“Ngonyan an Espesyalmenteng Panahon nin Pag-ako”

“Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.”—2 COR. 6:2.

1. Taano ta kaipuhan niatong maaraman kun ano an dapat gibohon sa sarong partikular na panahon?

“PARA sa gabos na bagay igwa nin itinalaan na panahon, panahon para sa lambang gibo sa sirong kan kalangitan.” (Ecl. 3:1) Si Salomon nagsurat manongod sa kahalagahan nin pakaaram kan pinakamarahay na panahon para sa ano man na kapakipakinabang na gibohon—iyan man sa pag-oma, pagbiahe, pagnegosyo, o pakikikomunikar sa iba. Minsan siring, kaipuhan man niatong maaraman an pinakaimportanteng bagay na dapat tang gibohon sa sarong partikular na panahon. Sa ibang pagtaram, dapat aram niato kun ano an mga prioridad niato.

2. Paano niato naaraman na kan si Jesus naghuhulit, aram niang marhay an panahon na kinabubuhayan nia?

² Kan si Jesus nasa daga, aram niang marhay an panahon na kinabubuhayan nia asin an kaipuhan niang gibohon. Huling malinaw sa isip kun ano an mga prioridad nia, aram nia na panahon na tanganing maotob an dakol na Mesiyanikong hula na haloy nang hinahalat. (1 Ped. 1:11; Kap. 19:10) May dapat siang gibohon tanganing sia mamidbid bilang an ipinanugang Mesiyas. Kaipuhan niang lubos na magpatotoo sa katotoohan kan Kahadean asin tiponon an mga magigin kaiba niang paramana kan Kahadean. Asin kaipuhan niang establisaron an pundasyon kan  Kristianong kongregasyon, na iyo an mahulit asin magibo nin mga disipulo sagkod sa mga kasagkodan kan daga.—Mar. 1:15.

3. Ano an nagin epekto ki Jesus kan pakaaram nia sa panahon?

³ An pakaaram na iyan nakapahirong marhay ki Jesus na magin maigot sa paggibo kan kabotan kan saiyang Ama. Sinabihan nia an mga disipulo: “Totoo nanggad na kadakol kan anihon, alagad kakadikit kan paraani. Kun siring, makimaherak kamo sa Kagurangnan kan anihon na magsobol nin mga paraani sa saiyang anihon.” (Luc. 10:2; Mal. 4:5, 6) Si Jesus nagpili nguna nin 12 dangan 70 sa mga disipulo nia, tinawan sinda nin espesipikong mga instruksion, asin isinugo sinda na ihulit an nakakapukaw sa boot na mensahe: “An kahadean kan kalangitan harani na.” Kun dapit ki Jesus mismo, mababasa niato: “Kan matapos [sia] sa pagtao nin instruksion sa saiyang doseng disipulo, nagpoon na sia duman na magtokdo asin maghulit sa saindang mga siudad.”—Mat. 10:5-7; 11:1; Luc. 10:1.

4. Sa anong paagi nagin paraarog ki Jesu-Cristo si Pablo?

⁴ Para sa gabos na parasunod ni Jesus, sia an sangkap na arogan sa kaigotan asin debosyon. Ini an idinoon ni apostol Pablo kan sadolon nia an mga kapagtubod: “Magin kamong mga paraarog sa sako, kun paanong ako paraarog ki Cristo.” (1 Cor. 11:1) Sa anong paagi nagin paraarog ki Cristo si Pablo? Sa pangenot, paagi sa paggibo kan pinakamakakaya na ihulit an maogmang bareta. Sa mga surat ni Pablo sa mga kongregasyon, mababasa niato an mga ekspresyon na arog kan “dai kamo maghinugak sa saindong gibohon,” “magpaoripon ki Jehova,” “danay na dakol an ginigibo sa gibohon kan Kagurangnan,” asin “ano man an ginigibo nindo, gibohon iyan nin bilog na kalag na para ki Jehova.” (Roma 12:11; 1 Cor. 15:58; Col. 3:23) Nungkang nalingawan ni Pablo an nangyari kan sia nasa dalan pa-Damasco asin an sinabi ni Jesus na seguradong ipinaabot sa saiya ni disipulo Ananias: “An tawong ini sarong piniling lalagan para sa sako tanganing magdara kan sakong ngaran sa mga nasyon saka sa mga hade asin mga aki ni Israel.”—Gibo 9:15; Roma 1:1, 5; Gal. 1:16.

