Magkonsentrar sa mga Ginibo ni Jehova Para sa Saindo

DAI nahaloy pagkabuhaya liwat ki Jesus, duwa sa mga disipulo nia an naglalakaw hale sa Jerusalem pa-Emaus. “Mantang sinda nag-oolay asin nagdidiskusyon,” an pagkasaysay sa Ebanghelyo ni Lucas, “nagrani mismo si Jesus asin nagpoon na maglakaw kaiba ninda; alagad dai sia namimidbid kan saindang mga mata.” Dangan, sinabihan sinda ni Jesus: “‘Ano ining mga bagay na pinagdidiskusyonan nindo mantang kamo naglalakaw?’ Asin uminontok sinda na mamondo an mga lalawgon.” Taano ta mamondo sinda? Iniisip kan mga disipulo na sa panahon na idto ililigtas ni Jesus an Israel sa pagdominar nin mga Hentil, alagad dai iyan nangyari. Imbes, ginadan si Jesus. Huli kaini, mamondo sinda.—Luc. 24:15-21; Gibo 1:6.

Pinonan ni Jesus na mangatanosan sa mga disipulo. “Magpoon ki Moises asin sa gabos na Mga Propeta ininterpretar nia sa sainda an mga bagay manongod sa saiya sa bilog na Kasuratan.” Iyo, may dakol na mahalaga asin nakakapakosog sa pagtubod na pangyayari durante kan ministeryo ni Jesus! Mantang nagdadangog an mga disipulo sa paliwanag ni Jesus, an saindang kamondoan naribayan nin kagayagayahan. Paghaloyhaloy kan bangging idto, sinabi ninda: “Bakong naglaad an satong puso mantang nagtataram sia sa sato sa dalan, mantang lubos niang binubuksan sa sato an Kasuratan?” (Luc. 24:27, 32) Ano an manonodan niato sa reaksion kan mga disipulo ni Jesus?

Paano Nakakaapektar sa Sato an Dai Naotob na mga Inaasahan?

Namondo an duwang disipulo na pa-Emaus huling dai nangyari an mga inaasahan ninda. Namatean ninda an ilinaladawan sa Talinhaga 13:12: “An inaasahan na naaatraso nagpapasakit sa puso.” Siring man, an nagkapira sa sato na dakol na dekada nang maimbod na naglilingkod ki Jehova nag-isip kaidto na pag-abot kan panahon na ini, an “dakulang kahorasaan” nag-abot na asin nangyari na. (Mat. 24:21; Kap. 7:14) Nasasabotan niato na sa ngonyan, an siring na dai naotob na inaasahan puedeng magpamondo sa sato.

Pero, girumdoma na an duwang disipulong idto nagkaigwa giraray kan saindang kagayagayahan pagkatapos na tabangan sinda ni Jesus na magkonsentrar sa kaotoban kan mga hula na nangyari na—dawa kan panahon mismo ninda. Sa kaparehong paagi, mapagdadanay man niato  an satong panglaog na kagayagayahan asin makakaya an pagkadesganar. An eksperyensiadong magurang sa kongregasyon na si Michael nagsabi: “Dai magkonsentrar sa mga dai pa ginigibo ni Jehova. Imbes, magkonsentrar sa mga ginibo na nia.” Marahay na sadol nanggad!

Kun Ano an mga Ginibo Na ni Jehova

Isip-isipa an nagkapira sa pambihirang mga ginibo na ni Jehova. Sinabi ni Jesus: “An minatubod sa sako, an saro man na iyan magibo kan mga gibo na ginigibo ko; asin magibo sia nin mga gibo na orog pa kaini.” (Juan 14:12) Ngonyan, ginigibo kan mga lingkod nin Dios an pinakamahalagang gibohon nin mga Kristiano kasuarin man. Labing pitong milyon an nag-aasa na makakaligtas sa dakulang kahorasaan. Imahinara, dai pa noarin man nagkaigwa nin arog kaiyan kadakol na maimbod na lingkod ni Jehova na aktibo sa dakolon na nasyon sa bilog na daga! Pinangyari ni Jehova na magkatotoo an makahulang sinabi ni Jesus manongod sa “mga gibo na orog pa kaini.”

Ano pa an mga ginibo na ni Jehova para sa sato? Pinagin posible nia na an mga sadiosan an puso makaluwas sa maraot na kinaban, sa piguratibong paagi, asin makalaog sa espirituwal na paraiso na ginibo nia. (2 Cor. 12:1-4) Magtao nin panahon na horophoropon an nagkapira sa mga itinatao sa sato kan paraisong iyan. Halimbawa, magheling sa libreriya mo o kan Kingdom Hall. Magheling sa Watch Tower Publications Index o sa Watchtower Library. Magdangog nin nakarekord na drama sa Biblia. Girumdomon an saindong mga nadangog asin naheling sa nakaagi pa sanang kombension. Isip-isipa man an manongod sa nakakapakosog na pakikiibaiba niato sa satong Kristianong mga tugang. Nagin buka nanggad an palad ni Jehova sa pagtao sa sato nin abundang espirituwal na pagkakan asin mamomoton na kasararoan nin magturugang—espirituwal na paraiso nanggad!

An salmistang si David nagsabi: “Dakol na bagay an saimo mismong ginibo, O Jehova na sakong Dios, pati na an saimong makangangalas na mga gibo asin an saimong mga paghorophorop sa samo.” (Sal. 40:5) Iyo, paagi sa pagkonsentrar sa makangangalas na mga ginibo na ni Jehova para sa sato asin sa paghorophorop sa mamomoton na paggirumdom nia sa sato, magkakaigwa kita nin bagong kosog tanganing maimbod na magtagal sa satong bilog na pusong paglilingkod sa langitnon na Ama niato, si Jehova.—Mat. 24:13.

[Ritrato sa pahina 31]

Tinabangan ni Jesus an mga disipulo nia na magkonsentrar sa mga ginibo na ni Jehova para sa sainda

[Mga Ritrato sa pahina 32]

Girumdomon an saindong mga nadangog asin naheling sa nakaagi pa sanang kombension