‘An mga Bagay na Ginibo Nia Kaibanan Nia’

NATAPOS ni Theodore Jaracz, miembro kan Namamahalang Grupo kan Mga Saksi ni Jehova, an saiyang daganon na buhay kan Mierkoles na aga, Hunyo 9, 2010. Sia 84 anyos asin nabayaan nia si Melita, an saiyang agom sa laog nin 53 na taon. An iba pang nabayaan nia iyo an saiyang tugang na babae saka sarong sobrino asin duwang sobrina.

Si Tugang na Jaracz namundag kan Setyembre 28, 1925 sa Pike County, Kentucky, E.U.A., asin sinimbolisaran nia an saiyang pagdusay ki Jehova sa edad na 15, kan Agosto 10, 1941. Pakalihis nin duwang taon, sa edad na 17, sia nagregular payunir, na iyo an kapinonan nin halawig na karera na haros 67 taon sa bilog na panahon na paglilingkod.

Kan 1946, sa edad na 20, nag-adal si Tugang na Jaracz sa ikapitong klase kan Paadalan sa Biblia kan Watchtower sa Gilead. Pagkagradwar, sia idinestino bilang nagbibiaheng paraataman sa Cleveland, Ohio, sa Estados Unidos. Kan 1951, inasignaran sia bilang lingkod kan sangang opisina sa Australia. An 1983 Yearbook of Jehovah’s Witnesses nagsabi na “dinagka niang marhay an mga tugang sa bilog na nasyon paagi sa saiyang kaigotan sa teokratikong pagkaareglado asin marahay na pangengenot sa langtad.”

Pakabalik ni Tugang na Jaracz sa Estados Unidos, pinakasalan nia si Melita Lasko kan Disyembre 10, 1956. Pinonan ninda an saindang buhay bilang mag-agom paagi sa gibohon na nagbibiahe, na maigot na pinaglilingkodan an mga sirkito asin distrito na nasasakopan an sarong dakulang parte kan Estados Unidos. Kan huring kabtang kan 1974, inimbitaran si Tugang na Jaracz na magin miembro kan Namamahalang Grupo kan Mga Saksi ni Jehova.

Si Tugang na Jaracz haloy na magigirumdoman bilang dusay asin maimbod na lingkod ni Jehova, na bilog na pusong nakakonsentrar sa teokratikong mga aktibidad. Sia mamomoton asin mapagmakolog na agom saka espirituwal na tawo na ineenot an kapakanan nin iba kisa sa saiyang sadiri. (1 Cor. 13:4, 5) Ipinaheling nia an sinserong interes na ini sa iba paagi sa saiyang makosogon na pagmawot na trataron an gabos nin may katanosan asin pagkaherak. Dugang pa, an saiyang marigon na pagkamoot asin pagmakolog sa mga tawo naheling man sa kaigotan nia sa ministeryo sa langtad.

Minsan ngani namomondo nanggad kita sa pagkagadan nin sarong mahigos asin namomotan na miembro kan pamilyang Bethel saka kan pambilog na kinaban na kasararoan nin magturugang, ipinaggagayagaya niato an maimbod na paglilingkod ki Jehova ni Tugang na Jaracz sa dakol na dekada. Makakapagtiwala kita na sia ‘nagmaimbod dawa sagkod sa kagadanan asin nag-ako kan korona nin buhay.’ (Kap. 2:10) Nakakasierto man kita na ‘an mga bagay na ginibo nia kaibanan nia.’—Kap. 14:13.