“An Espesyalmenteng Panahon nin Pag-ako”

5. Ano an nagpahiro ki Pablo na maigot na gibohon an saiyang ministeryo?

⁵ Kun babasahon niato an libro nin Gibo, maririsa nanggad niato an kosog nin boot asin kaigotan na ipinaheling ni Pablo mantang ginigibo an saiyang ministeryo. (Gibo 13:9, 10; 17:16, 17; 18:5) Aram ni Pablo an kahalagahan kan panahon na kinabubuhayan nia. Sia nagsabi: “Uya! Ngonyan an espesyalmenteng panahon nin pag-ako. Uya! Ngonyan an aldaw nin kaligtasan.” (2 Cor. 6:2) Kaidtong 537 B.C.E., paborableng panahon para sa mga nadistiero sa Babilonya na magbalik sa saindang dagang tinuboan. (Isa. 49:8, 9) Alagad ano an pinanonongdan digdi ni Pablo? An konteksto makakatabang sa sato na maaraman an nasa isip nia.

6, 7. Anong dakulang onra an itinatao sa linahidan na mga Kristiano ngonyan, asin sairisay an nakikipagtabangan sa sainda?

⁶ Sa enot na kabtang kan surat nia, sinambit ni Pablo an dakulang onra na itinao sa saiya asin sa mga kapwa linahidan na Kristiano. (Basahon an 2 Corinto 5:18-20.) Ipinaliwanag nia na sinda inapod nin Dios para sa espesipikong katuyohan—an paggibo kan “ministeryo nin pakipag-ulian,” na nakikimaherak sa mga tawo na ‘makipag-ulian sa Dios.’ Nangahulogan iyan nin pakipagkatood o pakipagkatoninongan giraray sa Dios.

⁷ Poon kan rebelyon sa Eden, an bilog na katawohan nagin siblag asin naparayo an boot ki Jehova. (Roma 3:10, 23) Huli kaiyan, an katawohan  sa pangkagabsan namugtak sa espirituwal na kadikloman, na nagresulta sa kasakitan asin kagadanan. “Aram niato na an gabos na linalang padagos na nag-aagrangay nin iriba asin nakokolgan nin iriba sagkod ngonyan,” an isinurat ni Pablo. (Roma 8:22) Alagad, an Dios naggibo nin lakdang na magsadol, an totoo ‘makimaherak,’ sa mga tawo na bumalik o makipag-ulian sa saiya. Iyan an ministeryo na ipinagkatiwala ki Pablo asin sa mga kapwa nia linahidan kaidto. An “panahon nin pag-ako” na iyan puedeng magin “aldaw nin kaligtasan” para sa mga nagtutubod ki Jesus. An gabos na linahidan asin an saindang kairiba—an “ibang mga karnero” na nakikipagtabangan sa sainda—padagos na nagdadagka sa mga tawo na makinabang sa “panahon nin pag-ako.”—Juan 10:16.

8. Taano ta pambihira an pakipag-ulian?

⁸ An mas pambihira pa sa pakipag-ulian iyo na dawa ngani sarong lado sana an dahelan kan pagkaraot kan relasyon—huli sa pagrebelde kaidto nin tawo sa Eden—an Dios mismo an naggibo nin paagi tanganing pakarhayon iyan. (1 Juan 4:10, 19) Ano an ginibo nia? Si Pablo nagsimbag: “An Dios paagi ki Cristo nagpapangyari na an sarong kinaban makipag-ulian sa saiya, na dai sinisingil sa sainda an saindang mga kalapasan, asin ipinagkatiwala nia sa samo an tataramon kan pakipag-ulian.”—2 Cor. 5:19; Isa. 55:6.

