Nagigirumdoman daw Nindo?

Napahalagahan daw nindo an pagbasa kan dai pa sana nahahaloy na mga isyu kan An Torrengbantayan asin The Watchtower? Bueno, helingon kun masisimbag nindo an minasunod na mga hapot:

• Ano an makakatabang sa saindo tanganing an saindong mga aki magdakula na responsable?

‘Magtao nin arogan’ sa saindong aki kun dapit sa pagigin responsable. (Juan 13:15) Magin rasonable sa mga inaasahan nindo; mantang nagdadakula sia, mas dakol an puede nindong asahan sa saiya kun dapit sa kalinigan, pagigin nasa oras, asin gibohon sa eskuelahan. Magtao nin espesipikong mga instruksion tanganing sanayon an saindong aki sa pag-asikaso nin mga paninimbagan.—5/1-E, pahina 19-20.

• Taano ta dai ni Jehova pinadusahan si Aaron sa paggibo kan bulawan na ogbon na baka?

Binalga talaga ni Aaron an ley nin Dios manongod sa idolatriya. (Ex. 20:3-5) Pero, si Moises nagngayongayo sa Dios para ki Aaron, asin may “dakulang puersa” an saiyang pagngayongayo. (Sant. 5:16) Si Aaron igwa nin rekord nin kaimbodan. Asin dawa ngani napirit si Aaron kan banwaan na gibohon an ogbon na baka, kan huri ipinaheling nia na an saiyang puso mayo sa sainda, huling uminiba sia sa mga aki ni Levi sa pagkampi ki Jehova. (Ex. 32:25-29)—5/15, pahina 21.

• Saen an Ofir, na nasambitan sa Biblia bilang gikanan nin bulawan?

Tanganing kumua nin bulawan hale sa Ofir, si Salomon nagpagibo nin mga barko sa Ezion-geber. (1 Ha. 9:26-28) An duongan na iyan nasa itaas na parte kan Golpo nin Aqaba harani sa namumugtakan kan Elat asin Aqaba ngonyan, sa Dagat na Pula. Sa siring, an Ofir posibleng nasa Arabia harani sa Dagat na Pula o sa mga baybayon nin Aprika o India.—6/1-E, pahina 15.

• Sa ano nanonongod an “balsamo sa Gilead”? (Jer. 8:22)

An lanang balsamo mahamot asin mapulot na lana na makukua sa manlaenlaen na tinanom sa Gilead, sa sirangan kan Salog nin Jordan, asin sa iba pang lugar. Huling nakakabolong iyan, ilinalahid iyan sa mga lugad. An makaheherak na kamugtakan kan Israel maninigo kutanang nagpahiro sa sainda na maghanap nin bolong, alagad dai ninda ginibo iyan. (Jer. 8:9)—6/1-E, pahina 21-22.

• Ano an puedeng makatabang sa sarong Kristiano na makayanan an pagsambay nin agom?

Kun an inosenteng agom naghingoang mamuhay kaoyon kan mga prinsipyo sa Biblia, dai sia kaipuhan na makamate na may sala sia sa pagtraydor kan parasambay. Aram nin Dios na kaipuhan mo nin karangahan asin pagparigon sa boot. Puede siang magtao nin karangahan paagi sa mga kapwa Kristiano.—6/15, pahina 30-31.

• Ano an puede nindong gibohon tanganing tabangan an saro na may helang?

Magin marahay na parahinanyog. (Ecl. 3:1, 7) Magpaheling nin pakikidamay asin konsiderasyon. (Roma 12:15) Magin nakakapakosog asin matinabang. (Col. 4:6; 1 Juan 3:18) Magdanay na dayupot. (Tal. 17:17)—Hul.-Set., pahina 10-13.

• Paano niato naaraman na mayo nin kapinonan an Dios?

Ipinarisa ini ni Moises paagi sa pamibi. (Sal. 90:2) Huli kaiyan, igwa si Jehova kan daing kaagid na titulong “Hadeng daing sagkod.” (1 Tim. 1:17)—Hul.-Set., pahina 28.

• Paano nindo matatabangan an saindong mga aki na magin hilig an pagbasa?

An mamomoton na kamugtakan asin halimbawa nin magurang nakakatabang na ikatokdo an pagkahilig sa pagbasa. Siring man, patuodon sinda sa mga libro. Magbasa nin makosog. Dagkahon sinda na magpartisipar, asin pag-olayan an binasa nindo. Dagkahon an mga aki nindo na basahan kamo asin na maghapot.—7/15, pahina 26.

• Taano ta dai si Jesus naghidali na magduman sa saiyang may helang na katood na si Lazaro tanganing paomayan ini?

Kan mag-abot si Jesus, apat nang aldaw na gadan si Lazaro. Huli sa paghalat ni Jesus, mas marahay na patotoo an ikinatao nia dapit sa saiyang Ama. Sa siring, dakol an nagtubod sa saiya. (Juan 11:45)—8/1-E, pahina 14-15.

• Ano an “haralangkaw na lugar”?

Sa kadaklan na pagkasambit, nanonongod iyan sa mga alitoktok nin bulod o iba pang lugar nin falsong pagsamba. Kun beses itinotogdok dian an mga altar, sagradong mga harigi o palo, asin iba pang relihiosong mga gamit tanganing isagibo an pagsamba na kinokondenar nin Dios. (Bil. 33:52)—8/1-E, pahina 23.