:15, 16; Jer. 7:24-26) Ano an nakatabang sa sainda na magtagal? An pagmansay ninda sa saindang asignasyon kapareho kan ki Jehova, bakong kan sa kinaban. Ibinilang man ninda na pinakadakulang onra an pagdara kan ngaran nin Dios.—Jer. 15:16.
18. Ano an epekto kan paghuhulit kan Kahadean sa pagbantog kan ngaran nin Dios sa ngapit?
18 May pribilehio man kita na ipahayag an ngaran asin katuyohan ni Jehova. Isip-isipa ini: Bilang direktang resulta kan satong paghuhulit, dai masasabi kan mga kaiwal nin Dios na mayo sindang aram kun papanimbagon na nia sinda durante kan saiyang dakulang aldaw. Sa katunayan, arog ni Faraon kan suanoy, maaaraman ninda na si Jehova an nakikipaglaban sa sainda. (Ex. 8:1, 20; 14:25) Kadungan kaiyan, tatawan ni Jehova nin onra an saiyang maimbod na mga lingkod paagi sa malinaw nanggad na paghayag na sinda talaga an mga representante nia.—Basahon an Ezequiel 2:5; 33:33.
19. Paano niato ikakapaheling na minamawot niatong gamiton sa tama an pagpapasensia ni Jehova?
19 Sa pagtatapos kan ikaduwang surat ni Pedro, sinabi nia sa saiyang mga kapagtubod: “Ibilang nindong kaligtasan an pagpapasensia kan satong Kagurangnan.” (2 Ped. 3:15) Iyo, padagos niatong gamiton sa tama an pagpapasensia ni Jehova. Paano? Paagi sa pagpatalubo nin mga kualidad na nakakapaogma sa saiya, pagdanay na “daing digta asin dai nin kanawayan,” pagkaigwa nin tamang saboot dapit sa mga pagbalo, asin pagdanay na sibot sa paglilingkod sa Kahadean. Sa paggibo kaiyan, nagkakaigwa kita nin oportunidad na magkamit kan daing katapusan na mga bendisyon na may koneksion sa ‘bagong kalangitan asin bagong daga.’—2 Ped. 3:13.
Nagigirumdoman daw Nindo?
• Paano kita makakapatalubo nin diosnon na mga kualidad?
• Paano kita makakapagdanay na “daing digta asin dai nin kanawayan”?
• Ano an manonodan niato dapit ki Jose asin Noemi?
• Taano ta sarong dakulang pribilehio an pakikikabtang sa paghuhulit?
[Mga Hapot Para sa Pag-adal]
[Ritrato sa pahina 9]
Ano an makakatabang sa saindo, mga agom na lalaki, na mapatalubo nindo asin kan saindong pamilya an diosnon na mga kualidad?
[Mga Ritrato sa pahina 10]
Ano an manonodan niato sa paagi nin pag-atubang ni Jose sa mga pagbalo?