9. Ano an ginibo ni Pablo tanganing ipaheling an pagpahalaga sa pagkaherak nin Dios?

⁹ Paagi sa pagtao kan atang na pantubos, pinagin posible ni Jehova na an mga nagtutubod mapatawad sa saindang mga kalapasan asin makipagkatoninongan o magin katood giraray nia. Apuera kaini, isinugo nia an saiyang mga representante tanganing sadolon an mga tawo sa gabos na lugar na makipagkatoninongan sa saiya sagkod na puede pa. (Basahon an 1 Timoteo 2:3-6.) Huling aram ni Pablo an kabotan nin Dios asin an panahon na kinabubuhayan nia, ginibo nia an saiyang pinakamakakaya sa “ministeryo nin pakipag-ulian.” An kabotan ni Jehova dai nagbabago. Sia nakikipag-ulian pa man giraray sagkod ngonyan. Aplikado pa an sinabi ni Pablo na “ngonyan an espesyalmenteng panahon nin pag-ako” asin “ngonyan an aldaw nin kaligtasan.” Maheherakon asin mapagmalasakit nanggad na Dios si Jehova!—Ex. 34:6, 7.

Dai “Paglipasan an Katuyohan Kaiyan”

10. Ano an kahulogan kan “aldaw nin kaligtasan” para sa mga linahidan kaidto asin ngonyan?

¹⁰ An mga enot na nakinabang sa kapahayagan na ini nin dai na kutana maninigong kabootan iyo an mga “kasaro ni Cristo.” (2 Cor. 5:17, 18) Para sa sainda, “an aldaw nin kaligtasan” nagpoon kan Pentecostes 33 C.E. Poon kaidto, ipinagkatiwala sa sainda an gibohon na pagbalangibog kan “tataramon kan pakipag-ulian.” Ngonyan, ginigibo pa kan natatada sa linahidan na mga Kristiano an “ministeryo nin pakipag-ulian.” Aram ninda na an apat na anghel na naheling ni apostol Juan sa sarong makahulang bisyon “pinupugolan an apat na doros kan daga, tanganing mayo nin doros na maghuyop sa daga.” Huli kaini, nagpapadagos pa man giraray “an aldaw nin kaligtasan” asin “an espesyalmenteng panahon nin pag-ako.” (Kap. 7:1-3) Sa dahelan na ini, poon kan enot na kabtang kan ika-20 siglo, maigot na inootob kan linahidan na natatada an “ministeryo nin pakipag-ulian” sagkod sa kaporoporohi kan daga.

11, 12. Paano ipinaheling kan mga linahidan kan enot na mga taon kan ika-20 siglo an pakaaram ninda sa panahon? (Helingon an retrato sa pahina 15.)

¹¹ Halimbawa, arog kan sinabi sa librong Jehovah’s Witnesses—Proclaimers of God’s Kingdom, kan madali nang magpoon an ika-20 siglo, “si C. T. Russell asin an saiyang kairiba marigon na naniniwala na sinda nasa panahon nin pag-ani asin na kaipuhan madangog nin mga tawo an nakakapatalingkas na katotoohan.” Ano an ginibo ninda manongod digdi? Huling aram ninda na sinda nasa panahon nin pag-ani, na sarong “espesyalmenteng panahon nin pag-ako,” an mga tugang na ini dai sana nakontento sa pag-imbitar sa mga tawo na mag-atender sa seremonya sa relihion. Iyan mismo an haloy nang ginigibo kan klero nin Kakristianohan. Imbes, an linahidan na mga Kristianong iyan naggibo nin ibang praktikal na paagi na ikapalakop an maogmang bareta. Kabilang dian an madonong na paggamit ninda kan pinakabagong teknolohiya tanganing paoswagon an saindang gibohon.

 ¹² Tanganing ikapalakop an maogmang bareta kan Kahadean, an sadit na grupong iyan nin maigot na mga ministro naggamit nin mga tract, pulyeto, magasin, asin mga libro. Nag-andam man sinda nin mga sermon asin artikulo na ipinaimprenta sa rinibong diaryo. Nagkaigwa man sinda nin sono sa Kasuratan na mga programa sa nasyonal asin internasyonal na istasyon nin radio. Nagprodusir asin naggamit sinda nin mga pelikula na may kasabay na nakarekord na tanog, bago pa ngani makagibo kaiyan an industriya nin pelikula. Ano an nagin resulta kan siring na nagdadanay na kaigotan? Ngonyan, igwa nin labing pitong milyon na naghimate asin nakikikabtang sa pagbalangibog kan mensahe na: “Makipag-ulian kamo sa Dios.” Tunay nanggad, an enot na mga lingkod na idto ni Jehova marahay na halimbawa nin kaigotan sa ibong kan limitadong kamugtakan.

13. Anong katuyohan nin Dios an maninigo tang isapuso?

¹³ Totoo pa man giraray an sinabi ni Pablo na “ngonyan an espesyalmenteng panahon nin pag-ako.” Kita na nakakaeksperyensia kan dai na kutana maninigong kabootan ni Jehova nagpapasalamat na kita tinawan nin oportunidad na dangogon asin akoon an mensahe nin pakipag-ulian. Imbes na magin kampante, isinasapuso niato an sunod na sinabi ni Pablo: “Nakikiolay man kami sa saindo na dai nindo pag-akoon an dai na kutana maninigong kabootan nin Dios asin paglipasan an katuyohan kaiyan.” (2 Cor. 6:1) An katuyohan kan dai na kutana maninigong kabootan nin Dios iyo na ‘an sarong kinaban ipakipag-ulian sa saiya’ paagi ki Cristo.—2 Cor. 5:19.

14. Ano an positibong nangyayari sa dakol na kadagaan?

¹⁴ An kadaklan sa katawohan, na binuta ni Satanas, siblag pa man giraray sa Dios asin mayong aram sa katuyohan kan dai na kutana maninigong kabootan nin Dios. (2 Cor. 4:3, 4; 1 Juan 5:19) Minsan siring, huli sa naggagrabeng situwasyon sa kinaban, dakol an naghimate kan ipaliwanag sa sainda na an pagigin siblag sa Dios an dahelan kan karatan asin kasakitan nin tawo. Dawa sa kadagaan na an kadaklan bakong interesado sa satong paghuhulit, dakol an nag-aako na ngonyan kan maogmang bareta asin naggigibo nin lakdang na makipag-ulian sa Dios. Kun siring, nasasabotan daw niato na panahon na ini tanganing magin mas maigot pa ngani kita sa pagbalangibog kan pakiolay na: ‘Makipag-ulian sa Dios’?

15. Imbes na maghulit nin mensahe tangani sanang magin marahay an pagmate nin mga tawo sa gabos na lugar, ano an gusto niatong maaraman ninda?

¹⁵ An satong gibohon bako sanang sabihon sa mga tawo na kun sinda madolok sa Dios, tatabangan nia sinda sa gabos nindang problema asin magigin mas marahay an pagmate ninda. An dakol iyan sana an hinahanap kun sinda nagsisimba, asin gustong-gusto kan mga relihion na panigoan an pagmawot na ini. (2 Tim. 4:3, 4) Bako iyan an katuyohan kan ministeryo niato. An maogmang bareta na ihinuhulit niato iyo na si Jehova, huli sa pagkamoot, andam na magpatawad nin mga kalapasan paagi ki Cristo. Sa siring, an mga indibiduwal puedeng makatalingkas sa pagigin siblag sa Dios asin makipag-ulian sa saiya. (Roma 5:10; 8:32) Minsan siring, madali nang matapos “an espesyalmenteng panahon nin pag-ako.”

“Magin Malaad sa Espiritu”

16. Ano an nakatabang ki Pablo na magpaheling nin kosog nin boot asin kaigotan?

¹⁶ Kun siring, paano niato mapapatalubo asin mapagdadanay an satong kaigotan para sa tunay na pagsamba? An nagkapira puedeng natural nang masusupgon o daing girong asin nasasakitan na ipahayag an nasa boot o magin makikatood.  Minsan siring, marahay na girumdomon na an kaigotan bako sanang basta pagpaheling nin emosyon o kaogmahan; ni nakadepende man iyan sa personalidad nin saro. Sinabi ni Pablo an paagi kan sadolon nia an mga kapwa Kristiano: “Magin malaad sa espiritu.” (Roma 12:11) Dakula an nagin papel kan espiritu ni Jehova sa kosog nin boot asin pakatagal kan apostol sa paghuhulit. Sa laog nin labing 30 taon, poon kan si Pablo apodon ni Jesus sagkod kan ultimong pagkabilanggo asin pagkagadan bilang martir sa Roma, dai nagluya an kaigotan nia. Sia pirmeng naglaom sa Dios, na paagi sa espiritu tinawan si Pablo nin kosog na kaipuhan nia. “Igwa ako kan kosog para sa gabos na bagay huli sa saiya na nagtatao nin puersa sa sako,” an sabi nia. (Fil. 4:13) Makikinabang nanggad kita paagi sa pakanood sa halimbawa nia!

17. Paano kita puedeng “magin malaad sa espiritu”?

¹⁷ An tataramon na trinadusir na “malaad” sa literal nangangahulogan na “nagkakalakaga.” (Kingdom Interlinear) Tanganing mapagdanay na nagkakalakaga an tubig sa takuri, kaipuhan niato an dagos-dagos na suplay nin init. Kaagid kaiyan, tanganing “magin malaad sa espiritu,” kaipuhan niato an dagos-dagos na bolos kan espiritu nin Dios. Tanganing makamtan iyan, gamiton niato an gabos na probisyon na itinatao ni Jehova sa pagpakosog sa sato sa espirituwal. Nangangahulogan iyan na kaipuhan tang seryosohon an pampamilya asin pangkongregasyon na pagsamba—pagigin regular sa personal asin pampamilyang pag-adal, pamimibi, asin pakikipagtipon kaiba kan mga kapwa Kristiano. Makakatabang iyan sa sato na magkaigwa nin “kalayo,” sabi ngani, tanganing magdanay na “nagkakalakaga” o “malaad sa espiritu.”—Basahon an Gibo 4:20; 18:25.

18. Bilang nagdusay na mga Kristiano, sa anong katuyohan maninigo kitang magkonsentrar?

¹⁸ An nagdusay na tawo lubos na nakakonsentrar sa sarong katuyohan asin dai tolos nadidisturbo o nadedesganar sa paghihingoang aboton iyan. Bilang nagdusay na mga Kristiano, an katuyohan niato iyo na gibohon an ano man na gusto ni Jehova na gibohon niato, arog nanggad ki Jesus. (Heb. 10:7) Ngonyan, an kabotan ni Jehova iyo na makipag-ulian sa saiya an pinakadakol na mapupuede. Kun siring, magin maigot kita—bilang pag-arog ki Jesus asin Pablo—sa pinakamahalaga, iyo apuradong gibohon na ini na dapat matapos ngonyan.

Nagigirumdoman daw Nindo?

• Anong ministeryo an ipinagkatiwala ki Pablo asin sa iba pang linahidan na mga Kristiano?

• Paano inaprobetsaran kan linahidan na natatada “an espesyalmenteng panahon nin pag-ako”?

• Paano puedeng “magin malaad sa espiritu” an Kristianong mga ministro?

[Mga Hapot Para sa Pag-adal]

[Ritrato sa pahina 12]

Nungkang nalingawan ni Pablo an nangyari kan sia nasa dalan pa-Damasco